ລັດຖະບານລາວ ເລັ່ງເຈລະຈາ ຊື້ນ້ຳມັນ ຈາກລັດເຊຍ

ປະເທດລາວ ມີຄວາມຕ້ອງການ ນ້ຳມັນເຊື້ອໄຟ ຫຼາຍກວ່າ 1,500 ລ້ານລິດຕໍ່ປີ ເພື່ອໃຫ້ພຽງພໍ ຕໍ່ຄວາມຕ້ອງການ ຢູ່ພາຍໃນ, ແຕ່ປັດຈຸບັນ ປະເທດລາວ ສາມາດນຳເຂົ້າ ນ້ຳມັນເຊື້ອໄຟ ໄດ້ປະມານ 1,200 ລ້ານລິດຕໍ່ປີ ເທົ່ານັ້ນ ເນື່ອງຈາກບັນຫາ ຂາດແຄນເງິນຕາ ຕ່າງປະເທດ.

ເພື່ອແກ້ໄຂບັນຫາ ນ້ຳມັນຂາດແຄນ ຢູ່ພາຍໃນປະເທດ, ລັດຖະບານລາວ ຈຶ່ງໄດ້ເຈລະຈາ ຂໍຊື້ນ້ຳມັນເຊື້ອໄຟ ຈາກລັດເຊຍ, ເຊິ່ງມີລາຄາຖືກກວ່າ ຕະຫຼາດໂລກ ຕັ້ງແຕ່ປີ 2022 ທີ່ຜ່ານມາ, ແຕ່ມາຮອດດຽວນີ້ ກະຍັງຕົກລົງກັນ ບໍ່ທັນໄດ້ເທື່ອ ຍ້ອນຕິດບັນຫາ ເລື້ອງເສັ້ນທາງ ໃນການຂົນສົ່ງ. ດັ່ງເຈົ້າໜ້າທີ່ ທະນາຄານ ພັດທະນາເອເຊຍ ຫຼື ADB ປະຈຳລາວ ທ່ານໜຶ່ງ ກ່າວຕໍ່ວິທຍຸເອເຊັຽເສຣີ ໃນມື້ວັນທີ 24 ກັນຍາ ນີ້ວ່າ:

“ເລື້ອງການຊື້ນ້ຳມັນ ຈາກລັດເຊຍ ກະເປັນປັດໃຈຢູ່ບ່ອນວ່າ ກະຄິດວ່າ ມັນຖືກ ຈະບໍ່ໄດ້ຖືວ່າ ເຮົາໄປຂວ້ຳບາດ ລັດເຊຍ ຄືກັບອາເມຣິກາ. ຄື ລາວ ມັນກະມີບັນຫາ ກະເປັນທາງທົບທວນອັນໃໝ່ ເລື້ອງນ້ຳມັນນີ້ດອກ ເພາະວ່າ ຢູ່ເມືອງລາວ ນີ້ ມັນມີ 2 ອັນ, ນ້ຳມັນ ກັບ ແກ໊ສ ນີ້ແມ່ນນຳເຂົ້າຢ່າງດຽວ.”

ທ່ານກ່າວອີກວ່າ ການນຳເຂົ້ານ້ຳມັນເຊື້ອໄຟ ຂອງປະເທດລາວ ຈະຕ້ອງຈ່າຍ ເປັນສະກຸນເງິນ ໂດລ້າຣ໌ສະຫະລັດ ເທົ່ານັ້ນ ໃນຂະນະທີ່ ປະເທດລາວ ຍັງຕ້ອງປະເຊີນກັບ ສະພາບເສດຖະກິດ-ການເງິນ ຕົກຕ່ຳ ແລະ ຂາດແຄນເງິນຕາ ຕ່າງປະເທດ ເຮັດໃຫ້ລັດຖະບານລາວ ຕ້ອງໄປຂໍຊື້ ນ້ຳມັນເຊື້ອໄຟ ທີ່ມີລາຄາຖືກກວ່າ ລາຄາຂອງຕະຫຼາດໂລກ ກັບປະເທດພັນທະມິດ ເຊັ່ນ ຈີນ ແລະ ລັດເຊຍ ຫຼາຍຂຶ້ນ.

