ສານເກົາຫຼີໃຕ້ຕັດ ສິນຈຳຄຸກກຸ່ມ Call Center ສາມຫຼ່່ຽມຄຳ 8 ປີ

ສານເກົາຫຼີໃຕ້ຕັດສີນຈໍາຄຸກຫົວໜ້າກຸ່ມສໍ້ໂກງທາງໂທລະຄົມ ຫຼື Call Center ຢູ່ເຂດເສດຖະກິດພິເສດສາມຫຼ່ຽມຄຳ ເມືອງຕົ້ນເຜີ້ງ ແຂວງບໍ່ແກ້ວ ແລະ ເຂດເສດຖະກິດພິເສດປະເທດມຽນມ້າ 8 ປີ ໃນຂໍ້ຫາຫຼອກລວງພົນລະເມືອງເກົາຫຼີໃຕ້ດ້ວຍສັນຍາທີ່ວ່າຈະເຮັດໃຫ້ເຂົາເຈົ້າໄດ້ເງິນມະຫາສານຖ້າລົງທືນນໂຄງການຕ່າງ ໆ ທີ່ເຂົາເຈົ້າແນະນໍາເຮັດໃຫ້ຊາວເກົາຫຼີໃຕ້ 60 ຄົນ ທີ່ເສັຍເງິນຫຼາຍກ່ວາ 23 ພັນລ້ານວອນ ຫຼື ປະມານ 17 ລ້ານໂດລາສະຫະລັດໃຫ້ກັບກຸ່ມສໍ້ໂກງທາງໂທລະຄົມເມື່ອເດືອນພຶດສະພາ ແລະ ເດືອນຕຸລາ ປິ 2023 ຜ່ານມາ. ດັ່ງປະຊາຊົນລາວຈາກແຂວງບໍ່ແກ້ວກ່າວຕໍ່ວິທຍຸເອເຊັຽເສຣີໃນວັນທີ 20 ສິງຫານີ້ວ່າ.

“ ຖ້າວ່າຜູ້ໃນເຮັດຜິດຕ້ອງຍອມຮັບວ່າຜິດຫັ້ນແຫຼະເນາະກໍ່ຖ້າວ່າຈໍາຄຸກ 7-8 ປີມັນກໍ່ສີອັນນັ້ນຕີ້ໜ້ອຍປີມັນໜ້ອຍປະເມີນເບິ່ງເງິນຫັ້ນເນາະເງິນມັນກໍ່ຫຼາຍດອນມັນກໍ່ຫຼາຍສົມຄວນເພິ່ນຕົວະໄດ້ເງິນຫຼາຍແລ້ວເດ້ຕະຫຼອດຊີວິດກໍ່ຫາກດີຖ້າວ່າສົມມຸດວ່າຄົນລາວໄປເຮັດວຽກຢູ່ເທດເຂົາບາງເທື່ອເຂົາທີ່ວ່າຈຳຄຸກຕະຫຼອດຊີວິດຫຼືວ່າປະຫານຊີວິດພຸ້ນນ່າເນາະ”

ເຈົ້າໜ້າທີ່ອາວຸໂສ ແລະ ນາຍໜ້າຂອງກຸ່ມສໍໍ້ໂກງທາງໂທລະຄົມນີ້ຖືກສານເກົາຫຼີໃຕ້ຕັດສີນຈຳຄຸກ 4 ປີ ນອກນັ້ນສະມາຊິກໃນກຸ່ມອີກ 10 ຄົນ ແລະ ທີ່ປຶກສາຖືກສານເກົາຫຼີໃຕ້ຕັດສີນຈຳຄຸກ 3 ປີ. ສ່ວນເຫຍື່ອຮ້ອງຂໍຕໍ່ສານເກົາຫຼີໃຕ້ເຖີງຄວາມທໍລະມານທາງເສດຖະກິດ ແລະ ຈິດໃຈຢ່າງຮຸນແຮງຈຶ່ງຮ້ອງຂໍໃຫ້ມີການລົງໂທດຈຳເລີຍທັງໝົດໜັກກ່ວານີ້.

