ລັດຖະບານ ຈະປັບຂຶ້ນເງິນເດືອນລັດຖະກອນ ໃນປີ 2025

ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ມີແຜນຈະປັບຂຶ້ນ ເງິນເດືອນ ໃຫ້ພະນັກງານລັດຖະກອນ ໃນປີ 2025 ເປັນ 2,200,000 ກີບຕໍ່ຄົນຕໍ່ເດືອນ ແຕ່ພະນັກງານ ລັດຖະກອນຫຼາຍຄົນ ເຫັນວ່າຍັງບໍ່ກຸ້ມກິນ ຄືເກົ່າ ທ່າມກາງສະພາບເສດຖະກິດທີ່ຕົກຕ່ຳ, ຄ່າຄອງຊີບສູງ, ສິນຄ້າແພງຫຼາຍເທົ່າໂຕ ຖ້າຈະກຸ້ມຢູ່ກຸ້ມກິນ ຕ້ອງໄດ້ຮັບເງິນເດືອນຂັ້ນຕ່ຳຕໍ່ເດືອນ ຢ່າງໜ້ອຍ 5 ລ້ານກີບ.

ດັ່ງ ພະນັກງານລັດຖະກອນ ຍານາງນຶ່ງ ໄດ້ສະແດງຄວາມຮູ້ສຶກ ຕໍ່ວິທຍຸເອເຊັຽເສຣີ ໃນວັນທີ 18 ພະຈິກ ນີ້ວ່າ:

"ມັນບໍ່ກຸ້ມແຫຼະເນາະ ມັນຈະໄປກຸ້ມຈັ່ງໃດ. ເອື້ອຍນີ້ເນາະ ປະຫຍັດແບບສຸດໆ ບໍ່ໄດ້ ກິນເຫຼົ້າ ກິນເບຍ ຊື້ແຕ່ຂອງກິນຢ່າງດຽວ ແລ້ວກໍໃຊ້ນ້ຳມັນລົດມາວຽກ 5 ລ້ານຈັ່ງກຸ້ມມາເຮັດວຽກນໍາລັດ 12-13 ປີແລ້ວ ຢືມແມ່ ຢືມພໍ່ ຢືມເອື້ອຍ ຢືມນ້ອງ ຍັງບໍ່ມີໃຊ້ໃຫ້ເຂົາຊໍ້າ ເບິ່ງໄປຢູ່ວ່າຈັກຈະຢູ່ໄປແບບໃດ ສະພາບປັດຈຸບັນນີ້.”

ຂະນະດຽວກັນ ພະນັກງານລັດຖະກອນ ອີກທ່ານໜຶ່ງ ກໍໄດ້ກ່າວບໍ່ແຕກຕ່າງກັນວ່າ ໃນທຸກມື້ນີ້ເງິນເດືອນ ລັດຖະກອນບໍ່ກຸ້ມກິນຕໍ່ເດືອນ ເງິນເດືອນໜ້ອຍຫຼາຍ ຈົນເຮັດໃຫ້ ພະນັກງານລັດຖະກອນ ຫຼາຍຄົນກໍລາອອກກັນຫຼາຍ ຕົວຢ່າງ ທ່ານເອງ ເງິນເດືອນ 2 ລ້ານປາຍ ກໍບໍ່ກຸ້ມຢູ່ກຸ້ມກິນຄືກັນ ເພາະຕ້ອງໃສ່ນໍ້າມັນລົດ ໄປກັບ60 ກິໂລແມັດ ຈາກບ້ານໄປຫາບ່ອນເຮັດວຽກ ເຊິ່ງລາຄານໍ້າມັນກໍແພງ ຖ້າບໍ່ມີອາຊີບເສີມ ທ່ານເອງກໍຢູ່ບໍ່ໄດ້ ຖ້າຫາກເປັນໄປໄດ້ ທ່ານຄິດວ່າ ເງິນເດືອນຂັ້ນຕໍ່າຂອງລັດຖະກອນ ກໍຄວນ ຢູ່ໃນລະດັບ 4 ລ້ານກີບຂຶ້ນໄປ ກະຍັງພໍດິ້ນຮົນໄປໄດ້.

"ປັດຈຸບັນນີ້ ກໍມີພະນັກງານລາອອກຫຼາຍຢູ່ແລ້ວຫັ້ນເນາະ ແຕ່ວ່າຕໍ່ໄປກະບໍ່ຮູ້ ວ່າສະພາບມັນເປັນແນວໃດ ຄື ອ້າຍນີ້ເນາະເງິນເດືອນ 2 ລ້ານປາຍ. ເມື່ອກ່ອນນີ້ 30 ກິໂລ ໄປກັບນີ້ 60 ມັນກໍບໍ່ກຸ້ມຫັ້ນນາ. ຂີ້ຮ້າຍສຸດເດືອນໜຶ່ງຕົກຢູ່ປະມານ 4 ລ້ານ. ປະມານນັ້ນ ກໍພໍໄປໄດ້ຢູ່ຫັ້ນນາ."

