ຄົນງານລາວຢາກອອກ ຈາກເຂດ ເສຖກິຈພິເສດ

ໄຊຍາ
2021-08-04
Share
ຄົນງານລາວຢາກອອກ ຈາກເຂດ ເສຖກິຈພິເສດ ຄົນງານລາວ ທີ່ເຮັດວຽກ ໃນເຂດ ເສດກິດພິເສດ ສາມຫຼ່ຽມຄໍາ ພາກັນໄປຮັບ ການກວດຫາເຊື້ອ ໂຄວິດ-19
ພາບຈາກ: ເຂດເສດກິດພິເສດສາມຫຼ່ຽມຄໍາ

ຄົນງານລາວຈຳນວນຫຼາຍ ໃນເຂດເສຖກິຈພິເສດ ສາມຫຼ່ຽມຄຳ ແຂວງບໍ່ແກ້ວ ຢາກອອກນອກເຂດ ເນື່ອງຈາກ ປະສົບກັບບັນຫາ ຫຍຸ້ງຍາກຫຼາຍຢ່າງ ຍ້ອນບໍ່ໄດ້ເຮັດວຽກຫຼາຍເດືອນ ເຮັດໃຫ້ກະທົບຕໍ່ການໃຊ້ຊີວິດ ທັງເຣື່ອງອາຫານການກິນ, ຄ່າໃຊ້ຈ່າຍທີ່ຂ້ອນ ຂ້າງແພງຫຼາຍ ໂດຍຮຽກຮ້ອງໃຫ້ທາງການລາວ ເຂົ້າມາຊ່ອຍເຫຼືອຢ່າງຮີບດ່ວນ. ດັ່ງຄົນງານລາວຜູ້ນຶ່ງ ທີ່ເຮັດວຽກໃນເຂດເສຖກິຈ ພິເສດ ສາມຫຼ່ຽມຄຳ ກ່າວຕໍ່ວິທຍຸເອເຊັຽເສຣີ ໃນວັນທີ 4 ສິງຫາ ນີ້ວ່າ:

"ບາງບ່ອນກະເຮັດຢູ່ ຫາກສ່ວນນ້ອຍ ແຕ່ວ່າສ່ວນຫຼາຍ ມັນມີແຕ່ຄົນຢາກອອກ ຫັ້ນແຫຼະ ມັນບໍ່ຢາກສະດວກ ມັນບໍ່ປົກກະຕິເຣື່ອງ ການຢູ່ ການກິນ ມັນກະຍາກລຳບາກ, ມັນບໍ່ໜ້າສິຍາກ ແຕ່ວ່າ ມັນມາຍາກນີ້ ຕ້ອງມາລົງທະບຽນ ໃຫ້ມັນຫຍຸ້ງຍາກ ບາງທີເຮົາ ຂໍຄວາມຊ່ອຍເຫຼືອທາງແຂວງ ເພິ່ນກະມິດ ບໍ່ມີການຕອບສນອງຫຍັງເລີຍ."

ຄົນງານລາວໄດ້ກ່າວຕື່ມວ່າ ສຳລັບຄົນງານລາວ ທີ່ຕ້ອງການອອກຈາກເຂດ ຈະຕ້ອງໄດ້ລົງທະບຽນກັບຫ້ອງການຄຸ້ມຄອງເສຖກິຈ ພິເສດ ກ່ອນໃນເບື້ອງຕົ້ນເຫັນວ່າ ມີຄົນງານລາວ ແຈ້ງຄວາມປະສົງ ຈະອອກຈາກເຂດແລ້ວ ປະມານ 50 ປາຍຄົນ ແລະ ມີຄົນ ງານລາວ ກຳລັງທະຍອຍມາລົງທະບຽນ ອີກເລື້ອຍໆ ໃນໄລຍະນີ້.

ຄົນງານລາວອີກຜູ້ນຶ່ງ ທີ່ເຮັດວຽກໃນເຂດເສຖກິຈພິເສດສາມຫຼ່ຽມຄຳ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນວ່າ ບໍ່ໄດ້ເຮັດວຽກເກືອບ 3 ເດືອນປາຍແລ້ວ ຕອນນີ້ເງິນເກັບທີ່ເຫຼືອຢູ່ ອາດຈະບໍ່ພໍຊື້ເຂົ້າ ແລະ ຈ່າຍຄ່າຫ້ອງຖ້າຍັງລ໊ອກດາວ ໄປອີກເລື້ອຍໆ ສະນັ້ນຈຶ່ງ ຕ້ອງການ ທີ່ຈະອອກຈາກເຂດດັ່ງກ່າວ ເພື່ອຈະເດີນທາງກັບບ້ານ.

ແນວໃດກໍຕາມ ຕາມທີ່ໄດ້ລົງທະບຽນ ອອກຈາກເຂດໄວ້ນັ້ນ ທາງເຂດແຈ້ງວ່າຈະພາອອກໄປສົ່ງ ສູນກັກບໍຣິເວນຢູ່ແຂວງບໍ່ແກ້ວ ໃນ ວັນທີ 15 ສິງຫາ ນີ້ ແຕ່ກໍຍັງບໍ່ທັນໝັ້ນໃຈປານໃດ ວ່າຈະໄດ້ອອກຕາມກຳນົດ ຈຶ່ງຕ້ອງການໃຫ້ທາງການລາວ ເຂົ້າມາຊ່ອຍເຫຼືອ.

