ຜູ້ປະກອບການ ທຸລະກິດທ່ອງທ່ຽວຊາຍແດນ ລາວ-ຈີນ ແຂວງຫຼວງນໍ້າທາ ຍັງຂາດລາຍໄດ້

ປັດຈຸບັນຜູ້ປະກອບການທຸລະກິດ ດ້ານການທ່ອງທ່ຽວຢູ່ເຂດຊາຍແດນ ລາວ-ຈີນ ໃນແຂວງຫຼວງນໍ້າທາໂດຍສະເພາະຢູ່ເຂດບ້ານ ບໍ່ເຕັນ ແລະ ບ້ານໄກ້ຄຽງກຳລັງປະສົບບັນຫາ ເລື່ອງຂາດລາຍໄດ້ຈາກນັກທ່ອງທ່ຽວທີ່ໂດຍສານມາກັບລົດໄຟ ລາວ-ຈີນ ທັງຜູ້ເດີນທາງຈາກລາວໄປຈີນ ແລະ ຈາກຈີນເຂົ້າມາລາວເນື່ອງຈາກວ່ານັກທ່ອງທ່ຽວສ່ວນໃຫຍ່ ບໍ່ໄດ້ແວ່ພັກຢູ່ເຂດຊາຍແດນ ແລະ ມີແຕ່ເດີນທາງຜ່ານໄປ. ເຮັດໃຫ້ຜູ້ປະກອບການຫຼາຍຄົນ ບໍ່ໄດ້ຮັບລາຍໄດ້ຕາມທີ່ການຄາດຄະເນວ່າ ໂຄງການກໍ່ສ້າງທາງລົດໄຟ ລາວ-ຈີນ ຈະສ້າງລາຍໄດ້ໃຫ້ແກ່ພວກເຂົາເຈົ້າ. ດັ່ງພະນັກງານຢູ່ເຮືອນພັກ ໃນເຂດບ້ານບໍ່ເຕັນກ່າວຕໍ່ວິທຍຸເອເຊັຽເສຣີ ໃນວັນທີ 20 ສິງຫານີ້ວ່າ:

“ບໍ່ມີ ໆ ຊ່ວງນີ້ບໍ່ມີແຂກເຂົາຂີ່ລົດໄຟໄປເລີຍ ໄປຈີນເລີຍບາງເທື່ອ ເຂົາກາພັກຢູ່ນີ້ບາງເທື່ອ ເຂົາກາພັກຢູ່ແຖວແຄມດ່ານລາວຫັ້ນ.”

ເຈົ້າຂອງເຮືອນພັກອີກແຫ່ງໜຶ່ງ ທີ່ຢູ່ບໍ່ໄກຈາກເຂດບ້ານບໍ່ເຕັນກ່າວວ່າ ສໍາລັບນັກທ່ອງທ່ຽວທີ່ໂດຍສານມາກັບລົດໄຟ ລາວ-ຈີນ ແຕ່ນະຄອນຫຼວງວຽງຈັນ ຫຼືແຂວງຫຼວງພະບາງ ທີ່ເດີນທາງໄປປະເທດຈີນນັ້ນກໍ່ບໍ່ເຄີຍແວ່ພັກຄ້າງຄືນຢູ່ເຂດຊາຍແດນ ຈຶ່ງເຮັດໃຫ້ຜູ້ປະກອບການຫຼາຍຄົນ ບໍ່ມີລາຍໄດ້ນໍານັກທ່ອງທ່ຽວກຸ່ມດັ່ງກ່າວເຊິ່ງກໍ່ມີພຽງແຕ່ຄົນລາວ ຈຳນວນໜຶ່ງທີ່ເຂົ້າມາພັກອາໄສ ແບບຊົ່ວຄາວ. ດັ່ງທ່ານກ່າວວ່າ:

“ຊິແມ່ນໂອໆ ໄປຈີນເຂົາກາເຂົ້າໄປຈີນເລີຍແຫຼະມັນກາໄກ້ໆ ນີ້ເອີມີໄລຍະ 2-3 ມື້ດຽວນີ້ບໍ່ມີແລ້ວ 2-3 ມື້ກ່ອນຫັ້ນມີຢູ່ສ່ວນຫຼາຍມີແຕ່ຄົນລາວແຫຼະ ເຂົາອອກາຊິໂນຕົ້ນເຜີ້ງມາແລ້ວກໍເຂົາມາພັກ.”

