ບໍລິສັດ ກຽມເພີ່ມເງິນເດືອນ ດຶງດູດຄົນງານລາວ ກັບຄືນປະເທດ

ໄຊຍາ
2024.04.09
ບໍລິສັດ ກຽມເພີ່ມເງິນເດືອນ ດຶງດູດຄົນງານລາວ ກັບຄືນປະເທດ ຄົນງານລາວ ກຳລັງນັ່ງລົດໄປເຮັດວຽກ, ຢູ່ແຂວງຈຳປາສັກ. ເດືອນສິງຫາ ປີ 2023.
RFA

ປັດຈຸບັນຫຼາຍບໍລິສັດໃນລາວ ກໍາລັງກຽມທີ່ຈະເພີ່ມເງິນເດືອນ ໃຫ້ແກ່ແຮງງານລາວ ເພື່ອດຶງດູດແຮງງານລາວ ທີ່ເດິນທາງກັບມາຈາກຕ່າງປະເທດ ໃນໄລຍະບຸນປີໃໝ່ລາວນີ້ ໃຫ້ປ່ຽນໃຈ ກັບມາເຮັດວຽກຢູ່ພາຍໃນປະເທດຫຼາຍຂຶ້ນ, ເຊິ່ງບາງບໍລິສັດຢູ່ນະຄອນຫຼວງວຽງຈັນ ກໍໄດ້ຕົກລົງທີ່ຈະເພີ່ມເງິນເດືອນ ໃຫ້ແກ່ແຮງງານລາວເພື່ອໃຫ້ສອດຄ່ອງ ກັບຄວາມສາມາດຂອງແຮງງານ ແລະປັບປຸງດ້ານອື່ນໆ ເພື່ອຊຸກຍູ້ໃຫ້ແຮງງານລາວ ກັບມາຊອກຫາວຽກເຮັດໃນລາວຫຼາຍຂຶ້ນ. ອີງຕາມການລາຍງານຂອງໜັງສືພິມວຽງຈັນທາມສ໌ ເມື່ອວັນທີ 09 ເມສາ 2024.

ປັດຈຸບັນແຮງງານລາວສ່ວນໃຫຍ່ ກໍຍັງຊອກໂອກາດທີ່ຈະອອກໄປເຮັດວຽກ ຢູ່ຕ່າງປະເທດເລື້ອຍໆ ໂດຍສະເພາະປະເທດເກົາຫຼີໃຕ້, ຢີ່ປຸ່ນ ແລະ ໄທ ຫຼາຍກ່ວາເຮັດວຽກຢູ່ພາຍໃນປະເທດ ຍ້ອນເງິນເດືອນດີກ່ວາຢູ່ລາວຈຶ່ງເຮັດໃຫ້ແຮງງານລາວ ຕ້ອງຂົນຂວາຍໄປຊອກຫາວຽກ ຢູ່ຕ່າງປະເທດເພື່ອມີເງິນລ້ຽງດູ ຄອບຄົວໃນສະພາບເສດຖະກິດບໍ່ດີ.

ດັ່ງເຈົ້າໜ້າທີ່ຈັດຫາງານ ທ່ານກ່າວຕໍ່ວິທຍຸເຊັຽເສຣີ ໃນວັນທີ 09 ເມສາ ນີ້ວ່າ:

“ເຂົາຢາກໄປເກົາຫຼີ ບໍ່ຢີ່ປຸ່ນບໍ່ນີ້ນ່າແຕ່ວ່າຢູ່ໄທ ຫຼາຍຄົນແລ້ວໄປນ່າເພາະວ່າ ເຂົາກາຢູ່ບໍ່ໄດ້ມັນຕ້ອງໄດ້ຊອກວຽກຢູ່ນອກກາໜ້ອຍແຫຼະ ບໍ່ກຸ້ມຢູ່ບໍ່ກຸ້ມໃຊ້ພື້ນຖານກາມີແຕ່ 3,000 ຖ້າທຽບໃສ່ເງິນບາດ.”

