ຊາວລາວຂໍໃຫ້ຣັຖບານ ຊ່ອຍເຫຼືອ ຍາມຍາກ

ສິດນີ
2021-08-05
Share
ຊາວລາວຂໍໃຫ້ຣັຖບານ ຊ່ອຍເຫຼືອ ຍາມຍາກ ເພື່ອໃຫ້ໄດ້ເດີນທາງ ເຂົ້າ-ອອກ ສະບາຍ ໄປຫາຢູ່ຫາກິນ ໄດ້ສະດວກ ປະຊາຊົນລາວ ພາກັນໄປສັກວັກຊິນ ປ້ອງກັນໂຄວິດ-19.
RFA

ໃນໄລຍະທີ່ໂຄວິດ-19 ຣະບາດຢູ່ນີ້ ຫຼາຍແຂວງໄດ້ຮັບຜົລກະທົບ ຢ່າງໜັກ ເນື່ອງຈາກທາງການລາວ ໄດ້ປິດບ້ານປິດເມືອງເພື່ອ ປ້ອງກັນໂຄວິດ-19 ແຜ່ລາມໄປວົງກວ້າງ ເປັນຕົ້ນທີ່ ແຂວງສວັນນະເຂດ ໃນເດືອນສິງຫາ ນີ້ ທາງການກໍສັ່ງໃຫ້ປິດບ້ານປິດເມືອງ ໃນພື້ນທີ່ສີແດງ ຕື່ມອີກ 30 ວັນ ຈົນຮອດທ້າຍເດືອນ ເຊິ່ງເຮັດໃຫ້ການໃຊ້ຊີວິດ ຂອງຊາວບ້ານລຳບາກເພີ່ມອີກ, ປະຊາຊົນຜູ້ ທຸກຍາກຕ້ອງການ ຢາກໃຫ້ຣັຖບານຊ່ອຍແຈກເຂົ້າສານ ອາຫານແຫ້ງ ເພື່ອບັນເທົ່າທຸກຊົ່ວຄາວ ຈົນກວ່າສະພາບການຈະດີຂຶ້ນ ດັ່ງຊາວບ້ານທ່ານນຶ່ງ ກ່າວຕໍ່ເອເຊັຽເສຣີ ໃນວັນທ 5 ສິງຫາ ນີ້ວ່າ:

”ການລ໊ອກດາວ ໃຊ້ຊີວິດກໍລຳບາກ ມັນບໍ່ມີໜ່ວຍງານ ທີ່ຈະເຂົ້າມາຊ່ອຍເຫຼືອ ແບບວ່າໃນຄອບຄົວເຂົາບໍ່ມີກິນ ກໍບໍ່ມີ ເຣື່ອງສິນຄ້າ ຫັ້ນນ່່າກໍຂ້ອນຂ້າງຢາກຂຶ້ນຫັ້ນແຫຼະ ເຂົ້າສານ ມັນກະຢາກຂຶ້ນຄືກັນຫັ້ນແຫຼະ ເປັນໄປໄດ້ຖ້າວ່າຣັຖບານ ຊ່ອຍເຣື່ອງເຂົ້າໃຫ້ແຕ່ລະ ຄອບຄົວ ມັນຫາກພໍທຸເລົາໄປ ຣາຍໄດ້ບໍ່ມີ ພັດໄປຊຶ້ເຂົ້າຫັ້ນນ່າ ຖ້າຄອບຄົວໃຜບໍ່ມີ ແຮ່ງລຳບາກ ຕຶ່ມ ເລີຍແຫຼະ.”

ຊາວບ້ານທ່ານນີ້ກ່າວຕື່ມວ່າ ໃນແຕ່ລະເດືອນ ຍັງຕ້ອງໄດ້ຫາເງິນໄປຈ່າຍຄ່ານ້ຳຄ່າໄຟ ແລະ ຄ່າອຶ່ນໆນຳອີກ ເຊີ່ງໃນໄລຍະປິດບ້ານ ປິດເມືອງນີ້ ການຫາເງິນກໍບໍ່ໄດ້ງ່າຍ ຖ້າຫາກ ເປັນໄປໄດ້ກໍຢາກໃຫ້ ຫຼຸດຄ່ານ້ຳຄ່າໄຟ ໃຫ້ຊາວບ້ານຫຼາຍກວ່ານີ້ ເພຶ່ອຈະມີເງິນເຫຼຶອ ໄປໃຊ້ຈ່າຍໃນສິ່ງທີ່ຈຳເປັນ.

”ກັບຄ່ານ້ຳຄ່າໄຟນີ້ ໂອ້ເຂົາຈົ່ົມໝົດ ແບບບໍ່ລົດເລີຍໂຕນີ້ ຖ້າຄ່ານ້ຳ ຄ່າໄຟມັນຫລຸດຈັ່ງຊີ້ ຄອບຄົວທີ່ບໍ່ມີແດ່ ມັນກໍຊິພໍໄດ້ໃຊ້ຈ່າຍ ອັນນີ້ ເງິນບໍ່ໄດ້ຫາ ພັດໄປໃຫ້ຄ່ານ້ຳຄ່າໄຟໝົດ.”