ສ່ວນເລື້ອງທີ່ຈະຂັດຕໍ່ມະຕິ ຂອງອົງການສະຫະປະຊາຊາດ ໃນການຂວ້ຳບາດ ປະເທດລັດເຊຍ ກໍລະນີສົງຄາມ ລັດເຊຍ-ຢູເຄຣນ ນັ້ນ, ຈະບໍ່ສົ່ງຜົນກະທົບ ກັບປະເທດລາວ ເພາະປະເທດລາວ ກະມີຄວາມຈຳເປັນສູງສຸດ ໃນການຮັກສາ ສະຖຽນລະພາບ ເພື່ອສະໜອງນ້ຳມັນເຊື້ອໄຟ ຢູ່ພາຍໃນປະເທດ ຢ່າງພຽງພໍ ແລະ ລາວ ກະບໍ່ມີເງິນຊື້ນ້ຳມັນເຊື້ອໄຟ ຕາມລາຄາ ທີ່ຕະຫຼາດໂລກ ກຳນົດໄວ້ໄດ້.

ປັດຈຸບັນ, ປະເທດລາວ ນຳເຂົ້ານ້ຳມັນເຊື້ອໄຟ ຈາກປະເທດໄທ ເປັນຫຼັກ ໄລ່ເປັນ 90% ຂອງນ້ຳມັນເຊື້ອໄຟ ທີ່ນ້ຳເຂົ້າ ແລະ ອີກປະມານ 10% ແມ່ນນຳເຂົ້າ ຈາກປະເທດຫວຽດນາມ ແລະ ປະເທດຈີນ ຕາມລຳດັບ.

ເຈົ້າຂອງປ້ຳນ້ຳມັນ ທ່ານໜຶ່ງ ໃນແຂວງຈຳປາສັກ ກ່າວວ່າ ຫາກລັດຖະບານລາວ ສາມາດເຈລະຈາ ຊື້ນ້ຳມັນເຊື້ອໄຟ ກັບປະເທດລັດເຊຍ ໄດ້ ກະເປັນເລື້ອງທີ່ດີ ເພາະຈະຊ່ອຍໃຫ້ ລາຄານ້ຳມັນເຊື້ອໄຟ ຢູ່ພາຍໃນປະເທດ ມີລາຄາຫຼຸດລົງ ແລະ ພຽງພໍ ຕໍ່ການຊົມໃຊ້ ຢູ່ພາຍໃນ. ດັ່ງເຈົ້າຂອງປ້ຳນ້ຳມັນ ທ່ານນີ້ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ໂອ້ຍ, ລັດເຊຍ ໃຜຂົນເຂົ້າມານ່າ ດຽວນີ້ນ່າ, ບັນຫາວ່າ ມັນໄດ້ບໍ່? ມັນກະເກີດສົງຄາມນ່າ ມັນຊິໄດ້ບໍ່? ຜ່ານມົງໂກເລຍ ໄດ້ບໍ່ ຫຼືວ່າ ຜ່ານຈີນໄດ້ບໍ່? ເອົາເຂົ້າມາໂລດແຫຼະ, ບັນຫາວ່າ ມັນໄດ້ບໍ່? ພົວພັນກັນໄດ້ບໍ່? ຖືກສະເປັກມັນບໍ່? ຍັງຊິມີຄວາມຫຍຸ້ງຍາກ ຫຼາຍຢູ່.”

ທາງດ້ານຊາວລາວ ທ່ານໜຶ່ງ ໃນແຂວງຈຳປາສັກ ກ່າວວ່າ ໃນເມືອງລັດຖະບານລາວ ຈະຂໍຊື້ນ້ຳມັນເຊື້ອໄຟ ກັບປະເທດລັດເຊຍ, ພາກລັດກະຕ້ອງເຂັ້ມງວດ ໃນການຕິດຕາມ-ກວດກາ ການນຳເຂົ້າ ໃຫ້ຖືກຕ້ອງ ຕາມລະບຽບກົດໝາຍ ເຮັດໃຫ້ຄົນລາວ ໄດ້ຮັບຜົນປະໂຫຍດສູງສຸດ ແລະ ບໍ່ໃຫ້ເກີດສຽງພິພາວິຈານ ຈາກສາກົນ ຍ້ອນ ລາວ ຊື້ນ້ຳມັນເຊື້ອໄຟ ຈາກລັດເຊຍ ທີ່ຂັດຕໍ່ມະຕິ ຂອງອົງການສະຫະປະຊາຊາດ. ດັ່ງຊາວລາວ ທ່ານນີ້ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ຄັນວ່ານ້ຳມັນຫັ້ນ ເຂົ້າມາຖືກຕ້ອງ ໃຫ້ມັນສອດຄ່ອງ ແລະ ມັນຖືກຕາມ ລະບຽບກົດໝາຍ ແລະ ບໍ່ມີຂໍ້ບັນຍັດອື່ນໆ ມາກ່ຽວຂ້ອງ ກ່ຽວພັນ ມັນອາດຊິຍາກ ຕາມເຮົາເບິ່ງ, ຫັ້ນນ່າ. ເບິ່ງເຂົາຊິວ່າຈັ່ງໃດ.”

