ຣົດໄຟເຈາະອຸໂມງສຸດທ້າຍ ເປີດທ້າຍປີ ຍັງບໍ່ແນ່

ໄຊຍາ
2021-06-10
Share
ຣົດໄຟເຈາະອຸໂມງສຸດທ້າຍ ເປີດທ້າຍປີ ຍັງບໍ່ແນ່ ການກໍ່ສ້າງທາງຣົດໄຟ ລາວ-ຈີນ ທີ່ ເຈາະອຸໂມງສຸດທ້າຍ ໄດ້ສຳເຣັດແລ້ວ ຊຶ່ງເຊື່ອມຕໍ່ຣະຫວ່າງ ຊາຍແດນຈີນ ກັບ ດ່ານສາກົລບໍ່ເຕັນ ແຂວງຫຼວງນໍ້າທາ (ຮູບຖ່າຍ: ມິຖຸນາ 2019)
File photo: RFA

ມາຮອດປັດຈຸບັນການກໍ່ສ້າງທາງຣົດໄຟ ລາວ-ຈີນ ສາມາດເຈາະອຸໂມງສຸດທ້າຍ ໄດ້ສຳເຣັດແລ້ວ ເຊິ່ງອຸໂມງດັ່ງກ່າວ ເຊື່ອມຕໍ່ຣະ ຫວ່າງຊາຍແດນຈີນ ກັບດ່ານສາກົລບໍ່ເຕັນ ແຂວງຫຼວງນໍ້າທາ ມີຄວາມຍາວ 9.5 ກິໂລແມັດ. ໂດຍໄດ້ເຈາະອຸໂມງຊອດສຳເຣັດ ເມື່ອວັນທີ 05 ມິຖຸນາ ຜ່ານມາ. ອີງຕາມການຣາຍງານຂອງ ທ່ານ ມ່າ ໂຢວສຽງ ເຈົ້າໜ້າທີ່ ການຣົດໄຟຂອງປະເທດຈີນ ເມື່ອວັນທີ 07 ມິຖຸນາ ປີ 2021 ນີ້.

ກ່ຽວກັບການເຈາະອຸໂມງ ດັ່ງກ່າວນີ້ ວິທຍຸເອເຊັຽເສຣີ ພຍາຍາມຕິດຕໍ່ຫາເຈົ້າໜ້າທີ່ ຄຸ້ມຄອງທາງຣົດໄຟລາວ-ຈີນ ປະຈຳແຂວງ ຫຼວງນໍ້າທາ ເພື່ອຖາມເຖິງຣາຍລະອຽດ ເພີ່ມຕື່ມ ແຕ່ທ່ານຍັງບໍ່ສາມາດໃຫ້ຂໍ້ມູນໃດໆ ໄດ້ເທື່ອ.

ໃນຂນະດຽວກັນ ການກໍ່ສ້າງສະຖານີຣົດໄຟ ລາວ-ຈີນ ໃນຫຼາຍແຂວງຂອງລາວ ກໍມີຄວາມຄືບໜ້າຫຼາຍ ມາຮອດປັດຈຸບັນການ ກໍ່ສ້າງສະຖານີຫຼາຍແຫ່ງ ເປັນຕົ້ນສະຖານີກາສີ ແຂວງວຽງຈັນ ໄດ້ມີການຕິດຕັ້ງປ້າຍຫຼັກ ປະຈຳສະຖານີພ້ອມທັງມີການຕົບແຕ່ງ ໂຕອາຄານໂດຍສານໃກ້ຈະສຳເຣັດແລ້ວ. ດັ່ງເຈົ້າໜ້າທີ່ກ່ຽວຂ້ອງ ເມືອງກາສີ ແຂວງວຽງຈັນ ໄດ້ກ່າວຕໍ່ເອເຊັຽເສຣີ ເມື່ອວັນທີ 09 ມິຖຸນາ ວ່າ:

"ເມືອງເຮົານີ້ມີບ່ອນນຶ່ງ ສະຖານີຣົດໄຟ ຢູ່ໜອງບົວທອງ ອັນນີ້ເພິ່ນກຳລັງສ້າງຢູ່ດຽວນີ້ນະ ກາຍໄປກາຍມາຢູ່ຫັ້ນເຮົາໄດ້ເບິ່ງສື່ໆ ສຳເຣັດຫັ້ນຂນາດໃດແລ້ວ ເຮົາຍັງບໍ່ຮູ້ເທື່ອ."