 ກ່ຽວກັບເລື່ອງນີ້ເຈົ້າໜ້າທີ່ທີ່ປະຈໍາຢູ່ເຂດເສດຖະກິດພິເສດສາມຫຼ່ຽມຄໍາກ່າວວ່າຄໍາຕັດສີນຂອງສານເກົາຫຼີໃຕ້ຂື້ນກັບກົດໝາຍຂອງປະເທດເຂົາເຈົ້າໂດຍໃສ່ໂທດຈຳຄຸກຕາມມູນຄ່າຄວາມເສັຍຫາຍດັ່ງທ່ານກ່າວວ່າ.

“ ມັນກໍ່ຂື້ນກັບກົດໝາຍຂອງເຂົາເຈົ້າເນາະວ່າມີຜົນບັງຄັບໃຊ້ໄດ້ແບບໃດເນາະອາດບາງທີມັນອາດຈະໜັກສຳລັບລາວເຮົາຈະເອີ້ນການຄ້າມະນຸດແຕ່ວ່າເຂົາເອົາໄປປະຕິບັດຢູ່ປະເທດເຂົາເຂົາອາດຈະໃຊ້ກົດໝາຍຂອງເຂົາເຈົ້າ, ສໍ້ໂກງກໍ່ໄປຕາມມູນຄ່າທີ່ວ່າເຂົາເຈົ້າສໍ້ໂກງມາໄດ້ນ່າເຂົາເຈົ້າຈະຕີເປັນມູນຄ່າໄລ່ຕາມນັ້ນມັນກໍ່ຂື້ນຕາມແຕ່ລະໂທດເນາະອັນໂຕຈຳຄຸກນີ້ກໍ່ສານເປັນຜູ້ຕັດສີນເຂົາຈະມາເບິ່ງວ່າເອີການກະທຳຜິດມັນກະທຳຜິດແບບໃດ”

 ສ່ວນເຈົ້າໜ້າທີ່ສະຖານທູດເກົາຫຼີໃຕ້ປະຈໍາລາວກ່າວວ່າຕົນເອັງເຫັນດີຕໍ່ຄໍາຕັດສີນຂອງສານເກົາຫຼີໃຕ້ທີ່ຈຳຄຸກຫົວໜ້າ ແລະ ກຸ່ມແກ້ງພ້ອມກ່າວຕື່ມວ່າຄຳຕັດສີນຂອງສານຫາກໍ່ເກີດຂື້ນໃນໄລຍະເດືອນນີ້ແຕ່ວ່າການຈັບຕົວ ຫົວໜ້າ ແລະ ກຸ່ມແກ້ງໃນເຂດເສດຖະກິດພິເສດສາມຫຼ່ຽມຄຳມີມາກ່ອນແລ້ວພ້ອມທັງຢາກໃຫ້ຕຳຫຼວດລາວຈັບຄົນເກົາຫຼີໃຕ້ທີ່ຢູ່ໃນກຸ່ມສໍ້ໂກງທາງໂທລະຄົມມາດຳເນີນຄະດີ ແລະ ຊ່ວຍເຫຼືອພົນລະເມືອງເກົາຫຼີໃຕ້ຕື່ມຍ້ອນສະຖານທູດເກົາຫຼີໃຕ້ປະຈຳລາວບໍ່ມີເຄືອຂ່າຍໃນເຂດນັ້ນ. ດັ່ງເຈົ້າໜ້າທີ່ສະຖານທູດກ່າວວ່າ.