"ແມ່ນແລ້ວໆ ເຮົາຖ້າມື້ອອກຢູ່ ຂະເຈົ້າວ່າຖ້າເບິ່ງວັນທີ 15 ວ່າຊັ້ນ, ໂອ້ ບໍ່ໄດ້ເຮັດວຽກມາຫຼາຍເດືອນ ເຕີບລະ 3-4 ເດືອນແລ້ວ ເພາະວ່າຢູ່ນີ້ວຽກບໍ່ໄດ້ເຮັດເງິນກະ ບໍ່ໄດ້ມີນ່າ ຜູ້ໃດກະ ອອກໝົດຫັ້ນລະເພາະວ່າ ຢູ່ໃນນີ້ວຽກບໍ່ໄດ້ເຮັດ ຊິເອົາເງິນໃສມາຈ່າຍຄ່າຫ້ອງ ທຸກສີ່ງທຸກຢ່າງແພງໝົດ."

ຄົນງານລາວອີກຜູ້ນຶ່ງ ທີ່ເຮັດວຽກໃນເຂດເສຖກິຈພິເສດ ສາມຫຼ່ຽມຄຳ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນນີ້ວ່າ ເຂົ້າມາຮັບເໝົາ ກໍ່ສ້າງ ຢູ່ໃນເຂດດັ່ງກ່າວ ແຕ່ຖືກໂຈະວຽກໄດ້ ປະມານ 1 ເດືອນ ແລ້ວເຮັດໃຫ້ມີເງິນເກັບ ເຫຼືອນ້ອຍລົງເລື້ອຍໆ ແຕ່ລະມື້ກໍຕ້ອງ ໄປຊື້ໝີ່ ປາກະປອງ ແລະ ໄຂ່ຕົ້ມກິນ ເພາະຕລາດສົດຖືກປິດ ແລະ ເຈົ້າໜ້າທີ່ຄົນຈີນ ຄວບຄຸມພື້ນທີ່ ທັງໝົດ ບໍ່ໃຫ້ຄົນງານອອກ ໄປຊື້ເຄື່ອງຢູ່ນອກເຂດ ເຮັດໃຫ້ການໃຊ້ຊີວິດ ຢູ່ພາຍໃນເຂດເສຖກິຈພິເສດ ສາມຫຼ່ຽມຄຳ ໃນຕອນນີ້ລຳບາກຫຼາຍ.

"ການລ໊ອກດາວນີ້ ຖ້າວ່າສະດວກເຣື່ອງກັບເຂົ້າ ເຣື່ອງອາຫານການກິນ ທີ່ຢູ່ກະໂອເຄ ຢູ່ນິມັນຍາກແມະໄປໃສບໍ່ໄດ້ ຢູ່ຕຶກຕໍ່ຕຶກດຽວນີ້ ຢູ່ແຕ່ໃນຕຶກນ່າບໍ່ໃຫ້ອອກເລີຍ ເຂົາກັ້ນໝົດ ມີແຕ່ເຈົ້າໜ້າທີີ່ຈີນ ເທົ່ານັ້ນທີ່ຄຸມຢູ່ນີ້ນ່າ ວຽກກະບໍ່ໄດ້ເຮັດ."

ຄົນງານລາວຜູ້ນີ້ໄດ້ກ່າວຕື່ມວ່າ ຖ້າຄົນງານລາວ ເກີດມີຄວາມສ່ຽງຕິດໂຄວິດ-19 ກໍຈະຕ້ອງໄດ້ຈ່າຍເງິນ 300 ຢວນ ດ້ວຍໂຕເອງ ໃນການກວດຫາເຊື້ອໂຄວິດ-19, ສ່ວນການສັກວັກຊິນປ້ອງກັນໂຄວິດ-19 ສ່ວນຫຼາຍກໍມີແຕ່ຄົນຈີນທີ່ໄດ້ສັກແລ້ວ ສ່ວນຄົນງານລາວ ສ່ວນຫຼາຍ ແມ່ນບໍ່ໄດ້ສັກ ແລະ ພາກັນກັກໂຕ ຢູ່ຫ້ອງຂອງໂຕເອງ.

ກ່ຽວກັບເຣື່ອງນີ້ເຈົ້າໜ້າທີ່ ຜແນກສາທາຣະນະສຸຂ ເມືອງຕົ້ນເຜິ້ງ ແຂວງບໍ່ແກ້ວ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າບໍ່ໄດ້ຮັບ ແຈ້ງການເທື່ອ ວ່າມີຄົນງານລາວ ຈະຂໍອອກຈາກ ເຂດເສຖກິຈພິເສດ ສາມຫຼ່ຽມຄຳ ແລະ ວຽກງານທັງໝົດແມ່ນ ເຈົ້າໜ້າທີ່ຄຸ້ມຄອງ ເຂດເສຖກິຈພິເສດ ເປັນຜູ້ຮັບຜິດຊອບ ໂດຍຕົງ.

