ເຂື່ອນນໍ້າເອົ້າຖືກສັ່ງໂຈະ

ຈໍາປາທອງ
2019-01-31
ອີແມວລ໌
ຄໍາເຫັນ
Share
ພິມ
ເຂື່ອນນໍ້າເອົ້າທີ່ແຕກ ເມື່ອເດືອນກັນຍາ ວັນທີ 11 2017
ເຂື່ອນນໍ້າເອົ້າທີ່ແຕກ ເມື່ອເດືອນກັນຍາ ວັນທີ 11 2017
Screen captured

ຣັຖບາລລາວ ສັ່ງໂຈະ, ບໍ່ໃຫ້ຟື້ນຟູເຂື່ອນນໍ້າເອົ້າ ຢູ່ເມືອງຜາໄຊ ແຂວງຊຽງຂວາງ, ທີ່ໄດ້ແຕກເມື່ອເດືອນກັນຍາ 2017 ນັ້ນ ໄປຈົນກວ່າ ຈະມີການກວດກາເຂື່ອນຢ່າງລະອຽດກ່ອນ, ວ່າຈະໃຫ້ດໍາເນີນຕໍ່ໄປຫລືບໍ່, ດັ່ງເຈົ້າໜ້າທີ່ຜແນກພລັງງານ ແລະບໍ່ແຮ່ ແຂວງຊຽງຂວາງ ຜູ້ບໍ່ປະສົງອອກຊື່ທ່ານນຶ່ງ, ກ່າວຕໍ່ວິທຍຸເອເຊັຍເສຣີ ໃນມື້ວັນທີ 31 ມົກກະຣານີ້ວ່າ:

"ຍັງບໍ່ໄດ້ເຮັດຫຍັງ, ຍັງໂຈະຢູ່ດຽວນີ້, ເພິ່ນບໍ່ໃຫ້ເຄື່ອນໄຫວ, ແລ້ວກໍບໍ່ໃຫ້ລົງໄປຕິດຕາມ, ບໍ່ໃຫ້ໄປເບິ່ງ. ເພິ່ນມີແຈ້ງການຂອງຫ້ອງວ່າການ ສໍານັກງານນາຍົກ, ເພິ່ນວ່າໃຫ້ໂຈະການກໍ່ສ້າງບໍ່ມີກໍານົດ, ແຈ້ງການໃຫ້ໂຈະ, ຄອຍຖ້າການກວດກາວ່າຊັ້ນ."

ເມື່ອເດືອນຕຸລາປີກາຍ ທາງການມີຄໍາສັ່ງ ບໍ່ໃຫ້ເຈົ້າໜ້າທີ່ເມືອງຜາໄຊ, ເຈົ້າໜ້າທີ່ແຂວງຊຽງຂວາງ, ແລະບໍຣິສັດບໍ່ທອງອິນເຕີກຣຸບ, ທີ່ເປັນ ເຈົ້າຂອງໂຄງການເຂື່ອນນໍ້າເອົ້າ ເຂົ້າໄປດໍາເນີນການໃດໆ ຢູ່ໃນເຂດກໍ່ສ້າງເຂື່ອນ, ຈົນກວ່າວ່າຈະມີຄນະກັມການ ກວດກາຈາກສູນກາງ, ໄປກວດກາມາຕຖານເຂື່ອນນັ້ນກ່ອນ.

ທ່ານເວົ້າວ່າ ການໃຫ້ໂຈະໂຄງການເຂື່ອນນໍ້າເອົ້າ ເທື່ອນີ້, ເປັນການໃຫ້ໂຈະແບບບໍ່ມີກໍານົດ, ແລະອາຈມີການລົບລ້າງໂຄງການເຂື່ອນນີ້ ກໍເປັນໄປໄດ້, ຖ້າຫາກວ່າ ຄນະກັມການກວດກາ ບໍ່ອະນຸມັດໃຫ້ສ້ອມແປງເຂື່ອນນັ້ນຄືນ.

ສໍາລັບຄ່າຊົດເຊີຍຄວາມເສັຍຫາຍຂອງປະຊາຊົນ ເມືອງທ່າໂທມ ແຂວງໄຊສົມບູນ, ທີ່ໄດ້ຮັບຜົລກະທົບຈາກເຂື່ອນແຕກ ນັ້ນ, ມາເຖິງ ປັດຈຸບັນ, ບໍຣິສັດບໍ່ທອງອິນເຕີກຣຸບ, ກໍຍັງຢູ່ໃນຂັ້ນຕອນການປະເມີນຄວາມເສັຍຫາຍ ແລະມູນຄ່າທີ່ີຈະຊົດເຊີຍ ນັ້ນຢູ່, ດັ່ງທີ່ທ່ານກ່າວວ່າ:

"ຂັ້ນເທິງລົງມາກວດກາ ແລ້ວເພິ່ນສິໃຫ້ສ້າງຕໍ່ຫລືບໍ່ ກໍບໍ່ທັນຮູ້ນໍ, ສ່ວນຄ່າຊົດເຊີຍ, ບໍຣິສັດກໍຍັງດໍາເນີນການກວດກາ, ດ້ານຜົລກະທົບຂອງ ປະຊາຊົນໃໝ່."

ເຂື່ອນນໍ້າເອົ້າ ຂນາດ 15 MW, ບໍຣິສັດບໍ່ທອງອິນເຕີກຣຸບ ໄດ້ເລີ່ມກໍ່ສ້າງໃນປີ 2015, ແລະຄາດວ່າຈະທໍາການຜລິດກະແສໄຟຟ້າໃນປີ 2018. ແຕ່ໃນຂະນະ ກໍ່ສ້າງໄດ້ 85% ເຂື່ອນນັ້ນກໍແຕກ ເຮັດໃຫ້ນໍ້າໄຫລຖ້ວມພື້ນທີ່ທໍາການຜລິດ ຂອງປະຊາຊົນຢູ່ ເມືອງທ່າໂທມ ແຂວງໄຊສົມບູນ, ທີ່ຢູ່ໃຕ້ເຂື່ອນຈໍານວນ 60 ຄອບຄົວ. ປັດຈຸບັນ ປະຊາຊົນທີ່ໄດ້ຮັບຜົລກະທົບ, ຍັງພາກັນລໍຖ້າຄ່າຊົດເຊີຍ ຈາກທາງ ບໍຣິສັດຢູ່.

ເຕັມຫນ້າ