ການຄ້າລາວ-ໄທຍ ຕົກຕໍ່າ ໄລຍະໂຄວິດ-19

ສິດນີ
2021-06-22
Share
ການຄ້າລາວ-ໄທຍ ຕົກຕໍ່າ ໄລຍະໂຄວິດ-19 ການຂົນສົ່ງສິນຄ້າ ຂ້າມຊາຍແດນ ຂົວມິຕພາບ ລາວ-ໄທຍ ເມືອງຊຽງຂອງ ແຂວງຊຽງຮາຍ ຣະຫວ່າງ ແຂວງບໍ່ແກ້ວ ປະເທດລາວ
ນັກຂ່າວພົລເມືອງ

ການຄ້າຊາຍແດນຣະຫວ່າງ ລາວ-ໄທຍ ໂດຍສະເພາະ ໃນເຂດພາກເໜືອ ໄດ້ຮັບຜົລກະທົບໜັກ ພາຍຫຼັງ ການຣະບາດຂອງ ໂຄວິດ-19 ຍ້ອນທາງການລາວປິດດ່ານ ເຂົ້າ-ອອກ ເກືອບໝົດທຸກແຫ່ງ ເພື່ອປ້ອງກັນໂຄວິດ-19 ແຜ່ລາມ. ດັ່ງເຈົ້າໜ້າທີ່ ອຸດສາຫະກັມ ແລະ ການຄ້າ ທ່ານນຶ່ງຜູ້ທີ່ບໍ່ປະສົງອອກຊື່ ກ່າວຕໍ່ເອເຊັຽເສຣີ ໃນມື້ວັນທີ 22 ມິຖຸນາ ນີ້ວ່າ:

“ສິນຄ້າຂອງໄທຍ ເຂົ້າມາລາວ ສິນຄ້າທີ່ເຮົາສ່ວນຫຼາຍຜລິດບໍ່ໄດ້ ຫຼືວ່າຜລິດບໍ່ພໍ ທາງບໍ່ແກ້ວ ແລະ ໄຊຍະບູຣີ ກະພາຍຫຼັງທີ່ເຮົາ ໃຊ້ມາຕການຄວບຄຸມນີ້ ພວກເຮົາເປີດແຕ່ດ່ານ ສາກົນ ພວກດ່ານນ້ອຍດ່ານຫຍັງ ພວກເຮົາກະບໍ່ໄດ້ເປີດ ຕົວເລກການຄ້າຫລຸດລົງ ກະຢ່າກົວຊັນລະ ມັນກະເຂົ້າໄດ້ແຕ່ດ່ານໃຫຍ່ເດ້.”

ທ່່ານກ່າວຕຶ່ມວ່າ ປັດຈຸບັນ ໄທຍ ຊຶ່ງເປັນປະເທດຄູ່ຄ້າອັນດັບນຶ່ງ ຂອງລາວ ທັງການສົ່ງອອກສິນຄ້າ ແລະ ການທ່ອງທ່ຽວ ເຮັດໃຫ້ ລາວມີຣາຍໄດ້ຈາກໄທຍ ປະມານ 2,000 ຫາ 2,500 ລ້ານໂດຣາ ສະຫະຣັດ ແຕ່ລະປີ ໂດຍສິນຄ້າຫຼັກທີ່ລາວ ສົ່ງໄປຂາຍໃຫ້ໄທຍ ກໍແມ່ນໄຟຟ້າ ພືດກະສິກັມ ແລະແຮ່ທາດຕ່າງໆທັງໝົດ ຂົນສົ່ງຜ່ານດ່ານຊາຍແດນ ລາວ-ໄທຍ ທັງທາງບົກ ແລະທາງນ້ຳ ປະມານ 50 ແຫ່ງ.

ແນວໃດກໍຕາມ ທາງການລາວກຳລັງ ຢູຸ່ໃນຣະຫວ່າງການຮິບໂຮມຂໍ້ມູນ ຕົວເລກການຄ້າຊາຍແດນ ຣະຫວ່າງລາວ-ໄທຍ ໃນໄລຍະ ໂຄວິດ-19 ຣະບາດນີ້່ວ່າໃນປີນີ້ ລາວ ຈະຂາດ ຣາຍໄດ້ຫຼາຍໜ້ອຍປານໃດ ຂນະທີ່ຕົວໂລກ ການສົ່ງສິນຄ້າອອກຂອງລາວ ໄປໄທຍ ໃນປີ 2020 ຫລຸດລົງ 41.89% .

