ຕຣຽມສົ່ງສິນຄ້າໄປຈີນ ຕາມທາງຣົຖໄຟລາວ-ຈີນ

ສຸພັດຕາ
2022.01.21
Share on WhatsApp
Share on WhatsApp
ຕຣຽມສົ່ງສິນຄ້າໄປຈີນ ຕາມທາງຣົຖໄຟລາວ-ຈີນ ຂະບວນຣົຖໄຟໂດຍສານ EMU CR200J ຫຼື “ຂະບວນລ້ານຊ້າງ” ຖ້ຽວປະຖົມມະເລີກ ພວມເດີນທາງຜ່ານເຮືອນ ແລະ ທົ່ງນາ ຂອງພວກຊາວບ້ານ ໃນຕອນບ່າຍ ທີ່ຢູ່ໃກ້ກັບຂົວ ຂອງທາງຣົຖໄຟລາວ-ຈີນ ເຂດເມືອງໄຊທານີ, ນະຄອນຫຼວງວຽງຈັນ (TS), ວັນທີ 3 ທັນວາ 2021..
RFA

ທາງການລາວ ກະຕຣຽມດໍາເນີນການຈະຂົນສົ່ງສິນຄ້າຈາກລາວໄປຈີນ ຜ່ານເສັ້ນທາງຣົຖໄຟລາວ-ຈີນ ຜ່ານເສັ້ນທາງຣົຖໄຟລາວ-ຈີນ ສ່ວນລາຍຣະອຽດ ແລະແຜນການກ່າວນັ້ນ ພາກສ່ວນທີ່ກ່ຽວຂ້ອງ ຍັງບໍ່ທັນສາມາດເປີດເຜີຍໄດ້ເທື່ອ.

ດັ່ງເຈົ້າໜ້າທີ່ທີ່ເຮັດວຽກກ່ຽວຂ້ອງກັບ ການສົ່ງອອກສິນຄ້າໄປຈີນ ທ່ານນຶ່ງ ກ່າວຕໍ່ວິທຍຸເອເຊັຽເສຣີ ໃນວັນທີ່ 21 ມົກກະຣານີ້ວ່າ:

ດຽວນີ້ມັນບໍ່ທັນໄດ້ສົ່ງດຽວນີ້ ຂະເຈົ້າຈັດສົ່ງລະແມ່ນ ຂັ້ນເທິງພຸ້ນ ເປັນບໍຣິສັດທີ່ວ່າ ສາມາດເວົ້າເຣື່ອງຂາເຂົ້າ-ຂາອອກ ຊັ້ນສາເນາະ ມັນຈັ່ງຄ່ອຍສົ່ງອອກໄດ້ ຫັ້ນນ່າເນາະ ຄັນວ່າພວກໃດ ທີ່ຕ້ອງການເຈດຈໍານົງ ສົ່ງອອກເນາະ ເປັນບໍຣິສັດ ຕ້ອງໄດ້ໄປປະກອບເອກະສານ ຕາມຂແນງການກ່ຽວຂ້ອງພຸ້ນ ຈັ່ງຄ່ອຍດໍາເນີນໄດ້ເນາະ.”

ປັດຈຸບັນ ບໍຣິສັດ ວຽງຈັນ ໂລຈິສຕິກ ພາກ ຈໍາກັດ (Vientiane Logistic Park)   ຊຶ່ງເປັນບໍຣິສັດ ຢູ່ດ່ານສາກົລ ສິນຄ້າທ່າບົກທ່ານາແລ້ງ ເມືອງຫາດຊາຍຟອງ ນະຄອນຫຼວງວຽງຈັນ ທີ່ຈະດໍາເນີນການໃຫ້ການຂົນສົ່ງສິນຄ້າໄປຈີນ ຜ່ານເສັ້ນທາງຣົຖໄຟລາວ-ຈີນ ກໍກໍາລັງຢູ່ລະຫວ່າງການກະຕຣຽມຄວາມພ້ອມຫຼາຍດ້ານ ກ່ອນທີ່ຈະເປີດໃຫ້ບໍຣິການ ແກ່ຜູ້ປະກອບການໃນລາວ ທີ່ມີຄວາມປະສົງ ສົ່ງສິນຄ້າໄປຈີນ ຜ່ານເສັ້ນທາງຣົຖໄຟລາວ-ຈີນ.