ຊາວນະຄອນຫຼວງວຽງຈັນນາງກ່າວວ່າ ເຖິງແມ່ນວ່າບາງບໍລິສັດໄດ້ເພີ່ມອັດຕາເງິນເດືອນໃຫ້ ແກ່ແຮງງານກໍຕາມແຕ່ກໍເຫັນວ່າ ເພີ່ມໃຫ້ແຕ່ຈຳນວນໜ້ອຍສື່ໆ ແລະ ບໍ່ທັນພຽງພໍຕໍ່ຄວາມຕ້ອງການ ຂອງແຮງງານຈຶ່ງເຮັດໃຫ້ແຮງງານ ຈຳນວນຫຼາຍຍັງຄົງຊອກຫາໂອກາດ ໄປເຮັດວຽກຢູ່ຕ່າງປະເທດຢູ່ຄືເກົ່າ. ດັ່ງນາງກ່າວວ່າ:

“ຂຶ້ນກາປະມານ 200 ປາຍບາດນີ້ແຫຼະ ຢູ່ແຖວບ້ານນ້ອງກາໂອຫຼາຍໄປເກືອບໝົດແລ້ວ ສ່ວນຫຼາຍກາປະຊາຊົນນີ້ທີ່ເຂົາເຈົ້າເຮັດການຜະລິດ ແລ້ວກາຖືວ່າເສດຖະກິດລາວແບບນີ້ ກໍຢາກໄປຕ່າງປະເທດເກົາຫຼີຢີ່ປຸ່ນໄທ.”

ຊາວລາວແຂວງສະຫວັນນະເຂດ ທ່ານກ່າວຢືນຢັນວ່າເຖິງແມ່ນວ່າ ຫຼາຍບໍລິສັດຢູ່ແຂວງສະຫວັນນະເຂດ ແລະຢູ່ໃນເຂດເສດຖະກິດພິເສດສະຫວັນ-ເຊໂນ ຈະເພີ່ມເງິນເດືອນໃຫ້ພະພະນັກງານ ແລະແຮງງານແລ້ວກໍຕາມແຕ່ກໍຍັງບໍ່ສາມາດ ທີ່ຈະໄດ້ດຶງດູແຮງງານໄດ້ຫຼາຍເຊິ່ງແຮງງານ ຢູ່ແຂວງຫຼາຍຄົນກໍລ້ວນແຕ່ແຕ່ຢາກສະມັກໄປເຮັດວຽກ ຢູ່ປະເທດເກົາຫຼີໃຕ້ທີ່ມີຄວາມຕ້ອງການແຮງງານລາວ ໄປເຮັດວຽກທາງດ້ານກະສິກຳຕາມລະດູການ. ດັ່ງທ່ານກ່າວວ່າ:

“ດຽວນີ້ຄ່າແຮງທີ່ວ່າແຕ່ລະບໍລິສັດ ພາຍໃນເຂົາຕ້ອງການຫັ້ນນ່າດຽວນີ້ ເຂົາກາເພີ່ມເງິນເດືອນຂຶ້ນຫຼາຍແລ້ວເຈົ້າເພື່ອດຶງພະນັກງານ ຫຼືວ່າດຶງຜູ້ອອກແຮງງານ ຢູ່ປັດຈຸບັນທີ່ວ່າລ້ານປາຍກາ 2 ລ້ານປາຍດຽວນີ້ເລີ້ມໄປເກົາຫຼີຫຼາຍເພາະວ່າ ດຽວນີ້ມັນມີທ່າແຮງທາງເກົາຫຼີ ຕ້ອງການແຮງງານລະດູການໄປຫຼາຍ.”

ສ່ວນບໍລິສັດຢູ່ປະເທດໄທ ກໍຍັງເປີດຮັບສະມັກແຮງງານລາວ ເຂົ້າມາເຮັດວຽກຢູ່ເລື້ອຍໆ ແລະ ແຮງງານລາວຈຳນວນຫຼາຍກໍຍັງຫຼັ່ງໄຫຼ ເຂົ້າມາຊອກວຽກເຮັດຢູ່ປະເທດໄທ ເນື່ອງຈາກວ່າຄ່າຈ້າງລາຍມື້ຢູ່ໄທດີກ່ວາຄ່າຈ້າງ ຢູ່ລາວຫຼາຍ. ດັ່ງພະນັກງານທີ່ເຮັດວຽກຢູ່ໄທນາງກ່າວວ່າ:

“ມັນມີຫຼາຍວຽກເດ້ເຈົ້າເອົາງານວຽກທີ່ຕົວເອງ ຖະນັດທີ່ສາມາດລົງແລ້ວເຮັດໄດ້ເລີ້ມຕົ້ນ ມັນທີ 360 ບາດຕໍ່ມື້ ສະຫວັດດີການບໍລິສັດ ເຮົາຈະໄດ້ທີ່ພັກຟຣີ ຫຼືວ່າທີ່ພັກຟຣີນໍ້າໄຟຕາມມິເຕິ້ ຫຼືວ່າອາຫານຟຣີ ຫຼືວ່າຟຣີທຸກຢ່າງກັບນາຍຈ້າງ ມັນມີຫຼາກຫຼາຍງານ.”

