ລາວຂາດດຸນການຄ້າ ໃນເດືອນມິຖຸນາ 133 ລ້ານໂດລ້າ

ປະເທດລາວຍັງສືບຕໍ່ຂາດດຸນການຄ້າ ຢ່າງຕໍ່ເນື່ອງຕະຫຼອດ 6 ເດືອນ ຂອງປີ 2024 ສະເພາະໃນເດືອນມິຖຸນາລາວຂາດດຸນການຄ້າ 133 ລ້ານໂດລ້າ. ໃນນີ້ມູນຄ່າການນໍາເຂົ້າ 680 ລ້ານໂດລ້າ ແລະ ມູນຄ່າການສົ່ງອອກ 547 ລ້ານໂດລ້າ. ອີງຕາມ ສູນຂໍ້ມູນທາງດ້ານການຄ້າຂອງ ສປປ ລາວ ຫລື LTP ລາຍງານເມື່ອວັນທີ 30 ກໍລະກົດ.

ປັດໄຈທີ່ເຮັດໃຫ້ປະເທດລາວ ຂາດດຸນການຄ້າຍ້ອນອັດຕາແລກປ່ຽນ ມີການເໜັງຕິງສູງ ເພາະລາວນໍາເຂົ້າສິນຄ້າຈາກຕ່າງປະເທດ ຫລາຍກ່ວາສົ່ງອອກ ເຊິ່ງຕ້ອງໄດ້ນໍາໃຊ້ເງິນຕາຕ່າງປະເທດ ທັງເງິນໂດລ້າ ເງິນບາດ ແລະ ເງິນຢວນ. ດັ່ງເຈົ້າໜ້າທີ່ກ່ຽວຂ້ອງກັບວຽກງານ ການຄ້າກ່າວຕໍ່ວິທຍຸເອເຊັຽເສຣີ ໃນວັນທີ 02 ສິງຫາ ນີ້ວ່າ:

“ແຕ່ວ່າມັນຢາກວ່າອັດຕາແລກປ່ຽນ ເງິນເຟີ້ ເພາະວ່າເງິນໂດລ້າແຕ່ລະມື້ມັນບໍ່ຢູ່ເກົ່າຫັ້ນນ່າບໍ່ທັນໄດ້ຂາຍກາຫລຸບທືນແລ້ວຄາຢູ່ບ່ອນວ່າ ເລື່ອງອັດຕາແລກປ່ຽນນີ້ແຫຼະເງິນມັນເປັນຊິເດ້.”

ການອ່ອນຄ່າຂອງເງິນກີບ ເປັນປັດໃຈສໍາຄັນທີ່ເຮັດໃຫ້ລາວຂາດດຸນການຄ້າ ເພາະຕ້ອງນໍາເຂົ້າສິນຄ້າຈາກຕ່າງປະເທດ ໂດຍສະເພາະນໍ້າມັນເຊື້ອໄຟ ແລະ ເຄື່ອງອຸປະໂພກ-ບໍລິໂພກ. ນອກຈາກນີ້ບັນຫາການຄຸ້ມຄອງອັດຕາແລກປ່ຽນ, ອັດຕາເງິນເຟີ້ ແລະ ການແກ້ໄຂເງິນກີບອ່ອນຄ່າ ຍັງບໍ່ທັນຮັດກຸມ, ເຂັ້ມງວດ ແລະ ເດັດຂາດ. ດັ່ງເຈົ້າໜ້າທີ່ກ່ຽວຂ້ອງກັບວຽກງານອຸດສາຫະກຳ ແລະ ການຄ້າ ກ່າວຕໍ່ວິທຍຸເອເຊັຽເສຣີໃນມື້ດຽວກັນວ່າ:

“ຜົນກະທົບມາຈາກເງິນນີ້ແຫຼະ ອ່ອນຄ່າມັນກາເປັນແນວນັ້ນແຫລະ ປະເພດສິນຄ້າຫລັກອັນສູງໆ ແດ່ກາສ່ວນຫລາຍຈະເປັນເງິນບາດ, ເງິນໂດລ້າ ແລ້ວກາການແບ່ງງານກັນມັນຍັງບໍ່ທັນຊັດເຈັນວ່າຊັ້ນສາ.”

ປະເທດລາວຈະຂາດດຸນການຄ້າ ຢ່າງຕໍ່ເນື່ອງກໍ່ບໍ່ແມ່ນເລື່ອງແປກໃໝ່ ເພາະສິນຄ້າໃນຕະຫລາດສ່ວນຫລາຍແລ້ວແມ່ນເປັນສິນຄ້າ ທີ່ນໍາເຂົ້າມາຈາກຕ່າງປະເທດ ເຊັ່ນຫວຽດນາມ ແລະ ໄທ. ສ່ວນສິນຄ້າທີ່ຜະລິດຢູ່ພາຍໃນ ແລະ ມີຄຸນນະພາບນັ້ນເກືອບວ່າ ບໍ່ມີຂາຍໃນຕະຫລາດ. ດັ່ງຜູ້ປະກອບການຮ້ານຂາຍເຄື່ອງຫຍ່ອຍຢູ່ເມືອງຄໍາເກີດ ແຂວງບໍລິຄໍາໄຊ ກ່າວຕໍ່ວິທຍຸເອເຊັຽເສຣີໃນມື້ດຽວກັນວ່າ:

“ສິນຄ້າລາວແບບຄົນລາວຜະລິດເອງ ຈະບໍ່ຫລາຍແບບອັນກິນຫັ້ນກາບໍ່ສູ້ມີມີແຕ່ນໍາເຂົ້າ ມາແຕ່ຫວຽດເພິ່ນໃກ້ກັບຫວຽດເດ້ຜັກ, ໝາກເພັດແມ່ນຫວຽດໝົດໝາກໄມ້ສ່ວນຫຼາຍ.”

