ຈີນປູກພືດຜັກແທນ ກ້ວຍ

ໄມຊູລີ
2019-01-16
ອີແມວລ໌
ຄໍາເຫັນ
Share
ພິມ
ສວນປູກກ້ວຍຂອງ ຈີນ ໃນແຂວງບໍ່ແກ້ວ
ສວນປູກກ້ວຍຂອງ ຈີນ ໃນແຂວງບໍ່ແກ້ວ
RFA/AS

ບໍຣິສັດຈີນ ເຊົາປູກກ້ວຍຢູ່ບ້ານ ດອນສະຫວັນ ເມືອງຕົ້ນເຜີ້ງ ແຂວງບໍ່ແກ້ວຈໍານວນ 1 ພັນປາຍໄຮ່ ເພາະໝົດສັນຍາເຊົ່າ ແລ້ວຫັນໄປເຊົ່າ ທີ່ດິນຂອງຊາວບ້ານ ປູກພືດລົ້ມລຸກເປັນຕົ້ນ: ໝາກນັດ, ຫມາກຟັກ ຫຼື ຫມາກອຶແທນ, ດັ່ງເຈົ້າໜ້າທີ່ ແຂວງບໍ່ແກ້ວ ກ່າວຕໍ່ວິທຍຸ ເອເຊັຽ ເສຣີ ໃນວັນທີ່ 14 ມົກກະຣາ ທີ່ຜ່ານມາວ່າ:

“ສວນກ້ວຍບ້ານເຮົາ ຖືວ່າເພິ່ນຍຸບເລີກ ໝົດແລ້ວເດີ ດຽວນີ້ກໍແມ່ນບໍຣິສັດຈີນ ລົງທຶນ ປູກເປັນໝາກຟັກ ໝາກນັດ, ທາງພໍ່ແມ່ປະຊາຊົນ ກໍເຫັນດີແລ້ວອໍານາດ ການປົກຄອງບ້ານ ກໍເຮັດໃບສເນີ ໃຫ້ທາງເມືອງ ສະເພາະໝາກນັດ ຢູ່ໄດ້ 4-5 ປີ ເພາະເປັນພືດ ຍາວນານ ໝາກຟັກແທ້ປີໃດກໍປີນັ້ນ ຣະດູການນຶ່ງ.”

ທ່ານກ່າວຕື່ມວ່າ ບໍຣິສັດຈີນເຊົ່າທີ່ດິນ ຂອງຊາວບ້ານດອນສະຫວັນ ປູກຫມາກນັດ ແລະໝາກອຶ ທັງໝົດ 818 ໄຮ່, ໄຮ່ລະ 6 ຫາ 8 ແສນກິບ ຕໍ່ປີ, ບໍຣິສັດຈີນຈ້າງຊາວບ້ານ ໃນທ້ອງຖິ່ນ ຈໍານວນ 50 ຄົນຕໍ່ມື້ ໃຫ້ເປັນແຮງງານ, ກັມມະກອນ ດູແລສວນ ໂດຍຈະໄດ້ຮັບເງິນ ເປັນຄ່າຕອບແທນ ຕາມວຽກໜັກ-ເບົາ ຂອງແຕ່ລະຄົນ, ດັ່ງທ່ານກ່າວວ່າ:

“ເພິ່ນໄລ່ໃຫ້ນີ້ເປັນຣາຍວັນ 75 ພັນ ເດືອນນຶ່ງປະມານ 9 ພັນ ເຖິງໝື່ນພັນ ກໍແລ້ວແຕ່ວຽກທີ່ເຮົາເຮັດ ສະບາຍກ່ຽວກັບ ເບິ່ງນໍ້າພົ່ນຢາ ຕ່າງໆ ວຽກໜັກຖືວ່າບໍ່ມີມື້ພັກ ບາງເທື່ອວຽກຈໍາເປັນ ມື້ຄໍ່າມື້ຄືນ ເຮົາໄດ້ເບິ່ງ ເປັນຄົນຂອງເພິ່ນເລີຍ.”

ເຖິງຢ່າງໃດກໍຕາມ ເຈົ້າຫນ້າທີ່ ກໍຍັງກັງວົນນໍາເຣື້ອງວິຖີຊີວິດ ຂອງຊາວບ້ານ ທີ່ເຮັດວຽກນໍາ ບໍຣິສັດຈີນ ທີ່ຍັງບໍ່ມີຄວາມໝັ້ນຄົງຍ້ອນວ່າ ໃນອະນາຄົດນີ້ ບໍຣິສັດ ດັ່ງກ່າວ ອາດຈະຍຸບເລີກໄປອີກ, ຄນະທີ່ ຢູ່ໃນເຂດບ້ານນັ້ນ ຍັງບໍ່ມີວຽກ ທີ່ຈະໃຫ້ເຮັດຮອງຮັບ.

ອິງຕາມຄໍາເວົ້າ ຂອງເຈົ້າໜ້າທີ່ ແຂວງບໍ່ແກ້ວ ຜູ້ດຽວກັນນີ້ ບໍຣິສັດຈີນ ສົ່ງໝາກນັດ ແລະໝາກອຶ ໃນສວນໄປຂາຍໃນປະເທດຈີນ ທັງໝົດ ຍ້ອນວ່າໄດ້ຣາຄາ ສູງກວ່າ. ປັຈຈຸບັນບໍຣິສັດຈີນ ມີສວນຫມາກນັດ ຈໍານວນ 310 ໄຮ່ ແລະຫມາກຟັກ 508 ໄຮ່ ທີ່ບໍຣິສັດເລີ້ມປູກ ມາແຕ່ ທ້າຍປີກາຍ.

ເຕັມຫນ້າ