ສ່ວນການກໍ່ສ້າງສະຖານີຣົດໄຟ ລາວ-ຈີນ ຢູ່ພາຍໃນແຂວງອຸດົມໄຊ ກໍມີຄວາມຄືບໜ້າ ຫຼາຍມີທັງການຕິດປ້າຍສະຖານີ ແລະ ຕິດຕັ້ງຣະບົບໄຟຟ້າຕ່າງໆ ພາຍໃນສະຖານີຣົດໄຟ ແຕ່ລະແຫ່ງ ເຊິ່ງທາງບໍຣິສັດຜູ້ຮັບເໝົາເອງ ກໍໄດ້ສືບຕໍ່ເຮັດວຽກຢ່າງໜັກ ເພື່ອໃຫ້ສຳເຣັດໃນທ້າຍປີນີ້. ດັ່ງເຈົ້າໜ້າທີ່ຜແນກ ໂຍທາທິການ ແລະ ຂົນສົ່ງແຂວງອຸດົມໄຊ ໄດ້ກ່າວວ່າ:

"ຕາມສັງເກດດ້ວຍຕາເປົ່າເນາະ ກາຍໄປກາຍມາເບິ່ງເຫັນການກໍ່ສ້າງ ໂຄງຮ່າງພື້ນຖານຂອງຣົດໄຟນີ້ນ່າ ເຮັດໄດ້ຫຼາຍແລ້ວນ່າ ຊິເອົາເຄື່ອງມາໃຊ້ບໍຣິການແລ້ວ."

ທາງດ້ານເຈົ້າໜ້າທີ່ຄຸ້ມຄອງ ທາງຣົດໄຟລາວ-ຈີນ ຢູ່ແຂວງຫຼວງພຣະບາງ ທີ່ຂໍສງວນຊື່ແລະສຽງ ໄດ້ກ່າວວ່າສຳລັບການກໍ່ສ້າງ ສະຖານີຣົດໄຟລາວ-ຈີນ ຢູ່ແຂວງຫຼວງພຣະບາງ ກໍມີຄວາມຄືບໜ້າ ຫຼາຍເປັນຕົ້ນການກໍ່ສ້າງ ສະຖານີຫຼວງພຣະບາງ ເຊິ່ງເປັນ ສະຖານີໃຫຍ່ ຂອງແຂວງຫຼວງພຣະບາງ ກໍມີທັງການຕິດປ້າຍຫຼັກ ຮວມທັງວຽກຕົບແຕ່ງຕິດຕັ້ງ ໄຟຟ້າ ພາຍໃນໂຕອາຄານ ໂດຍສານກໍມີຄວາມຄືບໜ້າຫຼາຍ ເຊິ່ງເຊື່ອວ່າຈະສຳເຣັດກ່ອນ ເດືອນທັນວາປີນີ້ ຢ່າງແນ່ນອນ.

ສ່ວນວຽກງານກ່ຽວກັບ ການຝຶກອົບຮົມບຸຄລາກອນ ທີ່ຈະປະກອບໃສ່ການຄຸ້ມຄອງ ແລະ ດຳນີນການຄວບຄຸມຣົດໄຟນັ້ນທາງ ເຈົ້າໜ້າທີ່ ບໍຣິສັດ ທາງຣົດໄຟລາວ-ຈີນ ຈຳກັດຜູ້ນຶ່ງຂໍ ສງວນຊື່ແລະສຽງ ໄດ້ກ່າວຕໍ່ເອເຊັຽເສຣີວ່າ:

ການຝຶກອົບຮົມບຸຄລາກອນດັ່ງກ່າວ ຈະສຳເຣັດຕາມແຜນການໃນປີນີ້ ພ້ອມທັງສາມາດບັນຈຸເຂົ້າເຮັດວຽກຄຸ້ມຄອງ ແລະດຳເນີນການ ຄວບຄຸມຣົດໄຟໄດ້ຢ່າງແນ່ນອນ ໂດຍຈະເພິ່ງພາ ບຸຄລາກອນຈາກຈີນ ເຂົ້າມາຊ່ອຍໜ້ອຍທີ່ສຸດ. ຍ້ອນການ ຝຶກອົບຮົມບຸຄລາກອນ ໃນຊຸດທີ 1, 2 ແລະ 3 ໃກ້ຈະສຳເຣັດແລ້ວ ເຫຼືອພຽງແຕ່ການຝຶກອົບຮົມ ໃນຊຸດທີ 4 ທີ່ຕ້ອງເລື່ອນກຳນົດອອກໄປກ່ອນ ຍ້ອນມີ ການແຜ່ຣະບາດຂອງເຊື້ອ ໂຄວິດ-19 ເຊີ່ງໂດຍຮວມຈະບໍ່ມີຜົລກະທົບ ຕໍ່ວຽກງານການຄຸ້ມຄອງ ແລະ ດຳເນີນການຄວບຄຸມ ທາງຣົດໄຟ ລາວ-ຈີນ ຢ່າງແນ່ນອນ.

