ລາວ-ຫວຽດນາມຕຽມສົ່ງເສີມ ການໃຊ້ສະກຸນເງິນ ຂອງທັງ 2 ເທດ

ທະນາຄານແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ທະນາຄານແຫ່ງລັດ ຂອງສາທາລະນະລັດ ສັງຄົມນິຍົມຫວຽດນາມ ໄດ້ປຶກສາຫາລືກັນ ກ່ຽວກັບການສົ່ງເສີມການໃຊ້ສະກຸນເງິນກີບຂອງລາວ ແລະເງິນດົງຂອງຫວຽດນາມ ໃນດ້ານການຄ້າ ແລະການລົງທຶນ ລະຫວ່າງ 2 ປະເທດ ລາວ ແລະຫວຽດນາມ ໃຫ້ເປັນຮູບປະທໍາຫຼາຍຂຶ້ນໃນອະນາຄົດ ແລະທັງຈະຊຸກຍູ້ການຊໍາລະຍ່ອຍຂ້າມຊາຍແດນ ລາວ ແລະຫວຽດນາມ ໂດຍທີ່ຫວຽດນາມ ສາມາດສະແກນຊໍາລະເປັນເງິນດົງ ຜ່ານ QR Code ຊຶ່ງປັດຈຸ ບັນ ຢູ່ໃນຂັ້ນຕອນຂອງການກະ ກຽມ ທີ່ຈະໃຊ້ຢູ່ ແລະຄາດວ່າ ຈະໄດ້ເລີ່ມປະຕິບັດໄລຍະທີ 1 ໃນເດືອນກັນຍາ ທີ່ຈະມາເຖິງນີ້ ໂດຍຈະມີ 9 ທະນາຄານຂອງປະເທດຫວຽດນາມ ແລະ 13 ທະນາ ຄານ ຂອງລາວ ເຂົ້າຮ່ວມໂຄງການທີ່ວ່ານີ້.

ການສົ່ງເສີມການໃຊ້ເງິນກີບ ແລະເງິນດົງທີ່ວ່ານີ້ ຕາມຄໍາເວົ້າຂອງເຈົ້າໜ້າທີ່ທະນາຄານແຫ່ງ ສປປລາວ ຜູ້ຂໍສະຫງວນຊື່ ແລະຕໍາແໜ່ງ ທ່ານນຶ່ງຕໍ່ວິທຍຸເອເຊັຍເສຣີ ໃນມື້ວັນທີ 27 ສິງຫາ 2024 ນີ້ ແລ້ວແມ່ນວ່າ ຈະສົ່ງເສີມສະເພາະໃນດ້ານການຄ້າ, ການບໍລິການ ແລະການລົງທຶນລະຫວ່າງ 2 ປະເທດ ລາວ-ຫວຽດນາມນີ້ເທົ່ານັ້ນ, ຈະບໍ່ໄດ້ມີການສົ່ງເສີມການໃຊ້ສະກຸນເງິນດົງຢ່າງຊະຊາຍ ເຊັ່ນການຊໍາລະເປັນສະກຸນເງິນຂອງ 2 ປະເທດນີ້ ໃນກໍລະນີການນໍາສິນຄ້າຈາກຫວຽດນາມ ເຂົ້າມາລາວ ຫຼືການສົ່ງສິນຄ້າຈາກລາວໄປຫວຽດນາມ ຜູ້ປະກອບການຄ້າລາວ ຫຼືຫວຽດນາມ ສາມາດຊໍາລະເງິນເປັນສະກຸນເງິນກີບ ຫຼືເງິນດົງໄດ້ ຫຼືຫາກມີນັກທ່ອງທ່ຽວຫວຽດນາມ ເດີນທາງມາທ່ຽວລາວ  ກໍສາມາດສະແກນຊໍາລະເງິນຜ່ານ QR Code ຈາກບັນຊີເງິນດົງໄດ້ທັນທີ, ດັ່ງທີ່ທ່ານກ່າວວ່າ:

