ຂົວມິດຕະພາບລາວ-ໄທ ແຫ່ງທີ່ 5 ຝ່າຍລາວ ກໍ່ສ້າງຫຼ້າຊ້າກວ່າກຳນົດ

ການກໍ່ສ້າງຂົວມິດຕະພາບ ລາວ-ໄທ ແຫ່ງທີ 5 ລະຫວ່າງແຂວງບໍລິຄໍາໄຊ ຂອງລາວ ແລະແຂວງບຶງການ ຂອງໄທ ຫລ້າຊ້າກວ່າກໍານົດ. ສະເພາະການກໍ່ສ້າງຂົວ ຢູ່ຝັ່ງລາວ ສ້າງໄດ້ 87%, ຍັງເຫລືອແຕ່ການກໍ່ສ້າງຂົວກາງແມ່ນໍ້າຂອງ. ສ່ວນຖະໜົນ ແລະອາຄານດ່ານສາກົນ ແມ່ນສ້າງສໍາເລັດແລ້ວ. ແຕ່ເຖິງຢ່າງໃດກໍຕາມ ການກໍ່ສ້າງຂົວ ທີ່ວ່າຈະໃຫ້ແລ້ວສົມບູນໃນທ້າຍປີນີ້ນັ້ນ ແມ່ນເປັນໄປບໍ່ໄດ້, ອາດຈະຂະຫຍາຍເວລາອອກໄປຕື່ມອີກ.

ມາຮອດປັດຈຸບັນ ກໍຍັງບໍ່ຮູ້ວ່າ ຂົວມິດຕະພາບລາວ-ໄທ ແຫ່ງທີ 5 ນີ້ ເມື່ອໃດແທ້ຈະກໍ່ສ້າງແລ້ວ ແລະຈະເປີດໃຊ້ເມື່ອໃດກັນແທ້, ແຕ່ກໍອາດເປັນໄປໄດ້ ທີ່ຈະເປີດໃຊ້ະມານເດືອນມີນາ ຫລືເດືອນເມສາປີໜ້າ ກ່ອນບຸນປີໃໝ່ລາວ ຊຶ່ງທັງ 2 ຝ່າຍ ຈະຕ້ອງໄດ້ປະຊຸມກັນກ່ອນ, ອີງຕາມຄໍາເວົ້າຂອງເຈົ້າໜ້າທີ່ພະແນກ ໂຍທາທິການແລະຂົນສົ່ງ ແຂວງບໍລິຄໍາໄຊ ທ່ານນຶ່ງຕໍ່ວິທຍຸເອເຊັຽເສຣີໃນມື້ວັນທີ 7 ສິງຫານີ້.

“ດຽວນີ້ໄດ້ 87% ແລ້ວ ບໍ່ທັນແລ້ວໆ ເພາະວ່າດຽວນີ້ກໍາລັງສະເໜີຂະຫຍາຍເວລາໄປຮອດປະມານທ້າຍເດືອນ ມົກກະຣາ ແຜນເປີດໃຊ້ຍັງເທື່ອ ເພາະວ່າມື້ອື່ນຈະມີການປະຊຸມ 2 ຝ່າຍລາວ-ໄທແລ້ວຈະກໍານົດການເຊື່ອມສະພານປະມານ ທ້າຍມົກກະຣາ ແລ້ວແຜນການເປີດນໍາໃຊ້ ອາດຈະເປັນມິນາ ຈັ່ງວ່າຕົວນີ້ທັງ 2 ຝ່າຍຕ້ອງໄດ້ປຶກສາກັນອີກບາດນຶ່ງ ເພາະວ່າຂັ້ນຕອນການເປີດສະພານ 2 ຝ່າຍຕ້ອງພ້ອມກັນ.”

ທ່ານກ່າວຕໍ່ໄປ ເຖິງສາເຫດ ທີ່ເຮັດໃຫ້ການກໍ່ສ້າງຂົວມິດຕະພາບຫລ້າຊ້າວ່າ ໃນໄລຍະໂຄວິດ-19 ໄດ້ຢຸດການກໍ່ສ້າງ ໄປນານກວ່າ 8 ເດືອນ. ຜູ້ຮັບເໝົາກໍ່ສ້າງໂຄງການຝັ່ງລາວ ຊຶ່ງແມ່ນບໍລິສັດໄທ ບໍ່ສາມາດເຂົ້າມາເຮັດວຽກໄດ້ ຍ້ອນໃນຕອນນັ້ນ ປະເທດລາວ ປິດປະເທດ ເພື່ອສະກັດກັ້ນໂຄວິດ, ຕ້ອງໄດ້ຊອກຫາຜູ້ຮັບເໝົາກໍ່ສ້າງໃໝ່. ເມື່ອໄດ້ຜູ້ຮັບເໝົາກໍ່ສ້າງໃໝ່ແລ້ວ ກໍຕ້ອງໄດ້ລໍຖ້າ ໃຫ້ຫວິດລະດູຝົນອີກ 3 ເດືອນ. ດັ່ງນັ້ນຈຶ່ງເຮັດໃຫ້ເສຽເວລາໄປທັງໝົດ 11 ເດືອນ.

