ຜູ້ປະກອບການ ສ່ວນຫຼາຍຍັງບໍ່ມິເງິນອຸດໜູນ ຄ່າຄອງຊີບ

ໃນຮອບ 4-5 ປີຜ່ານມາເຖິງແມ່ນວ່າປະເທດລາວ ຈະປະສົບບັນຫາເງິນກີບອ່ອນຄ່າຢ່າງຕໍ່ເນື່ອງ ເຮັດໃຫ້ເງິນຄ່າຈ້າງທີ່ຄົນງານ ໄດ້ຮັບໃນແຕ່ລະເດືອນມີມູນຄ່າຫຼຸດລົງ ທ່າມກາງສິນຄ້າ ອຸປະໂພກ-ບໍລິໂພກ ທີ່ມີລາຄາເພີ່ມສູງຂຶ້ນ, ແຕ່ຜູ້ປະກອບການໃນຫຼາຍຫົວໜ່ວຍທຸລະກິດ ພັດບໍ່ທັນມີນະໂຍບາຍຊ່ວຍເຫຼືອເງິນອຸດໜູນໃຫ້ແກ່ຄົນງານເທື່ອ. ດັ່ງເຈົ້າໜ້າທີ່ທີ່ເຮັດວຽກດ້ານແຮງງານ ຢູ່ນະຄອນຫຼວງວຽງຈັນ ທ່ານກ່າວຕໍ່ວິທຍຸເອເຊັຽເສຣີໃນວັນທີ 29 ສິງຫາ 2024 ນີ້ວ່່າ:

“ກໍ່ບໍ່ມີນ່າເຈົ້າເທົ່າທີ່ຮູ້ເອກະຊົນບໍ່ມີນ່າແລ້ວກໍ່ພະນັກງານລັດກໍ່ຍັງບໍ່ທັນມີເທື່ອ. ບໍ່ ໆ ບໍ່ມີເຈົ້າແມ່ນເອກະຊົນນີ້ມັນບໍ່ມີຢູ່ແລ້ວນ່າຢູ່ໃນລາວນີ້ນ່າເງິນອຸດໜູນນີ້ມັນມີມັນມີກັບບາງບໍລິສັດສື່ ໆ ບາງບໍລິສັດ. ບາງບໍລິສັດກໍ່ບໍ່ມີແມ່ນ ໆ ປັບຂຶ້ນຕາມອັດຕາເງິນເຟີ້.”

ທີ່ຜ່ານມາຜູ້ປະກອບການ ແລະ ຫົວໜ່ວຍທຸລະກິດສ່ວນຫຼາຍຍັງບໍ່ທັນມີນະໂຍບາຍ ໃຫ້ເງິນຊ່ວຍເຫຼືອອຸດໜູນຄ່າຄອງຊີບ ໃຫ້ແກ່ຄົນງານກໍ່ເປັນຍ້ອນທາງການລາວ ແລະ ພາກສ່ວນທີ່ກ່ຽວຂ້ອງຍັງບໍ່ທັນມີມາດຕະການຢ່າງຈິງຈັງ. ອີກທັງພວກເຂົາເຈົ້າບໍ່ຕ້ອງການແບກຮັບຄ່າໃຊ້ຈ່າຍທີ່ເພີ່ມຂຶ້ນ. ສະນັ້ນນອກຈາກເງິນເດືອນແລ້ວເງິນທີ່ຄົນງານຈະໄດ້ຮັບເພີ່ມກໍມີແຕ່ເງິນເບັ້ຍດຸໝັ່ນ. ດັ່ງພະນັກງານຊອກຫາຄົນງານມາເຮັດວຽກນໍາບໍລິສັດເອກະຊົນ ຢູ່ນະຄອນຫຼວງວຽງຈັນກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ນອກຈາກເງິນເດືອນຄ່າຄອງຊີບອໍບໍ່ມີຕີິ້ຍັງໆ ເຈົ້າ. ອັນຕາມທີ່ລົງຫັ້ນແຫຼະເຈົ້າ. ຕາມທີ່ລົງໄປແບບວ່າເງິນເດືອນເທົ່າໃດໆ ຫັ້ນນ່າເອີ 4,000,000 ກີບຫາ 10,000,000 ອັນມັນບວກແລ້ວແມ່ນເປັນ 4,000,000 ເຈົ້າແຕ່ວ່າ 10,000,000 ຫັ້ນແມ່ນເງິນເປີເຊັນຫັ້ນອີ່ຫຍັງຂະເຂົ້າຂາຍດີເຈົ້າກໍ່ໄດ້ບວກເຂົ້າໄປ. ຄ່ານໍ້າມູນນໍ້າມັນລະແມ່ນອອກເອັງເຈົ້າ.”

