ຄົນງານລາວ ໃນເຂດເສດຖະກິດພິເສດບໍ່ເຕັນ ຖືກນາຍຈ້າງຈີນເອົາປຽບ

ຄົນງານລາວ ທີ່ເຮັດວຽກເປັນກໍາມະກອນກໍ່ສ້າງ ຢູ່ໃນເຂດເສດຖະກິດພິເສດບໍ່ເຕັນແດນງາມ ແຂວງຫລວງນໍ້າທາ ຍັງຖືກນາຍຈ້າງຄົນຈີນ ເອົາປຽບ ແລະບໍ່ຈ່າຍຄ່າແຮງງານໃຫ້ ຈົນບາງເທື່ອ ເຮັດໃຫ້ເກີດມີການປະທ້ວງນາຍຈ້າງ ເພື່ອທວງເອົາເງິນຄ່າແຮງງານ ເປັນຕົ້ນ ເມື່ອວັນທີ 29 ມິຖຸນາທີ່ຜ່ານມາ ໄດ້ມີຄົນງານລາວ ປະມານ 100 ຄົນ ຫຼືຫຼາຍກວ່ານັ້ນ ພາກັນໂຮມໂຕກັນ ຢູ່ຕໍ່ໜ້າບໍລິ ສັດແຫ່ງນຶ່ງ ທວງເອົາເງິນຄ່າແຮງງານ ຈາກນາຍຈ້າງຄົນຈີນ ແລະມີການເຜີຍ ແຜ່ ທາງສື່ສັງຄົມອອນລາຍນໍາດ້ວຍ, ອີງຕາມຄໍາເວົ້າ ຂອງພະນັກງານລາວຜູ້ນຶ່ງ ທີ່ເຮັດວຽກ ຢູ່ເຂດເສດຖະກິດພິເສດ ບໍ່ເຕັນແດນງາມ ຕໍ່ວິທຍຸເອເຊັຽເສຣີໃນມື້ວັນທີ 13 ສິງຫານີ້.

“ແມ່ນແຫລະໆ ເຮັດວຽກບໍ່ໄດ້ເງິນ ໂອ໋ ໂຕຫົ້ນແມ່ນຄົນລະບ່ອນກັນ ເຂົາໄປເຮັດກໍ່ສ້າງ ເຮັດຕຶກເຂດພິເສດບໍ່ເຕັນຫັ້ນນ່າມັນຫລາຍຕໍ່ກໍ່ສ້າງ ມັນຫລາຍຕໍ່ກໍ່ສ້າງ ຜູ້ຮັບເໝົາຫລາຍຕໍ່ຢູ່ຫັ້ນ.”

ແລະພະນັກງານ ທີ່ເຮັດວຽກ ຢູ່ໃນເຂດເສດຖະກິດພິເສດບໍ່ເຕັນແດນງາມ ອີກນາງນຶ່ງ ກໍເວົ້າເຖິງເຫດການ ທີ່ເກີດຂຶ້ນໃນມື້ດັ່ງກ່າວວ່າ ໄດ້ຮັບການແກ້ໄຂແລ້ວ ແລະນາຍຈ້າງຈີນ ກໍຍອມຈ່າຍເງິນ ໃຫ້ຄົນງານລາວແລ້ວ ເນື່ອງຈາກຢູ່ໃນເຂດນີ້ ມີກົດລະບຽບເຂັ້ມງວດ ແລະບໍລີສັດ ທີ່ດໍາເນີນກິດຈະການຢູ່ໃນເຂດ ນີ້ກໍຕ້ອງປະຕິບັດຕາມກົດໝາຍແຮງງານຂອງລາວຢ່າງຄັກແນ່.

“ອໍ໋ ອັນນັ້ນມັນພວກກໍ່ສ້າງ ຮັບເໝົາກໍ່ສ້າງຕ່າງໆ ເຂົາເຈົ້າບໍ່ໃຫ້ຢືດຢາວ ເພາະວ່າຢູ່ນີ້ລປພ ກັບພວກອັນນັ້ນເຕັ້ມ ມັນຈະເຄັ່ງຄັດກວ່າສາມຫລ່ຽມຄໍາໄດ໋ ຄວາມເປັນເຈົ້າການຂອງຝ່າຍລາວເຮົາມັນສູງກວ່າສາມ ຫລ່ຽມຄໍານ່າ.”

