ສະຫະພັນນັກຣົບເກົ່າ ເວົ້າວ່າ ຜູ້ຂໍທານ ບໍ່ເວົ້າຄວາມຈິງ

ສຸພັດຕາ
2018-01-26
ອີແມວລ໌
ຄໍາເຫັນ
Share
ພິມ
ລຸງບຸນຈັນ ຈູມມະລີ ອາຍຸ 88 ປີ, ຢູ່ບ້ານຕະປາກ, ເມືອງສນາມໄຊ, ແຂວງອັດຕະປື ທີ່ ສະຫະພັນ ນັກຣົບເກົ່າ ແຂວງອັດຕະປື ເວົ້າວ່າ ລຸງບຸນຈັນ ໃຫ້ຂໍ້ມູນບໍ່ຖືກຕ້ອງ ແລະ ຂໍໃຫ້ ລຸງບຸນຈັນ ແລະຜູ້ເປັນຈົວໃນວັດ ແກ້ຂ່າວ
ລຸງບຸນຈັນ ຈູມມະລີ ອາຍຸ 88 ປີ, ຢູ່ບ້ານຕະປາກ, ເມືອງສນາມໄຊ, ແຂວງອັດຕະປື ທີ່ ສະຫະພັນ ນັກຣົບເກົ່າ ແຂວງອັດຕະປື ເວົ້າວ່າ ລຸງບຸນຈັນ ໃຫ້ຂໍ້ມູນບໍ່ຖືກຕ້ອງ ແລະ ຂໍໃຫ້ ລຸງບຸນຈັນ ແລະຜູ້ເປັນຈົວໃນວັດ ແກ້ຂ່າວ
Screen captured from Attapeu online

ສະຫະພັນນັກຣົບເກົ່າ ແຂວງອັດຕະປື ຊີ້ແຈງວ່າ ລຸງບຸນຈັນ ຈູມມະລີ ນັກຣົບເກົ່າຂອງແຂວງອັດຕະປື ທີ່ໄປຂໍທານຢູ່ແຂວງຈຳປາສັກ ແລະ ບອກວ່າ ຕົນບໍ່ໄດ້ຮັບການເບິ່ງແຍງໃດໆ ຈາກສະຫະພັນເລີຍ.

ຈາກການສອບສວນແລ້ວ ຜູ້ກ່ຽວເວົ້າບໍ່ຖືກຕາມຄວາມເປັນຈິງ ແລະຜູ້ກ່ຽວຍອມຮັບວ່າ ເຂົາບໍ່ໄດ້ເສັຍອົງຄະ ຍ້ອນການສູ້ຣົບໃນສມັຍສົງຄາມ ແລະໄດ້ຖືກປົດອອກຈາກ ສະຫະພັນນັກຣົບເກົ່າຫຼາຍປີແລ້ວ, ແຕ່ຜູ້ກ່ຽວຍັງລັກຖືບັດ ສະມາຊິກຢູ່, ດັ່ງເຈົ້າໜ້າທີ່ ສະຫະພັນນັກຣົບເກົ່າ ແຂວງອັດຕະປື ກ່າວຕໍ່ວິທຍຸເອເຊັຽເສຣີ ໃນວັນທີ 26 ມົກຣານີ້ວ່າ:

“ລາວຂຽນປວັດຫັ້ນແມ່ນບໍ່ຖືກຕ້ອງ ເພິ່ນວ່າເພິ່ນເຂົ້າການປະຕິວັດແຕ່ປີ 1953 ແຕ່ວ່າໂຕຈິງ ທາງບ້ານທາງເມືອງ ເຂົາຢັ້ງຢືນເພິ່ນປະຕິວັດ ແຕ່ປີ 1962 ນີ້, ບາດນີ້ເສັຍອົງຄະອີກ ເພິ່ນວ່າເພິ່ນສູ້ຮົບ ບາດທາງນີ້ ທາງບ້ານທີ່ເປັນຫລັກຖານໃຫ້ຫັ້ນ ມັນບໍ່ແມ່ນ ຍ້ອນການສູ້ຮົບ ຜູ້ກ່ຽວເປັນພຍາດເສັຍຕາ.”