ຊາວບ້ານຢູ່ແຂວງສວັນນະເຂດ ອີກທ່ານນຶ່ງເວົ້າວ່າ ເຖິງແມ່ນທາງການບໍ່ສັ່ງປິດບ້ານປິດເມືອງ ຕື່ມອີກ 30 ວັນ ແຕ່ທຸກມື້ນີ້ກໍຄື ປິດບ້ານປິດເມືອງຢູ່ແລ້ວ ສຳລັບຄົນມີເງິນ ກໍບໍ່ຫຍຸ້ງຍາກລຳບາກ ແຕ່ສຳລັບຜູ້ບໍ່ມີເງິນນັ້ນ ແຮ່ງຫຍຸ້ງຍາກລຳບາກ ຫຼາຍກວ່າເກົ່າ ໃນແຕ່ລະເດືອນຄ່າໃຊ້ຈ່າຍຕ່າງໆ ກໍຕາມມາ.

“ບໍ່ມີງານທຳໃຫ້ເຮັດດຽວນີ້ ຖ້າວ່າມັນກໍບໍ່ມີຣາຍໄດ້ ມັນກໍຫຍຸ້ງຍາກຫຼາຍຢູ່ ຈັ່ງຊັ້ນແຫຼະ ໄປວັນໆ ໄປຈັ່ງຊັ້ນແຫຼະ ສີິນຄ້າທຸກມື້ນີ້ມັນ ຂຶ້ນຣາຄາ ອາຫານເດ້ ກໍແພງບາດນີ້ ຂອງຢູ່ຂອງກິນ ຄັນເປັນໄປໄດ້ ແຈກເຂົ້າ ການຢູ່ການກິນ ກໍແຮ່ງດີເນາະ ໄດ້ກິນໃນແຕ່ລະມື້.”

ກ່ຽວກັບເຣື່ອງນີ້ ເຈົ້າໜ້າທີ່ຢູ່ແຂວງສວັນນະເຂດ ທ່ານນຶ່ງກໍເວົ້າວ່າ ເຫດຜົລທີ່ແຂວງສວັນນະເຂດ ແຈ້ງການປິດບ້ານປິດເມືອງຕື່ມ ອີກ 30 ວັນ ເປັນຍ້ອນວ່າ ພົບຜູ້ຕິດເຊື້່ອໂຄວິດ-19 ຢູ່ຕລາດສາມະຄີໄຊ ທັງຍັງມີເຈົ້າໜ້າທີ່ ກວດພົບເຫັນຄົນງານລາວ ກັບຈາກ ໄທຍ ຕິິດເຊື້ອຈຳນວນຫຼາຍນຳອີກ ຈຶ່ງເປັນການປ້ອງກັນໄວ້ລ່ວງໜ້າ ເພຶ່ອບໍ່ໃຫ້ເກີດການຣະບາດ ໃນວົງກວ້າງ.

”ແມ່ນແຈ້ງການໃໝ່ ກະຊິບໍ່ປ່ຽນແປງຫຼາຍ ມີຄົນຕິດເຊື້ອມັນຢູ່ຊຸມຊົນດຽວກັນ ຢູ່ຕລາດສາມະຄີໄຊ ນີ້ກະມີ ແລະ ກະຢູ່ພະນັກງານ ທີ່ເຮັດວຽກຢູ່ກັບການຜົລກວດ ອີ່ຫຍັງນີ້ນ່າ ມີຄົນຕິດເຊື້ອ ປະຊາຊົນເຂົາມີຄວາມເຂົ້າໃຈແລ້ວ ທຸກມື້ນີ້ນ່າ ບໍ່ແຕກຕື່ນແລ້ວ ເພາະວ່າ ເຂົາກໍຮູ້ວິທີປ້ອງກັນ.”

ໃນຂນະດຽວກັນ ຢູ່ເມືອງຈັນທະບູຣີ ນະຄອນຫຼວງວຽງຈັນ ກໍຍັງມີຮ້ານກິນດື່ມ ບາງແຫ່ງລະເມີດຄຳສັ່ງ ຂໍ້ຫ້າມທາງການ ໂດຍໄດ້ ເປີດຮ້ານຂາຍເຫຼົ້າເບັຽ ເກີນເວລາທີ່ທາງການ ກຳນົດໃຫ້ ເຈົ້າໜ້າທີ່ກໍໄດ້ປັບໃໝ ແລະ ສັ່ງໃຫ້ປິດຮ້ານໄປແລ້ວ.

