ຄ່ານາຍໜ້າການກໍ່ສ້າງ ບ້ານພັກ ຖາວອນ

ອຸ່ນແກ້ວ ສຸກສະຫວັນ
2019-02-15
ອີແມວລ໌
ຄໍາເຫັນ
Share
ພິມ
ການພັທນາຟື້ນຟູ ເຂດທີ່ປະສົບພັຍນໍ້າຖ້ວມ ຈາກເຫດການ ເຂື່ອນເຊປຽນ-ເຊນໍ້ານ້ອຍ ແຕກ
ການພັທນາຟື້ນຟູ ເຂດທີ່ປະສົບພັຍນໍ້າຖ້ວມ ຈາກເຫດການ ເຂື່ອນເຊປຽນ-ເຊນໍ້ານ້ອຍ ແຕກ
Photo Courtesy of: Korea CSO group

ຜູ້ຮັບເໝົາກໍ່ສ້າງເຮືອນພັກຖາວອນ ໃຫ້ແກ່ຜູ້ປະສົບພັຍ ເຂື່ອນ ເຊປຽນ-ເຊນ້ຳນ້ອຍ ແຕກ ຢູ່ແຂວງອັດຕະປື ຍັງຕ້ອງໄດ້ເສັຽຄ່ານາຍໜ້າ ບໍ່ຕ່ຳກວ່າ 10 ຫາ 26 ເປີເຊັນ.

ປັດຈຸບັນ ທາງການແຂວງອັດຕະປື, ໄດ້ຮັບຮອງເອົາແບບເຮືອນພັກຖາວອນ ແລະລາຄາຮຽບຮ້ອຍແລ້ວ, ເພື່ອສົ່ງໃຫ້ຣັຖບານອະນຸມັດ, ແຕ່ກໍມີບຸກຄົນທີ່ຢູ່ໃນວົງການສໍ່ສ້າງເວົ້າວ່າ, ຕ້ອງໄດ້ເສັຽຄ່ານາຍໜ້າ ກ່ອນທີ່ຈະໄດ້ຮັບການປະມູນ. ເຈົ້າຂອງບໍຣິສັດ ກໍ່ສ້າງທ່ານນຶ່ງ, ຜູ້ທີ່ບໍ່ປະສົງອອກຊື່ແລະສຽງ, ໄດ້ກ່າວຕໍ່ເອເຊັຽເສຣີ ວ່າ:

"ຄ່ານາຍໜ້າ ສຳລັບຜູ້ທີ່ຈະໄດ້ຮັບການປະມູນ ຢ່າງໜ້ອຍ, ບໍ່ຕ່ຳກວ່າ 10 ເປີເຊັນ ຂອງມູນຄ່າ ການກໍ່ສ້າງທັງຫມົດ."

ນອກຈາກນີ້, ເຈົ້າໜ້າທີ່ອີກທ່ານນຶ່ງ ໄດ້ກ່າວຕໍ່ເອເຊັຽເສຣີ ວ່າ:

"ຄ່ານາຍໜ້າແພງຫລາຍ ເຈົ້າຂອງໂຄງການຈະຄິດໄລ່ເອົາ 26 ເປີເຊັນ ຂອງ ມູນຄ່າກໍ່ສ້າງ."

ໃນຂນະທີ່ ເຈົ້າໜ້າທີ່ກ່ຽວຂ້ອງ ແຂວງອັດຕະປື ກໍຢືນຢັນວ່າ, ການກໍ່ສ້າງ ແລະ ເປີດການປະມູນ ບໍ່ໃຫ້ມີຫາງສຽງ. ທ່ານ ລັດຕະນະພອນ ເທບສຸວັນ ຫົວໜ້າຜແນກໂຍທາທິການ ແລະຂົນສົ່ງ ແຂວງອັດຕະປື ໄດ້ກ່າວຕໍ່ເອເຊັຽເສຣີ ວ່າ:

"ໂຕນີ້ເພິ່ນກະວ່າ, ບໍ່ໃຫ້ ບໍ່ໃຫ້, ເພິ່ນ [ຣັຖບານ] ກະຊີ້ນຳເດ້, ບໍ່ໃຫ້, ບໍ່ໃຫ້, ອັນນັ້ນເດ້, ບໍ່ໃຫ້ມີຫາງສຽງ, ບໍ່ໆ ບໍ່ມີ."

