ໂຄງການທາງຣົດໄຟ ລາວ-ໄທຍ ໄລຍະ 2

ຈໍາປາທອງ
2021-06-15
Share
ໂຄງການທາງຣົດໄຟ ລາວ-ໄທຍ ໄລຍະ 2 ໂຄງການ ກໍ່ສ້າງ ເສັ້ນທາງຣົດໄຟ ລາວ-ໄທຍ ໄລຍະທີ II ທີ່ຫຼ້າຊ້າໄປ ຍ້ອນການຣະບາດ ຂອງພຍາດໂຄວິດ-19
ນັກຂ່າວພົລເມືອງ

ປັດຈຸບັນທາງການລາວ ເວົ້າວ່າໂຄງການກໍ່ສ້າງທາງຣົດໄຟ ລາວ-ໄທຍ ໄລຍະ 2 ຈາກສະຖານີທ່ານາແລ້ງ ຫາບ້ານຄໍາສະຫວາດ ເມືອງໄຊເສດຖາ ນະຄອນຫລວງວຽງຈັນ ຄວາມຍາວ 7.5 ກິໂລແມັດ ຄືບໜ້າໄປຫລ້າຊ້າ ໜ້ອຍນຶ່ງ ຍ້ອນມີບັນຫາເຣື່ອງການນໍາ ວັສດຸກໍ່ສ້າງເຂົ້າມາຈາກໄທຍ ແຕ່ກໍກໍ່ສ້າງໄດ້ຫລາຍກວ່າ 70% ແລະຈະສໍາເຣັດຕາມແຜນໃນ ທ້າຍປີນີ້ ດັ່ງເຈົ້າໜ້າທີ່ກະຊວງ ໂຍທາທິການ ແລະຂົນສົ່ງ ທ່ານນຶ່ງຜູ້ບໍ່ປະສົງອອກຊື່ ແລະຕໍາແໜ່ງ ກ່າວຕໍ່ວິທຍຸເອເຊັຍເສຣີ ໃນມື້ວັນທີ 14 ມິຖຸນາ ນີ້ວ່າ:

“ເພາະວ່າດຽວນີ້ ມັນບາງຢ່າງເຮົາກະລໍເຣື່ອງວັສດຸນໍາເຂົ້າແມ່ນຫຍັງຫັ້ນນ່າ. ຂັ້ນຕອນຫັ້ນນ່າພວກຄົນຂັບຣົດ ມັນຕ້ອງມີໂຕຢ່າງວ່າ ຄັນອອກມາ ມັນຕ້ອງໄດ້ສັກວັກຊິນ ແມ່ນຫຍັງຫັ້ນນ່າ. ຄັນບໍ່ໄດ້ສັກ ເຂົາກະບໍ່ໃຫ້ເຈົ້າຂັບ ບໍ່ໃຫ້ເຈົ້າເຂົ້າບ້ານ ບໍ່ໃຫ້ເຈົ້າເຂົ້າເມືອງ ຊີ້ນ່າ. ມັນກະຍາກເນາະ.”

ທ່ານກ່າວຕື່ມວ່າ ຍ້ອນມາຕການປ້ອງກັນໂຄວິດ-19 ຂອງຣັຖບາລລາວ ເຮັດໃຫ້ຄົນງານລາວ ແລະຄົນງານໄທຍຈໍານວນນຶ່ງຍັງບໍ່ ສາມາດເດີນທາງມາເຮັດວຽກໄດ້ ຍ້ອນທີ່ຜ່ານມາ ຕ້ອງໄດ້ຖືກກວດຫາ ໂຄວິດ-19 ແລະ ກັກຕົວ 14 ມື້ ແລະ ຕໍ່ມາກໍຕ້ອງໄດ້ສັກ ວັກຊິນ ປ້ອງກັນເຊື້ອນີ້ຄົບທັງ 2 ເຂັມ ກ່ອນ.

ຕາມສັນຍາ ແລະຂໍ້ຕົກລົງ 2 ຝ່າຍ ແມ່ນຈະໃຊ້ເວລາກໍ່ສ້າງທາງນັ້ນ 24 ເດືອນ, ມາເຖິງປັດຈຸ ບັນ ໄດ້ວາງລາງຣົດໄຟ ແລະກໍ່ສ້າງ ອາຄານສະຖານີຣົດໄຟແລ້ວ ຍັງເຫລືອພຽງແຕ່ ການຕົບແຕ່ງພາຍໃນ, ການວາງຣະບົບໄຟຟ້າ ແລະການທົດລອງແລ່ນຣົດໄຟ ເພື່ອ ກວດກາມາຕຖານຂອງລາງ ຊຶ່ງ ທາງການລາວຄາດວ່າ ວຽກງານທັງໝົດຈະສໍາເຣັດ ພ້ອມກັບ ທາງຣົດໄຟຄວາມໄວສູງ ລາວ-ຈີນ ໃນທ້າຍເດືອນທັນວາ ທີ່ຈະມາເຖິງນີ້ແນ່ນອນ.

