ໂຮງງານຜລິດຊີເມັນ ຣະເບີດ ຫີນ

ໄມຊູລີ
2019-01-28
Share
ໂຮງງານຜລິດຊີເມັນ ຂອງຈີນ ທີ່ ເມືອງວັງວຽງ ແຂວງວຽງຈັນ
RFA/PN

ເມື່ອວັນທີ 27 ມົກຣາ ທີ່ຜ່ານມາ, ບໍຣິສັດຈີນຣະເບີດຫິນ ຢູ່ເຂດບ້ານຜາປ່ອງ ເມືອງຫີນເຫີບ ແຂວງວຽງຈັນ ການຣະເບີດຫີນຄັ້ງນີ້, ໄດ້ ສົ່ງສຽງດັງ ແລະ ມີຂິ້ຝຸ່ນກຸ້ມ ຂຶ້ນທ້ອງຟ້າ ສ້າງຄວາມຕື່ນເຕັ້ນ ແກ່ປະຊາຊົນ ໃນບໍຣິເວນດັ່ງກ່າວ, ເຈົ້າໜ້າທີ່ຫ້ອງການ ພລັງງານ ແລະ ບໍ່ແຮ່ ເມືອງຫີນເຫີບ ຊິ້ແຈງຕໍ່ວິທຍຸເອເຊັຽເສຣີວ່າ, ການຣະເບີດຫິນ ເທື່ອນີ້, ເປັນຂອງບໍຣິສັດຮົງຈຶ້ ຈາກປະເທດຈີນ ເພື່ອນໍາໄປປ້ອນເຂົ້າ ໂຮງງານ ຜລິດຊີເມັນ ຂອງເຂົາເຈົ້າ, ໂດຍໄດ້ຂໍອະນຸຍາດ ຈາກທາງການລາວແລ້ວ. ດັ່ງທ່ານກ່າວ ໃນວັນທີ່ 28 ມົກຣາ ນີ້ວ່າ:

”ຂອງບໍຣິສັດຮົງຈື້ ໂຮງງານຊີມັງນະ ດຽວນີ້ກໍຣະເບິດຢູ່ ຣະເບິດເພາະວ່າ ເຂົາເຈົ້າເອົາເຂົ້າໂຮງງານ ຊິມັງເດ້ ດົນໆເທື່ອນຶ່ງ ອະນຸຍາດຈາກ ຣັຖບານເດ້.”

ເຈົ້າໜ້າທີ່ທ່ານນີ້ ກ່າວຕື່ມວ່າ, ການຣະເບີດຫິນ ໄດ້ມີຂຶ້ນໃນມື້ວັນທີ 27 ຫາ 28 ມົກຣາ ນີ້, ແລະໄດ້ແຈ້ງເຕືອນ ປະຊາຊົນ ທີ່ຢູ່ໃກ້ຄຽງ ໃຫ້ຮູ້ລ່ວງໜ້າແລ້ວ ກ່ອນຈະມີການຣະເບີດຫິນ, ແລະວ່າຫຼັງຈາກນັ້ນ ທາງພະນັກງານຂອງບໍຣິສັດ ກໍຈະເກັບເສດຫິນ ດັ່ງກ່າວເຂົ້າໂຮງງານ ຂອງພວກເຂົາເຈົ້າ, ພ້ອມດຽວກັນນັ້ນ ກໍໄດ້ແຈ້ງເຕືອນ ປະຊາຊົນບໍ່ໃຫ້ເຂົ້າໄປໃກ້ ໃນພຶ້ນທີ່, ທີ່ມີການຣະເບີດຫິນນັ້ນຢ່າງເດັດຂາດ ເພື່ອ ປ້ອງກັນອັນຕະຣາຍ.

ທ່ານກ່າວຕື່ມວ່າໂຮງງານຜລິດຊີເມັນດັ່ງກ່າວ, ກໍສ້າງມາແຕ່ປີ 2015 ຫາ 2017 ແລະເຣີ້ມຜລິດຊີເມັນໃນປີ 2018, ໂດຍຊີເມັນທີ່ຜລິດ ໄດ້ນັ້ນ ຖືກນໍາສົ່ງຂາຍໃຫ້ແກ່ ໂຄງການກໍ່ສ້າງຕ່າງໆ ໃນແຂວງ ຮວມທັງໂຄງການ ສ້າງທາງຣັຖໄຟ ລາວ-ຈີນ.

ສ່ວນເຣື້ອງທີ່ວ່າ ຈະມີການຣະເບີດ ຕື່ມອີກເມື່ອໃດນັ້ນ, ທາງການຍັງບໍ່ທັນຮູ້ ແຜນການຂອງເຂົາເຈົ້າເທື່ອ ຊຶ່ງທາງບໍຣິສັດຂອງຈີນເວົ້າວ່າ, ຈະແຈ້ງໃຫ້ ທາງການຮູ້ລ່ວງໜ້າ, ເພື່ອແຈ້ງໃຫ້ປະຊາຊົນໃນເຂດໃກ້ຄຽງ ມີຄວາມຣະມັດຣະວັງ ບໍ່ໄປໃກ້ເຂດທີ່ຈະມີ ການຣະເບີດ.

ຕໍ່ເຫດການດັ່ງກ່າວ ກາຍເປັນເຣື້ອງທີ່ ສັງຄົມອອນລາຍ ໃນລາວ ພາກັນວິພາກວິຈານກັນ ຢ່າງແພ່ຫລາຍ ຫຼັງຈາກຜູ້ໃຊ້ເຟສບຸກ ທີ່ໃສ່ ຊື່ວ່າ (ຊົມລົມຄົນຮັກໄກ່ຕີ) ໄດ້ເຜີຍແພ່ ຄລິບ ວິດີໂອ ທີ່ບໍຣິສັດຈີນ ຣະເບີດຫິນນັ້ນ. ປະຊາຊົນໃຫ້ຄໍາເຫັນກ່ຽວກັບ ເຣື້ອງນີ້ວ່າເປັນການ ທໍາລາຍ ຄວາມງາມ ຂອງທັມມະຊາດ, ແລະອາດເຮັດໃຫ້ ເກີດບັນຫາອື່ນໆຕາມມາ ເຊັ່ນ: ບັນຫາດິນເຈື່ອນໃນຣະດູຝົນ ແລະ ບັນຫາ ດ້ານສຸຂພາບ ຂອງປະຊາຊົນ.

ເຖິງຢ່າງໃດກໍຕາມ ປັຈຈຸບັນ ຍັງມີໂຮງງານຜລິດຊິເມັນ ຂອງຈີນຫລາຍແຫ່ງ ທີ່ກໍາລັງຢູ່ໃນຣະຫວ່າງ ການກໍ່ສ້າງເປັນຕົ້ນ ໂຮງງານຊີເມັນ ຂອງຈີນ ຢູ່ແຂວງຫລວງພຣະບາງ ທີ່ຈະສ້າງສໍາເຣັດ ພາຍໃນປີ 2020 ແລະ ໂຮງງານ ຊິເມັນຂອງຈີນ ຢູ່ເມືອງວຽງໄຊ ແຂວງຫົວພັນ ຊຶ່ງຈະສ້າງສໍາເຣັດ ພາຍໃນປີ 2020 ເຊັ່ນດຽວກັນ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