ກຸ່ມຄົນລ້ຽງໝູ ເສັຽປໂຍດ

ສຸພັດຕາ
2019-01-31
ອີແມວລ໌
ຄໍາເຫັນ
Share
ພິມ
ຟາມລ້ຽງໝູ ຂອງກຸ່ມຄົນລ້ຽງໝູ ຮ່ວມກັບ ບໍຣິສັດຈະເຣີນໂຄກປະພັນ ຫຼື ບໍຣິສັດ CP ປະເທສໄທ
ຟາມລ້ຽງໝູ ຂອງກຸ່ມຄົນລ້ຽງໝູ ຮ່ວມກັບ ບໍຣິສັດຈະເຣີນໂຄກປະພັນ ຫຼື ບໍຣິສັດ CP ປະເທສໄທ
ຮູບພາບອຸປຖັມໂດຍ: ນັກຂ່າວພົລເມືອງ

ກຸ່ມຄົນລ້ຽງໝູ 3 ເມືອງ ໃນເຂດນະຄອນຫຼວງວຽງຈັນ, ເກືອບເຖິງ 100 ຄອບຄົວຄື; ເມືອງໄຊທານີ, ປາກງື່ມ ແລະ ເມືອງນາຊາຍທອງ ເສັຽຜົລປໂຍດ ຈາກການລ້ຽງໝູ ຮ່ວມກັບບໍຣິສັດ ຈະເຣີນໂຄກປະພັນ ຫຼື ບໍຣິສັດ CP ປະເທສໄທ, ຍ້ອນບໍຣິສັດ ບໍ່ປະຕິບັດຕາມສັນຍາ ຫຼາຍຂໍ້, ເປັນຕົ້ນວ່າ ບໍ່ມາຮັບເອົາໝູ ຕາມກຳນົດເວລາ, ບໍ່ຈ່າຍເງິນຕຣົງເວລາ, ສນອງລູກໝູບໍ່ໄດ້ນ້ຳໜັກ ແລະບໍ່ຄົບຈຳນວນ ແລະບັນຫາ ອື່ນໆອີກ. ດັ່ງຄົນລ້ຽງໝູຜູ້ນຶ່ງກ່າວຕໍ່ວິທຍຸເອເຊັຍເສຣີ ໃນວັນທີ 25 ມົກກະຣາ ຜ່ານມາວ່າ:

“ບາງເທື່ອນີ້ ເງິນໂອນນີ້, ເຮົາແມ່ນຜູ້ລ້ຽງເນາະ, ເຮົາລ້ຽງມາ 6 ເດືອນ ຫຼືວ່າ 5 ເດືອນ, ເຮົາຢາກໄດ້ເງິນ, ເຂົາກະພັດຄ້າງເປັນເດືອນ, ຍັງບໍ່ໄດ້ເງິນຊ້ຳຫັ້ນນ່າ, ອັນນີ້ນ່າ ລະປະຊາຊົນ ຢາກຂັດຂ້ອງຫຼາຍ. ເອີ່ ຈ່າຍເງິນຊ້າ, ໝູອອກໄປເປັນເດືອນແລ້ວ ເງິນ ຍັງບໍ່ທັນໄດ້, ຜູ້ລ້ຽງນີ້ ລ້ຽງມາ 6-7 ເດືອນ, ນີ້ມັນບໍ່ມີເງິນຈ່າຍເດ ມັນກະຢາກໄດ້ເງິນມາຈ່າຍ ຊີ້ນ່າ."

ຄົນລ້ຽງໝູອີກຜູ້ນຶ່ງ, ຢູ່ໃນມື້ດຽວກັນນັ້ນວ່າ, ເປັນເວລາ 2 ປີມາແລ້ວ ທີ່ບໍຣິສັດ CP ສນອງໝູທີ່ບໍ່ໄດ້ມາຕຖານ ຕາມສັນຍາ ແລະ ໝູ ມັກຕາຍ, ເຮັດໃຫ້ກຸ່ມຄົນລ້ຽງໝູ ຫຼຸບທຶນ:

“ໝູອັນເຮົາລ້ຽງນີ້ ມັນບໍ່ແມ່ນໝູທີ່ວ່າ ບໍ່ໃຫຍ່ແດ່, ລະກໍໝູແບບໝູມີພຍາດຫຼາຍນ່າ. ລະລູກໝູເຮົານີ້ ກັບລູກໝູຂອງນ້າບ່າວນີ້, ເຮົາເອົາ ມາລ້ຽງທຽບ, ດຽວນີ້ມັນແຕກຕ່າງດຽວຫຼາຍນ່າ, ໝູເພິ່ນຫັ້ນບໍ່ຕາຍຈັກໂຕ ໝູເຮົາລະແມ່ນຕາຍແທ້ຕາຍວ່າ, ຊີ້ນ່າ.”

