ຣັຖກອນຜີ ມີຊື່ຮັບ ເງິນເດືອນ

ໄຊຍາ
2019-11-12
ອີແມວລ໌
ຄໍາເຫັນ
Share
ພິມ
ສໍານັກງານ ນາຍົກຣັຖມົນຕຣີ ທີ່ ນະຄອນຫຼວງວຽງຈັນ
ສໍານັກງານ ນາຍົກຣັຖມົນຕຣີ ທີ່ ນະຄອນຫຼວງວຽງຈັນ
RFA

ການອອກບັດຣັຖກອນແມ່ນນຶ່ງ ໃນກົນໄກປາບປາມຣັຖກອນ ທີ່ບໍ່ມີໂຕຕົນ ແຕ່ຍັງກິນເງິນເດືອນຢູ່ ພ້ອມນີ້ຍັງເປັນການກວດກາຈຳນວນ ໂຕເລກຣັຖກອນທີ່ມີ ໃນປັຈຈຸບັນ. ເພາະທີ່ຜ່ານມາ ທາງກະຊວງພາຍໃນ ທີ່ມີໜ້າທີ່ຮັບຜິດຊອບ ວຽກງານຄຸ້ມຄອງຣັຖກອນ ໂດຍກົງນັ້ນ ຍັງພົບເຫັນ ບາງຫ້ອງການຍັງໂອນເງິນເດືອນ ເຂົ້າບັນຊີພະນັກງານຜີ ຫຼື ພະນັກງານມີແຕ່ຊື່ ແຕ່ບໍ່ໄດ້ເຮັດວຽກ ຫຼື ລາອອກໄປແລ້ວ. ດັ່ງ ເຈົ້າໜ້າທີ່ຫ້ອງການ ປະຊາສຳພັນ ກົມບໍຣິຫານຈັດການ ພະນັກງານຣັຖ ໄດ້ໃຫ້ສຳພາດຕໍ່ ນັກຂ່າວເອເຊັຽເສຣີ ໃນວັນທີ 12 ພຶສຈິກາ ວ່າ:

"ຍົກໂຕຢ່າງວ່າພະນັກງານ ທີ່ວ່າອອກໄປແລ້ວ ແຕ່ເຂົາຍັງມີຣາຍຊື່ ກິນເງິນດ້າມເງິນເດືອນຢູ່ ມີຊື່ອອກເປັນພະນັກງານ ເບັ້ຽບຳນານໄປແລ້ວ ແຕ່ກໍສິຍັງຢູ່ ຫຼືວ່າເຂົາເອົາລູກຫຼານ ເຂົ້າມາເປັນຣາຍຊື່ ໂຕຢ່າງວ່າມາເປັນພະນັກງານຂ້ອຍ ແຕ່ລູກຫຼານເຈົ້າ ບໍ່ໄດ້ຢູ່ຫັ້ນນ່າ ແຕ່ໃນຣາຍຊື່ ຍັງມີ, ແລ້ວກິນເງິນເດືອນຂອງຣັຖ ໄປເລື້ອຍໆ."

ທ່ານໃຫ້ສຳພາດຕື່ມວ່າ ທາງການໄດ້ແຈ້ງໃຫ້ຫ້ອງການຣັຖ ທົ່ວປະເທດ ສົ່ງຊື່ພະນັກງານຂອງຕົນ ໃຫ້ສູນກາງເພື່ອອອກບັດຣັຖກອນໃຫ້ ກ່ອນຈະໂອນເງິນເດືອນເຂົ້າບັນຊີ. ໂດຍຂະບວນການອອກບັດນີ້ ຈະຊ່ອຍໃຫ້ລົບລ້າງ ພະນັກງານຜີອອກຈາກ ບັນຊີໄດ້ ຊຶ່ງສ່ວນຫຼາຍ ຈະມີຢູ່ຕ່າງແຂວງ.

"ຮູບແບບຂອງຂະເຈົ້າມັນກໍຫາກມີຢູ່ດອກ ເພາະວ່າຣາຍເຊັນຢູ່ນໍາເຂົາ ການເບີກຈ່າຍຢູ່ນໍາເຂົາ ການກວດກາຢູ່ນໍາເຂົາ ແຂວງເຂດນອກ ກະແຂວງທາງພາກເໜືອ ທາງພາກໃຕ້ບໍ່ ແຂວງນອກພຸ້ນນ່າ ຄືຢ່າງຫຼວງນໍ້າທາ, ຜົ້ງສາລີ, ອຸດົມໄຊ, ທາງໃຕ້ກໍ ອັດຕະປື, ຈຳປາສັກ, ຄຳມ່ວນ, ໄປຊັ້ນລະ."

ການອອກບັດດັ່ງກ່າວ ກະຊວງພາຍໃນ ໄດ້ຮັບອະນຸມັດຈາກຣັຖບານ ໃຫ້ອອກບັດຣັຖກອນໃຫ້ໄດ້ 37 ອົງການຂອງຣັຖ ພາຍໃນປີນີ້. ຂັ້ນຕົ້ນແມ່ນຈະອອກບັດ ໃຫ້ຂັ້ນສູນກາງກ່ອນ ສ່ວນພະນັກງານຕ່າງແຂວງ ແມ່ນເລີ້ມ ປີ 2020. ພ້ອມກັນນີ້ ຣັຖບານ ຍັງອະນຸມັດ ໃຫ້ຮ່ວມມືກັບ ທະນາຄານການຄ້າ ຕ່າງປະເທດລາວ ອອກແບບບັດຣັຖກອນ ໃຫ້ສາມາດຖອນເງີນເດືອນ ຈາກ ຕູ້ເອທີເອັມໄດ້.