“ຕົວນີ້ສົ່ງເສີມໃຊ້ເຂົ້າໃນການຊໍາລະການຄ້າ ການບໍລິການແລະການລົງທຶນເນາະ ເຮົາຈະຊຸກຍູ້ໃຫ້ຜູ້ທີ່ວ່າດໍາເນີນການຄ້າຂາຍເນາະ ລະຫວ່າງ 2 ປະເທດຄືລາວກັບຫວຽດນາມ ຫັ້ນນ່າ ໃຫ້ຫັນມານໍາໃຊ້ເງິນກີບຫລືວ່າເງິນດົງໃນການຊໍາລະ ໂດຍທີ່ບໍ່ໄດ້ນໍາໃຊ້ສະກຸນເງິນອື່ນຫັ້ນ ທີ່ບໍ່ແມ່ນເງິນຂອງ 2 ປະເທດນີ້ ແຕ່ວ່າບໍ່ໄດ້ໝາຍຄວາມວ່າໃຫ້ເອົາມານໍາໃຊ້ໄດ້ ຊໍາລະສະສາງພາຍໃນປະເທດໂດຍທົ່ວໄປ.”

ກ່ຽວກັບເລື່ອງທີ່ວ່ານີ້ ແມ່ຄ້າຂາຍອາຫານແຊ່ແຂງ ຢູ່ແຂວງຫຼວງພະບາງ ນາງນຶ່ງ ທີ່ເຄີຍໄດ້ນໍາສິນຄ້າແຊ່ແຂງຈາກປະເທດຫວຽດນາມເຂົ້າມາຂາຍ ເວົ້າວ່າ ໃນການນໍາສິນຄ້າເຂົ້າມາຂາຍ ທີ່ຜ່ານມາກໍສາມາດຊໍາລະເປັນເງິນກີບ ຫຼືເງິນດົງກໍໄດ້, ແຕ່ຖ້າຫາກຊໍາລະສິນຄ້າເປັນເງິນກີບ ກໍຈະມີລາຄາສູງກວ່າເງິນດົງແດ່ເລັກນ້ອຍ ແລະເມື່ອມີການຊຸກຍູ້ການຊໍາລະເປັນເງິນກີບ ແລະເງິນດົງ ຂ້າມແດນໄດ້ ກໍເຫັນດີນໍາເພີ່ນ ໂດຍສະເພາະການຊໍາລະ ໃນຮູບແບບ QR ຍ້ອນມັນຈະສະດວກສະບາຍກວ່າເກົ່າ ເປັນຕົ້ນໃນເຂດເມືອງ ທີ່ມີຊາຍແດນຕິດກັບຫວຽດນາມ ຊຶ່ງມີຄົນລາວ ຂ້າມໄປຊື້ເຄື່ອງຂອງ ຢູ່ຫວຽດນາມຫຼາຍ ດັ່ງທີ່ນາງເວົ້າຕໍ່ວິທຍຸເອເຊັຍເສຣີ ໃນມື້ດຽວກັນນີ້ວ່າ:

“ຖ້າເປັນແບບນັ້ນກໍດີຢູ່ ເຂດນັ້ນເພາະວ່າສ່ວນຫລາຍຂະເຈົ້າໄປຊື້ສິນຄ້າທາງນັ້ນ ມາເດີ ເງິນກີບ ເອື້ອຍຈ່າຍເງິນກີບ ເຂົາເວົ້າລາຄາເງິນດົງມາໃຫ້ເອື້ອຍແລ້ວເອື້ອຍກໍບໍ່ຮູ້ບ່ອນແລກປ່ຽນ ເລີຍໃຫ້ວ່າເຂົາເວົ້າເງິນກີບ ຖ້າມີເງິນດົງນີ້ ຈ່າຍເງິນດົງຈະດີກວ່າ ແຕ່ວ່າເອື້ອຍບໍ່ມີ ເອື້ອຍເລີຍຈ່າຍເປັນເງິນກີບ ແຕ່ໄລ່ເລກແບບເງິນກີບນີ້ຈະສູງກວ່ານິດນຶ່ງຊີ້ນ່າ ຄືເງິນກີບນີ້ເຂົາກໍໄລ່ເລກເພື່ອໄວ້ນິດນຶ່ງຊີ້ນ່າ.”

