ເຂື່ອນນໍ້າງຽບ 1 ຊາວບ້ານ ບໍ່ພໍໃຈ ຄ່າຊົດເຊີຍ

ໄມຊູລີ
2018-06-13
ອີແມວລ໌
ຄໍາເຫັນ
Share
ພິມ
ປະຊາຊົນຈາກ ເຂື່ອນນໍ້າງຽບ 1
ປະຊາຊົນຈາກ ເຂື່ອນນໍ້າງຽບ 1
RFA/PN

ປະຊາຊົນ ຜູ້ໄດ້ຮັບຜົນກະທົບ ຈາກເຂື່ອນນໍ້າງຽບ 1 ເມືອງບໍຣິຄັນ ແຂວງບໍຣິຄໍາໄຊ ທີ່ຖຶກໂຍກຍ້າຍ ໄປຢູ່ບ້ານຈັດສັນ ພູມິນໄຊ ບໍ່ພໍໃຈກັບ ຄ່າຊົດເຊີຍ ທີ່ຄນະຈັດສັນ ມອບໃຫ້. ດັ່ງເຈົ້າໜ້າທີ່ ພາກສ່ວນກ່ຽວຂ້ອງ ເຂື່ອນນໍ້າງຽບ 1 ອະທິບາຍວ່າ:

“ນໍ້າງຽບ 1 ນີ້ ຊົດເຊີຍໄປແລ້ວ ແຕ່ວ່າມັນແລ້ວ ມັນກໍບໍ່ແລ້ວ ຍ້ອນວ່າປະຊາຊົນ ມັນ ຍັງຮ້ອງຟ້ອງຂຶ້ນສະພາຢູ່ ຟ້ອງໄປວ່າ ຢາກໄດ້ ຄ່າຊົດເຊີຍ ບໍຣິສັດ ໃນໂຄງການນີ້ ບໍ່ຊົດເຊີຍໃຫ້ ບໍ່ໄດ້ຫົວໜ່ວຍຊົດເຊີຍ ເທົ່ານີ້ ເທົ່ານັ້ນ ຈັງຊິ້ ລັກສນະວ່າ ຢາກໄດ້ດິນຄຶນ ກໍມີຫລາຍ ທີ່ຈິງມັນບໍ່ໄດ້ນອນ ຢູ່ໃນເງື່ອນໄຂ ເຮົາກໍບໍ່ສາມາດຊົດເຊີຍໄດ້ ເປັນພວກໂຄງການ ເຂົາເຈົ້າເນາະ ມັນກໍມີນິຕິກັມ ມັນກໍມີແຈ້ງການ ຂອງ ເຈົ້າແຂວງ ແຈ້ງການຫຍັງຕ່າງໆ  ແຕ່ປະຊາຊົນ ເຂົາເຈົ້າພັດບໍ່ຍອມຫັ້ນນະ.”

ທ່ານກ່າວຕຶ່ມວ່າ ປະຊາຊົນ ທີ່ຍ້າຍເຂົ້າມາຢູ່ ບ້ານຈັດສັນ ພູມິນໄຊ ມີເກືອບ 200 ຄອບຄົວ ມີຂໍ້ຂັດແຍ້ງກັບ ຄນະຈັດສັນເຂື່ອນ ເຊັ່ນ; ຕົວຢ່າງ ກຸ່ມນຶ່ງ ບໍ່ພໍໃຈກັບເຣື້ອງທີ່ ດິນປູກຝັງ ທີ່ທາງໂຄງການຈັດສັນໃຫ້ ຍ້ອນວ່າ ດິນບໍ່ງາມ, ອີກກຸ່ມນຶ່ງ ບໍ່ພໍໃຈນໍາ ຄ່າຊົດເຊີຍ ເພາະນ້ອຍໂພດ ອີກກຸ່ມນຶ່ງ ພັດວ່າ ຢາກໄດ້ດິນບ່ອນເກົ່າຄືນ ເພາະບໍ່ຢາກ ບຸກເບີກພື້ນທີ່ ການປູກພຶດໃໝ່.

ຕໍ່ບັນຫານີ້ ເຈົ້າໜ້າທີ່ ທ່ານນີ້ ກ່າວວ່າ  ທີ່ຜ່ານມາ ທາງການກໍໄດ້ ຈັດຕັ້ງຄນະ ກັມມະທິການ ໄປໄກ່ເກັ່ຍ ກັບຊາວບ້ານແລ້ວ ແລະໄດ້ ພຍາຍາມ ອະທິບາຍ ໃຫ້ເຂົາເຈົ້າ ເຂົ້າໃຈ ຕາມເງື່ອນໄຂ ແລະກົດໝາຍ,  ແຕ່ຊາວບ້ານ ຍັງບໍ່ເຂົ້າໃຈ ແລະ ຍັງຮ້ອງຟ້ອງ ໄປຫາ ສະພາແຂວງ ແລະ ເມືອງ ຊື່ງປັຈຈຸບັນ ບັນຫານີ້ຍັງ ເຈຣະຈາກັນ ບໍ່ໄດ້ເທື່ອ.

ສໍາລັບເຂື່ອນນໍ້າງຽບ 1 ປັຈຈຸບັນ ສ້າງສໍາເຣັດ ໄປແລ້ວກວ່າ 90 ສ່ວນຮ້ອຍ ແລະພ້ອມທີ່ຈະເປີດໃຊ້ ໃນປີ 2019ນີ້:

“ໃກ້ສໍາເຣັດແລ້ວ ຍັງອີກ 5 ເປີເຊັນ 10 ເປີເຊັນ ມັນກໍສໍາເຣັດ ເພາະວ່າເຂົາຕັນນໍ້າ ຕັນເຂື່ອນ ຫຍັງແລ້ວຫັ້ນນະ ຄືຮອງຣັຖມົນຕຣີ ແຕ່ຊຸດແລ້ວນີ້ ກໍລົງໄປເບິ່ງຫັ້ນນະ ເພາະວ່າ ໃນເດືອນ 2 ປິ 2019 ນີ້ ວັນທີ່ 1  ປີ 2019 ນີ້ ເຂົາຈະຕ້ອງໄປເປິດ ນໍາໃຊ້ ໄຟເດ.”

ເຂື່ອນນໍ້າງຽບ 1 ກໍ່ສ້າງມາໄດ້ 4 ປີແລ້ວ ເປັນເຂື່ອນ ຂອງບໍຣິສັດ ຣາຊບູຣີ ປະເທດໄທ ມີເຂື່ອນຂນາດນ້ອຍ 18 ກິໂລວັດ ແລະ ເຂື່ອນໃຫຍ່ 272 ກິໂລວັດ.

ເຕັມຫນ້າ