ໂຮງງານຫຼາຍແຫ່ງ ໃນເຂດເສຖກິຈ ມີຄົນງານບໍ່ພຽງພໍ

ໂຮງງານ ໃນເຂດເສຖກິຈ ພິເສດກວມລວມໄຊເສດຖາ ຢູ່ນະຄອນຫລວງວຽງຈັນ ແລະ ຢູ່ເຂດເສຖກິຈ ສວັນເຊໂນ ແຂວງສວັນນະເຂດ ຕ້ອງການຄົນງານລາວ ຈໍານວນຫລາຍພັນຄົນ. ໃນນັ້ນ ບໍຣິສັດ ມັສຄອດ ອິນເຕີເນເຊີນເນລ (ລາວ) ໂຊນ ຈໍາກັດ (Mascot International Sole Co., Ltd.) ຢູ່ເຂດເສຖກິຈພິເສດ ກວມລວມໄຊເສດຖາ ຊຶ່ງເປັນບໍຣິສັດ ທີ່ມີຊື່ສຽງ ຈາກປະເທດແດນມາກ ທີ່ເຂົ້າມາເປີດໂຮງງານ ໃນລາວ ເມື່ອທ້າຍປີ 2013 ນັ້ນ ຕ້ອງການຄົນງານລາວ ເພີ່ມອີກເຖິງ 2,000 ຄົນ ຈາກທີ່ມີຢູ່ໃນປັດຈຸບັນ ທັງໝົດ 2,000 ຄົນ. ບໍຣິສັດຜລິດເຄື່ອງນຸ່ງຫົ່ມ ແລະເກີບ ທີ່ມີຄຸນພາບສູງນີ້ ກໍາລັງຊອກຫາທີ່ດິນ ເພື່ອຂຍາຍໂຮງງານໃໝ່ຕື່ມ, ອີງຕາມຄໍາເວົ້າ ຂອງເຈົ້າໜ້າທີ່ ບໍຣິສັດ ມັສຄອດ ອິນເຕີເນເຊິນເນລ (ລາວ) ໂຊນ ຈໍາກັດ ທ່ານນຶ່ງ ຕໍ່ວິທຍຸ ເອເຊັຽ ເສຣີ ໃນມື້ວັນທີ 30 ສິງຫານີ້.

ທ່ານເວົ້າວ່າ ທາງໂຮງງານ ບໍ່ໄດ້ຂາດເຂີນຄົນງານຫລາຍ ເຖິງຂນາດວ່າ ບໍ່ມີຄົນເຮັດວຽກ, ​ຍັງມີຄົນເຮັດວຽກພຽງພໍຢູ່, ແຕ່ຫາກຕ້ອງການຄົນງານເພີ່ມຂຶ້ນເທົ່ານັ້ນ ແລະທີ່ຜ່ານມາ ມີຄົນເຂົ້າມາສມັກ ຢູ່ຢ່າງຕໍ່ເນື່ອງ, ແຕ່ທາງບໍຣິສັດ ບໍ່ໄດ້ຮັບໝົດທຸກຄົນ, ເພາະຕາມຫລັກການແລ້ວ ທາງບໍຣິສັດ ຕ້ອງໄດ້ຄັດເລືອກກ່ອນ ຈຶ່ງຮັບເອົາ.

“ເປີດຮັບຢູ່ ແຕ່ວ່າມາລົງທະບຽນຢູ່ໜ້າປ້ອມຍາມໄວ້ເນາະ ເຮົາບໍ່ຂາດ ແຕ່ເຮົາຢາກໄດ້ເພີ່ມຊື່ໆເນາະ ເພິ່ນໃຫ້ລົງທະບຽນ ປະໄວ້ກ່ອນ ຖ້າວ່າໂຕນີ້ສອບຜ່ານແລ້ວ ເຮົາຈະບອກນໍາຫລັງເນາະ.”

