ປີນີ້ ສປປ ລາວ ຍັງຂາດດຸນການຄ້າ 5 ເດືອນຊ້ອນ

ສູນຂໍ້ມູນຂ່າວສານທາງດ້ານການຄ້າຂອງ ສປປ ລາວ ຫຼື LTP ໄດ້ລາຍງານວ່າ ລາວຍັງຄົງຂາດດຸນການຄ້າ ໂດຍ 5 ເດືອນທຳອິດຂອງປີ 2024, ລາວຂາດດຸນການຄ້າແລ້ວ 658 ລ້ານໂດລ້າສະຫະລັດ. ໃນຂະນະທີ່ນາຍົກລັດຖະມົນຕີ ກ່າວຕໍ່ກອງປະຊຸມ ສະພາແຫ່ງຊາດວ່າ ລາວຍັງເກີນດຸນການຄ້າ ຖ້າບໍ່ລວມການນໍາເຂົ້າ-ສົ່ງອອກ ຂອງໄຟຟ້າ, ລາວຈະຂາດດຸນການຄ້າ 451 ລ້ານໂດລ້າສະຫະລັດ. ກ່ຽວກັບການນໍາເຂົ້າ-ສົ່ງອອກ ເຈົ້າໜ້າທີ່ກະຊວງອຸດສາຫະກຳ ແລະ ການຄ້າ ຜູ້ບໍ່ປະສົງອອກຊື່ ແລະ ຕຳແໜ່ງກ່າວຕໍ່ວິທຍຸເອເຊັຽເສຣີ ໃນວັນທີ 18 ມິຖຸນາ 2024 ວ່່າ:

“ມູນຄ່ານໍາເຂົ້າຫຼັກໆ ກໍ່ຊິແມ່ນນໍ້າມັນມູນຄ່າການຄ້າຫັ້ນນ່າ ອໍອັນນີ້ ກໍ່ຫຼາຍແນວ ແຕ່ວ່າຫຼັກໆ ກໍ່ສິນຄ້ານໍາເຂົ້າສ່ວນຫຼາຍ ກໍ່ແມ່ນເຄື່ອງໃຊ້ຄົວເຮືອນ ນີ້ເປັນສ່ວນໃຫຍ່ລວມ ເປັນມູນຄ່າແລ້ວມັນກໍ່ສູງກ່ວາຫັ້ນນ່າ ຄັນວ່າລວມທັງໝົດ.”

ທ່ານໄດ້ກ່າວຕື່ມວ່າ ສິນຄ້າສົ່ງອອກສໍາຄັນ ຂອງລາວແມ່ນເປັນພືດເສດຖະກິດ ແລະ ແຮ່ທາດທີ່ຍັງບໍ່ທັນມີການແປຮູບ ເຮັດໃຫ້ລາຄາທີ່ໄດ້ຈາກການສົ່ງອອກ ບໍ່ທັນຫຼາຍພໍເທົ່າໃດເມື່ອທຽບກັບ ປະລິມານສິນຄ້າຍ້ອນປະເທດລາວ ຍັງບໍ່ມີບຸກຄະລາກອນທີ່ມີຄວາມຮູ້ ແລະ ງົບປະມານໃນການລົງທຶນ ດ້ານເທັກໂນໂລຢີ.

“ສົ່ງອອກປະເພດພືດເສດຖະກິດແນ່ ແລ້ວກໍ່ສົ່ງອອກປະເພດແຮ່ທາດແນ່ ແຕ່ລະປະເພດສົ່ງອອກທີ່ເປັນຜະລິດຕະພັນແທ້ໆ ມີໜ້ອຍຫຼາຍ ເພາະວ່າເຮົາບໍ່ສາມາດຜະລິດ ເປັນເຄື່ອງສຳເລັດຮູບ ເພື່ອສົ່ງອອກ. ສ່ວນຫຼາຍເຮົາສົ່ງອອກ ໃນລັກສະນະເປັນວັດຖຸດິບ ເປັນພືດເສດຖະກິດ ມັນຕົ້ນກໍ່ຫຼາຍຢູ່. ບໍ່ອັນນ່າ ບຸກຄະລາຄອນນີ້ແຫຼະ ລວມເຖິງເລື່ອງແມ່ນແຫຼະ ເຄື່ອງມືທັນສະໄໝເນາະ ແລ້ວກໍ່ເລື່ອງເຕັກນິກຂະບວນການຜະລິດ.”