ຜູ້ປະກອບການບໍລິສັດນໍາທ່ຽວ ຢູ່ເຂດບ້ານ ບໍ່ເຕັນ ກ່າວຢືນຢັນວ່ານັກທ່ອງທ່ຽວ ເດີນທາງດ້ວຍລົດໄຟ ລາວ-ຈີນ ທີ່ມີປາຍທາງໄປປະເທດຈີນນັ້ນກໍ່ບໍ່ຢາກແວ່ພັກຄ້າງຄືນ ຢູ່ເຂດຊາຍແດນ ລາວ-ຈີນ. ຍ້ອນເປັນການເສັຍເວລາເດີນທາງຂອງພວກເຂົາເຈົ້າ ແລະ ແມ່ນແຕ່ນັກທ່ອງທ່ຽວຈີນທີ່ເດີນທາງ ເຂົ້າມາລາວຜ່ານທາງດ່ານສາກົນບໍ່ເຕັນ ກໍ່ບໍ່ເຄີຍແວ່ພັກເຊັ່ນດຽວກັນມີແຕ່ມຸ້ງໜ້າ ໄປແຂວງຫຼວງພະບາງ ຫຼື  ນະຄອນຫຼວງວຽງຈັນທັນທີ. ດັ່ງທ່ານກ່າວວ່າ.

“ເຂົ້າຈີນໝົດໆ ບໍ່ພັກບໍ່ເຕັນບໍ່ມີຫຍັງເຂົາບໍ່ຢາກເສັຍເວລາເຂົາເຂົາເຂົ້າຈີນ ໝົດຄົນຈີນເຂົ້າຫຼາຍຄົນຈີນເຂົ້າມາສ່ວນຫຼາຍເຂົ້າແຕ່ວຽງບໍ່ພັກບໍ່ເຕັນ.”

ນັກທ່ອງທ່ຽວທີ່ມັກເດີນທາງຈາກລາວ ໄປຈີນດ້ວຍລົດໄຟລາວ-ຈີນກ່າວວ່ານັກທ່ອງທ່ຽວ ສ່ວນໃຫຍ່ກໍ່ມັກເດີນທາງເຂົ້າປະເທດຈີນໂດຍກົງແບບບໍ່ແວ່ພັກ ຢູ່ເຂດບໍ່ເຕັນ ແຂວງຫຼວງນໍ້າທາເນື່ອງຈາກວ່າຢູ່ເຂດດັ່ງກ່າວຍັງບໍ່ມີສີ່ງທີ່ໜ້າດຶງດູດ ໃຫ້ເກີດການທ່ອງທ່ຽວພໍປານໃດຈຶ່ງບໍ່ຢາກເສັຍເວລາເພີ່ມຕື່ມ. ດັ່ງນາງກ່າວວ່າ:

“ເຮົາຂື້ນຈາກສະຖານີວຽງຈັນ ໄປລົງບໍ່ເຕັນແລ້ວໄປຕໍ່ດ່ານບໍ່ຫານແລ້ວ ກໍ່ໄປຫາສິບສອງປັນນາເລີຍ. ມັນບໍ່ໄດ້ມີອີ່ຫຍັງທ່ຽວຫຼາຍຢູ່ບໍ່ເຕັນ. ສ່ວນຫຼາຍແມ່ນເຮົາຜ່ານດ່ານໄປຈີນສື່ໆ ຈະບໍ່ໄດ້ຫຼີ້ນຫຍັງຢູ່ບໍ່ເຕັນມັນບໍ່ມີອັນຫຼີ້ນ.”