ສ່ວນເລື່ອງການກໍ່ສ້າງຢູ່ທາງຝັ່ງໄທ ຕອນທີ 1 ເປັນວຽກສ້າງຖະໜົນ ທີ່ສໍາເລັດໄປແລ້ວ. ຕອນທີ 2 ແມ່ນສ້າງອາຄານດ່ານສາກົນ ກໍສ້າງໄດ້ 99 ປາຍເປີເຊັນແລ້ວ ແລະຕອນທີ 3 ເປັນການສ້າງຂົວ ທີ່ສ້າງໄດ້ປະມານ 70 ປາຍເປີເຊັນ ແລ້ວ ດັ່ງເຈົ້າໜ້າທີ່ຫ້ອງ ການທາງຫຼວງບຶງການ ແຂວງບຶງການ ຂອງໄທນາງນຶ່ງ ກ່າວໃນມື້ດຽວກັນນີ້ວ່າ:

(ພາສາໄທ)... “ມັນຈະເຫຼືອຕອນ 2 ກັບຕອນ 3. ຕອນ 2 ຈະແມ່ນອາຄານດ່ານ ຕົວອາຄານດ່ານຕອນນີ້ 99 ກວ່າເປີເຊັນແລ້ວ ເຫລືອເກັບລາຍລະອຽດຍ່ອຍ ແຕ່ຕົວທີ່ວ່າ ຍັງບໍ່ຄົບຮ້ອຍ ອາດເປັນລະບົບໄຟລະບົບອີ່ຫຍັງຕ່າງໆ ແຕ່ຕອນ 3 ສ້າງໄດ້ປະມານ 70 ປາຍເປີເຊັນ.”

ສໍາລັບເລື້ອງການຊົດເຊີຍໃຫ້ປະຊາຊົນ ທີ່ໄດ້ຮັບຜົນກະທົບ ຮວມທັງດິນສວນຈາກໂຄງການຂົວມິດຕະພາບແຫ່ງທີ 5 ຢູ່ຝັ່ງລາວນັ້ນ ປະຊາຊົນ ໄດ້ຮັບເງິນຊົດເຊີຍແລ້ວ. ສ່ວນອາຄານດ່ານສາກົນ ສ່ວນຫລາຍເປັນດິນຂອງລັດ ດັ່ງເຈົ້າຂອງເຮືອນພັກ ຢູ່ເມືອງປາກຊັນ ທ່ານນຶ່ງ ເວົ້າຕໍ່ວິທຍຸເອເຊັຽເສຣີ ໃນມື້ວັນທີ 7 ສິງຫານີ້ວ່າ:

“ແມ່ນ ໄດ້ເປີດແລ້ວຫັ້ນນ່າ ສະເພາະເສັ້ນທາງຂົວ ແມ່ນດິນສວນດິນໄຮ່ດິນນາ ກໍບໍ່ໄດ້ກວມຫລາຍ ສ່ວນອາຄານຫັ້ນເປັນດິນລັດແລ້ວ.”

ນອກຈາກຂົວມິດຕະພາບລາວ-ໄທແລ້ວ ທາງການລາວ ຍັງຈະກໍ່ສ້າງໂຄງການ ໂລຊິສຕິກ ແລະແຫລ່ງທ່ອງທ່ຽວຄົບວົງຈອນ ທີ່ຈະມີທັງ ຫ້າງສັບພະສິນຄ້າ ແລະໂຮງແຮມ ຢູ່ບໍລິເວນ ບ້ານກ້ວຍອຸດົມ ເມືອງປາກຊັນ ນໍາດ້ວຍ.  

ສະເພາະໂຄງການໂລຊິສຕິກ ແມ່ນໄດ້ເລີ້ມກໍ່ສ້າງແລ້ວ. ສ່ວນໂຄງການແຫລ່ງທ່ອງທ່ຽວ ຍັງຢູ່ໃນຂັ້ນຕອນ ຂອງການຕົກລົງກັບຊາວບ້ານ ຍ້ອນໂຄງການນີ້ຈະກວມເອົາດິນສວນ ດິນນາຂອງຊາວບ້ານ ຊຶ່ງຄາດວ່າ ອາດຈະມີຊາວບ້ານ ໄດ້ຮັບຜົນກະທົບ 39 ຄອບຄົວ.