ຢ່າງໃດກໍຕາມ ວິທຍຸເອເຊັຽເສຣີ ໄດ້ພຍາຍາມຕິດຕໍ່ ຫາບໍຣິສັດດັ່ງກ່າວ ແຕ່ທາງບໍຣິສັດ ຍັງບໍ່ທັນເປີດໃຫ້ບໍຣິການເບີໂທຣະສັບ ແລະຍັງບໍ່ໄດ້ເປີດເຜີຍແຜ່ຂໍ້ມູນດ້ານຕ່າງໆ ຢ່າງຣະອຽດ ຜ່ານທາງເວັບໄຊ໋ ຂອງບໍຣິສັດເທື່ອ.

ແຕ່ກ່ອນໜ້ານີ້ ໃນວັນທີ່ 31 ທັນວາ ປີ 2021 ທ່ານ ຈັນທອນ ສິດທິໄຊ ປະທານບໍຣິສັດ ວຽງຈັນ ໂລຈິສຕິກ ພາກ ຈໍາກັດ ເປີດເຜີຍຕໍ່ສື່ມວນຊົນລາວວ່າ ໂຄງການໂລຈິສຕິກ ໄດ້ເປີດໃຊ້ຕັ້ງແຕ່ວັນທີ່ 4 ທັນວາ ປີ 2021 ຊຶ່ງໄດ້ມີການຂົນສົ່ງສິນຄ້າຈາກໄທຍ ເຂົ້າມາລາວ ສເລັ່ຍມື້ລະ ປະມານ 100 ຕູ້ຄອນເທັນເນີ້ ເພື່ອສົ່ງສິນຄ້າຕໍ່ໄປຍັງປະເທດຈີນ ຜ່ານທາງຣົຖໄຟລາວ-ຈີນ ແຕ່ປັດຈຸບັນ ຍັງມີບັນຫາ ເຣື່ອງຂອດຂັ້ນຂອງການບໍຣິຫານ ແລະກວດການສິນຄ້າຜ່ານແດນ ຍ້ອນທາງການຈີນ ຍັງຈໍາກັດການໃຫ້ສິນຄ້າຈາກລາວ ຫຼືຈາກຕ່າງປະເທດ ຜ່ານແດນຈາກລາວເຂົ້າໄປຈີນ.

ສ່ວນຜູ້ປະກອບການຂົນສົ່ງສິນຄ້າ ຈາກລາວໄປຈີນ ຫຼາຍບໍຣິສັດ ກໍກໍາລັງລໍຖ້າທີ່ຈະໃຊ້ບໍຣິການ ຂົນສົ່ງສິນຄ້າໄປຈີນ ຜ່ານຣົຖໄຟລາວ-ຈີນ ຍ້ອນເຊື່ອວ່າ ຈະໃຊ້ເວລາຂົນສົ່ງໄວ ແລະ ສະດວກກວ່າ ການຂົນສົ່ງທາງຣົຖບົນທຸກ ແຕ່ກໍບໍ່ຮູ້ວ່າ ຈະເປີດໃຫ້ບໍຣິການເມື່ອໃດ.

ດັ່ງຜູ້ປະກອບການຂົນສົ່ງສິນຄ້າ ທ່ານນຶ່ງ ກ່າວວ່າ:

ຍັງບໍ່ທັນມີເທື່ອເດີ້ ອັນນີ້ກະບໍ່ແນ່ໃຈຄືກັນ ບໍ່ໄດ້ ສົ່ງບໍ່ໄດ້ ມີແຕ່ສົ່ງມາໄດ້ ແຕ່ເຮົາສົ່ງໄປບໍ່ໄດ້ ມີແຕ່ຂົນສົ່ງພາຍໃນປະເທດກ່ອນ ຣົຖໄຟຍັງບໍ່ມີເທື່ອເດີ້.”