ສິນຄ້າເກືອບທຸກປະເພດ ທີ່ຂາຍໃນລາວສ່ວນຫລາຍແມ່ນໍາເຂົ້າຈາກຕ່າງປະເທດເຊັ່ນໄທ, ຈີນ ແລະ ຫວຽດນາມ. ສ່ວນສິນຄ້າຄົນລາວຜະລິດມາຂາຍນັ້ນ ສ່ວນຫຼາຍກໍ່ຈະເປັນພືດ, ຜັກ ແລະ ສັດນໍ້າຊະນິດຕ່າງ ໆ. ດັ່ງປະຊາຊົນໃນແຂວງຫລວງນໍ້າທາກ່າວຕໍ່ວິທຍຸເອເຊັຽເສຣີ ໃນມື້ດຽວກັນວ່າ:

“ໜັກໜ່ວງເຕີບໃດຫັ້ນຖືວ່າ ຄອງຊີບນີ້ໂອຍມີແຕ່ຂື້ນລູກດຽວ ສ່ວນຫລາຍກາຄືເກົ່າຫັ້ນແຫລະ ມີແຕ່ເຮັດແນວໃດຊິລົງດຽວນີ້ຄືຊິຍາກແລ້ວຕີ້ ຕາມເບິ່ງຫັ້ນຢູ່ບ້ານເມືອງເຮົາເຮັດເປັນຜູ້ຜະລິດ ເປັນຜູ້ເຮັດແຕ່ວ່າມັນບໍ່ລົງນ່າຄັນສິນຄ້າຫັ້ນ ແຕ່ວ່າຂອງຕ່າງປະເທດກາມີຫລາຍຢູ່.”

ອີງຕາມສູນຂໍ້ມູນຂ່າວສານ ທາງດ້ານການຄ້າຂອງ ສປປ ລາວ ໃຫ້ຮູ້ຕື່ມວ່າ ສະເພາະໃນເດືອນມິຖຸນາປະເທດລາວສົ່ງອອກ ຫລາຍທີ່ສຸດໄດ້ແກ່ຈີນ 199 ລ້ານໂດລ້າ, ຫວຽດນາມ 115 ລ້ານໂດລ້າ, ໄທ 100 ລ້ານໂດລ້າ, ສະຫະລັດອາເມຣິກາ 20 ລ້ານໂດລ້າ ແລະ ສະວິດເຊີແລນດ໌ 18 ລ້ານໂດລ້າ.

ສ່ວນປະເທດທີ່ລາວນໍາເຂົ້າຫລາຍ 5 ອັນດັບໄດ້ແກ່ ຈີນ 270 ລ້ານໂດລ້າ, ໄທ  258 ລ້ານໂດລ້າ, ຫວຽດນາມ  63 ລ້ານໂດລ້າ, ສະຫະລັດອາເມຣິກາ 23 ລ້ານໂດລ້າ ແລະ ຢີ່ປຸ່ນ 16 ລ້ານໂດລ້າ.

ສ່ວນສິນຄ້າທີ່ນໍາເຂົ້າຫລາຍທີ່ ສຸດປະກອບມີ ນໍ້າມັນກະຊວນ, ພາຫະນະທາງບົກ, ອຸປະກອນກົນຈັກ, ເຄື່ອງໄຟຟ້າ ແລະ ອຸປະກອນໄຟຟ້າ, ເຫລັກ ແລະ ເຄື່ອງທີ່ເຮັດດ້ວຍເຫລັກ ແລະ ເຫລັກກ້າ, ຜະລິດຕະພັນເຄມີ, ເຄື່ອງໃຊ້ທີ່ເຮັດດ້ວຍພລາສຕິກ, ນໍ້າມັນແອັດຊັງ ແອັດຊັງພິເສດ ແລະ ເຄື່ອງອາລູມີນຽມ.

ປະຈຸບັນປະເທດລາວ ນໍາເຂົ້າສິນຄ້າຈາກຕ່າງປະເທດ ເກືອບທຸກໝວດໝູ່ສິນຄ້າ ໂດຍສະເພາະເຄື່ອງອຸປະໂພກ-ບໍລິໂພກ ແລະ ນໍ້າມັນເຊື້ອໄຟຈົນເຮັດໃຫ້ມູນຄ່າ ການນໍາເຂົ້າສົ່ງອອກນັບແຕ່ປີ 2023 ເປັນຕົ້ນມາຂາດດຸນການຄ້າ ເປັນຈຳນວນຫຼາຍໃນແຕ່ເດືອນ. ເຖິງວ່າລັດຖະບານລາວຈະມີຄວາມພະຍາຍາມ ໃນການສົ່ງເສີມການຜະລິດສິນຄ້າ ຢູ່ພາຍໃນປະເທດເພື່ອຫລຸດຜ່ອນ ການນໍາເຂົ້າສິນຄ້າຈາກຕ່າງປະເທດ ແຕ່ມາຮອດປະຈຸບັນນີ້ກາຍັງບໍ່ປະສົບຜົນສຳເລັດ.  ສໍາລັບການລາຍງານ ການຂາດດຸນການຄ້າສະເພາະໃນເດືອນມິຖຸນາ 2024 ແມ່ນບໍ່ລວມເອົາມູນຄ່າ ການນໍາເຂົ້າ ແລະ ສົ່ງອອກ ໄຟຟ້າ.