ຫົວໜ້າກຸ່ມລ້ຽງໝູ ກ່າວວ່າ, ໃນ 2 ປີຜ່ານມາ, ກໍໄດ້ສເນີ ແລະຮຽກຮ້ອງໄປຫາພາກສ່ວນກ່ຽວຂ້ອງ ປະຈຳເມືອງ, ແລະບໍຣິສັດ CP, ໃຫ້ ແກ້ໄຂບັນຫາດັ່ງກ່າວ, ແຕ່ມາເຖິງປັດຈຸບັນ ກໍບໍ່ມີທ່າທີວ່າ ບັນຫາຈະຖືກແກ້ໄຂເລີຍ.

ກ່ຽວກັບເຣື້ອງນີ້, ວິທຍຸເອເຊັຽເສຣີ ໄດ້ຕິດຕໍ່ສອບຖາມໄປຍັງ ຫ້ອງການກະສິກັມ ແລະປ່າໄມ້ ປະຈຳເມືອງໄຊທານີ ໃນມື້ດຽວກັນ, ເຈົ້າໜ້າທີ່ ກ່ຽວຂ້ອງ ກໍໄດ້ອະທິບາຍວ່າ, ອຳນາດການປົກຄອງເມືອງ ກໍໄດ້ສົ່ງໂຕແທນລົງໄປເບິ່ງບັນຫານີ້ ໃຫ້ແກ່ປະຊາຊົນ ເປັນແຕ່ລະໄລຍະແລ້ວ, ເພື່ອແນະນຳໃຫ້ແຕ່ລະຝ່າຍ ປະຕິບັດຕາມສັນຍາຢ່າງເຂັ້ມງວດ, ດັ່່ງທ່ານກ່າວວ່າ:

“ໄດ້ໄປແລ້ວ ໄດ້ໄປເບິ່ງໄປເວົ້າໃຫ້ບໍຣິສັດ CP ແລ້ວ ກ່ຽວແກ່ກັບເວົ້າເຣື້ອງໂຕນີ້, ໄທເຮົາຄຸ້ມຄອງເຂົາເຈົ້າ. ທັມມະດາບໍຣິສັດ CP ສົ່ງໝູ ໃຫ້ຟາມແຕ່ລະຟາມ, ມັນຕ້ອງຈຳນວນຄົບຖ້ວນ, ສຸຂພາບແຂງແຮງ ບໍ່ແມ່ນໂຕທໍ່ແຄ່ງທໍ່ຂານີ້. ເຂົາກະຊິພຍາຍາມ, ຕ້ອງພຍາຍາມຕ້ອງເຮັດ. ສະນັ້ນລະໂຕນີ້ ຂະເຈົ້າໄດ້ຮ້ອງຟ້ອງມາ ລະກະໄດ້ລົງໄປແກ້ໃຫ້ ຂະເຈົ້າຢູ່ແລ້ວ, ແຕ່ວ່າຂະເຈົ້າຊິເຂົ້າໃຈກັນແນວໃດກະຍັງ ບໍ່ທັນຮູ້ເນາະ.”

ໃນຂນະດຽວກັນ, ວິທຍຸເອເຊັຽເສຣີ ໄດ້ພຍາຍາມຕິດຕໍ່ສອບຖາມໄປຍັງ ຫ້ອງການຜູ້ຕາງໜ້າ ບໍຣິສັດ CP ປະຈຳປະເທສລາວ ທີ່ບ້ານ ນາສາລາ, ເມືອງໄຊທານີ ນະຄອນຫຼວງວຽງຈັນ ໃນວັນທີ 25 ມົກກະຣາ ທີ່ຜ່ານມານັ້ນ, ແຕ່ເຈົ້າໜ້າທີ່ປະຈຳຫ້ອງການ ກ່າວສັ້ນໆວ່າ ອາຈມີຄວາມຄາດເຄື່ອນ ດ້ານຂໍ້ມູນຈາກຊາວບ້ານ.

ເຖິງຢ່າງໃດກໍຕາມ, ຜູ້ນຳກຸ່ມຄົນລ້ຽງໝູ ຈຳນວນເກືອບ 100 ຄອບຄົວ ໃນນະຄອນຫຼວງວຽງຈັນ ໄດ້ຢືນຢັນວ່າ ຖ້າຫາກບັນຫາ ດັ່ງກ່າວ ຍັງບໍ່ໄດ້ຮັບການແກ້ໄຂ ພາຍໃນ 2 ເດືອນ ຂ້າງໜ້ານີ້, ທາງກຸ່ມ ຈະຂຽນຄຳຮ້ອງທຸກໄປຫາຣັຖບານ ເພື່ອໃຫ້ຂັ້ນເທິງ ຊ່ອຍຫາທາງແກ້ໄຂ ບັນຫາ ໃຫ້ກັບພໍ່ແມ່ປະຊາຊົນ.

ເຕັມຫນ້າ