ຊາວລາວ ອີກທ່ານໜຶ່ງ ໃນແຂວງຊຽງຂວາງ ກ່າວວ່າ ສະເພາະຢູ່ແຂວງຊຽງຂວາງ ສ່ວນຫຼາຍ ນ້ຳມັນເຊື້ອໄຟ ຈະນຳເຂົ້າມາ ຈາກປະເທດຫວຽດນາມ ເປັນຫຼັກ, ແຕ່ກະມີໂຮງກັ່ນນ້ຳມັນເຊື້ອໄຟ ຂອງບໍລິສັດ ຍອດງື່ມພາວເວີ້ ມະຫາຊົນ ທີ່ຫາກະເປີດໂຮງກັ່ນ ຜະລິດນ້ຳມັນເຊື້ອໄຟ ຕັ້ງແຕ່ປີ 2023 ທີ່ຜ່ານມາ, ໂດຍມີເປົ້າໝາຍ ທີ່ຈະຂາຍນ້ຳມັນເຊື້ອໄຟ ໃນລາຄາຖືກ ໃຫ້ກັບປະຊາຊົນລາວ ໄດ້ນຳໃຊ້. ແຕ່ຄວາມເປັນຈິງແລ້ວ, ລາຄານ້ຳມັນເຊື້ອໄຟ ທີ່ຜະລິດຈາກ ໂຮງກັ່ນດັ່ງກ່າວ ກະມີລາຄາແພງ ຄືກັບປ້ຳນ້ຳມັນອື່ນໆ ໃນທົ່ວປະເທດ. ດັ່ງຊາວລາວ ທ່ານນີ້ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ກະຫາກໃຊ້ຢູ່, ກະໄດ້ຢູ່ໄດ໋. ເຂົາເອົາມາຂາຍ ເຂົາກະຂາຍຕາມລາຄາ ທາງກະຊວງແນະນຳຫັ້ນ ຄືວ່າ ເຂົາຊິຂະຫຍາຍຕື່ມຢູ່ໄດ໋, ຫັ້ນນ່າ.”

ສຳລັບການນຳເຂົ້າ ນ້ຳມັນເຊື້ອໄຟ ຈາກລັດເຊຍ ຍັງຖືເປັນເລື້ອງ ທີ່ຫຍຸ້ງຍາກ ແລະ ທ້າທາຍສົມຄວນ ທີ່ລັດຖະບານລາວ ຈະຕ້ອງໄດ້ຫາແນວທາງ ທີ່ເໝາະສົມທີ່ສຸດ, ໂດຍສະເພາະ ວິທີການຂົນສົ່ງ ທີ່ລັດຖະບານລາວ ຕ້ອງເລືອກໃຊ້ເສັ້ນທາງ ທີ່ໃກ້ທີ່ສຸດ ແລະ ປະຫຍັດທີ່ສຸດ, ເຊິ່ງໃນແຕ່ລະເສັ້ນທາງ ລັດຖະບານລາວ ກະຕ້ອງໄດ້ໄປເຈລະຈາ ກັບປະເທດເຫຼົ່ານັ້ນ ເພື່ອຂໍນຳໃຊ້ເສັ້ນທາງ ຂົນສົ່ງນ້ຳມັນເຊື້ອໄຟ.

ຫຼ້າສຸດນີ້, ທາງການລາວ ກໍຂໍຮ້ອງໃຫ້ລັດເຊຍ ຊ່ອຍອຳນວຍຄວາມສະດວກ ເຈລະຈາກັບປະເທດອື່ນໆ ເພື່ອໃຫ້ສາມາດ ນຳນ້ຳມັນເຊື້ອໄຟ ຈາກລັດເຊຍ ຜ່ານເຂົ້າມາລາວ ໄດ້, ອີງຕາມຜົນກອງປະຊຸມ ລະຫວ່າງ ກະຊວງອຸດສາຫະກຳ ແລະ ການຄ້າ ລາວ ແລະ ກະຊວງພັດທະນາເສດຖະກິດ ລັດເຊຍ ໃນນະຄອນຫຼວງວຽງຈັນ ເມື່ອວັນທີ 19 ກັນຍາ 2024 ທີ່ຜ່ານມາ, ໃນໂອກາດທີ່ລາວ ເປັນເຈົ້າພາບ ກອງປະຊຸມລັດຖະມົນຕີ ເສດຖະກິດອາຊ້ຽນ.