ຣັຖບານໄດ້ເປີດກວ້າງ ໃຫ້ບໍຣິສັດພາຍໃນປະເທດ ສາມາດເຂົ້າມາປະມູນວຽກງານ ການກໍ່ສ້າງໄດ້.

ທ່ານ ລັດຕະນະພອນ ໄດ້ກ່າວຕື່ມອີກວ່າ:

"ບໍຣິສັດພາຍໃນປະເທດ, ທາງຣັຖບານເພິ່ນຊີ້ນຳໃຫ້ ປະມູນເປີດກ້ວາງພາຍໃນປະເທດ ໄດ້ໝົດ, ໄດ້ໝົດ."

ປັດຈຸບັນ ທາງການແຂວງອັດຕະປື, ໄດ້ອະນຸມັດແບບກໍ່ສ້າງເຮືອນພັກຖາວອນແລ້ວ, ເຫລືອແຕ່ຖ້າໃຫ້ຣັຖບານ ເປັນຜູ້ອະນຸມັດ, ສ່ວນວ່າ ຈຳນວນເຮືອນພັກ ທີ່ຈະສ້າງນັ້ນ, ຍັງບໍ່ທັນສລຸບອອກມາ ຢ່າງເປັນທາງການ.

ອີງຕາມໃບສັງລວມລາຄາເຮືອນພັກຖາວອນ ຈາກຜແນກໂຍທາທິການແລະຂົນສົ່ງ ແຂວງອັດຕະປື ລາຄາເຮືອນແບ່ງອອກເປັນ 4 ປະເພດ.

1. ເຮືອນ 1 ຊັ້ນ - ໂຄງສ້າງເສີມເບຕົງ ເສີມເຫລັກ ລາຄາ 470 ລ້ານ ກີບ.

2. ເຮືອນກໍ່ 2 ຊັ້ນ - ໂຄງສ້າງເບຕົງ ເສີມເຫລັກ ລາຄາ 660 ລ້ານ ກີບ.

3. ເຮືອນ 2 ຊັ້ນ - ຊັ້ນລຸ່ມກໍ່, ຊັ້ນເທິງໄມ້, ໂຄງສ້າງເບຕົງເສີມເຫລັກ ລາຄາ 640 ລ້ານ ກີບ.

4. ເຮືອນ 2 ຊັ້ນ - ມີກ້ອງລ່າງ, ຊັ້ນເທິງແອ້ມໄມ້, ໂຄງສ້າງເບຕົງເສີມເຫລັກ ລາຄາ 490 ລ້ານ ກີບ.

ນອກຈາກນີ້, ທ່ານ ບຸນໂຮມ ພົມມະສານ ເຈົ້າເມືອງສະໜາມໄຊ ໄດ້ກ່າວຕໍ່ເອເຊັຽເສຣີ ວ່າ: ການກໍ່ສ້າງບ້ານພັກຖາວອນ ໃຫ້ແກ່ຜູ້ປະສົບ ພັຍນ້ຳຖ້ວມ ຈາກເຂື່ອນແຕກ ຢູ່ເມືອງຊານໄຊ ມີ 4 ຈຸດ ຄື ຢູ່ເຂດດົງບາກ ມີປະມານ 400 ຄອບຄົວ, ເຂດທ່າ ແສງຈັນ ມີປະມານ 120 ຄອບຄົວ, ເຂດຕຳມໍຢອດ ມີ 170 ຄອບຄົວ, ເຂດບິນດົງ  ມີປະມານ 90 ຄອບຄົວ.

ທາງການແຂວງອັດຕະປື ໄດ້ບຸກເບີກເນື້ອທີ່ 290 ເຮັກຕາ ຢູ່ໃນ 4 ຈຸດ ເພື່ອສ້າງບ້ານພັກຖາວອນ ໃຫ້ແກ່ປະຊົນຜູ້ທີ່ປະສົບພັຍ ຈາກ ເຂື່ອນເຊປຽນ-ເຊນ້ຳນ້ອຍແຕກ.

ເຕັມຫນ້າ