ຂໍ້ຕົກລົງແລະວິນັຍ ຂອງກະຊວງ ຊັພຍາກອນ

ຈໍາປາທອງ
2021-06-10
Share
ຂໍ້ຕົກລົງແລະວິນັຍ ຂອງກະຊວງ ຊັພຍາກອນ ໂຕຢ່າງ ຊາວບ້ານຊຽງດາ ເມືອງໄຊເສດຖາ ນະຄອນຫຼວງວຽງຈັນ ທີ່ມີຂໍ້ຂັດແຍ່ງທີ່ດິນ ກັບ ບໍຣິສັດ ແລະ ອີກຫຼາຍໆແຫ່ງ ໃນທົ່ວປະເທດ ທີ່ແກ້ບໍ່ຕົກ ຈົນກາຍເປັນ ບັນຫາຊໍາເຮື້ອ.
ນັກຂ່າວພົລເມືອງ

ກະຊວງຊັພຍາກອນທໍາມະຊາດ ແລະ ສິ່ງແວດລ້ອມ ອອກຂໍ້ຕົກລົງ ວ່າດ້ວຍຂໍ້ຫ້າມ ແລະວິນັຍຂອງພະນັກງານ-ຣັຖກອນຂແນງ ການຂອງຕົນ ໃນມື້ວັນທີ 3 ມິຖຸນາ 2021 ເພື່ອ ຍົກສູງໜ້າທີ່ ຄວາມຮັບຜິດຊອບ ຕໍ່ການປະຕິບັດໜ້າທີ່ ການເມືອງ, ເປັນແບບ ຢ່າງ, ມີຣະບຽບວິນັຍ, ມີຈັນຍາບັນ ຈັນຍາທັມ ຮັບໃຊ້ປະຊາຊົນ ດ້ວຍຄວາມໂປ່ງສັຍ ພ້ອມທັງ ປະຕິບັດຕາມກົດໝາຍ ແລະ ຣະບຽບການຢ່າງເຂັ້ມງວດ ເພື່ອແນໃສ່ສະກັດກັ້ນ ແລະຕ້ານການສໍ້ຣາດບັງຫລວງ, ຕ້ານພຍາດອາຍາສິດ ແລະ ປາກົດການ ຫຍໍ້ທໍ້ອື່ນໆ.

ແຕ່ກ່ຽວກັບ ຂໍ້ຕົກລົງທີ່ວ່ານີ້ ຊາວລາວຫລາຍຄົນເຫັນວ່າ ບໍ່ແມ່ນເຣື່ອງງ່າຍ ທີ່ຈະຈັດຕັ້ງປະຕິບັດ ໃຫ້ເກີດຜົລເປັນຈິງໄດ້ ຍ້ອນ ຍັງມີເຈົ້າໜ້າທີ່ຂແນງການ ດັ່ງກ່າວ ຈໍານວນນຶ່ງຍັງ ຣະເມີດກົດຣະບຽບຂອງກະຊວງ ໂດຍສະເພາະການຮັບສິນບົນເປັນຕົ້ນ ຈາກ ປະຊາຊົນ ທີ່ຂໍໃຫ້ແກ້ໄຂເຣື່ອງ ເອກກະສານທີ່ດິນ ຫລື ອອກເອກສານທີ່ດິນໃຫ້ໄວ ຊຶ່ງຫລາຍຄົນເຫັນວ່າ ກາຍເປັນເຣື່ອງປົກກະຕິ ໄປແລ້ວ ດັ່ງຊາວລາວນາງນຶ່ງ ເວົ້າຕໍ່ວິທຍຸເອເຊັຍເສຣີ ໃນມື້ວັນທີ 10 ມິຖຸນາ ນີ້ວ່າ:

“ອັນນັ້ນກໍຣະນີວ່າ ຖ້າເຮົາບໍ່ໄປຕາມຂັ້ນຕອນເນາະ ຕົວຢ່າງວ່າເຮົາຢາກເຮັດເລັ່ງດ່ວນ ເຮົາຈະຕ້ອງໃຫ້ຂະເຈົ້າໃສ່ນໍ້າມູກນໍ້າມັນ ເຮົາຕ້ອງພາຂະເຈົ້າໄປບໍຣິການ ກິນເຂົ້າກິນນໍ້າ ຕ່າງຫາກ ເຂົາຮ້ອງວ່າບໍ່ແມ່ນວຽກຣັຖການ.”