ພ້ອມດຽວກັນນີ້ ພະນັກງານລັດຖະກອນ ອີກທ່ານໜຶ່ງ ກໍກ່າວວ່າ ເງິນຈໍານວນ 2,200,000 ກີບຕໍ່ເດືອນ ທີ່ລັດຖະບານມີແຜນຈະປັບຂຶ້ນ ໃຫ້ພະນັກງານລັດຖະກອນ ຕາມຄວາມເປັນຈິງ ກໍບໍ່ກຸ້ມຢູ່ກຸ້ມກິນ ເພາະມື້ໜຶ່ງ ຊື້ເຂົ້າແຕ່ລະມື້ ກະຕົກມື້ລະ1 ແສນກີບ ເຊິ່ງຍັງບໍ່ລວມຄ່ານໍ້າມັນ ຄ່ານໍ້າ ຄ່າໄຟ ຄ່າອື່ນໆ ອີກຫຼາຍຢ່າງ ຂັ້ນຕໍ່າຕ້ອງເດືອນລະ ປະມານ 4 ຫາ 5 ລ້ານກີບ ເຖິງຈະພໍກຸ້ມຢູ່ກຸ້ມກິນ ໃນສະພາບເສດຖະກິດແບບນີ້.

"ເວົ້າຕາມຄວາມເປັນຈິງ ກະບໍ່ກຸ້ມກິນລະ ມັນຕ້ອງເຮັດອາຊີບແນວອື່ນ ເສີມນໍາ. ໂອ້ຄັນໄລ່ ມື້ລະແສນໂລດ ກໍຕົກເດືອນລະ 3 ລ້ານ. ທັງຄ່ານໍ້າມັນອີກກະ 3 ລ້ານກວ່າ ຍັງບໍ່ໄລ່ຄ່ານໍ້າຄ່າໄຟອີກ ກະຕົກຢູ່ປະມານ 4-5 ລ້ານ ຄັນວ່າກຸ້ມຢູ່ກຸ້ມກິນກະດາຍ."

ເຖິງວ່າອັດຕາເງິນເຟີ້ໃນລາວ ຈະຫຼຸດລົງມາຢູ່ໃນລະດັບ 20.73% ໃນເດືອນຕຸລາ 2024 ນີ້ ແຕ່ກະຍັງສູງກວ່າສະພາແຫ່ງຊາດລາວ ຮັບຮອງ ໃຫ້ຢູ່ໃນລະດັບ ບໍ່ເກີນ 9%, ສົ່ງຜົນຕໍ່ ຊີວິດການເປັນຢູ່ ຂອງພະນັກງານລັດຖະກອນ ໃນທົ່ວປະເທດ ໂດຍສະເພາະ ຜູ້ທີ່ໄດ້ຮັບເງິນເດືອນໜ້ອຍ ຕ້ອງປະເຊີນກັບຄວາມຫຍຸ້ງຍາກ ແລະມີຈໍານວນນຶ່ງຂໍລາອອກ ຈາກການເປັນພະນັກງານລັດຖະກອນ.

ບັນຫານີ້ລັດຖະບານລາວ ກໍຮັບຮູ້ມາໂດຍຕະຫຼອດ ຈົນຫຼ້າສຸດ ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ກໍໄດ້ຢືນຢັນ ໃນກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ 9 ໃນວັນທີ 18 ພະຈິກ 2024 ວ່າ ຈະພະຍາຍາມປັບເພີ່ມເງິນເດືອນ ໃຫ້ພະນັກງານລັດຖະກອນ ໃນປີ 2025 ຈາກ 1,850,000 ຕໍ່ເດືອນ ເປັນ 2,200,000 ກີບຕໍ່ເດືອນ ເຊິ່ງທ່ານ ໄດ້ກ່າວໃນຕອນໜຶ່ງວ່າ:

"ໄດ້ຍົກລະດັບເງິນເດືອນຂັ້ນຕໍ່າ ຂອງພະນັກງານ ລັດຖະກອນ ໃນປີ 2024 ໃຫ້ໄດ້ລະດັບ 1,850.000 ກີບ ຕໍ່ຄົນຕໍ່ເດືອນ ຄາດໝາຍ ປີ 2025 ຈະພະຍາຍາມປັບເພີ່ມຂຶ້ນ ໃຫ້ໄດ້ຕໍ່າສຸດໃນລະດັບ 2,200,000 ກີບຕໍ່ຄົນຕໍ່ເດືອນ."

ເຖິງຢ່າງໃດກໍຕາມ ລັດຖະບານລາວ ກະຍັງຂາດເຂີນງົບປະມານຢ່າງໜັກ ຈຶ່ງມີຄວາມຈໍາເປັນທີ່ຈະຫຼຸດຈໍານວນພະນັກງານລັດຖະກອນ ຈາກ 2.4% ໃຫ້ເຫຼືອພຽງ 1.8% ຂອງຈໍານວນພົນລະເມືອງ ໃນປີ 2025 ນີ້ ເພື່ອຫຼຸດຜ່ອນພາລະ ຄ່າໃຊ້ຈ່າຍຂອງລັດຖະບານ ດ້ວຍການຫຼຸດຈໍານວນໂກຕ້າລັດຖະກອນ ໃຫ້ໜ້ອຍລົງໃນປີໜ້າ.