ຊາວບ້ານນາເຕີຍກັງວົນ ເຣື້ອງ ອາຊີບ

ໄມຊຸລີ
2019-05-29
ອີແມວລ໌
ຄໍາເຫັນ
Share
ພິມ
ການກໍ່ສ້າງ ຂອງໂຄງການ ທາງຣົດໄຟ ລາວ-ຈີນ ທີ່ເຂດບ້ານນາເຕີຍ ຂ.ຫຼວງນໍ້າທາ
ການກໍ່ສ້າງ ຂອງໂຄງການ ທາງຣົດໄຟ ລາວ-ຈີນ ທີ່ເຂດບ້ານນາເຕີຍ ຂ.ຫຼວງນໍ້າທາ
RFA

ປະຊາຊົນ ບ້ານນາເຕີຍ 160 ຄອບຄົວ ເມືອງແລະແຂວງ ຫລວງນໍ້າທາ ຜູ້ທີ່ເສັຍດິນໃຫ້ໂຄງການ ທາງຣົດໄຟ ລາວ-ຈີນ ບໍ່ຢາກໂຍກຍ້າຍ ໄປຢູ່ບ້ານ ໃໝ່ຍ້ອນວ່າ ເຂົາເຈົ້າບໍ່ມີບ່ອນທໍາມາຫາກິນ ແລະ ບໍ່ຮູ້ວ່າ ຈະທໍາມາຫາກິນແນວໃດ, ອີງຕາມຄໍາເວົ້າ ຂອງປະຊາຊົນຜູ້ນຶ່ງ ຢູ່ ບ້ານນາເຕີຍ ຕໍ່ເອເຊັຽເສຣີ ໃນວັນທີ 26 ພຶສພາ ນີ້:

“ຍ້າຍນີ້ເຮົາຍ້າຍໄດ້ແຕ່ບັນຫາມັນຢູ່ບ່ອນວ່າ ຖ້າຍ້າຍໄປແລ້ວເຮົາຊິເຮັດອາຊີບຫຍັງ ເພາະວ່າບ່ອນຢູ່ໃໝ່ ມັນບໍ່ແມ່ນບ່ອນຄ້າບ່ອນຂາຍ, ອີກຢ່າງ ໄຮ່ນາຮົ້ວສວນກະບໍ່ມີ ແມ່ນຢູ່ທີ່ເພິ່ນຈ່າຍຄ່າຊົດ ເຊີຍໃຫ້ແຕ່ ເຮົາບໍ່ສາມາດໄປຊື້ບ່ອນທີ່ມັນເໝາະສົມໄດ້ ມັນກະມີຫຼາຍຄອບຄົວ ທີ່ເຂົາເຈົ້າບໍ່ຢາກເຫັນດີແຕ່ກໍ່ ຈຳເປັນ.”

ປະຊາຊົນຜູ້ນີ້ ໄດ້ກ່າວອີກວ່າ ປະຊາຊົນໄດ້ປະກອບອາຊີບຄ້າຂາຍ ແລະ ເຮັດໄຮ່ ເຮັດນາ ຊຶ່ງເປັນອາຊີບຫລັກຂອງພວກເຂົາ, ແຕ່ຖ້າຫາກ ໄດ້ໂຍກຍ້າຍແລ້ວ ເຂົາເຈົ້າບໍ່ຮູ້ວ່າ ຈະເຮັດອາຊີບຫຍັງ ເພື່ອລ້ຽງຄອບຄົວ.

ດິນທີ່ທາງການຈັດສັນໃຫ້ໃໝ່ນີ້ ແມ່ນຫ່າງຈາກສະຖານີຣົດໄຟປະມານ 1 ກິໂລແມັດ ມີທາງເຂົ້າ ຫ່າງຈາກທາງໃຫ່ຍປະມານ 200 ແມັດ, ມີເນື້ອທີ່ທັງໝົດ 19 ເຮັກຕາ ທີ່ຈະຖືກຈັດສັນ ໃຫ້ແຕ່ລະ ຄອບຄົວ ຂະໜາດ 20 ຄູນ 30 ແມັດ.

ເຈົ້າໜ້າທີ່ ຜູ້ທີ່ບໍ່ປະສົງອອກຊື່ ແລະສຽງ ໄດ້ກ່າວຕໍ່ວິທຍຸເອເຊັຽເສຣີ ວ່າ:

"ດິນທີ່ພວກເພີ່ນຈັດສັນໃຫ້ໃໝ່ ມັນກະເໝາະສົມຢູ່ ເພາະວ່າ ມັນຕິດກັບແຄມນໍ້າ ເໝາະແກ່ການ ປູກຝັງຕ່າງໆ, ເບື້ອງຕົ້ນ ກະຊິຈັດສັນ ດິນປຸກສ້າງກ່ອນ ຄອບຄົວນຶ່ງ ກະຊິໄດ້ເນື້ອທີ່ ປະມານ 20 ຄູນ 30 ນີ້ແຫລະ.”

ສະຖານີຣົດໄຟ ຢູ່ບ້ານນາເຕີຍ ເປັນສະຖານີໃຫຍ່ ອັນດັບສອງ ຮອງຈາກສະຖານີນະຄອນຫລວງວຽງຈັນ ດ່ັງນັ້ນ ຈຶ່ງຕ້ອງການເນື້ອທີ່ ຫລາຍ. ເສັ້ນທາງຣົດໄຟຜ່ານ ແຂວງຫລວງນໍ້າທາ ມີຄວາມຍາວເກືອບ 17 ກິໂລແມັດ, ມີການເຈາະອຸໂມງ 3 ຈຸດ, ມີ 4 ບ້ານທີ່ໄດ້ຮັບ ຜົນກະທົບ ຄືບ້ານຕີນຕົກ, ບ້ານຕີນສານ, ບ້ານບໍ່ເຕັນ ແລະ ບ້ານນາເຕີຍ ຊຶ່ງການໂຍກຍ້າຍ ບ້ານນາເຕີຍນີ້ ຈະໃຊ້ເວລາຮອດປີ 2021.

ອີງຕາມຂໍ້ມູນຈາກເຈົ້າໜ້າທີ່ ຜແນກໂຍທາທິການ ແລະຂົນສົ່ງ ແຂວງຫຼວງນໍ້າທາ ໂຄງການໄດ້ຈ່າຍຄ່າຊົດເຊີຍ ທີ່ຢູ່ອາສັຍໃຫ້ປະຊາຊົນ ແລ້ວ ສ່ວນວ່າ ດິນນາ ດິນສວນ ໂຄງການຈະຈ່າຍໃຫ້ ສໍາເຣັດພາຍໃນ ປີ 2019 ແລະ ນອກຈາກນີ້ ໂຄງການ ຈະຈ່າຍຄ່າໂຍກຍ້າຍ ໃຫ້ປະຊາຊົນ ພາຍໃນ ເດືອນຕຸລາ 2019.

ເຕັມຫນ້າ