ຄໍາເຫັນ (2)
Share

ອາ​ດີດພະ​ນັກ​ງານ​ເກົ່າ

ອັນນີ້ ບໍ່ແມ່ນເລື້ອງແປກ ໃນກົງຈັກພັກລັດ ສໍ້ໂກງເອົາເງິນ ແມ່ນມີທຸກວິທີທາງ, ໂດຍສະເພາະ ພາກສ່ວນກອງທັບ ຍິ່ງຮ້າຍແຮງ ແລະ ກໍ່ບໍ່ແມ່ນຄວາມລັບຫຍັງດອກ ໃຜໆກໍ່ຮູ້ກັນທັງນັ້ນ ແຕ່ບໍ່ມີໃຜແກ້ໄຂໄດ້ ເພາະວ່າ ທະຫານມີສິດໝົດທຸກຢ່າງ ຜູ້ທີ່ຮັ່ງມີໃນປະເທດເຮົາ ກໍມີແຕ່ພື້ນຖານ ຈາກທະຫານກັນທັງນັ້ນ ຕັ້ງແຕ່ ທ່ານຄຳໄຕ ທ່ານ ຈູມມະລີ ທ່ານ ດວງໃຈ ແລະ ທະຫານຂັ້ນນາຍພົນນາຍພັນຕ່າງໆ. ເຂົາເຈົ້າ ກິນໝົດທຸກຢ່າງ ຕັ້ງແຕ່ການຕັດໄມ້ ຂຸດຄົ້ນບໍ່ແຮ່ ແລະ ຊັບພະຍາກອນທຳມະຊາດຕ່າງໆ ແມ່ນທະຫານ ລວບເອົາໝົດ. ນອກຈາກນັ້ນ ກໍຍັງເປັນເຈົ້າການ ໃນການຄ້າຢາເສບຕິດ ເຂົ້າຫຍຸ້ງກ່ຽວກັບ ອາດສະຍາກຳຕ່າງໆ. ບ້ານເຮົາ ບໍ່ຄືປະເທດໃກ້ຄຽງ ເພາະວ່າ ບ້ານເຮົາ ປາບຫຍັງບໍ່ໄດ້ ເພາະເປັນຄົນເຈົ້າຄົນຂ້ອຍ. ຜູ້ຂ້າ ອອນຊອນແຕ່ປະເທດໃກ້ຄຽງ ທີ່ປາບປາມໝົດ ທັງທະຫານຕຳຫລວດ. ບໍ່ຮູ້ວ່າ ອີກດົນປານໃດ ປະເທດເຮົາ ຈຶ່ງຈະມີການປ່ຽນແປງ ໄປໃນທາງທີ່ດີ ແລະ ມີຄວາມຍຸດຕິທຳ.

Nov 13, 2019 11:02 PM

ຜູ້ອ່ານທີ່ບໍ່ອອກຊື່

ຢູ່ໃນໂລກນີ້ບໍ່ມີປະເທດໃດທີ່ມີພຶດຕິກໍາແບບ ສປປລາວເລີຍແລະບໍ່ເຄີຍໄດ້ຍິນອີກຄໍາວ່າລັນທະກອນ ຫຼືລັດທະບານຜີທີ່ບໍ່ມີຕົວຕົນແລະປອມແປງເອກກະສານຫຼືຕົວະກິນເງີນອຸດໜູນຂອງລັດ,ໂອ້ຍຟັງແລ້ວເປັນຫໜ້າອັບອາຍແທ້ໆ,ບໍ່ຮູ້ວ່າຜູ້ນໍາຂັ້ນສູງຫຼືຂັ້ນເທິງຫຼືຂັ້ນສຸດຍອດເພີ່ນພາກັນເຮັດຫັຽງຢູ່ຫຼືວ່າພາກັນຫຼືຮ່ວມໃຈກັນເຮັດແບບນີ້ກັນໝົດທົ່ວປະເທດເລີຍບໍ, ທີ່ພາກັນມາຕົວະມາຕົ້ມເອົາພາສີຂອງປະຊາຊົນໄປ,ເມື່ອໄດ້ໄປແລ້ວພາກັນເຮັດແບບນີ້ໂດຍບໍ່ຄໍານຶງເຖີງຄວາມທຸກຍາກຫາເຊົ້າກີນຄໍ່າແລະດີ້ນຮົນຫາເງິນມາເສັຽພາສີໄຫ້ລັດແລ້ວພວກເຈົ້າຍັງມາຕົວະຕົ້ມເອົາແບບນີ້,ເບີ່ງແລະພິຈາລະນາແລ້ວມັນໂຫດຮ້າຍປ່າຖ່ຽນກົ່ວ.....ໃຜຮູ້ຕອບຮັບໄດ້ແລະຄົງເຂົ້າໃຈໃນສ່ວນຕົວ,ອັນນີ້ບໍ່ແມ່ນໂຈມຕີຫຼືວ່າກໍ່ກວນນະໂຍບາຍຂອງພັກແລະລັດເດີ,ສະນັ້ນຂໍໄຫ້ພວກທ່ານໄດ້ຮັບຟັງແບະໄຫ້ເຂົ້າໃຈຂ້ອຍແດ່ແບະຢ່າສູຄິດວ່າໂຕເອັງເປັນຜູ້ສະລາດຫຼາຍໄຫ້ຟັງປະຊາຊົນແດ່.

Nov 12, 2019 02:22 PM

ເຕັມຫນ້າ