ຂນະດຽວກັນກໍເກີດມີ ເຫດການບຸຄລາກອນ ທີ່ຜ່ານການສັມພາດ ແລະ ຕຽມເຂົ້າຝຶກອົບຮົມ ບໍຣິສັດທາງຣົດໄຟ ລາວ-ຈີນ ຈຳກັດ ໃນຊຸດທີ 4 ບາງຄົນກໍໄດ້ຂໍລາອອກ ໄປຈາກການ ຝຶກອົບຮົມດັ່ງກ່າວແລ້ວ ຈຳນວນນຶ່ງ ຍ້ອນເຫັນວ່າມີຄວາມຫຼ້າຊ້າເກີນໄປ ແລະ ບຸຄລາກອນອີກຈຳນວນນຶ່ງ ທີ່ມາຈາກຕ່າງແຂວງກໍຂໍລາອອກ ຍ້ອນບໍ່ມີເງິນສຳລັບເຊົ່າຫ້ອງພັກຢູ່ ນະຄອນຫຼວງວຽງຈັນ ເພື່ອລໍຖ້າ ການຝຶກອົບຮົມ ດັ່ງກ່າວ.

ເຖິງແມ່ນວ່າເຫຼືອເວລາ ປະມານ 6 ເດືອນ ແລະ ໂຄງການທາງຣົດໄຟລາວ-ຈີນ ມີກຳນົດເປີດໃຊ້ໃນເດືອນທັນວາ ປີນີ້ ແຕ່ຊາວລາວ ສ່ວນນຶ່ງຍັງບໍ່ມີແຜນ ໃຊ້ບໍຣິການເສັ້ນທາງຣົດ ໄຟ ລາວ-ຈີນ ເທື່ອເນື່ອງຈາກຍັງລັງເລໃຈ ກ່ຽວກັບສະຖານະການໂຄວິດ-19 ຢູ່ລາວ ແລະ ບໍ່ໝັ້ນໃຈວ່າໂຄວິດ-19 ຈະຄວບຄຸມໄດ້ ໃນຕົ້ນປີໜ້າບໍ່ ດັ່ງຊາວບ້ານຢູ່ ນະຄອນຫຼວງ ວຽງຈັນໄດ້ກ່າວວ່າ:

"ຍັງບໍ່ໄດ້ຄິດເທືຶ່ອ ເພາະວ່າຊ່ວງນີ້ພຍາດຣະບາດເດ້ ຄັນວ່າພຍາດຍັງແບບຊີ້ກະຄືຊິບໍ່ໄດ້ໄປໃສ ຫັ້ນນ່າ ເພາະວ່າໂຄວິດເດ້."

ສ່ວນຊາວບ້ານຢູ່ແຂວງຫຼວງພຣະບາງ ໄດ້ກ່າວວ່າ ຕົນເອງກໍຍັງລັງເລໃຈ ທີ່ຈະໃຊ້ບໍຣິການ ຣົດໄຟດັ່ງກ່າວຢູ່ ຍ້ອນຍັງບໍ່ໝັ້ນໃຈ ໃນສະຖານະການ ຂອງການແຜ່ຣະບາດເຊື້ອ ໂຄວິດ-19 ຢູ່ລາວ ແຕ່ຖ້າສະຖານະການ ບາງລົງກໍຈະໃຊ້ບໍຣິການ ຢ່າງແນ່ນອນ.

"ຍັງບໍ່ຮູ້ເທື່ອໂອ່, ກະບໍ່ຮູ້ວ່າຊິເປັນແນວໃດເນາະ ເບິ່ງສະຖານະການນີ້ເຮົາກະຄາດເດົາ ບໍ່ໄດ້ບາດນຶ່ງແລ້ວມັນປ່ຽນຢູ່ເດ້ ສະຖານະ ການທົ່ວໂລກມັນກະເປັນແບບນີ້ຢູ່."

