ທາງຣົຖໄຟລາວ-ຈີນຫາລື ສົ່ງເສີມການທ່ອງທ່ຽວ ໃນລາວ

ໃນໄລຍະຕົ້ນສັບປະດາ ຜ່ານມາ ບໍຣິສັດ ທາງຣົຖໄຟ ລາວ-ຈີນ ຈໍາກັດ ໄດ້ເປີດກອງປະຊຸມປຶກສາຫາລືການສົ່ງເສີມ ຍົກລະດັບຄຸນນະພາບ ການບໍລິການປີແຫ່ງການທ່ອງທ່ຽວລາວ ເພື່ອປັບປຸງການໃຫ້ການບໍລິການຣົຖໄຟ ລາວ-ຈີນ ທີ່ສະດວກ ແລະວ່ອງໄວກ່ວາເກົ່າເພື່ອປະກອບສ່ວນຊຸກຍູ້ສົ່ງເສີມປີທ່ອງທ່ຽວລາວ 2024. ອີງຕາມການຣາຍງານຂອງ China Media Group ເມື່ອວັນທີ 19 ມີນາທີ່ຜ່ານມາ.

ໃນກອງປະຊຸມດັ່ງກ່າວ ທ່ານ ຫຼີວ ຫົງ ຜູ້ອໍານວຍບການໃຫຍ່ ບໍຣິສັດ ທາງຣົຖໄຟ ລາວ-ຈີນ ຈຳກັດ ກ່າວວ່າ ທາງບໍຣິສັດມີຄວາມພ້ອມ ທີ່ຈະປະກອບສ່ວນເຂົ້າໃນການຊຸກຍູ້ ສົ່ງເສີມປີທ່ອງທ່ຽວລາວ 2024 ໂດຍໄດ້ຈັດຊື້ຣົຖໄຟຂະບວນໃໝ່, ເພີ່ມຖ້ຽວຣົຖໄຟແລະເພີ່ມຈຸດຈອດຣົຖໄຟ ພາຍໃນປະເທດລາວ ລວມທັງປັບປຸງການໃຫ້ການບໍລິການ ໃນດ້ານຕ່າງໆ ກ່ອນຮອດໄລຍະບຸນປີໃໝ່ລາ ວທີ່ຈະມາເຖິງນີ້.

ກ່ຽວກັບເຣື່ອງນີ້ ວິທະຍຸເອເຊັຍເສຣີ ໄດ້ຕິດຕໍ່ໄປຫາບໍຣິສັດ ທາງຣົຖໄຟ ລາວ-ຈີນ ຈໍາກັດ ເພື່ອສອບຖາມຂໍ້ມູນເພີ່ມ ແຕ່ເຈົ້າໜ້າທີ່ພາກສ່ວນຮັບຜິດຊອບ ຍັງບໍ່ສະດວກທີ່ຈະເປີດເຜີຍຂໍ້ມູນ ແລະເຈົ້າໜ້າທີ່ຂໍໃຫ້ລໍຖ້າການຖະແຫຼງຂ່າວ ຈາກຜູ້ຮັບຜິດຊອບໂດຍກົງ.

ທາງຜູ້ປະກອບການ ດ້ານການທ່ອງທ່ຽວ ຈໍານວນຫຼາຍໃນລາວທີ່ຢູ່ຕາມເມືອງ ທີ່ຣົຖໄຟລາວ-ຈີນແລ່ນຜ່ານ ຢາກໃຫ້ບໍຣິສັດທາງຣົຖໄຟ ລາວຈີນ ຈຳກັດ ມີການສົ່ງເສີມ ໃຫ້ແກ່ພວກເຂົາເຈົ້າດ້ວຍໂດຍສະເພາະສົ່ງເສີມ ໃຫ້ນັກທ່ອງທ່ຽວທີ່ເດີນທາງດ້ວຍຣົຖໄຟ ລາວ-ຈີນ ໄປໃຊ້ບໍລິການທຸຣະກິຈປະເພດທ່ອງທ່ຽວດ້ານຕ່າງໆ ເປັນຕົ້ນ ໂຮງແຮມ, ເຮືອນພັກ ແລະ ບໍຣິສັດນໍາທ່ຽວໃຫ້ທົ່ວເຖິງຍ້ອນທຸຣະກິຈ ທ່ອງທ່ຽວທີ່ໄດ້ຮັບຜົລປໂຍດຈາກທາງຣົຖໄຟ ລາວ-ຈີນ ກໍມີພຽງແຕ່ກຸ່ມທຸຣະກິຈ ທີ່ຢູ່ໃນເມືອງທ່ອງທ່ຽວສຳຄັນເທົ່ານັ້ນ. ສ່ວນທຸຣະກິຈທ່ອງທ່ຽວ ທີ່ບໍ່ແມ່ນຢູ່ໃນເມືອງໃຫຍ່ເກືອບວ່າ ຈະບໍ່ໄດ້ຮັບຜົລປໂຍດຈາກການເຂົ້າມາຂອງຣົຖໄຟ ລາວ-ຈີນ. ດັ່ງຜູ້ປະກອບການເຮືອນພັກ ທີ່ຢູ່ໃກ້ກັບສະຖານີນາເຕີຍ ທ່ານກ່າວຕໍ່ວິທະ ຍຸເອເຊັຍເສຣີ ໃນວັນທີ 20 ມີນາ ນີ້ວ່າ:

“ບໍ່ມີແຫຼະພວກທ່ອງທ່ຽວຄົນຈີນ ຄົນລາວບໍ່ມີແຫຼະ ມາພັກມາເຊົານ່າ. ເອີໆ ພວກໂຊເຟີ້ຣົຖ ເຂົາເຈົ້າມາຮັບແຂກສົ່ງແຂກ ແລ້ວກໍມານອນຄ້າງຄືນໜຶ່ງໆ ບ່ອນນາເຕີຍບ່ອນຄົນກາຍເດ້. ໄປຫຼວງພຣະບາງໄປວຽງພຸ້ນໝົດ. ໂອໄປບໍ່ແກ້ວໝົດໂອກາພວກຣົຖຕູ້ຫັ້ນແຫຼະ ພັກມາເຊົ່ານຳ.”

ຜູ້ປະກອບການທຸຣະກິຈ ນໍາທ່ຽວຢູ່ແຂວງຫຼວງນໍ້າທາກໍຢາກໃຫ້ບໍຣິສັດ ທາງຣົຖໄຟ ລາວ-ຈີນ ຈຳກັດ ມີການໂຄສະນາໃຫ້ນັກທ່ອງທ່ຽວຈີນ ຫຼື ນັກທ່ອງທ່ຽວລາວທີ່ໃຊ້ບໍລິການຣົຖໄຟ ລາວ-ຈີນ ໃຫ້ມາທ່ຽວແຂວງຫຼວງນໍ້າທາຫຼາຍຂຶ້ນ ເພື່ອເປັນການສົ່ງເສີມໃຫ້ແກ່ຜູ້ປະກອບການ ພາຍໃນແຂວງເຊິ່ງທຸກມື້ນີ້ກໍມີພຽງແຕ່ນັກທ່ອງທ່ຽວ ຈາກຢູໂຣບແລະອາເມຣິກາ ທີ່ເຂົ້າມາໃຊ້ບໍລິການທຸຣະກິຈ ນຳທ່ຽວຢູ່ແຂວງຫຼວງນໍ້າທາ ແລະມີຈຳນວນບໍ່ຫຼາຍ.

ດັ່ງທ່ານກ່າວວ່າ:

“ເຣື່ອງສົ່ງເສີມຫວາ ໂອຍກາຄືເກົ່າຫັ້ນແຫຼະ. ປົກກະຕິຫັ້ນແຫຼະມີຫຼາຍ ມັນກາບໍ່ຫຼາຍດອກ. ບາງທິດກາມີ ມື້ລະທົວຣ໌ປະມານນັ້ນແຫຼະ. ມີທົວຣ໌ໜຶ່ງບໍ່ 2 ທົວຣ໌ກາປະມານນັ້ນ ບໍ່ຫຼາຍນ່າ. ມັນບໍ່ຫຼາຍຄືເກົ່າຄື ແຕ່ກີ້ແຫຼະຈຳນວນໜຶ່ງ ກາມາທາງຊຽງຣາຍກາມີ. ຈຳນວນໜຶ່ງມາທາງຫຼວງພຣະບາງກາມີ ມາທຽງວຽງຈັນກາມີ.”

ສ່ວນຜູ້ປະກອບການ ນໍາທ່ຽວຢູ່ເມືອງໄຊ ແຂວງອຸດົມໄຊ ກ່າວວ່າເຖິງແມ່ນວ່າ ສະຖານີເມືອງໄຊຫາກໍກາຍເປັນສະຖານີຣົຖໄຟ ລາວ-ຈີນ ຂະບວນສາກົລມາແວ່ຮັບສົ່ງຜູ້ໂດຍສານ ແຕ່ຈຳນວນນັກທ່ອງທ່ຽວຈີນແລະລາວທີ່ແວ່ພັກ ທ່ຽວເມືອງໄຊກໍຍັງມີຈຳນວນໜ້ອຍຢູ່ ຈຶ່ງຢາກໃຫ້ບໍຣິສັດທາງຣົຖໄຟ ລາວ-ຈີນ ຈຳກັດມີການໂຄສະນາ ເພື່ອສົ່ງເສີມໃຫ້ນັກທ່ອງທ່ຽວແວ່ພັກ ຢູ່ເມືອງໄຊຫຼາຍຂຶ້ນນໍາດ້ວຍ.