ສ່ວນຄ່າຊົດເຊີຍ ທີ່ທາງການສະເໜີໃຫ້ນັ້ນ ແມ່ນຕາແມັດນຶ່ງຕໍ່ 20,000 ກີບ ຊຶ່ງຊາວບ້ານເຫັນວ່າ ໜ້ອຍກ່ວາໂຕຈິງ, ບໍ່ເໝາະສົມ ແລະໂຄງການຂົວ ກໍຍັງມີຊາວບ້ານ ໄດ້ເງິນຊົດເຊີຍບໍ່ທັນຄົບເທື່ອ ຍ້ອນທາງການ ໂອນໃຫ້ເທື່ອລະໜ້ອຍ ເຮັດໃຫ້ຊາວບ້ານ ບໍ່ຢາກໃຫ້ດິນແກ່ໂຄງການທ່ອງທ່ຽວ ດັ່ງປະຊາຊົນ ຢູ່ບ້ານກ້ວຍອຸດົມ ຜູ້ນຶ່ງເວົ້າວ່າ.

“2 ໄລຍະ ມັນມີ 2 ໂຄງການນະ ເຈົ້າ ໂຄງ ການ ທີ 1 ຂະເຈົ້າໄດ້ທີ່ດິນໄປແລ້ວ ຕົວທີ 2 ມັນຍັງເປັນໂຄງການ ເຂົາເອີ້ນວ່າເປັນແຫລ່ງທ່ອງທ່ຽວຫັ້ນນ່າ ເຂົາສິເອົາໃຫ້ໄດ້ຫັ້ນນ່າ ແຕ່ວ່າເລື້ອງຊົດເຊີຍ ຂະເຈົ້າໄດ້ໜ້ອຍໂພດ ແມັດກາເຣນຶ່ງ 20,000 ກີບ ບໍ່ມີໃຜເຫັນດີດອກ ອີກຢ່າງຄື ເຂົາມີບົດຮຽນຈາກໂຄງການຂົວ...ແມັດກາເຣນຶ່ງ 35,000 ກີບ ແມ່ນ ບາງຄອບຄົວເຂົາກໍຍັງບໍ່ໄດ້ໝົດ ຜູ້ຖືກຜົນກະທົບມີບົດຮຽນຈາກຕົວນີ້ ເຂົາກໍຢືນຢັນຂາດຽວ ເຂົາວ່າບໍ່ໃຫ້.”

ຂົວມິຕພາບລາວ-ໄທຍ ແຫ່ງທີ 5 ມູນຄ່າການກໍ່ສ້າງທັງໝົດປະມານ 3,930 ລ້ານບາດ. ໃນຈໍານວນນີ້ ທາງການໄທຍ ໄດ້ປ່ອຍເງິນກູ້ໃຫ້ຣັຖບານລາວ 1,380 ລ້ານບາດ ໃນການກໍ່ສ້າງຂົວ ແລະອາຄານດ່ານສາກົລຝັ່ງລາວ.

ການກໍ່ສ້າງຂົວ ໄລຍະກາງນໍ້າຂອງ ສ້າງເປັນລັກສະນະວົງແຫວນ, ແບ່ງອອກເປັນຫລາຍໄລຍະ. ໄລຍະຂົວກາງນໍ້າຂອງ ແມ່ນທັງສອງຝ່າຍ ຮັບຜິດຊອບສ້າງຮ່ວມກັນ. ຂົວແຫ່ງນີ້ ມີຄວາມຍາວທັງໝົດ 810 ແມັດ, ຂົວເຊື່ອມຕໍ່ ມີຄວາມຍາວ 540 ແມັດ, ໂຄງສ້າງ ແລະຮູບຊົງ ເສົາຄຶງສາຍກາບ ຢູ່ກາງນໍ້າຂອງ ມີ 4 ເສົາ.

ຂົວມິດຕະພາບລາວ-ໄທ ແຫ່ງທີ 5 ມີຈຸດເຊື່ອມຕໍ່ ລະຫວ່າງຖນົນຫລວງ ເລກທີ 13 ເມືອງປາກຊັນ ຊຶ່ງເປັນຈຸດເຊື່ອມໂຍງ ທາງເສຖກິດ ລະຫວ່າງ ສາມປະເທດ ລາວ ໄທ ແລະຫວຽດນາມ.