ທາງການລາວ ມີແຜນປັບປຸງສະໜາມບິນ ຫລວງພຣະບາງ

ທາງການລາວ ມີແຜນປັບປຸງສະໜາມບິນສາກົນ ແຂວງຫລວງພຣະບາງ ໃຫ້ທັນສະໄໝ ແລະ ຮັບປະກັນບໍ່ໃຫ້ມີຜົນກະທົບຕໍ່ເມືອງມໍລະດົກໂລກ ເພາະວ່າ ກ່ອນຈະປັບປຸງ ຕ້ອງມີການປະເມີນຜົນຕາມກົດໝາຍ.​

ໃນວັນທີ 4 ກັນຍາ ທີ່ຜ່ານມາ ອົງການ ການເງິນສາກົນ ຫຼື IFC ແລະ ກະຊວງໂຍທາທິການ ແລະ ຂົນສົ່ງຂອງລາວ ໄດ້ລົງນາມສັນຍາຮ່ວມມືການໃຫ້ບໍລິສັດທີ່ປຶກສາ ປຸງປຸງສະໜາມບິນໃຫ້ມີຄວາມທັນສະໄໝ.

ການຮ່ວມມື ເປັນໃນຮູບແບບ ລັດ ແລະ ເອກະຊົນ ໂດຍອົງການການເງິນສາກົນ ຈະເປັນທີ່ປຶກສາຫຼັກ ພາຍໃຕ້ສັນຍາ ທີ່ຈະເລີ່ມລົງມືປັບປຸງ ໃນປີ 2025-2030.

ໃນເບື້ອງຕົ້ນ ຈະມີການກໍ່ສ້າງເສີມອາຄານໃໝ່ ເພື່ອຂະຫຍາຍສະໜາມບິນສາກົນຫລວງພຣະບາງໃຫ້ກວ້າງອອກ ແລະ ປັບປຸງພາຍໃນ ໃຫ້ມີອຸປະກອນທີ່ທັນສະໄໝຫຼາຍຂຶ້ນ.

ຈະມີບໍລິສັດເກົາຫຼີໃຕ້ ຮ່ວມສໍາຫຼວດ ອອກແບບ ຜ່ານກະຊວງໂຍທາທິການ ແລະ ຂົນສົ່ງ ຂອງລາວ ໂດຍຈະຫຼີກລ້ຽງຜົນກະທົບຕໍ່ສະຖານະຄວາມເປັນມໍລະດົກໂລກ.

ເຈົ້າໜ້າທີ່ກ່ຽວຂ້ງແຂວງຫລວງພຣະບາງ ໄດ້ກ່າວຕໍ່ເອເຊັຽເສຣີ ໃນວັນທີ 10 ກັນຍາ ວ່າ:

“ນີ້ແມ່ນປັບປຸງອາຄານສະໜາມບິນນີ້ ສິ່ງອໍານວນຄວາມສະດວກນີ້ ຮູບເດີ ແຕ່ວ່າ ປັບປຸງທາງໃນ ລະບົບອຸປະກອນໃຫ້ມັນທັນສະໄມ ແລ້ວກະເສີມອາຄານຕື່ມ ໂດຍຜ່ານແບບຂອງເຄຫະຜັງເມືອງ ເພີິ່ນເປີດໃຫ້ ສ. ເກົາຫຼີ ເນາະ ມາສໍາຫຼວດ ແລ້ວກໍອອກແບບ ບໍ່ມີຜົນກະທົບຕໍ່ສິ່ງແວດລ້ອມ ແລ້ວກະຂອງມໍລະດົກໂລກ ເພາະວ່າ ເຂົາເຈົ້າ ໄດ້ໄປຜ່ານເຄຫະຜັງເມືອງກະຊວງໂຍທາ.”

ການປັບປຸງສະໜາມບິນຫລວງພຣະບາງ ໃຫ້ທັນສະໄໝດັ່ງກ່າວ ຍັງບໍ່ມີລາຍລະອຽດອອກມາເຜີຍແຜ່, ແຕ່ ການປັບປຸງຈະເປັນໄປຕາມກົດໝາຍມໍລະດົກແຫ່ງຊາດ ຖ້າຈະມີການປັບປຸງກໍ່ສ້າງ ແລະ ປະເມີນຜົນກະທົບ.