ກ່ຽວກັບເຣື້ອງນີ້ ເຈົ້າຫນ້າທີ່ຜແນກອຸດສາຫະກັມ ແລະການຄ້າ ແຂວງບໍ່ແກ້ວ ທ່ານນຶ່ງເວົ້າວ່າ ເປັນທີ່ຍອມຮັບວ່າ ເມຶ່ອເກີດການ ຣະບາດຂອງໂຄວິດ-19 ທີ່ເຮັດໃຫ້ທາງການລາວ ປິດປະເທດນັ້ນ ກໍສົ່ງຜົລກະທົບ ຕໍ່ການຄ້າຊາຍແດນ ໃນຫຼາຍແຂວງຂອງລາວ ແລະ ທີ່ແຂວງບໍ່ແກ້ວ ກັບແຂວງຕົງກັນຂ້າມກັບໄທຍໜັກພໍສົມຄວນ ເນຶ່ອງຈາກວ່າເສຖກິດ ຫຼາຍຢ່າງໃນແຂວງບໍ່ແກ້ວ ເພິ່ງພາ ນັກທ່ອງທ່ຽວຈາກໄທຍ ແຕ່ເມຶ່ອບໍ່ມີນັກທ່ອງທ່ຽວ ເຂົ້າມາ ການຄ້າຂາຍກໍຢຸດສງັກ.

“ຄັນຖ້າວ່າໄທຍ ບໍ່ເປີດດ່ານບໍ່ເປີດຊາຍແດນ ອັນເຊຶ່ອມກັນກັບລາວ ເຮົານີ້ ເສຖກິດເຮົານີ້ມັນກໍໄປຍາກ ເພາະວ່າໄທຍນີ້ເປັນໂຕຄຳ ທີ່ສຳຄັນນ່າ ອັນລາວນີ້ຄັນວ່າບໍ່ໄດ້ຄ້າຂາຍ ກັບຊາຍແດນໄທຍ ນີ້ ກະຢາກຫຍຸ້ງຍາກຢູ່.”

ຜູ້ເຮັດທຸຣະກິດໃຫ້ຄົນເຊົ່າບ່ອນຂາຍຂອງ ໃນເຂດເມືອງຕົ້ນເຜິ້ງ ແຂວງບໍ່ແກ້ວ ກ່າວຕໍ່ເອເຊັຽເສຣີວ່າ ໄດ້ຮັບຜົລກະທົບຂ້ອນຂ້າງ ໜັກແທ້ ຍ້ອນວ່າຕ້ອງໄດ້ປິດຕລາດ ໄປເລີຍເພາະ ບໍ່ມີນັກທ່ອງທ່ຽວ ແລະ ຄົນມາຊື້ຄືແຕ່ກ່ອນ.

“ຍັງໆ ຍັງບໍ່ທັນໄດ້ເປີດເອີ ຍັງປິດຢູ່ ກໍຈັ່ງວ່າ ດຽວນີ້ຍັງບໍ່ທັນຮູ້ເທຶ່ອນ່າດຽວນີ້ ອັນນັ້ນທາງການຄ້າ ເພິ່ນຊິ່ແລ່ນເຕັ້ນດຽວນີ້ ຊິ່ໃຫ້ ເຂົາມາເປີດຫັ້ນນ່າ ຕລາດໂຕເທສບານນີ້ເປີດແລ້ວ ຂອງເຮົານີ້ຍັງບໍ່ທັນເປີດ ໂຈະໄວ້ກ່ອນຫັ້ນນ່າ.”