ແລະເຈົ້າຂອງຮ້ານຂາຍເຄື່ອງອະໄຫຼ່ລົດຈັກ ຢູ່ເມືອງຄໍາເກີດ ແຂວງບໍລິຄໍາໄຊ ກໍເວົ້າວ່າ ປັດຈຸບັນ ຕົນໄດ້ນໍາເຄື່ອງອະໄຫຼ່ລົດຈັກ ຈາກປະເທດຫວຽດນາມ ເຂົ້າມາຂາຍເລື້ອຍໆ ຊຶ່ງຕົນມີທັງບັນຊີທະນາຄານຫວຽດນາມ ແລະບັນຊີທະ ນາຄານລາວ ສໍາລັບໃຊ້ໃນການໂອນເງິນຊໍາລະຄ່າສິນຄ້າ ຊຶ່ງໃນການຊໍາລະນັ້ນ ສາມາດໃຊ້ທັງເງິນກີບ ແລະເງິນດົງໄດ້ ຊຶ່ງມູນຄ່າມັນກໍຊໍ່າໆກັນ ດັ່ງທີ່ທ່ານເວົ້າຕໍ່ວິທຍຸເອເຊັຍເສຣີ ໃນມື້ວັນທີ 27 ສິງຫາ 2024 ນີ້ວ່າ:

“ຈ່າຍເປັນເງິນດົງກໍແມ່ນ ຈ່າຍເປັນເງິນກີບກໍມີ ເຈົ້າ ນ່າຈະສໍ່າໆກັນນະ ເຈົ້າ ເງິນຫວຽດກັບເງິນລາວສໍ່າໆກັນແລ້ວ ແຕ່ສ່ວນຫລາຍເຂົາໃຊ້ເງິນກີບ ກັບເງິນຫວຽດແດ່ເຂົາບໍ່ໄດ້ໃຊ້ເງິນໂດລ້າ ໂອ້ ຢູ່ຫລັກ 20 ເອົາເງິນຫວຽດໄປໃຊ້ຂາຍໄປໃຊ້ຄືເຂົາກໍໄດ້.”

ໃນຂະນະດຽວກັນ ເຈົ້າຂອງຮ້ານຂາຍເຂົ້າ ຢູ່ບ້ານຫຼັກ 20 ເມືອງຄໍາເກີດ ແຂວງບໍລິຄໍາໄຊ ກໍເວົ້າເຖິງການໃຊ້ເງິນກີບ ແລະງິນດົງ ຊໍາລະໃນດ້ານການຄ້າ ແລະການລົງທຶນ ຢູ່ 2 ປະເທດ ລາວ-ຫວຽດນາມ ວ່າ ອາດຈະບໍ່ເຮັດໃຫ້ ເງິນກີບອ່ອນຄ່າລົງ ຍ້ອນເງິນກີບ ແລະເງິນດົງ ມີມູນຄ່າຕ່າງກັນບໍ່ຫຼາຍ ຄືກັນກັບເງິນບາດຂອງໄທ ແລະປັດຈຸບັນ ເງິນກີບກໍແຂງຄ່າກວ່າເງິນດົງຂອງຫວຽດ ນາມແລ້ວ. ນອກຈາກນັ້ນ ການຄ້າຊາຍແດນ ລະຫວ່າງລາວ-ຫວຽດນາມ ຢູ່ເມືອງຄໍາເກີດ ກໍມີການຊື້-ຂາຍກັນ ດ້ວຍການໃຊ້ເງິນ 2 ສະກຸນນີ້ຢູ່ແລ້ວ ເຊັ່ນ ພໍ່ຄ້າຂາຍເຂົ້າ ທີ່ເປັນຄົນຫວຽດນາມ ກໍສະເໜີລາຄາເຂົ້າ ເປັນເງິນ 2 ສະກຸນນີ້ ໃຫ້ພໍ່ຄ້າເຂົ້າ ທີ່ເປັນຄົນລາວ ໃຫ້ເລືອກເອົາ ວ່າຈະຈ່າຍເປັນເງິນສະ ກຸນໃດ ເປັນເງິນກີບ ຫຼືເງິນດົງ ກໍໄດ້ ດັ່ງທີ່ທ່ານກ່າວວ່າ:

“ເງິນດົງກັບເງິນກີບ ມັນບໍ່ໄດ້ແຂງຄ່າຄືເງິນບາດ ມັນຈະສູສີກັນດຽວນີ້ລາວເຮົາ ແຂງກວ່າດົງແລ້ວ ແຂງກວ່າດົງຫລາຍແລ້ວ 0.5, 0.6 ມື້ອື່ນມື້ນີ້ແຫລະ.”