ນາງກ່າວຕື່ມວ່າ ຄັ້ງທີ່ນາງເຂົ້າໄປຕິດຕໍ່ ກັບຫ້ອງການທີ່ດິນ ກໍເຫັນພາຍໃນຫ້ອງການ ມີການຕິດປ້າຍກ່ຽວກັບຣະບຽບການ ແລະ ຂໍ້ຫ້າມເຈົ້າໜ້າທີ່ໃນການປະຕິບັດວຽກງານ ແຕ່ໃນຕົວຈິງຍັງເຫັນວ່າ ເຈົ້າໜ້າທີ່ບາງຄົນ ຍັງບໍ່ປະຕິບັດຕາມຣະບຽບ ນັ້ນໄດ້ຢ່າງ ເຂັ້ມງວດ. ແລະວ່າ ຖ້າທາງກະຊວງດັ່ງກ່າວ ສາມາດເຮັດໃຫ້ພະນັກງານຂອງຕົນ ປະຕິບັດ ຕາມຂໍ້ຫ້າມນັ້ນໄດ້ ຕົນເອງກໍຈະ ດີໃຈນໍາ.

ໃນຂນະດຽວກັນ ຊາວລາວອີກນາງນຶ່ງກໍເວົ້າວ່າ ການໄປຕິດຕໍ່ວຽກກັບເຈົ້າໜ້າທີ່ຫ້ອງການທີ່ດິນ ເພື່ຶອຂໍເອກສານທີ່ດິນຖ້າໄປຕິດຕໍ່ ຕາມປົກກະຕິ ກໍຈະໃຊ້ເວລາດົນເຕີບ ກວ່າຄໍາຮ້ອງຂໍນັ້ນຈະໄດ້ຮັບ ການດໍາເນີນການ. ແຕ່ຖ້າມີການໃຫ້ເງິນພິເສດ ແກ່ເຈົ້າໜ້າທີ່ ກໍຈະໄດ້ຮັບການບໍຣິການໄວກວ່າ ຊຶ່ງຕົນກໍບໍ່ຢາກເຫັນດີນໍາ ແລະ ຄິດວ່າ ຄວນມີການ ແກ້ໄຂບັນຫານີ້ ດັ່ງທີ່ນາງກ່າວວ່າ:

“ຄັນວ່າເຮົາຮູ້ຈັກຂະເຈົ້າ ແລ້ວກະແບບໃຫ້ຂະເຈົ້າກິນນໍ້າກິນໃນແດ່ ກະຢາກໄວແດ່. ແຕ່ສ່ວນຫຼາຍຂະເຈົຶ້າເຮັດຫັ້ນກະແບບວ່າ ແບ່ງເປັນທີ່ດິນແບບຫລາຍຄົນເຮັດຮ່ວມກັນ ແລ້ວມັນຈະຖືກແດ່ຫັ້ນນ່າ ຜູ້ລ້ານປາຍຊີ້ນ່າ. ຢາກຣາຄາສູງແດ່.”

ຊາວບ້ານຢູ່ນະຄອນຫລວງວຽງຈັນ ທ່ານນຶ່ງ ທີ່ປະສົບກັບບັນຫາ ຖືກບໍຣິສັດເອກຊົນຍຶດທີ່ດິນໄປນັ້ນ ກ່າວວ່າເປັນເຣື່ອງຍາກທີ່ຈະ ໃຫ້ພະນັກງານ ເຮັດຕາມຂໍ້ຕົກລົງດັ່ງກ່າວ ຊຶ່ງໃນໄລຍະຜ່ານມາ ຕົນກໍເຄີຍໄປຮ້ອງຂໍ ຄວາມເປັນທັມ ນໍາເຈົ້າໜ້າທີ່ຫ້ອງການ ຊັພຍາກອນທັມຊາດ ແລະ ສິ່ງແວດລ້ອມຂັ້ນເມືອງ ເພື່ອຂໍໃຫ້ຊ່ອຍແກ້ໄຂ ແຕ່ກໍບໍ່ໄດ້ຮັບການ ຊ່ອຍເຫຼືອຫຍັງເລີຍ, ຊໍ້າບໍ່ໜໍາ ເຈົ້າໜ້າທີ່ ຍັງເຂົ້າຂ້າງນາຍທຶນ ໃຫ້ຍຶດທີ່ດິນຂອງຕົນໄປ ແບບບໍ່ໄດ້ຈ່າຍຄ່າຊົດເຊີຍໃຫ້ ຊຶ່ງມີຄວາມເປັນໄປໄດ້ວ່າ ເຈົ້າໜ້າທີ່ ອາຈໄດ້ຮັບຜົລປໂຍດ ອັນໃດອັນນຶ່ງ ຈາກນາຍທຶນຄົນນັ້ນກໍເປັນໄດ້ ດັ່ງທີ່ທ່ານກ່າວວ່າ:

“ຄິດວ່າເຂົາສິບໍ່ໃຫ້ເຮົາແຫລະ ເຂົາກະສິເອົາໝົດຫັ້ນແຫລະ. ເຈົ້າໜ້າທີ່ກະໄປນໍາບໍຣິສັດຫັ້ນແຫລະ ເຂົ້າຂ້າງທາງບໍຣິສັດແນ່ນອນ ແຫລະ ແນວໃດເຂົາກະສິເອົາໃຫ້ມັນໄດ້.”

ແລະຊາວບ້ານອີກທ່ານນຶ່ງ ທີ່ຂໍສງວນຊື່ ແລະສຽງ ກໍເວົ້າຕໍ່ວິທຍຸເອເຊັຍເສຣີ ໃນມື້ວັນທີ 9 ມິຖຸນານີ້ວ່າ ຕົນກໍເຄີຍປະສົບກັບບັນຫາ ທີ່ບໍ່ໄດ້ຮັບຄວາມເປັນທັມ ໃນເຣື່ອງຂໍ້ຂັດແຍ້ງ ທີ່ດິນ ຊຶ່ງຄູ່ກໍຣະນີ ໄດ້ພາເຈົ້າໜ້າທີ່ ຊັພຍາກອນທໍາມະຊາດ ແລະ ສິ່ງແວດລ້ອມ ຂັ້ນເມືອງແລະນາຍບ້ານ ໄປແທກດິນທີ່ມີການຂັດແຍ້ງກັນ ເພື່ອແບ່ງເຂດ ໂດຍທີ່ບໍ່ໄດ້ເອີ້ນຕົນໄປ ຮ່ວມນໍາ. ແຕ່ເມື່ອຕົນໄປຂໍຄວາມ ເປັນທັມ ຈາກເຈົ້າໜ້າທີ່ ທີ່ກ່ຽວຂ້ອງເພື່ອໃຫ້ຊີ້ແຈງ ພັດບໍ່ໄດ້ຮັບຄໍາຕອບໃດໆ. ດັ່ງນັ້ນຈຶ່ງເຊື່ອວ່າ ເຈົ້າໜ້າທີ່ເຮັດວຽກແບບບໍ່ມີ ຄວາມໂປ່ງສັຍ.

ກ່ຽວກັບຂໍ້ຕົກລົງຂອງກະຊວງທີ່ວ່ານັ້ນ ເຈົ້າໜ້າທີ່ຊັພຍາກອນທໍາມະຊາດ ແລະສິ່ງແວດລ້ອມ ທ່ານນຶ່ງ ກ່າວຕໍ່ວິທຍຸເອເຊັຍເສຣີໃນມື້ ດຽວກັນນີ້ວ່າ ການອອກຂໍ້ຕົກລົງນັ້ນ ແມ່ນເພື່ອ ເຕືອນເຈົ້າໜ້າທີ່ ແລະພະນັກງານໃນຂແນງການນີ້ ຢູ່ແຂວງຕ່າງໆ ບໍ່ໃຫ້ປະຕິບັດ ຕົນໄປໃນທາງທີ່ບໍ່ດີ ຫລື ສວຍໂອກາດສໍ້ຣາດບັງຫລວງ ໃນຮູບແບບໃດໆ:

“ເພື່ອວ່າເປັນການເຕືອນຄະຕິເຕືອນໃຈໄວ້ ເພິ່ນເລີຍອອກເຕືອນສະຕິໄວ້ກ່ອນ ປ້ອງກັນໄວ້ກ່ອນ ບໍ່ໃຫ້ເກີດປາກົດການຫຍໍ້ທໍ້ຕາມມາ ໃນຂົງເຂດຊັພຍາກອນທັມຊາດ.”

