ຫຼວງນໍ້າທາຍຸບໂຮງເລື່ອຍ ໂຮງງານ ເຟີນີເຈີ

ໄມຊູລີ
2019-01-15
ອີແມວລ໌
ຄໍາເຫັນ
Share
ພິມ
ໂຮງເລື່ອຍ ແຂວງຫຼວງນໍ້າທາ
ໂຮງເລື່ອຍ ແຂວງຫຼວງນໍ້າທາ
RFA/VD

ທາງການແຂວງຫລວງນໍ້າທາ ບໍ່ອະນຸຍາດໃຫ້ມີການ ຕັ້ງໂຮງເລື່ອຍ ແລະໂຮງເຟີນີເຈີເພີ່ມອີກ ພາຍຫລັງຄຳສັ່ງ ເລກທີ 15 ຂອງ ທ່ານ ນາຍົກ ຣັຖມົນຕຣີ ສປປລາວ ວ່າດ້ວຍການ ເພີ່ມທະວີຄວາມເຂັ້ມງວດ ໃນການຄຸ້ມຄອງ ແລະ ກວດກາ ການຂຸດຄົ້ນໄມ້, ການເຄື່ອນ ຍົກຍ້າຍໄມ້ ແລະທຸຣະກິດໄມ້ ລົງວັນທີ 13 ພຶສພາ 2016 ແລະໄດ້ສັ່ງຍຸບໂຮງເລື່ອຍໄມ້ ຂນາດໃຫຍ່ອີກ 2 ແຫ່ງ, ຕາມຄໍາເວົ້າຂອງ ເຈົ້າໜ້າທີ່ ກອງກວດກາປ່າໄມ້ ເມືອງຫລວງນໍ້າທາ ທ່ານນຶ່ງ ຕໍ່ວິທຍຸ ເອເຊັຍເສຣີ ໃນວັນທີ 12 ມົກກະຣາ ນີ້:

“ຢູ່ໃນໄລຍະຜ່ານມານີ້ພາຍຫັລງທີມີແຈ້ງການ ເລກທີ 15 ນີ້ລະແມ່ນໂຮງເລື່ອຍ ຂະໜາດໃຫ່ຍ 2 ບ່ອນຢູ່ແຂວງຫລວງນໍ້າທາ ນີ້ແມ່ນໃຫ້ ຍຸບເລີຍ ເພິ່ນບໍ່ອະນຸຍາດ ໃຫ້ຂຸດຄົ້ນໄມ້ເພື່ອປ້ອນເຂົ້າໂຮງເລື່ອຍຫັ້ນ ແລະທາງເຈົ້າໜ້າທີ່ແມ່ນຈະເຂັ້ມງວດ ໃນການຕິດຕາມກວດກາ ຖ້າຫາກພົບເຫັນແມ່ນຈະດຳເນີນຕາມລະບຽບຂອງເພີ່ນຫັ້ນ.”

ທ່ານກ່າວຕື່ມວ່າຜ່ານມາ ແຂວງຫຼວງນໍ້າທາ ມີໂຮງເລື່ອຍຂນາດໃຫ່ຍ 2 ແຫ່ງຄືຢູ່ເມືອງວຽງພູຄາ 1 ແຫ່ງ ແລະຢູ່ບ້ານຊຽງກົກ ເມືອງລອງ 1 ແຫ່ງ ແລະມີໂຮງເລື່ອຍຂນາດກາງ 1 ແຫ່ງຢູ່ເມືອງສິງ. ທັງໝົດເປັນຂອງຄົນຈີນ. ນອກຈາກນັ້ນກໍຍັງມີ ໂຮງຊອຍ ແລະໂຮງເຟີນີເຈີ ອີກຫລາຍບ່ອນທີ່ຕັ້ງຢູ່ ກະແຈກກະຈາຍ ເຮັດໃຫ້ ມີຄວາມຫຍຸ້ງຍາກ ໃນການກວດກາ:

“ຄວາມໝາຍຂອງເພິ່ນແມ່ນບໍ່ຢາກໃຫ້ຕັ້ງແບບ ກະແຈກກະຈາຍຫັ້ນ ແລະຢາກໃຫ້ເອົາມາລວມກັນຢູ່ບ່ອນດຽວ ເປັນຈຸດໃຫ່ຍເລີຍສະເພາະ ຂອງເມືອງຜ່ານມານີ້ ແມ່ນກະແຈກກະຈາຍຫລາຍ ເລື່ອງໃບອະນຸຍາດນີ້ ບາງຄົນກະບໍ່ມີ.”

ຜ່ານມາແຂວງຫລວງນໍ້າທາ ມີໂຮງຊອຍໄມ້ທັງໝົດທົ່ວເມືອງ 13 ແຫ່ງແລະໂຮງເຟີນີເຈີ ອີກ 20 ປາຍແຫ່ງ ຊຶ່ງຕັ້ງຢູ່ແຕ່ລະເມືອງ ປັດຈຸບັນທາງການແຂວງຫລວງນໍ້າທາ ໄດ້ສັ່ງໃຫ້ໂຮງຊອຍຂນາດນ້ອຍ ແລະໂຮງເຟີນີເຈີ ຕັ້ງລວມກັນເມືອງນຶ່ງ ບໍ່ໃຫ້ເກີນ 1 ບ່ອນ. ສ່ວນໂຮງເລື່ອຍຂນາດກາງ ຢູ່ເມືອງສິງ ປັດຈຸບັນແມ່ນເລື່ອຍໄມ້ ທີ່ຍັງເຫືລອ ຊຶ່ງໄດ້ຮັບອະນຸຍາດ ໃຫ້ຕັດໃນ 3 ປີ ຜ່ານມາ.

ແຕ່ເຖິງຢ່າງໃດກໍ່ຕາມ ການລັກລອບຕັດໄມ້ ເພື່ອນຳມາຂາຍຢູ່ ແຂວງຫລວງນໍ້າທາ ກໍ່ຍັງມີໃຫ້ເຫັນ ໃນຂນະທີ່ ທາງເຈົ້າໜ້າທີ່ ກໍ່ໄດ້ ເອົາໃຈໃສ່ ປາບປາມຢູ່ເປັນປະຈໍາ.

ເຕັມຫນ້າ