ກ່ຽວກັບເລື່ອງນາຍຈ້າງຄົນຈີນ ບໍ່ຈ່າຍເງິນໃຫ້ຄົນງານລາວນັ້ນ ຄົນງານລາວນາງນຶ່ງ ທີ່ເຮັດວຽກຢູ່ໃນເຂດນີ້ ເວົ້າຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ ນາງກໍເຄີຍໄດ້ຍິນຂ່າວ ຢູ່ຫລາຍເທື່ອ ແຕ່ກໍບໍ່ຮູ້ວ່າ ແມ່ນບໍລິສັດໃດ ທີ່ເຮັດແນວນັ້ນ, ຮູ້ພຽງແຕ່ວ່າ ເປັນບໍລິສັດຮັບເໝົາກໍ່ສ້າງ ທີ່ເຄີຍບໍ່ຈ່າຍເງິນໃຫ້ຄົນງານລາວ.

“ຫລາຍຢູ່ຕີ້ເບາະ ຍິນຂ່າວຢູ່ແຕ່ວ່າກໍບໍ່ເຄີຍພົບເຫັນຕົວຈິງ ບໍ່ແນ່ໃຈຄືກັນວ່າເປັນພວກໃດ ອັນນີ້ໍ່ຮູ້ນໍາ ເພາະວ່າຫລາຍຄົນຫັ້ນມັນຈະໄປມີວຽກເຂື່ອນ ແລ້ວກໍຈະຜ່ານບໍລິສັດໂຕນີ້ຫັ້ນນ່າ ອາດຈະພົບບັນຫາແບບນີ້ຫລາຍ.”

ແລະຜູ້ປະກອບການທຸລະກິດ ຢູ່ໃນເຂດເສດຖະກິດພິເສດບໍ່ເຕັນແດນງາມ ນາງນຶ່ງ ກໍເຫັນວ່າ ເຖິງແມ່ນ ຈະເຄີຍມີເຫດການນາຍຈ້າງຄົນຈີນ ບໍ່ຈ່າຍເງິນໃຫ້ຄົນງານລາວ ຢູ່ໃນເຂດນີ້ ແຕ່ກໍບໍ່ເປັນບັນຫາໃຫຍ່ ທີ່ຮຸນແຮງ ຈົນເຖິງຂັ້ນເກີດການປະທ້ວງ, ບໍ່ຄ່ອຍເຫັນ, ສ່ວນຫຼາຍ ເກີດຂຶ້ນຢູ່ໃນເຂດເສດຖະກິດພິເສດສາມຫຫຼ່ຽມຄໍາ ແຂວງບໍ່ແກ້ວ.

“ແມ່ນໆ ຢູ່ບໍ່ເຕັນນ້ອງບໍ່ເຄີຍເຫັນເລີຍ ປະທ້ວງແບບນັ້ນບໍ່ຄ່ອຍເຫັນ ເຂດນີ້ນ່າຈະຈ່າຍໝົດແລ້ວ ບໍ່ຄ່ອຍເຫັນຂ່າວ ສ່ວນຫລາຍເຫັນແຕ່ຢູ່ໃນສາມຫລ່ຽມ ທີ່ເຂົາເຈົ້າມັກເອົາລົງ ບໍ່ແດ້ວພຸ້ນ.”