ຜູ້ປະກອບການຂົນສົ່ງ ສິນຄ້າຈາກລາວໄປຈີນ ອີກທ່ານນຶ່ງກ່າວວ່າ ລາວເອງກໍຮູ້ຂ່າວວ່າ ມີບໍຣິສັດ ວຽງຈັນ ໂລຈິສຕິກ ພາກ ຈໍາກັດ ທີ່ກໍາລັງຈະໃຫ້ບໍຣິການຂົນສົ່ງສິນຄ້າ ຈາກລາວໄປຈີນ ແຕ່ກໍຍັງບໍ່ຮູ້ວ່າ ຈະເລີ່ມເມື່ອໃດ ຊຶ່ງໃນໄລຍະນີ້ ກໍມີແຕ່ຂົນສົ່ງສິນຄ້າ ຈາກລາວໄປຈີນ ຜ່ານທາງຣົຖບັນທຸກ ແລະ ເຮືອບິນ.

ສິນຄ້າໄປຈີນ ທາງບໍຣິສັດເຮົາ ກະມີບໍຣິການໂຕນີ້ແດ່ ແຕ່ເຂົາຍັງເຂົາຍັງບໍ່ໄດ້ເປີດເທື່ອ ສົ່ງໄປຈີນນີ້ ມັນຈະມີບໍຣິສັດອັນນຶ່ງຕ່າງຫາກ ບໍ່ແມ່ນບໍຣິສັດຣົຖໄຟ.”

ໃນຂະນະດຽວກັນ ປະເທດໄທຍ ກໍໄດ້ສົ່ງສິນຄ້າ ປະເພດເຂົ້າສານອອກໄປຈີນ ປະຣິມານ 1,000 ຕັນ ໂດຍຜ່ານເສັ້ນທາງຣົຖໄຟລາວ-ຈີນແລ້ວ, ດັ່ງທ່ານ ອະລົງກອນ ພົລບຸດ ທີ່ປຶກສາຣັຖມົນຕຣີ ວ່າການກະຊວງກະເສດ ແລະສະຫະກອນ ຂອງໄທຍ ໄດ້ໂພສຂໍ້ຄວາມ ລົງໃນເຟສບຸກສ່ວນໂຕຂອງທ່ານ ໃນວັນທີ່ 20 ມົກກະຣາ ຜ່ານມາວ່າ: “ປະເທດໄທຍ ສາມາດສົ່ງອອກເຂົ້າສານ ຈໍານວນ 20 ຕູ້ ປະຣິມານ 1,000 ຕັນ ໂດຍໃຊ້ເສັ້ນທາງຣົຖໄຟລາວ-ຈີນ ໄປຮອດຈີນແລ້ວ.”

ກ່ຽວກັບເຣື່ອງນີ້ ວິທຍຸເອເຊັຽເສຣີ ໄດ້ຕິດຕໍ່ໄປຫາກະຊວງກະເສດ ແລະສະຫະກອນ ຂອງໄທຍ ເພື່ອສອບຖາມລາຍຣະອຽດເພີ່ມຕື່ມ ແຕ່ເຈົ້າໜ້າທີ່ກ່ຽວຂ້ອງ ບໍ່ສະດວກໃຫ້ລາຍຣະອຽດທາງໂທຣະສັບ.

ສ່ວນຜູ້ປະກອບການຂົນສົ່ງສິນຄ້າຢູ່ໄທຍ ແຫ່ງນຶ່ງ ທີ່ຂໍສງວນຊື່ບໍຣິສັດ ຊຶ່ງໄດ້ເປັນໂຕແທນ ເລີ່ມໃຫ້ບໍຣິການ ຂົນສົ່ງສິນຄ້າຈາກໄທຍໄປຈີນ ໂດຍຜ່ານເສັ້ນທາງຣົຖໄຟໄທຍ-ລາວ ໄປເຊື່ອມຕໍ່ກັບຣົຖໄຟລາວ-ຈີນ ກ່າວວ່າ:

ພວກເຮົາເປັນບໍຣິສັດ ທີ່ເຮັດດ້ານການຂົນສິນຄ້າໄປລາວ ຜ່ານຣົຖໄຟໄທຍ-ລາວ ຖາມວ່າ ການຂົນສົ່ງມີຄວາມສະດວກບໍ ມັນກໍຍັງບໍ່ທັນເຂົ້າທີ່ເຂົ້າທາງ ແຕ່ໃນສ່ວນຂອງພວກເຮົາແລ້ວ ພວກເຮົາເຮັດທຸຣະກິຈ ຂົນສົ່ງສິນຄ້າມາຫຼາຍກວ່າ 30 ປີແລ້ວ ກໍບໍ່ໄດ້ຕິດຂັດຫຍັງຫຼາຍ.”