ເຖິງຢ່າງໃດກໍດີ ຍັງມີຊາວລາວ ຈຳນວນນຶ່ງ ທີ່ມີຄວາມຮູ້ສຶກຕື່ນເຕັ້ນຕໍ່ ໂຄງການດັ່ງກ່າວ ແລະມີແຜນທີ່ຈະໃຊ້ບໍຣິການຣົດໄຟ ລາວ-ຈີນ ສຳລັບການເດີນທາງ ໄປແຂວງຕ່າງໆ ໃນລາວ ຮວມເຖີງໄປປະເທດຈີນ ນໍາດ້ວຍ. ດັ່ງຊາວບ້ານຢູ່ແຂວງວຽງຈັນ ໄດ້ກ່າວວ່າ:

"ເພິ່ນໃຊ້ບໍຣິການກະໃຊ້ແລ້ວ ກະເບິ່ງເພີ່ນເປີດພຸ້ນແລ້ວໄປວຽງຈັນ ກະບໍ່ໄດ້ນອນ ໄປ-ກັບ ກະຢາກໃຫ້ດີຂື້ນຫຼາຍຫັ້ນແຫຼະເນາະ ກະຢາກໃຫ້ດີໃຫ້ຈະເຣີນໄປ."

ມາຮອດປັດຈຸບັນໂຄງການ ສ້າງທາງຣົດໄຟລາວ-ຈີນ ຄວາມຍາວ 422,4 ກິໂລແມັດ ມີຄວາມຄືບໜ້າ 94% ແລະ ການວາງລາງ ຣົດໄຟ ຈາກນະຄອນຫຼວງວຽງຈັນ ໄປຫາສະຖານີ ບໍ່ເຕັນ ແຂວງຫຼວງນໍ້າທາ ດ່ານຊາຍແດນລາວ-ຈີນ ກໍມີຄວາມຄືບໜ້າຫຼາຍ ກວ່າ 80%.

ເຖີງແມ່ນວ່າໂຄງການກໍ່ສ້າງ ມີຄວາມຄືບໜ້າ ແຕ່ເມື່ອທຽບໃສ່ເວລາທີ່ເຫຼືອ ໂດຍສະເພາະເຈົ້າໜ້າທີ່ ຂອງບໍຣິສັດກໍ່ສ້າງທາງຣົດໄຟ ລາວ-ຈີນ ໄດ້ອອກມາໃຫ້ສັມພາດ ເມື່ອຕົ້ນປີຜ່ານມາວ່າ ການຈ່າຍຄ່າຊົດເຊີຍ ສີ່ງກີດຂວາງເປັນອຸປສັກ ຕໍ່ການກໍ່ສ້າງທີ່ຄາດໝາຍ ໃຫ້ສຳເຣັດ ໃນທ້າຍປີນີ້ໂດຍສະເພາະ ໃນເຂດ ນະຄອນຫຼວງວຽງຈັນ.

ໂຄງການລົດໄຟລາວ-ຈີນ ເລີ່ມລົງມືກໍ່ສ້າງໃນວັນທີ 25 ທັນວາ 2016, ຄວາມຍາວທັ້ງຫມົດ 426.5 ກິໂລແມັດ, ສະເລັ່ຽຄວາມໄວ 160-200 km/h, ໄລຍະເວລາກໍ່ສ້າງ 5 ປີ ຄາດວ່າທ້າຍປີ 2021 ຈະໄດ້ນຳໃຊ້ຢ່າງເປັນທາງການ, ມູນຄ່າຂອງໂຄງການ 37.4 ຕື້ຢວນ ຫຼື ປະມານ 6000 ລ້ານໂດລາ ສະຫະລັດ, ຝ່າຍລາວຖືຮຸ້ນ 30%, ຝ່າຍຈີນຖືຮຸ້ນ 70%, ກຳນົດເອົາ 40% ຂອງມູນຄ່າ ການລົງທຶນ ເປັນເງິນຕົ້ນທຶນ, ສ່ວນອີກ 60% ແມ່ນກູ້ຢືມຈາກທະນາຄານ ຂາເຂົ້າ-ຂາອອກ ສປ ຈີນ ດ້ວຍດອກເບັ້ຽນະໂຍບາຍ; ໃນມູນຄ່າ 5,986 ລ້ານໂດລາ ສະຫະຣັດນັ້ນ, ຣັຖບານລາວ ລົງທຶນ 730 ລ້ານໂດລາ ສະຫະຣັດ ຫຼື ເທົ່າກັບ 12% ຂອງມູນຄ່າ ໂຄງການ, ຊຶ່ງຣັຖບານລາວອອກເງິນຕົວຈິງ 250 ລ້ານໂດລາສະຫະຣັດ ໃນໄລຍະເວລາ 5 ປີ (ປີລະ 50 ລ້ານໂດລາ ສະຫະຣັດ) ແລະ ອີກຈໍານວນ 480 ລ້ານໂດລາ ສະຫະຣັດ ແມ່ນຣັຖບານຈີນ ໃຫ້ການກູ້ຢືມ ແບບພິເສດ.

ຄໍາເຫັນ (0)

ເບິ່ງຄວາມເຫັນທັງໝົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