ເຖິງແມ່ນວ່າກະຊວງແຮງງານ ແລະ ສະຫວັດດີການສັງຄົມ ແລະ ພາກສ່ວນທີ່ກ່ຽວຂ້ອງຈະກຳນົດໃຫ້ຄ່າຈ້າງແຮງງານຂັ້ນພື້ນຖານ ຢູ່ປະເທດລາວຈະຕ້ອງບໍ່ຕໍ່າກ່ວາ 1,600,000 ກີບ/ຄົນ/ເດືອນ ແຕ່ຢ່າງໃດກໍ່ຕາມຜູ້ປະກອບການ ແລະ ຫົວໜ່ວຍທຸລະກິດສ່ວນຫຼາຍແມ່ນພັດຈ່າຍເງິນເດືອນ ໃຫ້ແກ່ຄົນງານປະມານ 2,500,000 ຫາ 3,000,000 ກີບ/ຄົນ/ເດືອນ ເປັນຢ່າງໜ້ອຍແລ້ວ ແລະ ບາງບໍລິສັດກໍ່ມີການຈ່າຍເງິນອຸດໜູນຄ່າຄອງຊີບໃຫ້ຄົນງານບາງກໍລະນີິ. ດັ່ງພະນັກງານຮັບຈ້າງຂັບລົດໃຫຍ່ ຢູ່ນະຄອນຫຼວງວຽງຈັນໄປຍັງພາກເໜືອທ່ານກ່າວວ່າ:

“ກໍ່ຈ່າຍຢູ່ແລ້ວແຕ່ຕາມໜ້າວຽກຕາມ ແຕ່ບໍລິສັດເປັນເງິນເພີ່ມເປັນແບບເງິນຂະຫຍັນ ແບບເງິນເພີ່ມກໍມັນກໍ່ແລ້ວແຕ່ໜ້າວຽກເພິ່ນ ໃຫ້ເພິ່ນກໍ່ຂຶ້ນໃຫ້ເພິ່ນກໍເບິ່ງຕາມອັດຕາ ແລກປ່ຽນເງິນຕາມຄ່າແຮງງານ ຄ່າຄອງຊີບຄັນຄົນເຂົ້າໃໝ່ມັນກໍ່ຊິເຮັດໄດ້ຕໍ່າແນ່ ຄັນຄົນຢູ່ເກົ່າກໍ່ຊິໄດ້ເງິນອ່າວສູງເພາະວ່າ ເພິ່ນກໍ່ເບິ່ງເອົາຕາມເສດຖະກິດເງິນອຸດໜູນຄ່າຄອງຊີບ ມັນກໍ່ແພງ.”

ກ່ອນໜ້ານີ້ເຈົ້າໜ້າທີ່ກົມການຈັດຫາງານ ກະຊວງແຮງງານ ແລະ ສະຫວັດດີການສັງຄົມທ່ານໄດ້ກ່າວຕໍ່ວິທຍຸເອເຊັຽເສຣີວ່າ ກະຊວງແຮງງານ ແລະ ສະຫວັດດີການສັງຄົມໄດ້ເຮັດວຽກຮ່ວມກັບສະຫະພັນກຳມະບານລາວ ແລະ ພາກເອກຊົນ ມີຄວາມເຫັນກົງກັນວ່າຈໍາເປັນຕ້ອງໄດ້ຮັບການຂຶ້ນຄ່າຈ້າງແຮງງານຂັ້ນຕໍ່າຂຶ້ນເປັນ 2,200,000 ຫາ 2,500,000 ກີບ/ຄົນ/ເດືອນໃນໄລຍະບໍ່ດົນນີ້ເພື່ອໃຫ້ສອດຄ່ອງກັບຄ່າຄອງຊີບໃນປັດຈຸບັນອີກທັງຍັງເປັນການຫຼຸດຜ່ອນ ບັນຫາຄົນງານລາວຫຼັ່ງໄຫຼອອກໄປເຮັດວຽກຢູ່ຕ່າງປະເທດ.