ໃນຂະນະດຽວກັນ ກໍຍັງມີຜູ້ປະກອບການ ຂົນສົ່ງສິນຄ້າຢູ່ໄທຍ ອີກຈໍານວນຫຼາຍ ທີ່ຍັງບໍ່ທັນມີແຜນ ໃຊ້ບໍຣິການຂົນສົ່ງສິນຄ້າ ຜ່ານທາງຣົຖໄຟລາວ-ຈີນ ຍ້ອນຍັງຕ້ອງເບິ່ງປັດຈັຍ ທາງດ້ານເສຖກິຈ ແລະອື່ນໆອີກຫຼາຍຢ່າງນໍາ.

ດັ່ງຜູ້ປະກອບການ ຂົນສົ່ງສິນຄ້າອີກນາງນຶ່ງ ກ່າວວ່າ:

ຕອນນີ້ຍັງບໍ່ມີແຜນເທື່ອ ແຕ່ກໍຍັງມີການຂົນສົ່ງສິນຄ້າໄປຈີນ ສົ່ງຜ່ານທາງເຮືອບິນ ແລະທາງເຮືອ ຊິຶ່ງສ່ວນຫຼາຍຈະສົ່ງສິນຄ້າ ປະເພດ ຜລິດຕະພັນບໍາຣຸງຜິວ ແລະຂນົມກິນຫຼິ້ນຕ່າງໆ.”

ຫຼ້າສຸດນີ້ ຄ່າບໍຣິການຂົນສົ່ງສິນຄ້າ ແລະຄ່າທໍານຽມເອກະານຕ່າງໆ ໃນລາວຍັງມີລາຄາສູງຢູ່ ໂດຍທ່ານ ຄໍາແພງ ໄຊສົມແພງ ຣັຖມົນຕຣີກະຊວງອຸດສາຫະກັມ ແລະການຄ້າ ໄດ້ສເນີໃຫ້ບໍຣິສັດທາງຣົຖໄຟລາວ-ຈີນ ຈໍາກັດ ປັບປຸງໂຄງຮ່າງພື້ນຖານ ສະຖານີຣົຖໄຟແຕ່ລະແຫ່ງ ເພື່ອຮອງຮັບການຂົນສົ່ງສິນຄ້າໃຫ້ຫຼາຍຂຶ້ນ ແລະສົມທົບກັບໂຄງການ ທ່າບົກທ່ານາແລ້ງ ແລະເຂດໂລຈິສຕິກ ນະຄອນຫຼວງວຽງຈັນ ເພື່ອເຮັດໃຫ້ວຽກໄປໃນລວງດຽວກັນ ໃນຂະນະທີ່ ຜູ້ປະກອບການຫຼາຍຄົນ ກໍເຫັນວ່າ ຖ້າຫຼຸດຄ່າບໍຣິການຂົນສົ່ງລົງໄດ້ ຈະຊ່ອຍເຮັດໃຫ້ເສຖກິຈລາວ ສາມາດແຂ່ງຂັນ ກັບນາໆປະເທດໄດ້.

ມາຮອດປັດຈຸບັນ ສະຖານີຣົຖໄຟລາວ-ຈີນ ໄດ້ເປີດໃຫ້ບໍຣິການ ຂົນສົ່ງສິນຄ້າພາຍໃນປະເທດແລ້ວ 3 ສະຖານີ ໄດ້ແກ່ ສະຖານີຂົນສົ່ງສິນຄ້າວຽງຈັນໃຕ້ ນະຄອນຫຼວງວຽງຈັນ, ສະຖານີວັງວຽງ ແຂວງວຽງຈັນ ແລະສະຖານີຂົນສົ່ງສິນຄ້ານາເຕີຍ ແຂວງຫຼວງນໍ້າທາ, ອີງຕາມຂໍ້ມູນຈາກບໍຣິສັດ ທາງຣົຖໄຟລາວ-ຈີນ ຈໍາກັດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