ທ່ານໄດ້ກ່າວໃນຕອນທ້າຍວ່າ ເຖິງແມ່ນວ່າສິນຄ້າການນໍາເຂົ້າ ອັນດັບທໍາອິດຂອງ ສປປ ລາວ ແມ່ນນໍ້າມັນກາຊວນ ແລະ ຮອງລົງມາແມ່ນເປັນອຸປະກອນກົນຈັກ, ຍານພາຫະນະ ແລະ ເຫຼັກ, ແຕ່ໃນສະພາບຕົວຈິງແລ້ວຖ້າຫາກນໍາສິນຄ້າ ອຸປະໂພກ-ບໍລິໂພກໃນຊີວິດປະຈຳວັນ ປະເພດຕ່າງໆ ມາລວມກັນກໍ່ຈະມີມູນຄ່າເປັນອັນດັບສອງ ຮອງຈາກມູນຄ່າ ການນໍາເຂົ້ານໍ້າມັນກາຊວນ.

ກ່ຽວກັບການສົ່ງ ອອກຊາວສວນມັນຕົ້ນ ຢູ່ນະຄອນຫຼວງວຽງຈັນກ່າວວ່າ ມັນຕົ້ນແມ່ນເປັນພືດເສດຖະກິດທີ່ຖືກສົ່ງອອກໄປຍັງປະເທດຈີນ ເປັນຈໍານວນຫຼາຍໃນໄລຍະ 3 ເດືອນທຳອິດຂອງປີ 2024 ທັງນີ້ຊາວສວນມັນຕົ້ນ ຈະບໍ່ແມ່ນເປັນຜູ້ສົ່ງອອກໂດຍກົງ ແຕ່ຈະຂາຍໃຫ້ແກ່ລານຮັບຊື້ມັນຕົ້ນ ທີ່ເປັນຂອງນັກລົງທຶນຊາວຕ່າງປະເທດ ໃນຖານະພໍ່ຄ້າຄົນກາງທັງນີ້ບໍ່ວ່າ ຈະເປັນໄລຍະທີ່ມີສິນຄ້າໜ້ອຍ ຫຼືຫຼາຍພໍ່ຄ້າຄົນກາງຈະຕີລາຄາຖືກ ແລະຊາວກະສິກອນລາວ ກໍ່ຕ້ອງຍອມຂາຍ.

“ຈີນນີ້ເກັບຢາກຕໍ່ານ່າ ກົດລົງກົດລາຄາລົງ ບາງເທື່ອປະຊາຊົນ ເອົາໄປຂາຍໃຫ້ມັນ ແລ້ວເອົາໄປຮອດໜ້າໂຮງງານ ແລ້ວມັນແຈ້ງລາຄາມື້ວານ ກັບມື້ນີ້ ບໍ່ຄືກັນ ບໍ່ກົງກັນເລີຍ ແຕ່ເຂົາກໍ່ຈຳເປັນ ໄດ້ຂາຍຊິນ່າລາຄາຕໍ່າສຸດມີແຕ່ 1,400 ກີບ ມັນຫົວໃດ ເຂົາເອົາເຂົ້າໂຮງງານຜະລິດແປ້ງນ່າ. ຕົ້ນທຶນສູງອັນໃດກໍ່ແພງເນາະ ໄປຂາຍແລ້ວສະເລັ່ຍນີ້ລຸບທຶນຄ່າເງິນເຟີ້ ອີກມາໄລ່ແລ້ວຊື້ຢາຂ້າຫຍ້າ ເປັນເງິນບາດ ເຂົາກໍ່ໄລ່ເປັນເງິນກີບ ແຕ່ກໍ່ສະເລ່ຍເປັນເງິນບາດແຫຼະ ພໍ່ຄ້າຄົນກາງຫັ້ນແຫຼະ ໄດ້ຜູ້ທີ່ຊາວກະເສດຕະກອນແທ້ ຖືກເອົາປຽບຕະຫຼອດ.”