ນອກຈາກໂຮງງານ ທີ່ວ່ານີ້ແລ້ວ ຍັງມີໂຮງງານອີຫຼາຍແຫ່ງ ທີ່ຕ້ອງການຄົນງານເພີ່ມ ຈຳນວນຫລາຍພັນຄົນ ດັ່ງເຈົ້າໜ້າທີ່ໂຮງງານຕັດຫຍິບ, ຜລິດເຄື່ອງນຸ່ງຫົ່ມແຫ່ງນຶ່ງ ຂອງນັກລົງທຶນຈີນ ຢູ່ເຂດເສຖກິຈພິ ເສດກວມລວມໄຊເສຖາ ນະຄອນຫລວງວຽງຈັນ ກໍເວົ້າວ່າ ໂຮງງານ ທີ່ຕົນເຮັດຢູ່ນໍານີ້ ຕ້ອງການຄົນງານລາວ ເພີ່ມຂຶ້ນອີກເຊັ່ນກັນ ຊຶ່ງປັດຈຸບັນ ມີຢູ່ແລ້ວ 1,000 ປາຍຄົນ, ແຕ່ກໍຍັງຕ້ອງການເພີ່ມອີກ 2,000 ຄົນ, ໄດ້ເງິນເດືອນຂັ້ນຕໍ່າ 1,500,000 ກີບຕໍ່ເດືອນ ແລະທັງມີສວັດດິການຕ່າງໆໃຫ້ນໍາດ້ວຍ, ແຕ່ບາງຄົນ ທີ່ເຮັດວຽກຢູ່ໃນໂຮງງານນີ້ ຍັງຢູ່ບໍ່ໄດ້ດົນ ຄືເຮັດໄດ້ພຽງ 1 ເດືອນ 2 ເດືອນ ກໍລາອອກ ຊຶ່ງບໍ່ຮູ້ສາເຫດທີ່ແທ້ຈິງວ່າ ເປັນຍ້ອນຫຍັງກັນແທ້.

“ຕ້ອງການ 2,000 ຄົນ ແຕ່ວ່າປັດຈຸບັນນີ້ໄດ້ແຕ່ 1,000 ປາຍ ແຕ່ກໍຍັງບໍ່ຮອດຕາມກໍານົດເທື່ອ ເຂົາມີສວັດດິການ ເງິນເດືອນພື້ນຖານກໍແມ່ນ 1,500,000 ບາງຄົນເຂົາກໍມາສມັກເຮັດ 1 ເດືອນ, 2 ເດືອນ ກໍອອກ ແຕ່ວ່າບໍ່ຮູ້ວ່າເປັນຍ້ອນຫຍັງ.”

ອີງຕາມຄໍາເວົ້າ ຂອງເຈົ້າໜ້າທີ່ໂຮງງານຕັດຫຍິບແຫ່ງນຶ່ງ ຢູ່ເຂດເສຖກິຈສວັນເຊໂນ ແຂວງສວັນນະເຂດ ຕໍ່ວິທຍຸເອເຊັຽ ເສຣີ ໃນມື້ວັນທີ 30 ສິງຫານີ້ ແລ້ວແມ່ນວ່າ ຍັງມີຫລາຍໂຮງງານ ຢູ່ໃນເຂດເສຖກິຈແຫ່ງນີ້ ຕ້ອງການຄົນງານ ໄປເຮັດວຽກນໍາ ຫລາຍພັນຄົນເຊັ່ນກັນ. ທ່ານເວົ້າວ່າ ໂຮງງານ ທີ່ຕົນເຮັດວຽກຢູ່ນີ້ ຕ້ອງການຄົນງານ ເຂົ້າມາເຮັດວຽກ ຈໍານວນ 1,000 ປາຍຄົນ ແລະ ຍັງມີອີກຫລາຍໂຮງງານ ທີ່ຍັງຕ້ອງການຄົນງານລາວ ຫລາຍພັນຄົນ ຊຶ່ງຕົນຄິດວ່າ ສາເຫດສ່ວນນຶ່ງ ທີ່ຄົນງານລາວ ບໍ່ຢາກເຮັດວຽກໃນໂຮງງານ ຢູ່ພາຍໃນປະເທດນັ້ນ ກໍຍ້ອນວ່າ ໄດ້ເງິນ ເດືອນໜ້ອຍ ເຮັດໃຫ້ພວກເຂົາເຈົ້າ ພາກັນຫລັ່ງໄຫລ ໄປເຮັດວຽກຢູ່ປະເທດໄທຍ ດັ່ງທີ່ລາວເວົ້າວ່າ.

“ໂຮງງານເຮົາເປັນໂຮງງານຕັດຫຍິບ ເປັນໂຮງງານເຮັດເສື້ອຜ້າເນາະ ຕ້ອງ ການຢູ່ປະມານ 1,000 ຄົນ ກໍຍັງມີໂຮງງານອື່ນອີກ ຍັງມີຫລາຍ ກໍຢາກໄດ້ຢູ່ ລວມໆແລ້ວ ເຂົາກໍຢາກໄດ້ຢູ່ປະມານ 1 ພັນຫາ 2 ພັນນີ້ແຫລະ ກໍຍັງຕອບສນອງບໍ່ພຽງພໍ ເງິນເດືອນຂັ້ນຕໍ່າບໍ່ສູງຫັ້ນນ່າ ເຂົາຈັ່ງໄປໄທຍ.”