“ ຖືກກັກຕົວກ່ອນແລ້ວປະມານ 6 ເດືອນກ່ອນເນາະຊ່ວງນີ້ຊ່ວງຕັດສີນສື່ ໆ ຫົວໜ້ານີ້ກໍາໄດ້ຍີນວ່າຈຳຄຸກ 8 ປີ ແລ້ວກໍ່ຜູ້ຮ່ວມປະມານ 4 ປີ ເຮົາກໍ່ຢາກໃຫ້ຕຳຫຼວດລາວຈັບຄົນເກົາຫຼີຄົນເກົາຫຼີຫຼາຍຢູ່ໃນເຂດສາມຫຼ່ຽມຄຳຫຼືວ່າຖືກສໍ້ໂກງຕ້ອງຊ່ວຍກໍ່ມີຫຼາຍແຕ່ວ່າເຂົາເຈົ້າບໍ່ໄດ້ແຈ້ງນຳເຮົາເຮົາກໍ່ບໍ່ມີເຄືອຂ່າຍເນາະໃນເຂດພິເສດເທື່ອ”

  ປັດຈຸບັນເພື່ອສະກັດກັ້ນບໍ່ໃຫ້ພົນລະເມືອງເກົາຫຼີໃຕ້ໄປເຮັດວຽກຢູ່ບໍລິສັດສໍ້ໂກງທາງໂທລະຄົມຕື່ມທາງສະຖານທູດເກົາຫຼີໃຕ້ປະຈຳລາວ ແລະ ຕໍາຫຼວດກວດຄົນເຂົ້າເມືອງປະເທດລາວໄດ້ເຮັດຂໍ້ຕົກລົງນໍາກັນຫ້າມພົນລະເມືອງເກົາຫຼີໃຕ້ເຂົ້າເຂດເສດຖະກິດພິເສດສາມຫຼ່ຽມຄຳຫາກບໍ່ມີວຽກຈຳເປັນເຊີ່ງຂໍ້ຕົກລົງດັ່ງກ່າວຍັງມີຜົນບັງຄັບໃຊ້ໃນປັດຈຸບັນ. ດັ່ງເຈົ້າໜ້າທີ່ສະຖານທູດເກົາຫຼີໃຕ້ປະຈຳລາວອີກທ່ານກ່າວວ່າ.

“ ບໍ່ມີແລ້ວເຈົ້າຕັ້ງແຕ່ເຮົາຊ່ວຍຫຼ້າສຸດແລ້ວກໍ່ບໍ່ມີເພາະວ່າເຮົາຫັ້ນໄດ້ເຮັດຂໍ້ຕົກລົງຫ້າມທາງ ຕມ ຖ້າວ່າຄົນເກົາຫຼີທີ່ບໍ່ມີວຽກອີ່ຫຍັງທີ່ຈະເຂົ້າໄປຫັ້ນນ່າແມ່ນເພິ່ນບໍ່ໃຫ້ເຂົ້າໄປເພາະວ່າມັນມີບັນຫາຕະຫຼອດຫັ້ນນ່າເພິ່ນກໍ່ເລີຍເຮັດແບບນັ້ນບໍ່ໃຫ້ຄົນເພິ່ນເຂົ້າໄປຖ້າວ່າບໍ່ມີວຽກຈຳເປັນຫັ້ນນ່າກໍ່ເລີຍວ່າເຕືອນບໍ່ໃຫ້ເຂົ້າເລີຍ”

 ເມື່ອເດືອນພະຈິກປີ 2023 ທີ່ຜ່ານມາເກົາຫຼີໃຕ້ປະກາດວ່າພົນລະເມືອງ 19 ຄົນໄດ້ຮັບການຊ່ວຍເຫຼືອຈາກຕຳຫຼວດມຽນມ້າຫຼັງຈາກຖືກຄວບຄຸມຕົວໂດຍບໍລິສັດຜິດກົດໝາຍໃນເມືອງແຫ່ງໜຶ່ງທາງເວັນອອກຂອງປະເທດມຽນມ້າເຂດຊາຍແດນປະເທດໄທ.