ປະຊາຊົນ ທີ່ຢູ່ໃກ້ກັບໂຄງການສ້າງທາງຣົດໄຟ ລາວ-ໄທຍ ຜູ້ນຶ່ງກ່າວໃນມື້ດຽວກັນນັ້ນວ່າ ຕາມການສັງເກດຂອງຕົນເຫັນວ່າການ ກໍ່ສ້າງທາງຣົດໄຟ ຄືບໜ້າໄປຫລາຍແລ້ວ, ລາງຣົດໄຟກໍໄດ້ວາງໄປແລ້ວ ແຕ່ກໍຍັງບໍ່ທັນເຫັນລອງແລ່ນເທື່ອ ຫລືອາດເປັນຍ້ອນ ການຣະບາດຂອງໂຄວິດ-19 ແລະວ່າ ຫລັງບຸນປີໃໝ່ລາວມານີ້ ບໍ່ຄ່ອຍມີຄົນງານມາເຮັດວຽກ ຫລາຍປານໃດ:

“ກະແລ້ວ ກະບໍ່ໄດ້ສົມບູນແບບດອກ ແຕ່ວ່າມັນກະໄດ້ວາງລາງວັນອະຫຍັງ. ຊ່ວງນຶ່ງຂະເຈົ້າປິດ ແຕ່ຫາກະສິເລີ່ມເຮັດປະມານ 10 ກວ່າມື້ມານີ້ຫວາ ກະຍັງເປັນບາງໝ້ອງ ບາງເທື່ອກັກໝ້ອງນີ້ ກະຢຸດໄປ.”

ແລະຊາວບ້ານ ທີ່ຢູ່ໃກ້ກັບໂຄງການ ຄືກັນນັ້ນ ກໍໄດ້ເວົ້າວ່າ ການກໍ່ສ້າງຄືບໜ້າໄປຫລາຍສົມຄວນ ແລະທາງການກໍໄດ້ແຈ້ງໃຫ້ ປະຊາຊົນ ທີ່ຢູ່ໃກ້ກັບໂຄງການ ຮູ້ແລ້ວວ່າ ຈະກໍ່ສ້າງທາງຣົດໄຟ ລາວ-ໄທຍ ໃຫ້ສໍາເຣັດ ແລະເປີດໃຫ້ບໍຣິການໃນທ້າຍປີ 2021 ນີ້:

“ເພິ່ນສິໃຫ້ມັນທັນໄດ້ເປີດເດືອນ 12 ນີ້ນ່າ. ຄັນສະຖານີມັນແທ້ ເຂົາກະເຮັດໃກ້ສິແລ້ວລະ. ໂຕຜ່ານມາບ້ານເຮົາຫັ້ນ ອອກໄປໃສ່ຂົວ ມິຕພາບ ແມ່ນໂຕເພິ່ນສິເລັ່ງເອົາເຄື່ືອງມາແຕ່ ຈີນ ແຕ່ຫຍັງມາລົງຫັ້ນລະກະເຮັດ ຂ້າມໄທຍ.”

ພ້ອມກັນນັ້ນທ່ານຍັງສັງເກດເຫັນວ່າ ໃນເຂດບ້ານດົງໂພສີ ທີ່ຕິດກັບແຄມນໍ້າຂອງ ເລີ່ມມີການຂົນອຸປກອນກໍ່ສ້າງທາງຣົດໄຟເພື່ອກຽມ ຄວາມພ້ອມໃນການກໍ່ສ້າງຂົວຣົດໄຟ ເຊື່ອມໃສ່ໄທຍ ນໍາດ້ວຍ.

ຣັຖບານລາວມີຄວາມພ້ອມທີ່ຈະເລີ່ມກໍ່ສ້າງ ຂົວທາງຣົດໄຟຄວາມໄວສູງ ເພື່ອເຊື່ອມກັບແຂວງ ໜອງຄາຍຂອງໄທຍແລ້ວ. ເຈົ້າໜ້າທີ່ ການຣົດໄຟແຫ່ງປະເທດໄທຍ ກ່າວຕໍ່ວິທຍຸເອເຊັຽເສຣີ ໃນມື້ວັນທີ 14 ມິຖຸນາ ນີ້ວ່າການກໍ່ສ້າງທາງຣົດໄຟ ຄວາມໄວສູງໄທຍ-ຈີນ ປັດຈຸບັນ ຢູ່ຣະຫວ່າງການກໍ່ສ້າງໄລຍະ ທີ 1 ຈາກບາງກອກ ຫາ ແຂວງນະຄອນຣາຊສີມາ.