"ກະບໍ່ຮູ້ເນາະ ເຮົາບໍ່ໄດ້ມີຫໜ້າທີ່ ຮັບຜິດຊອບໂຕນີ້ ເພາະວ່າ ໃນເຂດຂະເຈົ້າຮັບຜິດຊອບ ສ່ວນເຮົາຢູ່ນອກນີ້ກະບໍ່ໄດ້ເຮັດ ເພາະວ່າ ເຮົາແບ່ງຄົນເຂົ້າໄປລະເດ້."

ທາງດ້ານເຈົ້າໜ້າທີ່ ແຂວງບໍ່ແກ້ວ ອີກທ່ານນຶ່ງ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນວ່າ ຍັງບໍ່ອະນຸຍາດ ໃຫ້ຄົນງານທັງພາຍໃນ ແລະ ຕ່າງປະເທດເດີນທາງ ເຂົ້າ-ອອກ ພາຍໃນ ເຂດເສຖກິຈ ພິເສດ ສາມຫຼ່ຽມຄຳ.

ຖ້າບໍ່ໄດ້ຮັບອະນຸຍາດ ຈາກເຈົ້າໜ້າທີ່ຄຸ້ມຄອງ ເສຖກິຈພິເສດ ແຕ່ຖ້າຈະອອກຈາກເຂດ ຕ້ອງລໍຖ້າຍົກເລີກມາຕການ ລ໊ອກດາວຈາກ ທາງການແຂວງ ຫຼື ຣັຖບານລາວ ເທົ່ານັ້ນ.

ສ່ວນເຣື່ອງ ການກິນການຢູ່ ຂອງຄົນງານ ໃນເຂດເສຖກິຈພິເສດ ຖ້າເປັນຄົນງານ ທີ່ຂຶ້ນກັບ ບໍຣິສັດ ຫຼື ນາຍຈ້າງ ກໍຈະໄດ້ຮັບການ ຊ່ອຍເຫຼືອເຣື່ອງການກິນການຢູ່ ແຕ່ຖ້າເປັນຄົນງານ ທົ່ວໄປ ກໍຕ້ອງຫາກິນກັນເອງ ຖ້າເກີດຄວາມຫຍຸ້ງຍາກ ລຳບາກແທ້ ກໍແຈ້ງໄປ ຍັງເຈົ້າໜ້າທີ່ ຄຸ້ມຄອງ ເສຖກິຈພິເສດ ສາມຫຼ່ຽມຄຳ ເພື່ອໃຫ້ເຈົ້າໜ້າທີ່ ຊ່ອຍເຫຼືອ ໃນເບື້ອງຕົ້ນ.

"ກັບບໍ່ໄດ້ ຕ້ອງຄາຍລ໊ອກຄ່ອຍກັບໄດ້ ເພາະວ່າຖ້າຢູ່ນຳບໍຣິສັດ ສຳນັກງານອົງການຫຼືວ່າ ຢູ່ໃນຮ້ານຕ່າງໆຫັ້ນ ເປັນຄວາມຮັບຜິດ ຊອບຂອງບັນດາບໍຣິສັດ ຕ້ອງເບິ່ງຄົນລາວ ຫຼືວ່າ ຄົນຕ່າງປະເທດ ຖ້າຄົນລາວມີບັນຫາ ຫຼືວ່າ ຕ່າງປະເທດມີບັນຫາ ທາງຣັຖບານ ເພິ່ນກະ ໃຫ້ຄວາມຊ່ອຍເຫຼືອ ເປັນອາຫານການກິນ."

ເນື່ອງຈາກສະພາບການແຜ່ຣະບາດ ຂອງໂຄວິດ-19 ຢູ່ພາຍໃນລາວ ປະເທດເພື່ອບ້ານ ຍັງມີຜູ້ຕິດເຊື້ອ ເປັນຈຳນວນຫຼາຍຂື້ນ ເລື້ອຍໆເຮັດໃຫ້ຄະນະສະເພາະກິຈ ປ້ອງກັນໂຄວິດ-19 ແຂວງບໍ່ແກ້ວ ປະກາດປິດການເຂົ້າ-ອອກ ພາຍໃນເຂດເສຖກິຈພິເສດ ສາມຫຼ່ຽມຄຳ ແລະ ຣະຫວ່າງ ແຂວງຕໍ່ແຂວງ ເຣີ່ມວັນທີ 1 ສິງຫາ ເຖີງ ວັນທີ 15 ສິງຫາ 2021 ນີ້. ປະກາດດັ່ງກ່າວສົ່ງຜົລ ໃຫ້ບໍຣິສັດ, ໂຮງງານ, ຮ້ານຄ້າຕ່າງ ໆ ແລະ ກາສິໂນ ຕ້ອງໄດ້ປິດກິຈການ ຊົ່ວຄາວ ເຮັດໃຫ້ຄົນງານລາວ ແລະ ຄົນງານຕ່າງ ປະເທດຈຳນວນນຶ່ງ ຖືກໂຈະວຽກໄປພ້ອມກັນ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