ຂະນະທີ່ທະນາຄານຂອງທາງການລາວ ລາຍງານກ່ຽວກັບການແລກປ່ຽນເງິນຕາ ລະຫວ່າງເງິນກີບ ແລະເງິນດົງ ໃນມື້ວັນທີ 27 ສິງຫານີ້ວ່າ 1 ກີບແລກໄດ້ 1.12 ດົງ.

ການຮ່ວມມື ໃນການສົ່ງເສີມການໃຊ້ສະກຸນເງິນກີບຂອງລາວ ແລະເງິນດົງຂອງຫວຽດນາມ ໃນດ້ານການຄ້າ ແລະການລົງທຶນ ລະຫວ່າງທະນາຄານ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ແລະທະນາຄານແຫ່ງລັດ ຂອງສາທາລະນະລັດ ສັງຄົມນິຍົມຫວຽດນາມ ມີຂຶ້ນພາຍຫຼັງທີ່ທັງສອງຝ່າຍໄດ້ເຮັດບົດບັນທຶກຄວາມເຂົ້າໃຈກັນ ວ່າດ້ວຍການສົ່ງເສີມ ສະກຸນເງິທ້ອງຖິ່ນ ເງິນກີບ ແລະເງິນດົງ ໃນມື້ວັນທີ 1 ທັນວາ 2023 ທີ່ຫາກໍຜ່ານມານີ້. 

ເວົ້າເຖິງການສົ່ງເສີມ ການຊໍາລະຄ່າສິນຄ້າ ເປັນເງິນສະກຸນທ້ອງຖິ່ນ ລະຫວ່າງລາວ ແລະຈີນ ເງິນກີບ ແລະເງິນຢວນ, ເມື່ອກ່ອນໜ້ານີ້ ຄືໃນເດືອນກັນຍາ 2023 ທາງການລາວ ແລະທາງການຈີນ ກໍໄດ້ຕົກລົງຮ່ວມມືກັນ ສົ່ງເສີມການຊໍາລະຄ່າສິນຄ້າ ເປັນເງິນສະກຸນທ້ອງຖິ່ນ ເງິນກີບ ແລະເງິນຢວນ ເພື່ອຍົກລະດັບການຄ້າ ແລະການລົງທຶນ ຂອງທັງສອງຝ່າຍ ໃຫ້ຫຼາຍເພີ່ມຂຶ້ນ ໂດຍສະເພາະ ການຄ້າ ລະຫວ່າງຊາຍແດນ ລາວ ແລະຈີນ ເພື່ອໃຫ້ມີຄວາມສະດວກ ແລະງ່າຍຂຶ້ນ ໃນການຊໍາລະສະສາງຄ່າສິນຄ້າ ເປັນຕົ້ນ ເມື່ອຄົນລາວ ໄປຊື້ສິນຄ້າຢູ່ຈີນ ກໍສາມາດ ນໍາເງິນກີບຂອງລາວ ໄປຊືື້ໄດ້ ແລະເງິນຢວນຂອງຈີນ ກໍເຊັ່ນກັນ ຄົນຈີນມາຊື້ສິນຄ້າຢູ່ລາວ ກໍໃຊ້ເງິນຢວນ ໄດ້.

ເວົ້າເຖິງການຄ້າ ລະຫວ່າງລາວ ແລະຫວຽດນາມ, ຕາມລາຍງານຂອງກົມພາສີຫວຽດນາມ ທີ່ໜັງສືພິມ “The Saigon Times” ວັນທີ 23 ສິງຫາ 2024 ແລ້ວແມ່ນວ່າ ມູນຄ່າການຄ້າລະຫວ່າງລາວ ແລະຫວຽດນາມ ໃນ 6 ເດືອນຕົ້ນປີ 2024 ນີ້ ມີເຖິງ 927 ລ້ານໂດລາສະຫະລັດ ຄືເພີ່ມຂຶ້ນ 11% ເມື່ອທຽບໃສ່ໄລຍະດຽວກັນຂອງປີກາຍ.

ແລະເລື່ອງການລົງທຶນ ຂອງຫວຽດນາມ ຢູ່ປະເທດລາວ, “The Laotian Times” ລາຍງານວັນທີ 19 ສິງຫາ 2024 ນີ້ວ່າ ການລົງທຶນຂອງຫວຽດນາມຢູ່ລາວ ບັນລຸເຖິງ 5.5 ຕື້ໂດລ້າສະຫະລັດ ໃນຈໍານວນ 256 ໂຄງການ.