ຊາວສວນຂໍຮ້ອງທາງການ ຊ່ອຍປັບ ລາຄາ ອ້ອຍ

ໄມຊູລີ
2018-01-30
ອີແມວລ໌
ຄໍາເຫັນ
Share
ພິມ
ຊາວບ້ານຫລັກ7 ເມືອງສິງ ແຂວງຫລວງນ້ຳທາ ກຳລັງຕັດອ້ອຍ. ຖ່າຍວັນທີ 15/1/2018
ຊາວບ້ານຫລັກ7 ເມືອງສິງ ແຂວງຫລວງນ້ຳທາ ກຳລັງຕັດອ້ອຍ. ຖ່າຍວັນທີ 15/1/2018
RFA/VD

ປະຊາຊົນ 1,500 ຄອບຄົວ ຢູ່ແຂວງຫລວງນ້ຳທາ ຜູ້ທີ່ປູກອ້ອຍສົ່ງຂາຍໃຫ້ໂຮງງານ ຜລິດນໍ້າຕານຂອງຈີນ ຢາກຮ້ອງຮຽນທາງການ ຊ່ອຍ ເຈຣະຈາກັບ ບໍຣິສັດຂອງຈີນ ໃຫ້ຂຶ້ນລາຄາອ້ອຍ ຫລັງຈາກທີ່ລາຄາອ້ອຍຕົກຕ່ຳຫລາຍ, ປະຈຸບັນຖ້າທຽບໃສ່ ຕົ້ນທຶນການຜລິດແລ້ວແມ່ນຍັງ ຕໍ່າແລະຜົນໄດ້ຮັບກໍບໍ່ກຸ້ມຄ່າ, ດັ່ງປະຊາຊົນບ້ານສົບອິ ເມືອງສິງ ແຂວງຫຼວງນ້ຳທາທ່ານນຶ່ງ ກ່າວຕໍ່ ວິທຍຸເອເຊັຽເສຣີ ໃນວັນທີ 17 ມົກຣາ ຜ່ານມາວ່າ:

“ຜ່ານມາໄດ້ສເນີໄປເທື່ອນຶ່ງແລ້ວ ແຕ່ທາງບໍຣິສັດເຂົາເຈົ້າບໍ່ຂຶ້ນໃຫ້ ເຂົາວ່າລາຄານີ້ກະສູງແລ້ວ ບາດວ່າເຮົາມາສົມທຽບລາຄາ ກັບຕົ້ນທຶນ ແລ້ວ ບໍ່ຢາກເໝາະສົມປານໃດ ຈຶ່ງວ່າຢາກຂໍໃຫ້ທາງລັດ ເພິ່ນຊ່ວຍເວົ້ານໍາ ບໍຣິສັດເຂົາໃຫ້ ບາງເທື່ອເຂົາຈະຂຶ້ນ ໃຫ້.”

ປີນີ້ຣາຄາອ້ອຍແບ່ງອອກເປັນ 3 ປະເພດຄື: ອ້ອຍປະເພດ 1 ລາຄາ ຕໍ່ 420,000  ກີບຕໍ່ຕັນ, ອ້ອຍປະເພດ 2 ລາຄາ 375.000 ກີບ ຕໍ່ຕັນ ແລະອ້ອຍປະເພດ 3 ລາຄາ 300.000 ກີບຕໍ່ຕັນ, ແຕ່ຖ້າທຽບລາຄາກັບ ຕົ້ນທຶນການຜລິດແມ່ນບໍ່ມີກຳໄລ ເທົ່າທີ່ຄວນ: ການຈ້າງ ແຮງງານຕ່າງໆ ການໃສ່ຢາປາບສັດຕູພືດ ແລະປຸຍເຄມີຕ່າງໆ ແມ່ນມີລາຄາສູງສົມຄວນ.

ຕົ້ນທຶນໃນການປູກອ້ອຍ ນັບແຕ່ກຽມດິນຈົນຮອດເວລາຕັດໄປຂາຍ ສະເລັ່ຍແມ່ນ 1 ຕັນ ຕໍ່ 375,000 ກີບ. ການປູກອ້ອຍຂອງປະຊາຊົນ ແມ່ນການຕົກລົງ ລະຫວ່າງ ບໍຣິສັດແລະປະຊາຊົນ ໂດຍບໍ່ໄດ້ຜ່ານເຈົ້້າໜ້າທີ່ ທີ່ກ່ຽວຂ້ອງ ການປູກອ້ອຍຢູ່ ເມືອງສິງ ແມ່ນເລີ່ມຕົ້ນປູກມາ ແຕ່ປີ 2004. ກ່ຽວກັບບັນຫາດັ່ງກ່າວ ທາງເຈົ້າໜ້າທີ່ຈາກຫ້ອງການ ການຄ້າ ຜູ້ບໍ່ປະສົງອອກຊື່ແລະສຽງ ທ່ານນຶ່ງ ກ່າວຕໍ່ເອເຊັຍເສຣີ ວ່າ:

"ກ່ຽວກັບລາຄາອ້ອຍໃນແຕ່ລະປີ ແມ່ນທາງບໍຣິສັດຈີນ ພຸ້ນເປັນຜູ້ກຳນົດລາຄາ ແຕ່ລະປະເພດ ເຂົາກະອິງໃສ່ລາຄານໍ້າຕານໃນແຕ່ລະປີ ມັນກະມີຂຶ້ນມີລົງ ທາງເຮົາບໍ່ສາມາດ ທີ່ຈະກຳນົດໄດ້ ມີແຕ່ວ່າຜູ້ໃດເຮັດໄດ້ ກະເຮັດ ເຮັດບໍ່ໄດ້ບໍ່ມີກຳໄລ ກະຢຸດ."

ເມືອງສິງເປັນເມືອງນຶ່ງທີ່ມີເນື້ອທີ່ປູກອອກອ້ອຍ 5,000 ເຮັກຕາ ຊຶ່ງຖືວ່າຫລາຍກ່ວາໝູ່ ໃນແຂວງຫລວງນ້ຳທາ ແລະສາມາດສນອງ ອ້ອຍ ໃຫ້ກັບໂຮງງານນໍ້າຕານ ຂອງຈີນໄດ້ 3 ແສນກວ່າຕັນ ຕໍ່ປີ. ອີງຕາມຂໍ້ມູນຈາກ ຫ້ອງການກະສິກັມແລະປ່າໄມ້ ເມືອງສິງ.

ເຕັມຫນ້າ