ນາຍທຶນຈີນ ຣະເບີດ ຜາບ່ອງ

ໄຊຍາ
2019-02-06
ອີແມວລ໌
ຄໍາເຫັນ
Share
ພິມ
ຜາບ່ອງ ທີ່ສວຍງາມ ຢູ່ເມືອງຫີນເຫີບ ແຂວງວຽງຈັນ ຖືກນາຍທຶນຈີນ ຣະເບີດ
ຜາບ່ອງ ທີ່ສວຍງາມ ຢູ່ເມືອງຫີນເຫີບ ແຂວງວຽງຈັນ ຖືກນາຍທຶນຈີນ ຣະເບີດ
ຮູບພາບອຸປຖັມໂດຍ: ນັກຂ່າວພົລເມືອງ

ເມື່ອຕົ້ນສັ​ປ​ດາ ຜ່ານມາ ຄຣິບຣະເບີດຜາບ່ອງ ແຜ່ກະຈາຍອອກສູ່ ສັງຄົມອອນລາຍ​ນ໌ ຕ່າງກໍມີການວິພາກວິຈານ ແລະ ເຕັມໄປດ້ວຍ ຄວາມ ສົງໃສ ວ່າ ເປັນຫຍັງ ຜາບ່ອງ ຈຶ່ງຖືກຣະເບີດ ຄົນທ້ອງຖິ່ນເອງ ກໍບໍ່ຮູ້ ປະຊາຊົນທົ່ວໄປ ຊອກຫາຄຳຕອບ ວ່າເກີດຫຍັງຂຶ້ນກັບທັມມະຊາດ ຂອງປະເທດລາວ.

ທ່ານ ວອນ ວໍລະສານ, ຮອງເຈົ້າເມືອງ ເມືອງຫີນເຫີບ, ໄດ້ໃຫ້ສັມພາດ ຕໍ່ສື່ມວນຊົນ ເມື່ອວັນທີ 28 ມົກຣາ ເຖິງສາເຫດການຣະເບີດວ່າ: ບໍຣິສັດ ຊີໂນມາ ໄດ້ຣະເບີດຜາຫີນ ເພື່ອສນອງວັດຖຸດິບ ປ້ອນເຂົ້າໂຮງງານຊີເມັນ ວຽງຈັນ ຫົງຊື້ໃສທິລາດ ແຕ່ບໍ່ໄດ້ແຈ້ງ ໃຫ້ພາກສ່ວນ ກ່ຽວຂ້ອງ ຮັບຊາບ ພ້ອມນີ້ ປະຊາຊົນຢູ່ໃນເຂດດັ່ງກ່າວ ບໍ່ໄດ້ຮັບຜົລກະທົບຫຍັງ.

"ການຣະເບີດຜາຫີນ ເພື່ອນຳປ້ອນເຂົ້າໂຮງງານຊີເມັນ ວຽງຈັນຫົງຊື້ ເມື່ອວັນທີ 26 ມົກກະຣາ ຫັ້ນ ກາເຫັນວ່າ ທາງກຸ່ມບ້ານຄະນະນໍາ ກໍ່ໄດ້ຊີ້ແຈງ ຂອດການປະສານສົມທົບ ເຫັນວ່າ ຣະເບີດຫັ້ນ ມັນກໍບໍ່ໄດ້ແຕະຕ້ອງຊີວິດການເປັນຢູ່ ຂອງປະຊາຊົນ.”

ຮອງເຈົ້າເມືອງຫີນເຫີບ ກ່າວຕື່ມວ່າ ການຣະເບີດ ມັນບໍ່ໄດ້ແຕະຕ້ອງ ພື້ນທີ່ໄຮ່ນາ ຂອງປະຊາຊົນ ໄລຍະຜ່ານມາ ທາງການກໍໄດ້ໄປແກ້ໄຂ ວ່າເຂດໃດ ທີ່ບໍຣິສັດ ຈະຊົດເຊີຍ ເຂດໃດທີ່ບໍຣິສັດ ຈະເອົາ ເປັນຈຸດຫວງຫ້າມ ເພື່ອບໍ່ໃຫ້ວັດຖຸດິບນັ້ນ ສົ່ງຜົລສະທ້ອນ ເຖິງປະຊາຊົນ. ແຕ່ວ່າ ຄນະຊີ້ນຳ ກໍໄດ້ຢືນຢັນວ່າ ໃນການຣະເບີດຫີນນັ້ນ ກາບໍ່ມີບັນຫາ ກະທົບເຖິງ ພໍ່ແມ່ປະຊາຊົນ. ທີ່ຈິງ ປະຊາຊົນ ທີ່ຢູ່ໃກ້ຄຽງ ໃນເຂດຣະເບີດ ມີ 4 ບ້ານ ເຊັ່ນ ບ້ານນາຕ້າຍ, ໜອງຫຼວງ, ຜາບ່ອງ ແລະ ໜອງເລື່ອງ ໄດ້ບອກກ່າວ ໃຫ້ພວກເຮົາຮູ້ວ່າ ຜົລກະທົບທຸກມື້ນີ້ ກໍແມ່ນເຣື່ອງ ຂອງຝຸ່ນໄງ່ປິວລອຍ ຈາກການຜລິດຫີນ ດັ່ງພະຍາບານ ເມືອງຫີນເຫີບ ຈົ່ມວ່າ:

"ປະຊາຊົນ ເຂດຜາບ່ອງ ເມືອງຫີນເຫີບ ແຂວງວຽງຈັນ ຕ້ອງທຸກທໍລະມານ ກັບຝຸ່ນລະອອງ ຈາກການຣະເບີດຜາ ມາໃສ່ ໂຮງງານ ຊີເມັນຈີນ ທັມມະຊາດ ຂອງຜາຄ່ອຍໆ ໝົດ."

ສ່ວນຊາວບ້ານຜາບ່ອງ ອີກທ່ານນຶ່ງ ກ່າວວ່າ:

"ຢ່າໂທດຈີນເລີຍ ໂທດພາກຣັຖລາວເຮົານີ້ລະ ເປັນຄົນເຮັດ ຄົນພັທນາມາ ທຳລາຍທັມມະຊາດ ແລະ ສັດປ່າສູນຫາຍ ຮວມທັງຄົນ ລາວເຮົາ ກະຢູ່ຍາກແລ້ວ ກະບໍມີ ບ່ອນຢູ່ ຍ້ອນເຫັນແກ່ແຕ່ໄດ້ເງິນ ສ້າງຫັ່ນສ້າງນີ້ຫຼາຍ ຄວນຊິມາພັທນາປາຊົນ ແລະ ປະເທດໂຕເອງ ໃຫ້ພ້ົນຈາກຄວາມທຸກຍາກ ແລະ ຖນົນຫົນທາງ ບໍ່ດີກວ່າຫວາ...ບໍ່ແມ່ນເຫັນປະເທດອື່ນ ເຂົາເຮັດແນວໃດ ລະເຮັດຕາມເຂົາ ອັນໃດມີຢູ່ ກະຄວນຮັກສາມັນໄວ້ ບໍ່ແມ່ນມີແຕ່ ທຳລາຍ."

ເຫດການຣະເບີດ ຜາບ່ອງເທື່ອນີ້ ແມ່ນເທື່ອທີ 2, ເທື່ອທີ 1 ແມ່ນເກີດຂຶ້ນ ເມື່ອຕົ້ນເດືອນ ພຶສພາ ປີກາຍ ເຊີ່ງກໍ່ມີຄຣິບ ເຜີຍແຜ່ອອກໄປ ເຫດການດັ່ງກ່າວ ກໍເຮັດໃຫ້ປະຊາຊົນຈົ່ມ ເສັຽດາຍທັມມະຊາດ ທີ່ຈະເອົາ ກັບຄືນບໍ່ໄດ້ ສ່ວນປະຊາຊົນທ້ອງຖິ່ນ ກໍໄດ້ແຕ່ ຢືນເບິ່ງພະນັກງານ ປະຕິບັດໜ້າທີ່. ຜ່ານມາ ກໍໄດ້ມີປະຊາຊົນຈໍານວນນຶ່ງ ໄດ້ຮ້ອງຮຽນ ໄປຍັງ ຫ້ອງການປົກຄອງ ເພື່ອຊ່ອຍແກ້ໄຂ ປະຊາຊົນ ໃນເຂດ 4 ບ້ານ ທີ່ຢູ່ອ້ອມແອ້ມ ຜາບ່ອງ ຢ້ານວ່າ ຈະຖືກໂຍກຍ້າຍ ຄືກັບໂຄງອື່ນໆ ແລະ ບັນຫາການຣະເບີດຜາ ຂອງບໍຣິສັດ ທີ່ມີຄວາມຮຸນແຮງ ເຊີ່ງສ້າງ ຜົລກະທົບ ຕໍ່ປະຊາຊົນ ອາຈມີຄວາມສ່ຽງ ຕໍ່ການສູນເສັຍຊັບສິນ. ຕໍ່ການຮຽກຮ້ອງດັ່ງກ່າວ ຂອງປະຊາຊົນ ທ່ານ ຮອງເຈົ້າເມືອງ ເມືອງ ຫີນເຫີບ ກ່າວວ່າ:

“ຕໍ່ບັນຫາ ທີ່ເກີດຂຶ້ນ ໃນວັນທີ 26 ເດືອນ 1 ປີ 2019 ນີ້ ທາງຄະນະນຳອົງກອນຫ້ອງການ ກາບໍ່ໄດ້ລົດລະ ຕໍ່ບັນດາຫາງສຽງ ຂອງສັງຄົມ ຕໍ່ບັນດາຫາງສຽງ ຂອງພໍ່ແມ່ປະຊາຊົນ ພາຍໃນເມືອງຫີນເຫີບ ເວົ້າລວມເວົ້າສະເພາະ ປະຊາຊົນຢູ່ໃນ 3 ໝູ່ບ້ານ ຂອງເຂດຈຸດສຸມ ພັດທະນາ ຜາບ່ອງຫັ້ນ ດ້ວຍຮູບການແກ້ໄຂ ກໍ່ຄື ເຊື້ອເຊີນເອົາຈຳນວນ 2 ບໍຣິສັດ ຄື ບໍຣິສັດຂຸດຄົ້ນ ແລະ ບໍຣິສັດຝ່າຍຜລິດ ມາແກ້ໄຂ ໃນວັນທີ 28 ເດືອນ 1 ປີ 2019 ຜ່ານການແກ້ໄຂນັ້ນ ໄດ້ໃຫ້ ບໍຣິສັດ ຣາຍງານຂໍ້ມູນ ຄວາມເປັນຈິງ."

ທ່ານກ່າວຕື່ມວ່າ: ຕໍ່ບັນດາພາບພົດ ຕໍ່ບັນດາຫາງສຽງສັງຄົມ ເວົ້າລວມ ເວົ້າສະເພາະ ການຣະເບີດຫີນ ຢູ່ຜາບ່ອງ ເຂດ 3 ໝູ່ບ້ານຫັ້ນ ທາງການ ກໍໄດ້ເໜັ້ນໜັກ ເພື່ອເປັນການແກ້ໄຂ ເພື່ອຮັບປະກັນ ການຣະເບີດຫີນ ໃຫ້ຫຼຸດນ້ອຍຖອຍລົງ ຕາມຈຸດເປົ້າ ແລະ ອີກດ້ານນຶ່ງ ໃຫ້ບໍຣິສັດ ຊິໂນມາ ຫຼຸດບໍຣິມາດ ທາດຣະເບີດລົງ ແລະ ໃຫ້ບໍຣິສັດ ປະຕິບັດ ຕາມບົດວິພາກເສຖກິຈ ຂອງໂຄງການ ຂຸດຄົ້ນຫີນ ເພື່ອເຮັດ ໃຫ້ຮູບຊົງ ຫຼື ເຮັດໃຫ້ເຂດຂຸດຄົ້ນ ຢູ່ໃນສະພາບປົກກະຕິ.

ເມືອງຫີນເຫີບ ຜ່ານມາ ເບິ່ງຄືວ່າ ເປັນເມືອງງຽບ ບໍ່ຄ່ອຍ ເປັນຂ່າວ ແຕ່ກັບມີ ນັກລົງທຶນຈີນ ມາລົງທຶນຫຼາຍ ເຊັ່ນ ບໍຣິສັດວຽງຈັນຫົງຊື້ ໃສທິລາດຈຳກັດ ໄດ້ສັມປະທານ ສ້າງໂຮງງານຊິເມັນ ຂນາດໃຫຍ່ ທີ່ເຂດຜາບ່ອງ, ເນື້ອທີ 76 ເຮັກຕາ​ຣ໌, ສັມປະທານ 50 ປີ, ປີນຶ່ງ ຜລິດໄດ້ 2 ລ້ານຕັນ ມູນຄ່າການລົງທຶນ 300 ລ້ານໂດລາ​ຣ໌ ສະຫະຣັຖ. ເຣີ້ມຜລິດຈຳໜ່າຍ ເດືອນມີນາ ປີ 2018. ໂດຍມີບໍຣິສັດ ຊິໂນມາ ຮັບໜ້າທີ່ຣະເບີດຜາຫີນ ເພື່ອສນອງວັດຖຸດິບປ້ອນໂຮງງານ. ຫີນດັ່ງກ່າວ ຍັງສນອງ ໃຫ້ໂຄງການສ້າງທາງຣົດໄຟ ລາວ-ຈີນ ນັບແຕ່ ແຂວງວຽງຈັນ ຫາ ນະຄອນຫລວງວຽງຈັນ ແລະ ສນອງໃຫ້ໂຮງງານ ຊີມັງ 3 ແຫ່ງ ໃນເມືອງວັງວຽງ ພ້ອມສົ່ງຂາຍ ໃຫ້ແຂວງອື່ນໆຕື່ມ.  ບໍຣິສັດ ລາວພັທນາ ຂຸດຄົ້ນແຮ່ຖ່ານຫີນ ຈຳກັດ ສັມປະທານ ຂຸດຄົ້ນ ແຮ່ຖ່ານຫີນ ມູນຄ່າລົງທຶນ 100 ປາຍລ້ານໂດລາ​ຣ໌ ສະຫະຣັຖ ບໍ່ດັ່ງກ່າວ ມີແຮ່ຖ່ານຫີນເຖິງ 3 ລ້ານຕັນ ໂດຍເຣີ້ມຂຸດຄົ້ນ ເມື່ອ 2ປີຜ່ານມາ ປະຈຸບັນ ຂຸດຄົ້ນໄປແລ້ວ 20 ພັນຕັນ ແຮ່ດັ່ງກ່າວ ສົ່ງຂາຍ ໃຫ້ໂຮງງານຊິມັງ ທົ່ວປະເທດ.  ໂຄງການນີ້ ມີປະຊາຊົນ 15 ຄອບຄົວໄດ້ຮັບຜົລກະທົບ ແລະ ໄດ້ຮັບຄ່າຊົດເຊີຍໄປແລ້ວ.