ກ່ຽວກັບເລື້ອງນີ້ ວິທຍຸເອເຊັຽເສຣີ ໄດ້ຕິດຕໍ່ໄປຫາ ຄະນະຄຸ້ມຄອງເຂດເສດຖະ ກິດພິເສດ ບໍ່ເຕັນແດນງາມ ແລະພະແນກແຮງງານ ແລະສະວັດດິການສັງຄົມ ແຂວງຫລວງນໍ້າທາ ເພື່ອຂໍຮູ້ຂໍ້ມູນເພີ້ມຕື່ມ. ແຕ່ເຈົ້າໜ້າທີ່ທີ່ຮັບຜິດຊອບ ບອກວ່າ ຍັງບໍ່ໄດ້ຮັບ ການຮ້ອງຮຽນ ກ່ຽວກັບເຫດການນັ້ນເທື່ອ, ບໍ່ສາມາດໃຫ້ຄໍາເຫັນຫຍັງໄດ້.                                                                                                              ແຕ່ເຖິງຢ່າງໃດກໍຕາມ ເຈົ້າໜ້າທີ່ທີ່ເຮັດວຽກດ້ານການຄຸ້ມຄອງແຮງງານຢູ່ແຂວງພາກເໜືອ ທ່ານນຶ່ງກ່າວຕໍ່ວິທຍຸເອເຊັຽເສຣີໃນມື້ວັນທີ 13 ສິງຫານີ້ວ່າ ຄັນຄົນ

ງານລາວ ທີ່ເຮັດວຽກນໍານາຍຈ້າງຈີນ ແລ້ວເກີດບັນຫານາຍຈ້າງບໍ່ຈ່າຍຄ່າແຮງງານໃຫ້ນັ້ນ ກໍບໍ່ແນະນໍາໃຫ້ຄົນງານໂຮມໂຕກັນເພື່ອປະທ້ວງ ຂໍຄ່າແຮງງານ ແລະໃຫ້ໄປແຈ້ງຕໍ່ສະຫະພັນກໍາມະບານ ຫລືພະແນກແຮງງານແລະສະວັດດິການສັງຄົມ ທີ່ຢູ່ໃນແຂວງນັ້ນ ເພື່ອຈະໄດ້ມີການແກ້ໄຂຕາມຂັ້ນຕອນທີ່ເໝາະສົມ.

“ໂອ໋ ຄັນບໍ່ໄດ້ເງິນເດືອນຫັ້ນ ກໍມີແຕ່ເຂົ້າມາຫາກໍາມະບານພວກເຮົາ ຫລືວ່າພະແນກແຮງງານ ພະແນກແຮງງານເຂົາເຈົ້າຈະກວດເບິ່ງວ່າ ເຫດຜົນເພິ່ນບໍ່ຈ່າຍເງິນຫັ້ນ ເປັນຍ້ອນເຫດຜົນແນວໃດ ຈະໄດ້ຮ້ອງ 2 ຝ່າຍມາເຈລະຈານໍາກັນກ່ອນ.”

ຢູ່ເຂດເສດຖະກິດພິເສດ ບໍ່ເຕັນແດນງາມ ມີຄົນງານທັງໝົດປະມານ  2,300 ຄົນ. ໃນຈໍານວນນັ້ນ ເປັນຄົນງານລາວ ປະມານ 1,800 ຄົນ, ອີງຕາມຂໍ້ມູນເດືອນກັນຍາ 2023.

ນອກຈາກຢູ່ເຂດດັ່ງກ່າວນີ້ແລ້ວ ໃນໄລຍະທີ່ຜ່ານມາ ກໍ່ເຄີຍເກີດເຫດ ຄົນງານລາວປະທ້ວງ ຂໍຄ່າແຮງງານ ຈາກນາຍຈ້າງຈີນ ຢູ່ເຂດອື່ນໆອີກ ເປັນຕົ້ນ ຄົນງານລາວ ແລະຄົນງານຈີນ ທີ່ເຮັດວຽກ ຢູ່ໂຄງການຂຸດຄົ້ນ ບໍ່ເກືອກາລີ ຂອງບໍລິສັດ ຊີໂນ ອາກຣີ ໂປຕາສຈໍາກັດ ຂອງຈີນ ຢູ່ບ້ານດົງໃຕ້ ເມືອງທ່າແຂກ ແຂວງຄໍາມ່ວນ ໄດ້ພາກັນປະທ້ວງນາຍຈ້າງ ເມື່ອເດືອນ ມັງກອນ 2022 ຈົນເຈົ້າໜ້າທີ່ ຕ້ອງໄປລະງັບເຫດການນັ້ນ ດ້ວຍການຍິງປືນຂຶ້ນຟ້າ ເພື່ອໃຫ້ເຫດ ການສະຫງົບລົງ.