ຜົນປໂຍດຈາກນຶ່ງແລວ ນຶ່ງເສັ້ນທາງ: ປະຊາຊົນ

ໄມຊຸລີ
2019-04-30
ອີແມວລ໌
ຄໍາເຫັນ
Share
ພິມ
ເຈົ້າໜ້າທີ່ທາງການ ຂອງ ສປຈີນ ຖ່າຍຮູບຮ່ວມກັນ ທີ່ໜ່ວຍຖແລງຂ່າວ ໂຄງການນຶ່ງແລວນຶ່ງເສັ້ນທາງ ທີ່ ກຸງປັກກິ່ງ ໃນວັນທີ 27 ເມສາ 2019
ເຈົ້າໜ້າທີ່ທາງການ ຂອງ ສປຈີນ ຖ່າຍຮູບຮ່ວມກັນ ທີ່ໜ່ວຍຖແລງຂ່າວ ໂຄງການນຶ່ງແລວນຶ່ງເສັ້ນທາງ ທີ່ ກຸງປັກກິ່ງ ໃນວັນທີ 27 ເມສາ 2019
AFP

ຊາວລາວທ່ານນຶ່ງ ໄດ້ສະແດງຄວາມຄິດເຫັນວ່າ ປະຊາຊົນລາວ ຈະໄດ້ຮັບຜົນປໂຍດໜ້ອຍ ຈາກໂຄງການ ນຶ່ງແລວນຶ່ງເສັ້ນທາງ ຫຼື (Belt & Road) ຊຶ່ງຈະເຊື່ອມຕໍ່ໂຄງການ ທາງຣົດໄຟ ລາວ-ຈີນ ແລະ ໄທ, ໂຄງການນີ້ ຈ້າງຄົນງານລາວ ພຽງແຕ່ 4 ພັນປາຍຄົນ ເທົ່ານັ້ນ ໜ້ອຍກວ່າ ຄົນງານຈີນ ແລະ ເປັນຄົນງານ ເຮັດວຽກແບບລູກຈ້າງຣາຍມື້  ບໍ່ມີສວັດດີການ ຄືຄົນງານຈີນ, ດັ່ງທ່ານກ່າວ ຕໍ່ວິທຍຸ ເອເຊັຽ ເສຣີ ໃນວັນທີ 30 ເມສາ ນີ້ວ່າ:

“ຜົນປໂຍດນີ້ ຈີນ ເປັນຜູ້ໄດ້ ຄົນລາວນີ້ ກໍໄດ້ສ່ວນໜ້ອຍ ຄືປັດຈຸບັນນີ້ ຄົນງານຫຼືວ່າ ກັມມະກອນ ທີ່ອອກແຮງງານປະມານ 20 ພັນຄົນ ແຕ່ວ່າ ຄົນລາວເຮົາໄປຮ່ວມຢູ່ໃນນັ້ນ ກໍບໍ່ຮອດ 5 ພັນຄົນ ຊໍ້າເນາະອັນນີ້ ຕາມຣັຖບານຣາຍງານໄດ໋ ຄົນງານຫຼືຜູ້ອອກແຮງງານເປັນ ຣາຍມື້ ເອີ້ນວ່າ ບໍ່ມີສວັດດີການ ວ່າຊັ້ນຊະ.”

ທ່ານວ່າ ບໍ່ພຽງແຕ່ເທົ່ານັ້ນ ເມື່ອໂຄງການນີ້ ເປີດໃຊ້ ໃນທ້າຍປີ 2021 ກໍຈະອໍານວຍຄວາມສະດວກ ຫຼາຍຢ່າງ ໃຫ້ແກ່ ພວກພໍ່ຄ້າ-ແມ່ຄ້າ ຊາວຈີນ ໃນການເດີນທາງ ເຂົ້າມາຄ້າຂາຍຢູ່ລາວ ມາຍາດແຍ່ງວຽກງານ ຄ້າຂາຍໄປຈາກຄົນລາວ ນັ້ນກໍແມ່ຜົນກະທົບນຶ່ງ ທີ່ຄົນລາວຈະ ຫຼີກລ່ຽງບໍ່ໄດ້.

ຊາວຫລວງພຣະບາງ ຜູ້ນຶ່ງເວົ້າຕື່ມວ່າ ຖ້າຈະເວົ້າເຖິງເຣື້ອງ ການໃຊ້ປໂຍດແລ້ວ ຕົນອາຈບໍ່ໄດ້ໃຊ້ ບໍຣິການ ຣົດໄຟ ລາວ-ຈີນ ແຕ່ຢ່າງໃດ, ຍ້ອນບໍ່ໄດ້ເຮັດວຽກຄ້າວຽກຂາຍ ພໍຈະໄດ້ເດີນທາງໄປຫັ້ນໄປນີ້ ຢູ່ຕລອດເວລາ ແລະຕົນ ກໍບໍ່ມີແຜນ ຈະຊື້ປີ້ ນັ່ງຣົດໄຟສາຍນີ້ ໄປທ່ຽວ ແຂວງອື່ນໆ ຫຼື ແມ່ນແຕ່ໄປທ່ຽວປະເທດຈີນ.

ທ່ານ ບຸນຍັງ ວໍລະຈິດ ປະທານປະເທດ ສປປ ລາວ ໄດ້ປະກອບຄໍາເຫັນ ໃນກອງປະຊຸມ Belt & Road ວ່າ: ນັບຕັ້ງແຕ່ ປະທານ ສີ ຈິ້ນຜີງ ໄດ້ປະກາດຂໍ້ ລິເຣີ້ມ ນຶ່ງແລວນຶ່ງເສັ້ນທາງ ໃນປີ 2013 ເປັນຕົ້ນມາ, ໄດ້ສ້າງຄວາມສົນໃຈ ຢ່າງກວ້າງຂວາງ ຢູ່ໃນເວທີສາກົນ.

ສປປ ລາວ ຕີຣາຄາສູງ ໝາກຜົນຂອງການຮ່ວມມື ພາຍໃຕ້ກອບ ນຶ່ງແລວ ນຶ່ງເສັ້ນທາງ ແລະ ໄດ້ປະກອບສ່ວນຢ່າງຕັ້ງຫນ້າ ຕາມພາຣະ ບົດບາດ ແລະ ຄວາມສາມາດຂອງຕົນ ເຂົ້າໃນການ ຈັດຕັ້ງປະຕິບັດ ຂໍ້ລິເຣີ້ມດັ່ງກ່າວ.

ຢ່າງໃດກໍຕາມ ຣາຍງານວ່າ ໂຄງການສ້າງທາງຣົດໄຟ ລາວ-ຈີນ ຈາກຊາຍແດນ ບໍ່ເຕນ ຫານະຄອນຫຼວງວຽງຈັນ ຊຶ່ງເປັນນຶ່ງ ໃນແຜນ ນຶ່ງແລວ ນຶ່ງເສັ້ນທາງ ປັດຈຸບັນນີ້ ມີຄວາມຄືບໜ້າແລ້ວ ປະມານ 60%.

ເຕັມຫນ້າ