ເຈົ້າໜ້າທີ່ພະແນກຖະແຫຼງຂ່າວ ວັດທະນາທໍາ ແລະ ທ່ອງທ່ຽວ ແຂວງຫຼວງນໍ້າທາກ່າວວ່າ ຈາກການຮີບໂຮມຂໍ້ມູນການທ່ອງທ່ຽວແຕ່ຕົ້ນປີ 2024 ເປັນຕົ້ນມາກໍ່ເຫັນວ່ານັກທ່ອງທ່ຽວ ທີ່ເດີນທາງດ້ວຍລົດໄຟ ລາວ-ຈີນ ເພື່ອຂ້າມແດນໄປຈີນນັ້ນກໍ່ມີບາງສ່ວນທີ່ໄດ້ແວ່ພັກ ທ່ຽວຢູ່ແຂວງຫຼວງນໍ້າທາແລ້ວຈຶ່ງຄ່ອຍອອກເດີນທາງຕໍ່ແຕ່ຍັງບໍ່ສາມາດລາຍງານຕົວເລກ ຢ່າງຄັກແນ່ໄດ້ເທືອ່. ດັ່ງຍານາງກ່າວວ່າ.

“ເບິ່ງຕາມສະຖິຕິນັກທ່ອງທ່ຽວແຕ່ລະເດືອນ ມັນກໍ່ພໍມີຢູ່ມີນັກທ່ອງທ່ຽວພັກແຮມ ມີນັກທ່ອງທ່ຽວຜ່ານດ່ານນັກທ້ອງທ່ຽວບາງເທື່ອ ມັນເປັນຖ້ຽວລົດທີ່ວ່າອອກແລງບາງເທື່ອ ເຂົາເຈົ້າກາໄປເລີຍບາງຄົນທີ່ວ່າມີຈຸດປະໝາຍປາຍທາງທີ່ວ່າ ຈະມາແວ່ນໍ້າທາເຂົາເຈົ້າກາແວ່ກ່ອນມີທັງລາວ ທັງຈີນນັກທ່ອງທ່ຽວສາກົນ.”

ສໍລັບປະເທດທີ່ໄດ້ຮັບຜົນປະໂຫຍດ ຈາກໂຄງການເສັ້ນທາງລົດໄຟ ລາວ-ຈີນ ຫຼາຍທີ່ສຸດກໍ່ແມ່ນປະເທດຈີນທີ່ເປັນເຈົ້າຂອງແນວຄິດໂຄງການ ດັ່ງກ່າວເຊິ່ງບັນດາທຸລະກິດປະເພດຕ່າງໆ ຂອງຈີນທີ່ຢູ່ຕາມເສັ້ນທາງລົດໄຟ ລາວ-ຈີນ ກໍ່ມັກໄດ້ຮັບຜົນປະໂຫຍດເລື້ອຍໆ ທັງການຂົນສົ່ງສິນຄ້າ ແລະ ການໂດຍສານຂອງນັກທ່ອງທ່ຽວ.

ຫຼ້າສຸດມີຂໍ້ມູນລາຍງານວ່າ ນັບແຕ່ເດືອນມັງກອນ 2024 ເປັນຕົ້ນມານັກທ່ອງທ່ຽວທີ່ເດີນທາງເຂົ້າ-ອອກ ຢູ່ສະຖານີບໍ່ຫານເຊິ່ງ ເປັນສະຖານີລົດໄຟໃນຈີນທີ່ເຊື່ອມຕໍ່ກັບສະຖານີບໍ່ເຕັນ ຂອງລາວມີຈຳນວນທັງໝົດ 1,66 ລ້ານຄົນທີ່ມາຈາກ 101 ປະທດ. ໃນນັ້ນແມ່ນນັກທ່ອງທ່ຽວຕ່າງປະເທດຈຳນວນ 676,000 ຄົນໂດຍຈຳນວນຜູ້ໂດຍສານທີ່ເດີນທາງເຂົ້າປະເທດຈີນ ດ້ວຍລົດໄຟ ລາວ-ຈີນ ຫຼາຍທີ່ສຸດແມ່ນຄົນລາວ, ຄົນໄທ ແລະ ຄົນມາເລເຊັຍ ທີ່ເດີນທາງເຂົ້າໄປຍັງເຂດຕ່າງໆ ຂອງຈີນທີ່ຢູ່ຕາມເສັ້ນທາງລົດໄຟ ລາວ-ຈີນ ໂດຍສະເພາະແຂວງຢຸນນານ.