ເຖິງວ່າຈະບໍ່ມີຄົນຕິດເຊື້ອ ໃນເມືອງຈັນທະບູຣີ ກໍຕາມ ແຕ່ເຈົ້າຫນ້າທີ່ຍັງເຂັ້ມງວດຫຼາຍຢູ່ ຍ້ອນວ່່າຍັງມີບາງເມືອງໃນນະຄອນຫຼວງ ວຽງຈັນ ຕິດເຊື້ອໃນຊຸມຊົນ ຍ້ອນມີ ຄົນງານລາວ ເດີນທງມາຈາກຕ່າງປະເທດ ຈຳນວນຫຼາຍ.

”ເພາະວ່າບໍ່ໃຫ້ຂາຍເຫຼົ້າຂາຍເບັຽ ຊັ້່ນຕົ່ວ ຕາມກຳນົດເພິ່ນໃຫ້ເປີດ ກະຢູ່ໃນຣະດັບ 10 ໂມງ ເຮົາກໍຍັງເຄັ່ງຄັດຢູ່ ເພາະວ່າຍັງນຳ ເຂົ້າຫຼາຍ ມີສະຕິກ່ອນຫັ້ນແຫຼະ ກັນໄວ້ກ່ອນຫັ້ນແຫຼະ”

ໃນຂນະດຽວກັນໃນມື້ນີ້ ທາງການລາວ ກໍໄດ້ວກດພົບເຫັນຜູ້ຕິດຣາຍໃໝ່ ເພີ່ມອີກ 206 ເປັນກໍຣະນີນຳເຂົ້າ 187 ຄົນແລະກໍຣະນີ ຕິດເຊື້່ອໃນຊຸມຊົນ 19 ຄົນຈາກຜົລກວດວິເຄາະທັງໝົດ 2,392 ໂຕຢ່າງ ຂອງວັນທີ 4 ສິງຫາ ໃນນັ້ນ ຈາກນະຄອນຫຼວງວຽງຈັນ 53 ຄົນ, ແຂວງສວັນນະເຂດ 74 ຄົນ, ຈຳປາສັກ 54 ຄົນ, ບໍ່ແກ້ວ 12 ຄົນ, ສາຣະວັນ 8 ຄົນ, ບໍຣິຄຳໄຊ 4 ຄົນ ແລະ ແຂວງວຽງຈັນ 1 ຄົນ.

”ໄດ້ກວດວິເຄາະທັງໝົດ 2,392 ຄົນ ໄດ້ກວດພົບຜູ້ຕິດເຊື້ອໃໝ່ທັງໝົດ 206 ຄົນ ເຊິ່ງໃນກໍຣະນີຕິດເຊື້ອ ໃນຊຸມຊົນນັ້ນ ກະແມ່ນ ມີເຖິງ 19 ຄົນ.”

ນອກຈາກນີ້ ຣັຖບານຍີ່ປຸ່ນ ກໍໄດ້ປະກາດ ໃຫ້ການຊ່ອຍເຫຼຶອລາວ ໂດຍຈະສົ່ງວັກຊິນ ຍີ່ຫໍ້ ແອສຕຣາ ເຊເນກ້າ ຈຳນວນ 6 ແສນ ປາຍໂດສ ພ້ອມທັງເຄື່ອງຜລິດ ອ໌ອກຊີເຢັນ 100 ເຄື່ອງ ແລະ ເຄື່ອງຕິດຕາມອາການຊິວິດ 100 ເຄື່ອງ ຮ່ວມມູນຄ່າ 7 ແສນ 1 ມື່ນ ໂດຣາ.

ວິທຍຸເອເຊັຽເສຣີ ໄດ້ຕິດຕໍ່ໄປຍັງສະຖານທູດຍີ່ປຸ່ນ ປະຈຳລາວ ເພື່ອຣາຍລະອຽດ ເຈົ້າໜ້າທີ່ທ່ານນຶ່ງ ກ່າວວ່າການຊ່ອຍເຫຼຶອ ຈາກ ຣັຖບານຍີ່ປຸ່ນ ເທື່ອນີ້ ຈະມີການສົ່ງມອບ ໃນຕອນແລງຂອງ ວັນທີ 5 ສິງຫາ ນີ້.

ອີງຕາມການຣາຍງານ ຂອງ ຄະນະສະເພາະກິດປ້ອງກັນໂຄວິດ-19 ມາຮອດປັດຈຸບັນ ມີຜູ້ໄດ້ຮັບການວິເຄາະຫາເຊື້ອໂຄວິດ-19 ທັງໝົດ 328,368 ຄົນ ໃນນັ້ນພົບເຫັນຜູ້ຕິດ ເຊື້ອສະສົມ 7,511 ຄົນ ເສັຽຊິວິດ 7 ຄົນ ປົວເຊົາ 3,808 ຄົນ ຍັງປີ່ນປົວ ຢູຸ່ ໂຮງພຍາບານ 3,696 ຄົນ.

ຄໍາເຫັນ (0)

ເບິ່ງຄວາມເຫັນທັງໝົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