ຊາວລາວຄົນນຶ່ງ ທີ່ເປີດຮ້ານຂາຍເຄຶ່ອງ ຢູ່ຕລາດສົດ ຢູ່ເມືອງແກ່ນທ້າວ ແຂວງໄຊຍະບູຣີ ເວົ້າວ່າ ທາງການເຣີ່ມຜ່ອນຄາຍມາຕການ ຕ່າງໆແລ້ວເຮັດໃຫ້ທຸຣະກິດບາງຂແນງ ກັບມາເຄຶ່ອນໄຫວ ຕາມປົກກະຕິແລ້ວ ແຕ່ການຂາຍເຄື່ອງຍັງບໍ່ຄ່ອຍດີ ຄືແຕ່ກ່ອນຍ້ອນບໍ່ມີ ນັກທ່ອງທ່ຽວ.

“ດ່ານນີ້ເພິ່ນຊິເປີດມື້ໃດໂອ້ ຄືຊິ່ຍັງດົນໄດ໋ນິ ມັນກໍຫາກຜ່ອນຄາຍແລ້ວ ມັນກໍບໍ່ໄດ້ຕຶງຄຽດ ຫຼາຍປານໃດ ຄືແຕ່ກອ່ນແລ້ວຫັ້ນນ່າ.”

ຊາວບ້ານອີກຄົນນຶ່ງ ທີ່ເປັນໂຕແທນຈຳໜ່າຍສິນຄ້າ ທີ່ນຳເຂົ້າມຈາກໄທຍ ໃນເມືອງເງິນແຂວງໄຊຍະບູຣີ ເວົ້າວ່າການປິດດ່ານ ສາກົນ ແລະດ່ານທ້ອງຖິ່ນ ເຮັດໃຫ້ການຄ້າຊາຍແດນ ລາວ-ໄທຍ ຢຸດສງັກ ໂດຍສະເພາະຮ້ານອາຫານສົດ ແລະ ອາຫານປ່າ ປິດໝົດ ເນຶ່ອງຈາກຄົນໄທຍ ບໍ່ຂ້າມມາຊື້.

“ບໍ່ໆ ບໍ່ໄດ້ເປີດແຫລະ ເພິ່ນບໍ່ເປີດງ່າຍຕິ ຍັງຂາຍປົກກະຕິ ເຄື່ອງກະເອົາເຂົ້າປົກກະຕິ ເຄຶ່ອງຢູ່ດ່ານເຮົານີ້ກະຂາຍບໍ່ຄືເກົ່າແຫລະ ໄດ້ຂາຍດ້າມເລັກຊຶ່ໆແຫຼະ ບໍ່ໄດ້ຂາຍຫຼາຍດອກ.”

ຢ່າງໃດກໍຕາມ ທາງການໄທຍ ກໍົໄດ້ຣາຍງານສະພາບການຄ້າຊາຍແດນ ລາວ-ໄທຍ ໃນມື້ວັນທີ 22 ມິຖຸນາ ນີ້ວ່າ ນັບຕັ້ງແຕ່ການ ຣະບາດຂອງໂຄວິດ-19 ເຮັດໃຫ້ສະພາບການຄ້າ ຊາຍແດນລາວ-ໄທຍ ທາງພາກເໜືອ ຣະຫວ່່າງ ແຂວງຊຽງຮາຍ ກັບ ແຂວງ ບໍ່ແກ້ວ, ແຂວງເລີຍ ກັບ ແຂວງໄຊຍະບູຣີ ຊຶ່ງແຕ່ກອ່ນເຄີຍຄຶກຄຶ້ນ ກໍໄດ້ຊົບເຊົາ ລົງຢ່າງໜັກໜ່ວງ ຫົວໜ້າດ່ານສາກົນ ເມຶອງ ຊຽງແສນ ແຂວງຊຽງຮາຍ ເວົ້າວ່າ ພາຍຫລັງທີ່ປະເທດລາວ ປະກາດປິດດ່ານສາກົນ ແລະ ດ່ານທ້ອງຖິ່ນທຸກແຫ່ງ ໃນເຂດພາກ ເໜືອ ກໍເຮັດໃຫ້ຕົວເລກ ການຄ້າຊາຍແດນຂອງໄທຍ ໃນປີ 2020 ລຸດລົງ 21.42% ແລະ ໃນປີ 2021 ນີ້ ຫລຸດລົງແລ້ວ 19%.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