ສ່ວນການຄ້າພາຍໃນ ເຈົ້າຂອງປໍ້ານໍ້າມັນແຫ່ງໜຶ່ງ ຢູ່ນະຄອນຫຼວງວຽງຈັນ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ ປະຈຸບັນນໍ້າມັນເຊື້ອໄຟ ທີ່ນໍາເຂົ້າຈາກຕ່າງປະເທດ ເປັນເງິບາດ ຫຼືເງິນໂດລ້າສະຫະລັດ ແຕ່ເມື່ອນໍາເຂົ້າ ມາຂາຍພັດຂາຍເປັນເງິນກີບ ສະນັ້ນລາຄານໍ້າເຊື້ອໄຟ ຈຶ່ງມີການປັບລາຄາຂຶ້ນ-ລົງຕາມອັດຕາແລກປ່ຽນ ເງິນຕາຕ່າງປະເທດ ໃນແຕ່ລະໄລຍະເຊິ່ງສົ່ງຜົນກະທົບໂດຍກົງ.

“ກາຊວນກັບແອັດຊັງທໍາມະດາ ທີ່ວ່າຄົນໃຊ້ຫຼາຍ 5 ມື້ທີ່ຜ່າມາ, ຫຼ້າສຸດນີ້ແມ່ນປັບຂຶ້ນ. ແມ່ນຂຶ້ນນໍາເຣດເງິນຫຼັກໆ ກໍ່ຄືວ່ານໍາເຂົ້າມາຈາກໄທເນາະ ແຕ່ວ່າຊ່ວງພັກຫຼັງ ກໍ່ມີນໍາເຂົ້າມາຈາກຫວຽດນາມ ນໍາຜົນກະທົບບໍ່ໜ້າຈະຂຶ້ນກັບລູກຄ້າ ທີ່ມາຊື້ຈ່າຍສໍ່າເກົ່າ ແຕ່ວ່າໄດ້ນໍ້າມັນໜ້ອຍລົງໂດຍ.”

ເຈົ້າຂອງປໍ້ານໍ້າມັນ ຢູ່ນະຄອນຫຼວງວຽງຈັນກ່າວຕື່ມວ່າ ເມື່ອວັນທີ 13 ມິຖຸນາ 2024 ຜ່ານມາ ກະຊວງອຸດສາຫະກຳ ແລະ ການຄ້າ ໄດ້ອອກແຈ້ງການປັບຂຶ້ນລາຄານໍ້າມັນ ແອັດຊັງພິເສດ ເພີ່ມຂຶ້ນອີກ 640 ກີບ, ຕົກເປັນ 32,160 ກີບ/ລິດ, ແອັດຊັງທຳມະດາເພີ່ມຂຶ້ນອີກ 190 ກີບ, ຕົກເປັນ 25,140 ກີບ/ລິດ ແລະ ກະຊວນເພີ່ມຂຶ້ນອີກ 190 ກີບ, ຕົກເປັນ 21,640 ກີບ/ລິດ ທັງນີ້ນໍ້າມັນເຊື້ອໄຟ ຈະມີລາຄາແຕກຕ່າງກັນ ໃນແຕ່ລະພື້ນທີ່. ສ່ວນເຄື່ອງໃຊ້ໃນຄົວເຮືອນ ທີ່ໄດ້ນໍາເຂົ້າຈາກຕ່າງປະເທດ ແມ່ນມີລາຄາແຕກຕ່າງກັນໃນແຕ່ລະມື້ ຍ້ອນບັນຫາເງິນເຟີ້ ທີ່ເພີ່ມສູງຂຶ້ນເລື້ອຍໆໂດຍບໍ່ມີທ່າອ່ຽງຫຼຸດລົງ ໃນຮອບ 4-5 ປີທີ່ຜ່ານມາ.