ແລະເຈົ້າໜ້າເຈົ້າທີ່ຜແນກຊັພຍາກອນທໍາມະຊາດ ແລະສິ່ງແວດລ້ອມ ແຂວງສວັນນະເຂດທ່ານນຶ່ງ ທີ່ຂໍສງວນຊື່ ແລະສຽງ ກໍເວົ້າ ຕໍ່ວິທຍຸເອເຊັຍເສຣີໃນມື້ດຽວກັນນີ້ວ່າ ຫລັງຈາກ ໄດ້ຮັບຂໍ້ຕົກລົງທີ່ວ່ານັ້ນ ຈາກທາງກະຊວງແລ້ວ ທາງຜແນກກໍໄດ້ສົ່ງຕໍ່ໃຫ້ຫ້ອງ ການຊັພຍາກອນທໍາມະຊາດ ແລະສິ່ງແວດລ້ອມ ຢູ່ເມືອງຕ່າງໆທົ່ວແຂວງ ເພື່ອໃຫ້ພະນັກງານຮັບຮູ້ ແລະ ປະຕິບັດຕາມຢ່າງ ເຂັ້ມງວດ ແລະ ຈະມີພາກສ່ວນທີ່ກ່ຽວຂ້ອງ ລົງຕິດຕາມກວດກາໃນຂັ້ນຕໍ່ໄປ.

ໃນຂໍ້ຕົກລົງວ່າດ້ວຍຂໍ້ຫ້າມ ແລະ ວິນັຍຂອງພະນັກງານ-ຣັຖກອນ ຂແນງຊັພຍາກອນທໍາມະຊາດ ແລະສິ່ງແວດລ້ອມ, ມາດຕຣາ 3 ໄດ້ຣະບຸເຖິງຫລາຍຂໍ້ຫ້າມ ສໍາລັບພະນັກງານ ເປັນຕົ້ນຫ້າມປະຕິບັດໜ້າທີ່ ແບບບໍ່ມີຄວາມຍຸຕິທັມ ຫລື ລໍາອຽງ, ຫ້າມສ້າງເອກສານ ຫລື ສົມຮູ້ຮ່ວມຄິດສ້າງເອກສານ ຣາຍຮັບ-ຣາຍຈ່າຍ, ເອກສານການເງິນ, ການຈັດຊື້ ແລະ ຈ້າງທີ່ບໍ່ຖືກຕ້ອງ, ຫ້າມສວຍໃຊ້ສິດ ອໍານາດ ໜ້າທີ່ ຕໍາແໜ່ງເພື່ອຫາຜົລປໂຍດໃຫ້ຕົນເອງ, ຫ້າມສໍ້ກົງຫລືຮັບສິນບົນ ຈາກເຈົ້າຂອງໂຄງການລົງທຶນ ຫລື ເຈົ້າຂອງສິດ ນໍາໃຊ້ທີ່ດິນ ແລະ ຫ້າມອໍານວຍຄວາມສະດວກ ຫລືສົມຮູ້ຮ່ວມຄິດກັບບຸກຄົນ, ນິຕິບຸກຄົນ, ເຈົ້າຂອງໂຄງການລົງທຶນ ເພື່ອລັກໂລບ ສໍ້ກົງ ຫລືມີພຶດຕິກັມ ທີ່ຣະເມີດກົດໝາຍ.

ແລະໃນມາດຕຣາ 5 ຣະບຸເຖິງມາຕການຕໍ່ພະນັກງານຜູ້ຣະເມີດ ຊຶ່ງຈະຖືກປະຕິບັດວິນັຍ ຫລື ລົງໂທດຕາມກົດໝາຍ ແລະ ຣະບຽບ ການຕາມແຕ່ລະກໍຣະນີໜັກເບົາ.

ຄໍາເຫັນ (0)

ເບິ່ງຄວາມເຫັນທັງໝົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