ທ່ານເວົ້າອີກວ່າ ດຽວນີ້ຜູ້ກ່ຽວມີອາຍຸ 88 ປີແລ້ວ ບໍ່ແມ່ນ 72 ປີ ຕາມທີ່ອອກໃນຂ່າວ ແລະຫຼຽນກ້າຫານ ທີ່ຜູ້ກ່ຽວຖືຕິດຕົວນັ້ນກໍເອົາມາຈາກ ໝູ່, ຢ່າງໃດກໍ່ຕາມ ດຽວນີ້ທາງເຈົ້າໜ້າທີ່ ພຍາຍາມຕິດຕໍ່ ໄປຫາຈົວນ້ອຍຢູ່ວັດຫຼວງໃນແຂວງຈຳປາສັກ ທີ່ເຄີຍ ສັມພາດ ລຸງບຸນຈັນ ແລ້ວ ອັດວິດີໂອເຜີຍແຜ່ ລົງທາງເຟສບຸກ ເພື່ອໃຫ້ຈົວຜູ້ນັ້ນ ແກ້ຂ່າວທີ່ຖືກຕ້ອງ ໃຫ້ສັງຄົມເຂົ້າໃຈ. ເພາະເນື້ອໃນ ຂອງວິດີໂອດັ່ງກ່າວ ຣະບຸວ່າ ລຸງບຸນຈັນເປັນຄົນອານາຖາ ຖືກທາງການປ່ອຍປະລະເລີຍ ຊື່ງຂັດແຍ້ງກັບ ຄວາມເປັນຈິງ.

ເຈົ້າໜ້າທີ່ກ່າວອີກວ່າ ປັດຈຸບັນ ລຸງບຸນຈັນ ໄດ້ອາສັຍຢູ່ກັບຄອບຄົວ ທີ່ເມືອງສນາມໄຊ ໂດຍເຈົ້າໜ້າທີ່ໄດ້ບອກ ຍາດພີ່ນ້ອງໃຫ້ເບິ່ງແຍງ ລາວ ບໍ່ໃຫ້ໄປຂໍທານອີກ ແລະພາກສ່ວນກ່ຽວຂ້ອງ ກຳລັງພິຈາລະນາ ໃຫ້ການຊ່ວຍເຫຼືອຢູ່.

ປັດຈຸບັນ ຢູ່ສະຫະພັນນັກຣົບເກົ່າແຂວງອັດຕະປື ມີສະມາຊິກທັງໝົດ 2 ພັນປາຍຄົນ ຊື່ງປີນີ້ທາງຜແນກແຮງງານ ແລະສວັດດີການສັງຄົມ ແຂວງອັດຕະປື ໄດ້ມອບເງິນຊ່ວຍເຫຼືອ ແກ່ນັກຣົບເກົ່າຈຳນວນ 10 ຄົນເມື່ອວັນທີ 24 ມົກຣາ ນີ້ຜແນກແຮງງານ ແລະສວັດດີການສັງຄົມ ແຂວງຫຼວງພຣະບາງ ກໍໄດ້ຈັດພິທີ ມອບເງິນນະໂຍບາຍ ໃຫ້ແກ່ນັກຣົບເກົ່າ ໃນສມັຍສົງຄາມ ເກືອບ 3 ຕື້ ກວ່າກີບ.

ຄໍາເຫັນ (1)
Share

Lao

ຈາກ Laos

ແກ້ໂຕນໍ້າໃສໆ ຫຼຽນໃຜຈະເອົາໄຫ້ລາວ ຜູ້ທີ່ໄດ້ຮັບຫຼຽນ ແມ່ນບູຊາກັນຍິ່ງກົວພຣະເຈົ້າ ແລະຊີວິດຈິດໃຈ. ແລະບັດນັກລົບເກົ່າຜູ້ໃດເອົາໄຫ້ລາວ. ຢ່າຕົວະສັງຄົມເລີຍ. ແລະດ້ວາຍເຫຕຜົລໃດຈິ່ງໄລ່ລາວ ອອກຈາກນັກລົບເກົ່າ. ສ່ວນຈົວນ້ອຍ ກໍ່ບໍ່ຄວນທີ່ຈະໄປບັງຄັບໄຫ້ອອກມາແກ້ຕົວຕໍ່ສັງຄົມ ເພາະວ່າຈົວນ້ອຍພຽງແຕ່ຖາມລຸງ ແລະອັດຄລິບສົ່ງອອກໄຫ້ສັງຄົມໄດ້ຟັງນໍາກັນ. ເລື້ອງທຸກຢ່າງແມ່ນລຸງເປັນຄົນບອກເອງ ທຸກເລື້ອງບໍ່ແມ່ນຈົວນ້ອຍເວົ້າເອງ.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Jan 30, 2018 05:35 AM

ເຕັມຫນ້າ