“ຂຶ້ນໆສິນຄ້າອຸປະໂພກ-ບໍລິໂພກ ທຸກຢ່າງທີ່ນໍາເຂົ້າມາຈາກປະເທດໄທ. ແມ່ນລາຄາປັບຂຶ້ນເບິດເລີຍບໍ່ວ່າຈະຢູ່ໃນ ບິກຊີ ກໍ່ຕາມ. ມິນິມາດທົ່ວໄປ ຕາມຮ້ານ ໝາຍປັບຂຶ້ນໝົດ ໂດຍບາງມິນິມາດ ເຂົາເຈົ້າບໍ່ຕິດລາຄາ. ລາຄາຈະໄປເຊັກຢູ່ຄາວເຕີ້ ຊີ້ນ່າ ຂະເຈົ້າປັບຕາມເຣດເງິນ ນໍາເຂົ້າແຕ່ລະອາທິດ ແຕ່ວ່າຕາມເຣດທະນາຄານ ກໍ່ຍັງຢູ່ 690 ແຕ່ວ່າເຣດທີ່ວ່າ ເຂົາເຈົ້າແລກປ່ຽນກັນເອງ ຕົກຢູ່ 700 ປາຍ 720.”

ພະນັກງານ ໂຮງງານແປຮູບເກືອກາລີ ໄປຍັງປະເທດຈີນກ່າວວ່າ ສໍາລັບໃນໄລຍະເດືອນເມສາ ຫາເດືອນພຶດສະພາ 2024 ນີ້ ເກືອກາລີ ໄດ້ກາຍເປັນສິນຄ້າລຳດັບຕົ້ນໆ ໃນການດຳເນີນການ ຂອງຊາວຕ່າງປະເທດ ໄດ້ຖືກສົ່ງອອກ ໄປຍັງປະເທດຈີນ, ໄທ ແລະ ຫວຽດນາມ ພາຍຫຼັງໝົດລະດູເກັບກ່ຽວມັນຕົ້ນ ທີ່ເປັນສິນຄ້າຫຼັກໃນການສົ່ງອອກ ຂອງລາວລະຫວ່າງເດືອນມັງກອນ ຫາ ເດືອນມີນາ 2024.

“ເຈົ້າໆ ມີເບິດທຸກທາງທີ່ເວົ້າມາເລີຍແຕ່ວ່າ ຂອງເຮົາເຮົາຈະຮັບໜ້າທີ່ ແຕ່ທາງລົດໄຟ ໜ້າທີ່ເຮົານ່າຄວາມໝາຍວ່າ ຈຂະເຈົ້າໄປໄທ ແລ້ວກໍ່ໄປຫວຽດນາມຄືກັນ ເກືອກາລີ ມັນກໍ່ຈະມີວິທີໃຊ້ຫຼາຍໆ ແບບອາດຈະໄປໃຊ້ປະສົມໜ້ອຍໜຶ່ງ ຫຼືວ່າໄປໃຊ້ຈັ່ງໃດຫັ້ນນ່າ.”

ກ່ຽວກັບການຂາດດຸນ ການຄ້າ ພາຍໃນປີ 6 ເດືອນຕົ້ນປີ 2024 ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ກ່າວລາຍງານ ໃນກອງປະຊຸມສະພາແຫ່ງຊາດ ສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ 9 ເມື່ອວັນທີ 10 ມິຖຸນາ 2024 ວ່າ ໃນໄລຍະ 6 ເດືອນຕົ້ນປີ 2024 ໂດຍລວມເຫັນວ່າເສດຖະກິດລາວ ມີທ່າອ່ຽງຂະຫຍາຍຕົວດີຂຶ້ນ ສາມາດບັນລຸໄດ້ໃນລະດັບ 4.7% ຄາດຄະເນໝົດປີ ບັນລຸໄດ້ຕາມມະຕິສະພາ ກຳນົດຢູ່ທີ່ 4.5%. ຈີດີພີ (GDP) ຄາດຄະເນ 6 ເດືອນຕົ້ນປີ 2024 ບັນລຸໄດ້ 148,043 ຕື້ກີບ ເທົ່າກັບ 50.4% ໂດຍແຜນການທີ່ມະຕິ ສະພາກໍານົດ 293,876 ຕື້ກີບ. ສ່ວນການສົ່ງອອກ 4.7 ຕື້ໂດລ້າສະຫລັດ, ນໍາເຂົ້າ 4.4 ຕື້ໂດລ້າສະຫະລັດ, ເກີນດຸນ 331 ລ້ານໂດລ້າສະຫະລັດ ແຕ່ຖ້າບໍ່ລວມການນໍາເຂົ້າ-ສົ່ງອອກ ໄຟຟ້າ ຈະຂາດດຸນ 451 ລ້ານໂດລ້າສະຫະລັດ.