ເຈົ້າໜ້າທີ່ກົມມໍລະດົກໂລກໃນລາວ ໄດ້ກ່າວວ່າ:

“ຢູ່ໃນກົດໝາຍມໍລະດົກແຫ່ງຊາດນີ້ ໄດ້ລະບຸໄວ້ ໃນມາຕາ 65 ຫຼື 66 ທຸກໂຄງການພັດທະນາທີ່ ອາດມີຜົນກະທົບຕໍ່ມໍລະດົກ ຕ້ອງໃຫ້ມີການປະເມີນ ຜົນກະທົບ ກໍສາມາດເລີ່ມໂຄງການພັດທນາໄດ້.”

ປັດຈຸບັນ ມີຄົນເດີນທາງຂຶ້ນໄປແຂວງຫລວງພຣະບາງ ດ້ວຍທາງລົດໄຟຫຼາຍກວ່າ ເພາະມີລາຍຄາຖືກກວ່າ ການຂີ່ເຮືອບິນ.​ ເຈົ້າໜ້າທີ່ທ່ອງທ່ຽວ ແຂວງຫລວງພຣະບາງ ໄດ້ກ່າວວ່າ: 

“ແຕ່ກີ້ຜ່ານມາ ເພິ່ນກໍເຄີຍເວົ້າຢູ່ ຕອນປັບປຸງສະໜາມບິນ ທໍາອິດພຸ້ນນ່າ ຫຼັງຈາກນັ້ນ ທາງລັດຖະບານລາວ ກໍໄດ້ຊື້ແຈງຕໍ່ທາງອົງການຢູເນສໂກ້ ມັນກໍບໍ່ມີຫຍັງ ຜົນກະທົບຫລວງພຣະບາງກໍຍັງ ຮັກສາມໍລະດົກໂລກຄືເກົ່າຢູ່ ແຕ່ວ່າ ທຸກມື້ນີ້ເວົ້າເລື່ອງອັນນັກທ່ອງທ່ຽວເນາະ ສ່ວນຫຼາຍແມ່ນທາງລົດໄຟຫຼາຍກວ່າ ດຽວນີ້ສະໜາມບິນຖືວ່າ ທຽບໃສ່ເມື່ອກ່ອນ ຫຼຸດຫຼາຍ.”

ທີ່ຜ່ານມາ ກໍມີການພັດທະນາ ໃນເມືອງຫລວງພຣະບາງ ຕະຫຼອດ ໂດຍສະເພາະຂອງໂຄງການຕ່າງປະເທດ ແລະ ຈະມີໃບອະນຸຍາດປັບປຸງ ເພື່ອບໍ່ໃຫ້ກະທົບຕໍ່ເມືອງມໍລະດົກໂລກ.

ຊາວແຂວງຫລວງພຣະບາງ ທ່ານນຶ່ງ ໄດ້ກ່າວວ່າ:

“ອະນຸຮັກຢູ່ແຫຼະ ເມືອງເກົ່າ ຢູ່ໃນກາງເມືອງນີ້ນ່າ ແຕ່ວ່່າບາງສ່ວນ ແບບຂອງໂຄງການຕ່່າງປະເທດ ມີຫຍັງ ເຂົາເຈົ້າກະບໍ່ຟັງວ່າ ຊັ້ນສາ ເຂົາເຈົ້າກະເຮັດໄດ້ ຈະຕ້ອງໄດ້ແລ່ນເອກະສານ ແບບວ່າ ໃບອະນຸຍາດ ມັນຕ້ອງໄດ້ຜ່ານມໍລະດົກ.”

ປັດຈຸບັນ ສະໜາມບິນຫລວງພຣະບາງ ສາມາດຮອງຮັບຜູ້ໂດຍສານໄດ້ 1,3 ລ້ານ ຄົນ ຕໍ່ປີ ໂດຍມີອາຄານຜູ້ໂດຍສານຫຼັງດຽວ ສໍາລັບຖ້ຽວບິນພາຍໃນ ແລະ ຕ່າງປະເທດ.

ທາງການລາວ ຄາດການວ່າ ຖ້າໂຄງການປັບປຸງສະໜາມບິນສໍາເລັດ ສະໜາມບິນດັ່ງກ່າວ ຈະສາມາດໃຫ້ບໍລິການ ຜູ້ໂດຍສານສາກົນຫຼາຍກວ່າ 4 ລ້ານຄົນ ແລະ ຜູ້ໂດຍສານພາຍໃນ 5 ແສນຄົນ ຕໍ່ປີ ພ້ອມທັງຍົກລະດັບການເຊື່ອຈອດ ຂອງ ສປປ ລາວ ກັບພາກພື້ນເອເຊັຽຕາເວັນອອກສ່ຽງໃຕ້ ແລະ ສາກົນ.