ສ່ວນເຈົ້າໜ້າທີ່ ຂະແໜງການແຮງງານ ຢູ່ພາກເໜືອທ່ານກ່າວຍອມຮັບວ່າ ການທີ່ຈະດຶງດູດໃຫ້ແຮງງານລາວກັບມາຊອກຫາວຽກງານ ໃນລາວນັ້ນກໍເປັນເລື່ອງຍາກຫຼາຍເຖິງແມ່ນວ່າ ຫຼາຍບໍລິສັດໄດ້ເລີ່ມເພີ່ມອັດຕາເງິນເດືອນ ໃຫ້ກໍຕາມແຕ່ວ່າໜ້ອຍຢູ່ຄັນທຽບໃສ່ເງິນເດືອນ ຢູ່ຕ່າງປະເທດ. ໃນຂະນະທີ່ເຈົ້າໜ້າທີ່ຂະແໜງການແຮງງານ ເອງກໍພະຍາຍາມຊອກຫາແຮງງານລາວ ພາຍໃນແຂວງຈຳນວນໜຶ່ງ ທີ່ສົນໃຈຢາກໄປເຮັດວຽກຢູ່ຕ່າງປະເທດເພື່ອໃຫ້ພວກເຂົາເຈົ້າ ໄດ້ຮັບໂອກາດນັ້ນ. ດັ່ງທ່ານດັ່ງກ່າວວ່າ:

“ມັນກໍແຕກຕ່າງກັນເນາະ ບາງບໍລິສັດກາເລີ່ມຕົ້ນກາໃນລະດັບ 2 ລ້ານປາຍຂຶ້ນເມືອຫັ້ນແຫຼະ ໃຫ້ບັນດາເມືອງໂຄສະນາເບິ່ງຢູ່ແຕ່ລະບ້ານຫັ້ນ ມີບໍ່ຜູ້ສົນໃຈຢາກໄປຫັ້ນເນາະຄັນມີກາຊິໃຫ້ເຂົາເຈົ້າຂຶ້ນທະບຽນ ຢູ່ຫ້ອງການແຮງງານເມືອງຫັ້ນ.”

ກ່ອນໜ້ານີ້ ໃນວັນທີ 28 ມີນາ ທີ່ຜ່ານມາ ກະຊວງແຮງງານ ແລະ ສະຫວັດດີການສັງຄົມ ໄດ້ອອກແຈ້ງການແນະນໍາໄປຍັງຄົນງານລາວ ທີ່ເຮັດວຽກຢູ່ປະເທດໄທທີ່ມີແຜນ ຈະເດີນທາງກັບປະເທດລາວ ໃນໄລຍະງານບຸນປີໃໝ່ລາວ ປະຈຳປີ 2024 ນີ້ ໃຫ້ພວກເຂົາເຈົ້າພິຈາລະນາ ຊອກວຽກເຮັດງານທຳ ພາຍໃນປະເທດເພື່ອແກ້ໄຂບັນຫາ ການຂາດແຄນແຮງງານ ພາຍໃນໂດຍໃຫ້ຂຶ້ນທະບຽນແຮງງານ ຜ່ານຊ່ອງທາງຕ່າງໆ ທັງພະແນກ ແລະ ຫ້ອງການແຮງງານ ແລະສະຫວັດດີການສັງຄົມ ທີ່ຢູ່ໃກ້ບ້ານ ຫຼື ວິສາຫະກິດຈັດຫາງານຕ່າງໆ. ແຕ່ຫາກພວກເຂົາເຈົ້າ ຕ້ອງການເດີນທາງກັບໄປເຮັດວຽກ ຢູ່ປະເທດໄທ ຄືເກົ່າກໍຈະຕ້ອງປະຕິບັດຕາມ ລະບຽບກົດໝາຍການເດີນທາງ ຂ້າມແດນແບບຖືກຕ້ອງ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.