ດັ່ງທີ່ກ່າວວ່າ:

“ແຕ່ກ່ອນຫັ້ນ ມັນຍັງບໍ່ທັນເປີດສາຍຕ່າງປະເທດ ແຕ່ດຽວນີ້ຫັ້ນເປີດແລ້ວກາບໍ່ຫຼາຍປານໃດ ບໍ່ໜ້ອຍບໍ່ຫຼາຍກາພໍໄປມາຢູ່ ສ່ວນຫຼາຍເຮົາຈະບໍລິການຣົຖກາປະມານ ອາທິດໜຶ່ງ 2 ຄະນະ.”

ຜູ້ໂດຍສານຣົຖໄຟທາງ ລາວ-ຈີນ ກໍຢາກໃຫ້ທາງບໍຣິສັດ ທາງຣົຖໄຟ ລາວ-ຈີນ ຈໍາກັດ ມີການປັບປຸງທາງດ້ານການບໍລິການນໍາດ້ວຍ ໂດຍສະເພາະພະນັກງານ ທີ່ຢູ່ປະຈຳສະຖານີຣົຖໄຟ ລາວ-ຈີນ ບາງຄົນທີ່ມັກບໍລິການ ແກ່ຜູ້ໂດຍສານແບບບໍ່ເທົ່າທຽມກັນ ເປັນຕົ້ນວ່າພະນັກງານທີ່ອອກປີ້ໂດຍສານ ມັກໃຫ້ບໍລິການດີແກ່ຜູ້ໂດຍສານ ທີ່ຕົນເອງຮູ້ຈັກ ຫຼືເປັນໝູ່ກັນເທົ່ານັ້ນ. ສ່ວນຜູ້ໂດຍສານທົ່ວໄປ ບໍ່ໄດ້ຮັບການບໍລິການທີ່ດີ ແລະບາງຄັ້ງກໍຖືກພະນັກງານຮ້າຍໃສ່ ຫຼືເວົ້າຈາບໍ່ດີໃສ່.

ດັ່ງຍານາງກ່າວວ່າ:

“ບາງຄົນເນາະເລືອກບໍລິການວ່າຊັ້ນສາ ຄົນສະນິດກາບໍລິການດີແມ່ນຄົນ ບໍ່ສະນິດກາບໍລິການ ທັມມະດາບໍ່ມີການເທົ່າທຽມຊີ້ນ່າ ມີແຕ່ວ່າຕອນອອກປີ້ຫັ້ນແຫຼະ ບາງຄົນບໍ່ແມ່ນເວົ້າໝົດ.”

ຜູ້ໂດຍສານທາງຣົຖໄຟ ລາວ-ຈີນ ອີກທ່ານໜຶ່ງກ່າວວ່າ ສໍາລັບປີທ່ອງທ່ຽວລາວ 2024 ກໍບໍ່ໄດ້ຄາດຫວັງຢາກໃຫ້ບໍຣິສັດທາງຣົຖໄຟ ລາວ-ຈີນມີການຫລຸດຄ່າປີ້ໂດຍສານລົງ ແຕ່ຫວັງວ່າຈະບໍ່ມີການປັບລາຄາ ປີ້ໂດຍສານຂຶ້ນ. ນອກນີ້ກໍຕ້ອງການໃຫ້ມີການ ເພີ່ມສິ່ງອຳນວຍຄວາມສະດວກ ໃນຕູ້ໂດຍສານລວມທັງພາຍໃນສະຖານີຣົຖໄຟນໍາດ້ວຍ.

ດັ່ງທ່ານກ່າວວ່າ:

“ບໍ່ໃຫ້ເພີ່ມຂຶ້ນດອກ ແຕ່ວ່າຢາກໃຫ້ເພີ່ມສິ່ງອໍານວຍຄວາມສະດວກ ຫຼາຍກ່ວາ ຕາມທີ່ເປັນລາຄາເກົ່າກາຍັງໂອເຄຢູ່ຫັ້ນນ່າ. ຄັນວ່າເອົາຕາມຫຼັກການຂອງເງິນເຟີ້ ຂຶ້ນມາ ເພາະວ່າໄປຫຼວງພຣະບາງ ຕະຫຼອດ.”

ປັດຈຸບັນທາງຣົຖໄຟ ລາວ-ຈີນ ມີຈໍານວນຜູ້ໂດຍສານ ທັງໝົດ 30 ລ້ານຄົນ ແລະຂົນສົ່ງສິນຄ້າ ຫຼາຍກ່ວາ 34 ລ້ານຕັນ ໂດຍສະເພາະ ໃນປະເທດລາວຈຳນວນຜູ້ໂດຍສານ ໄດ້ເພີ່ມຂຶ້ນຈາກ 720 ຄົນຕໍ່ມື້ເປັນປະມານ 12,800 ຄົນຕໍ່ມື້. ໃນຂະນະທີ່ຈຳນວນຜູ້ໂດຍສານ ຣົຖ ໄຟ ລາວ-ຈີນ ຂະບວນສາກົລ ມີຈຳນວນຫຼາຍກ່ວາ 155,000 ຄົນ. ອີງຕາມການຣາຍງານ ຂອງສຳນັກຂ່າວ China Daily ເມື່ອບໍ່ດົນມານີ້.