ຈີນ ກໍານົດຣາຄາ ຢາງ

ມະນີຈັນ
2017-06-14
ອີແມວລ໌
ຄໍາເຫັນ
Share
ພິມ
ສວນຢາງພາລາ ຢູ່ພາກເໜືອ ຂອງລາວ
ສວນຢາງພາລາ ຢູ່ພາກເໜືອ ຂອງລາວ
RFA/VD

ບໍຣິສັດຢາງພາຣາຂອງຈີນ ຢູ່ແຂວງຫຼວງນ້ຳທາ ເປັນບໍຣິສັດດຽວ ຜູກຂາດຣາຄາ ຢາງພາຣາ ທີ່ຮັບຊື້ຢາງ ຈາກປະຊາຊົນ ຢູ່ໃນແຂວງນີ້ ໂດຍທີ່ບໍ່ມີ ບໍຣິສັດ ອື່ນເຂົ້າມາແຂ່ງ ເຮັດໃຫ້ຢາງ ບໍ່ໄດ້ຣາຄາສູງ ແຕ່ກໍຍັງ ໄດ້ດີກວ່າ ປີກາຍ. ຕາມຄຳເວົ້າ ຂອງຊາວສວນຢາງ ຢູ່ແຂວງ ຫລວງນ້ຳທາ ໃນມື້ວັນທີ 13 ມິຖຸນາ ນີ້.

"ເຣື່ອງການຊື້ກໍມີຫຼາຍ ເຖົ້າແກ່ຢາກຊື້ຢູ່ ແຕ່ວ່າປັດຈຸບັນນີ້ ຢູ່ຫຼວງນໍ້າທາ ຫລື ບັນດາແຂວງ ກໍຄືກັນ ບ່ອນວ່າຈີນ ນີ້ເພິ່ນມາ ເຮັດໂຮງງານ ແລ້ວເພິ່ນ ມາຜູກມັດ ເຣື່ອງຢາງພາລາ ນີ້ເຮັດໃຫ້ ຜູ້ອື່ນນີ້ ບໍ່ສາມາດ ເຂົ້າມາໄດ້ນະ ແລ້ວຣາຄານີ້ ບໍ່ມີການແກ່ງແຍ່ງ ກັນແລ້ວ ຣາຄາມັນ ບໍ່ຂຶ້ນນະ".

ປັຈຈຸບັນຣາຄາຢາງພາຣາ ຢູ່ແຂວງຫຼວງນ້ຳທາ ກິໂລນຶ່ງ ຫົກພັນ ເຈັດພັນກີບ ຄືສູງຂຶ້ນກວ່າປີກາຍ ທີ່ຂາຍໄດ້ ກິໂລລະ ສີ່ພັນ ຫ້າພັນກີບ ຍ້ອນວ່າ ຣາຄາຢາງພາຣາ ຢູ່ໃນຕລາດໂລກ ຖືກປັບຕົວສູງຂຶ້ນ.

ເຈົ້າຂອງສວນຢາງພາລາ ທ່ານນີ້ເວົ້າຕື່ມວ່າແຕ່ກ່ອນ ຣາຄາຢາງພາລາ ຢູ່ແຂວງຫລວງນ້ຳທາ ກິໂລນຶ່ງ 18 ພັນຫາ 20 ພັນກີບ. ດັ່ງນັ້ນ ຈຶ່ງຢາກໃຫ້ ທາງການແຂວງ ຊ່ວຍແກ້ໄຂບັນຫາ ການຜູກຂາດ ຣາຄາ ຢາງພາລາ ຂອງບໍຣິສັດຈີນ ທີ່ວ່ານັ້ນ ເພື່ອໃຫ້ ຣາຄາຢາງສູງຂຶ້ນ ກວ່າທີ່ເປັນຢູ່ ໃນປັດຈຸບັນນີ້.

ເຈົ້າໜ້າທີ່ ຜແນກອຸດສາຫະກັມແລະການຄ້າ ແຂວງຫຼວງນໍ້າທາ ເວົ້າວ່າໃນປີນີ້ ບໍຣິສັດຕ່າງໆ ຢູ່ແຂວງຫຼວງນໍ້າທາ ໄດ້ຂາຍຢາງພາຣາ ໄປ ປະເທດຈີນແລ້ວ 11 ພັນປາຍຕັນ, ເປັນມູນຄ່າ 17 ລ້ານ 8 ແສນ ໂດລາ ສະຫະຣັຖ.

ເຕັມຫນ້າ