ບໍຣິສັດ ໄຟຟ້ານໍ້າລີກ 1 ຈຳກັດ  ໄດ້ສັມປະທານ ສ້າງເຂື່ອນນໍ້າລີກ 1 ມູນຄ່າ ການກໍ່ສ້າງ 153.7 ລ້ານໂດລາ​ຣ໌ ສະຫະຣັຖ ມີກຳລັງ ການຜລິດ 65 ເມກາວັດ. ເຊີ່ງດຳເນີນ ການກໍ່ສ້າງ ໄດ້ກວ່າເຄີ່ງນື່ງແລ້ວ. ໂຄງການນີ້ ມີປະຊາຊົນໄດ້ຮັບຜົລກະທົບ ທັງໝົດ 489 ຄອບຄົວ ແມ່ນໄດ້ ໂຍກຍ້າຍ ອອກຈາກ ບ້ານຫີນເຫີບເໜືອ ໄປຢູ່ບ້ານຫີນເຫີບໃຕ້ ແລະ ບ້ານໂພນທອງ ໂດຍໂຄງການ ໄດ້ປຸກເຮືອນໃໝ່ແທນ ແລະ ໄດ້ຈ່າຍ ຄ່າຊົດເຊີຍ ທັງໝົດ 11.7 ລ້ານໂດລາ​ຣ໌ ສະຫະຣັຖ.

ສ່ວນໂຄງການຣະດັບຊາດ ຢ່າງໂຄງການສ້າງທາງຣົດໄຟ ລາວ-ຈີນ, ໂຄງການສ້າງທາງດ່ວນ ວຽງຈັນ-ວັງວຽງ ເມືອງຫີນເຫີບ ທີ່ເປັນ ທາງຜ່ານຫລັກ ແລະ ໂຄງການຢາງພາຣາ ເຊີ່ງກຳລັງສ້າງບັນຫາ ສົ່ງກິ່ນເໝັນ ໄປທົ່ວເມື່ອງຫີນເຫີບ ເມື່ອກາງເດືອນທີ່ຜ່ານມາ. ປັດຈຸບັນ ໂຄງການເລົ່ານີ້ ທີ່ຣັຖບານລາວ ອະນຸມັດ ໃຫ້ນາຍທຶນຈີນ ນັ້ນ ກໍລ້ວນແລ້ວແຕ່ ຢູ່ໃນຣະຫວ່າງ ການກໍ່ສ້າງ ທັງໝົດ ເຊີ່ງເປັນໂຕຊີ້ວັດ ວ່າ ຜາບ່ອງ ຄືວັດຖຸດິບ ທີ່ເປັນປັດໃຈ ເຮັດໃຫ້ໂຄງການເຫລົ່ານີ້ສຳເຣັດ. ປະເມີນ ຈາກປະຣິມານ ການໃຊ້ ໃນໂຄງການເຫລົ່ານີ້ ຜາບ່ອງປະເຊີນໜ້າ ມີຄວາມສ່ຽງຕໍ່ການສູນຫາຍ ໃນອານາຄົດອັນໃກ້ນີ້.

ຄໍາເຫັນ (1)
Share

(

Laos, you've more than welcomed those Chinese and now they can do what they want.Please don't complain, besides you're already dead.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Feb 07, 2019 06:17 AM

ເຕັມຫນ້າ