ຄົນງານລາວຂໍຕໍ່ວີຊາ ຢູ່ໄທຍ

ສຸພັດຕາ
2020-10-27
Share
F-Lao-workers ຄົນງານລາວທີ່ຕົກຄ້າງຢູ່ ແຂວງເລີຍຂອງໄທຍ ຍ້ອນມາຕການໂຄວິດ-ປິດດ່ານ, ພາກັນມາຂໍຕໍ່ວີຊາ ເພື່ອໃຫ້ຢູ່ໄທຍໄດ້ຢ່າງຖືກຕ້ອງ
File photo September 2020: RFA

ຄົນງານລາວຢູ່ໄທຍ ເດີນທາງມາເຮັດເອກກະສານ ເພື່ອຂໍຢູ່ໃນປະເທດໄທຍຕໍ່ ຕາມແຈ້ງການຂອງຕໍາຣວດກວດ ຄົນເຂົ້າເມືອງ ຂອງໄທຍ, ຊຶ່ງການມາເຮັດໜັງສື ໃນເທື່ອນີ້ ຈະຢູ່ໄດ້ປະມານ 1-2 ເດືອນ ແລະ ມີຄ່າທໍານຽມ ເລັກໜ້ອຍ, ດັ່ງ ຄົນງານລາວ ຜູ້ນຶ່ງ ທີ່ມາເຮັດ ເອກກະສານ ນັ້ນກ່າວຕໍ່ວິທຍຸເອເຊັຽເສຣີ ໃນວັນທີ 27 ຕຸລາ ນີ້ວ່າ:

“ຕໍ່ເພື່ອ ໃຫ້ໄດ້ຢູ່ຕໍ່ ກໍປະມານເດືອນນຶ່ງ ຫຼືວ່າ ສອງເດືອນ ກໍໄດ້ມາຕໍ່ ກໍບໍ່ຫຼາຍປານໃດ ກໍຍັງກັບບໍ່ໄດ້ ເຮົາກໍຕ້ອງເຮັດວຽກຕໍ່ ເພາະມີພາລະ ຫຼາຍ.”

ຄົນງານລາວ ອີກຄົນນຶ່ງ ທີ່ມາເຮັດເອກກະສານ ຂໍຢູ່ໄທຍຕໍ່ ເວົ້າວ່າ ຢາກຢູ່ໄທຍຕໍ່ອີກ ເພາະວ່າເຮົາກັບບ້ານບໍ່ໄດ້ ແລະອີກຢ່າງນຶ່ງ ເຮົາກໍ ເຮັດວຽກຢູ່ພີ້ ສໍາລັບຄ່າໃຊ້ຈ່າຍ ໃນການປະກອບເອກກະສານ ກໍປະມານ 1,000 ບາດ:

“ຕໍ່ວີຊາ ຢູ່ຕໍ່ ເພາະກັບບ້ານບໍ່ໄດ້ ເຮັດວຽກບໍ່ຫຍຸ້ງ ຄ່າສະແກນ QR Code ບໍ່ຫຼາຍປານໃດ ກະປະມານ 1,000 ບາດ ນີ້ລະ.”

ໃນຂນະທີ່ ຊາວລາວ ຄົນນຶ່ງ ກໍຕ້ອງມາຕໍ່ເອກກະສານ ຂໍຢູ່ໄທຍຕໍ່ ເພາະວ່າຕົນມາທ່ຽວໃນໄທຍ ແລ້ວຍັງກັບລາວບໍ່ທັນໄດ້ ເນື່ອງຈາກດ່ານ ສາກົລ ຕ່າງໆຍັງປິດຢູ່ ຕາມມາຕການປ້ອງກັນ ແລະຄວບຄຸມເຊື້ອ ໄວຣັສ ໂຄວິດ-19 ດັ່ງນັ້ນ, ຕົນຈຶ່ງຕ້ອງໄດ້ຢູ່ໄທຍ ຕໍ່ໄປອີກກ່ອນ ຈົນກວ່າດ່ານຈະເປີດ ຈຶ່ງຈະໄດ້ກັບເມືອລາວ, ດັ່ງນາງເວົ້າວ່າ:

“ມາທ່ຽວກັບບໍ່ໄດ້ ຕິດໂຄວິດ ກໍບໍ່ຫຍຸ້ງຍາກ ໄປຂໍຮັບຮອງຈາກ ສະຖານທູດລາວ ເລຂ ທີ່ເຮືອນ ຂອງເຈົ້າຂອງເຮືອນ ແລະກໍມີບັດປະຊາຊົນ ຂອງເຈົ້າຂອງເຮືອນ ມີຮູບ 2 ໃບ ແລ້ວກໍພາສປອດເທົ່ານັ້ນແຫຼະ.”

ອີງຕາມການຣາຍງານ ຂອງສໍານັກງານ ກວດຄົນເຂົ້າເມືອງ ຂອງໄທຍ ລົງວັນທີ່  8 ຕຸລາ 2020 ຄົນຕ່າງດ້າວທຸກສັນຊາດ ທີ່ວີຊາຈະ ໝົດກໍານົດ ໃຫ້ມາຍື່ນຄໍາຮ້ອງ ຕໍ່ວີຊາ ນັບແຕ່ວັນທີ 1 ພຶສຈິກາ 2020 ນີ້ເປັນຕົ້ນໄປ ແລະຈະສາມາດ ຕໍ່ໄດ້ພຽງແຕ່ 60 ມື້.

ແລະອີງຕາມການຣາຍງານ ຂອງກະຊວງແຮງງານ ປະເທດໄທຍ ປະຈໍາເດືອນສິງຫາ ປີ 2020 ນີ້ແລ້ວແມ່ນວ່າ ຄົນງານລາວ ທີ່ມີບັດ ອະນຸຍາດ ເຮັດວຽກຖືກຕ້ອງ ທັງບັດສີບົວ ແລະປະເພດ MOU ໃນປະເທດໄທຍ ຫາກບັດອະນຸຍາດເຮັດວຽກ ຍັງບໍ່ໝົດກໍານົດ ກໍສາມາດຢູ່ຕໍ່ໄດ້.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.