ສ່ວນໄລຍະທີ 2 ຈາກແຂວງນະຄອນຣາຊສີມາ ຫາ ແຂວງໜອງຄາຍ ເພື່ອເຊື່ອມກັບນະຄອນຫລວງວຽງຈັນ ນັ້ນ ຍັງບໍ່ທັນໄດ້ເລີ່ມກໍ່ ສ້າງເທື່ອ, ແຕ່ມາເຖິງປັດຈຸບັນໄດ້ກຽມສເນີ ການອອກແບບໂຄງສ້າງ, ສະຖານີ ແລະຈະຣາຍງານການປະເມີນ ຜົລກະທົບທາງດ້ານ ສິ່ງແວດລ້ອມ ແລະສັງຄົມ ຕໍ່ຄະນະຣັຖມົນຕຣີ ຂອງໄທຍ ໃນທ້າຍປີ 2021 ນີ້ ດັ່ງທີ່ທ່ານກ່າວວ່າ:

“ຝັ່ງໄທຍ ໄທຍກໍສ້າງ. ຝັ່ງລາວຈະເປັນໃຜສ້າງ ກະຢູ່ທີ່ລາວກັບຈີນເຂົາໄປຕົກລົງກັນ. ຈຸດທີ່ຊາຍແດນເປັນປົກຕິ ກົງຂົວເຊື່ອມຈະຢູ່ ໃນໄລຍະທີ 2. ໄລຍະທີ 2 ກະອອກແບບສໍາເຣັດແລ້ວ ດຽວອີກບໍ່ດົນ ກະຄົງເອົາເຂົ້າຄະນະຣັຖມົນຕຣີ ປະມູນຣາຄາໄປຕາມປົກຕິ ແຕ່ຕ້ອງມີເຣື່ອງ EIA ດ້ວຍ. ຍັງຕ້ອງລໍຖ້າຜົລ EIA ອີກໜ້ອຍນຶ່ງວ່າ ມື້ໃດຈະຜ່ານ.”

ໂຄງການກໍ່ສ້າງທາງຣົດໄຟລາວ-ໄທຍ ໄລຍະ 2 ໄດ້ເລີ້ມມາແຕ່ວັນທີ 1 ຕຸລາ 2019 ແລະມີກໍານົດສ້າງໃຫ້ສໍາເຣັດໃນເດືອນທັນວາ 2021 ນີ້.

ບໍຣິສັດທີ່ປຶກສາວິສວະກັມອາຊຽນ ຂອງໄທຍ ເປັນຜູ້ຮັບເໝົາກໍ່ສ້າງ ໃນມູນຄ່າ 994 ລ້ານບາດ. ໃນນັ້ນ 30% ເປັນທຶນຊ່ອຍເຫຼືອລ້າ ຂອງຣັຖບາລໄທຍ ແລະ 70% ແມ່ນຣັຖບາລລາວ ກູ້ຢືມເງິນໃນອັດຕຣາດອກເບັ້ຍຕໍ່າ 1.5% ຕໍ່ປີໃນໄລຍະ 30 ປີ ຈາກສໍານັກງານ ການຮ່ວມມືພັທນາເສຖກິດ ກັບປະເທດເພື່ອນບ້ານ ຫລື NEDA.

ການກໍ່ສ້າງທາງຣົດໄຟລາວ-ໄທຍ ໄລຍະທີ 1 ຍາວ 3.5 ກິໂລແມັດ ຈາກຂົວມິຕພາບ, ມູນຄ່າ 656 ລ້ານບາດ ໄດ້ເລີ້ມກໍ່ສ້າງໃນປີ 2013 ໂດຍບໍຣິສັດ ທິມທີ່ປຶກສາວິສວະກັມ ແລະ ບໍຣິຫານຈັດການຂອງໄທຍ, ສ້າງສໍາເຣັດ ແລະເປີດໃຫ້ບໍຣິການໃນປີ 2015.

ເມື່ອກໍ່ສ້າງທາງຣົດໄຟລາວ-ໄທຍ ໄລຍະທີ 2 ສໍາເຣັດ ຈະເຮັດໃຫ້ເສັ້ນທາງສານີ້ ມີຄວາມຍາວ 11 ກິໂລແມັດ.

ຄໍາເຫັນ (0)

ເບິ່ງຄວາມເຫັນທັງໝົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