ແລະ ກ່ອນໜ້ານີ້ ທ່ານ ນາງ ຄໍາໃບ ຂັດທິຍະ ປະທານຄະນະກໍາມະການ ແຮງງງານແຫ່ງຊາດ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມກ່າວໃນກອງປະຊຸມຄະນະກຳມະການ ແຮງງານແຫ່ງຊາດເພື່ອປຶກສາຫາລືປັບປຸງຄ່າແຮງງານຂັ້ນຕໍ່າເມື່ອວັນທີ 24 ກໍລະກົດ 2024 ທີ່ຜ່ານມານັ້ນວ່າຄ່າແຮງງານຂັ້ນຕໍ່າ 1,600,000 ກີບ/ຄົນ/ເດືອນ ທີ່ໄດ້ກຳນົົດໄວ້ແມ່ນບໍ່ສອດຄ່ອງກັບຄ່າຄອງຊີບໃນປັດຈຸບັນເຮັດໃຫ້ຄົນງານປະເຊີນຄວາມຫຍຸ້ງຍາກ ແລະ ບໍ່ສົນໃຈເຮັດວຽກພາຍໃນປະເທດ.

ເນື່ອງຈາກຜູ້ປະກອບການ ແລະ ຫົວໜ່ວຍທຸລະກິດສ່ວນຫຼາຍຍັງບໍ່ທັນມີນະໂຍບາຍ ໃຫ້ເງິນອຸດໜູນຄ່າຄອງຊີບໃຫ້ແກ່ຄົນງານແຕ່ຖ້າຫາກຄົນງານຜູ້ໃດ ມີຄວາມດຸໝັ່ນໃນການປະຕິບັດໜ້າທີ່ເປັນຕົ້ນ ສ້າງຍອດຂາຍໃຫ້ໄດ້ສູງ, ມາເຮັດວຽກຕາມເວລາ ແລະ ບໍ່ລາປ່ວຍ. ດັ່ງພະນັກງານພັດທະນາຊັບພະຍາກອນບຸກຄົນ ຂອງໂຮງໝໍເອກະຊົນຢູ່ນະຄອນຫຼວງວຽງຈັນ ທ່ານກ່າວວ່າ:

“ເຣດທົ່ວໄປມັນຊິໃຫ້ເປັນຢ່າງເງິນຂະຫຍັນນ ອກຈາກມັນຈະມີເງິນນອກຈາກເງິນເດືອນ ອີກເພາະວ່າປົກກະຕິເຮົາຈະໄດ້ເງິນຂະຫຍັນຫຼືວ່າເງິນ Incentive ແລ້ວແຕ່ບໍລິສັດ. ພື້ນຖານດຽວນີ້ເລີ່ມຕົ້ນ 3,000,000 ກີບ/ເດືອນມັນກໍ່ມີແດ່ຫັ້ນນ່າແຕ່ວ່າເລີ້ມຕົ້ນກໍປະມານ 3,000,000 ມັນກໍ່ແລ້ວແຕ່ຊົ່ວໂມງທີ່ເຮັດນໍາ.”

ໃນກອງປະຊຸມສະໄໝສາມກັນທີ່ຈັດຂຶ້ນໃນວັນທີ 26 ສິງຫາ 2024 ຜ່ານມາ ຜູ້ເຂົ້າຮ່ວມປະຊຸມໄດ້ຮ່ວມກັນປະກອບຄຳເຫັນຕໍ່ສະຖານະການຕ່າງໆ ທີ່ເກີດຂຶ້ນໃນເດືອນສິງຫາ ແລະ ຮ່ວມກັນຊອກຫາທິດທາງໃນເດືອນກັນຍານີ້ແມ່ນມີການສະເໜີຂໍອະນຸມັດໃຫ້ເພີ່ມເງິນອຸດໜູນຄ່າຄອງຊີບໃຫ້ແກ່ຄົນງານໃນພາກທຸລະກິດ.

ຂະນະທີ່ ທ່ານ ສອນໄຊ ສີພັນດອນ ນາຍົກລັດຖະມົນຕີກໍໄດ້ກ່າວເຖິງຜົນກະທົບ ຕໍ່ການຟື້ນຕົວ ແລະ ການຂະຫຍາຍຕົວ ຂອງເສດຖະກິດໂລກໂດຍສະເພາະການພັດທະນາເສດຖະກິດ-ສັງຄົມ ພາຍໃນປະເທດລາວເປັນຕົ້ນບັນຫາດ້ານການເງິນ, ການສຶກສາ, ແຮງງານ ແລະ ໄພທຳມະຊາດ.