ກ່ຽວກັບສາເຫດສໍາຄັນ ທີ່ເຮັດໃຫ້ຄົນງານລາວ ບໍ່ໄປສມັກເຮັດວຽກ ຢູ່ໂຮງງານ ຫລືເຮັດວຽກບໍ່ໄດ້ດົນກໍອອກນັ້ນ ປະຊາຊົນລາວຜູ້ນຶ່ງ ເວົ້າວ່າ ເປັນຍ້ອນໄດ້ເງິນເດືອນໜ້ອຍ, ມີຄ່າໃຊ້ຈ່າຍຫລາຍ, ເງິນເດືອນບໍ່ກຸ້ມກິນ ຍ້ອນໄລຍະນີ້ ເງິນກີບເຟີ້ແຮງ ແລະເງິນກີບອ່ອນຄ່າຫລາຍ, ເຄື່ອງຂອງທຸກຢ່າງແພງຂຶ້ນໝົດ.

“ບ້ານເຮົາບໍ່ໄດ້ຫລາຍ ມັນໄດ້ໜ້ອຍມັນໃຊ້ຫຍັງກໍບໍ່ພໍໃຊ້ນ່າ 1000 ບາດ ຄິດຄ່າເງິນບ້ານເຮົານີ້ 6 ແສນ ເພາະຊ່ວງນີ້ເງິນເຟີ້ແຮງ ຈ່າຍສູງຂຶ້ນມັນກະແພງຂຶ້ນຊີ້ນ່າ.”

ພ້ອມດຽວກັນນັ້ນ ຊາວລາວຜູ້ນຶ່ງ ກໍເວົ້າເຖິງເຣື່ອງໂຮງງານຫລາຍແຫ່ງ ທີ່ເປີດຮັບສມັກ ຄົນງານລາວຢູ່ນັ້ນວ່າ ຕົນເອງ ບໍ່ຄິດທີ່ຈະໄປສມັກເຮັດວຽກຢູ່ໂຮງງານແລ້ວ ຍ້ອນໄດ້ເງິນເດືອນໜ້ອຍ ບໍ່ກຸ້ມຄ່າໃຊ້ຈ່າຍ ໃນຂະນະທີ່ຄ່າຄອງຊີບ ກໍແພງຂຶ້ນຫລາຍ. ຕົນຢາກໄປເຮັດວຽກຢູ່ໄທຍ ຫລາຍກວ່າ ເຖິງແມ່ນວ່າ ປັດຈຸບັນ ຕົນເອງກໍມີວຽກເຮັດຢູ່ແລ້ວ ເປັນວຽກຂັບຣົຖຂົນສົ່ງ ໃຫ້ບໍຣິສັດແຫ່ງນຶ່ງ ໄດ້ເງິນເດືອນປະມານ 3 ລ້ານກີບ ແຕ່ກໍບໍ່ພໍຄ່າໃຊ້ຈ່າຍ, ແຕ່ລະເດືອນ ແມ່ນຕິດລົບ ແລະຈະລາອອກແລ້ວ ຈະຫາທາງໄປເຮັດວຽກຢູ່ໄທຍ.

“ສໍາລັບສ່ວນໂຕຂ້ອຍ ມັນຍັງບໍ່ພໍໃຊ້ດອກຄືດຽວນີ້ນິ ເງິນເດືອນຂ້ອຍ 3 ລ້ານແຕ່ຂ້ອຍຊິໄດ້ອອກແລ້ວ ເພາະວ່າມັນຍັງບໍ່ພໍການໃຊ້ຈ່າຍ ແລ້ວບາດນີ້ມາໄລ່ນໍ້າມັນຣົຖ ການກິນຢູ່ໄປຕລາດກໍບໍ່ໄດ້ແລ້ວ ເພາ ທຸກຢ່າງໃນຕລາດມັນແພງ ຊີ້ນກໍແສນປາຍ 3 ລ້ານນີ້ບໍ່ສາມາດມີເງິນເກັບ ຕິດລົດຊໍ້າ.”

ມາເຖິງປັດຈຸບັນ ຣັຖບານລາວ ກໍຍັງບໍ່ສາມາດແກ້ໄຂ ບັນຫາການຂາດເຂີນຄົນງານ ຢູ່ພາຍໃນປະເທດໄດ້ເທື່ອ ຈຶ່ງໄດ້ມີການນໍາເອົາຄົນງານຕ່າງປະເທດ ເຂົ້າມາເຮັດວຽກແທນເຖິງ 145,049 ຄົນ, ສ່ວນໃຫຍ່ເປັນຄົນຈີນ ແລະວຽດນາມ. ໃນຈໍານວນນັ້ນ ມີແມ່ຍິງພຽງ 2,303 ຄົນ, ແຕ່ຣັຖບານລາວ ມີແຜນ ທີ່ຈະປັບເງິນເດືອນຂັ້ນຕໍ່າຂຶ້ນຈາກ 1,300,000 ກີບ ເປັນ 1,600,000 ກີບ ໃນເດືອນຕຸລາ 2023 ນີ້.