ຊາວບ້ານ ຍັງສືບຕໍ່ ໄດ້ຮັບຜົນກະທົບ ບໍ່ເກືອກາລີ ຂອງນັກລົງທຶນຈີນ ຢູ່ແຂວງຄໍາມ່ວນ

ຊາວລາວ ຢູ່ເມືອງທ່າແຂກ ແລະ ເມືອງໜອງບົກ ແຂວງຄໍາມ່ວນ ຫຼາຍຄົນຍັງຄົງພົບການເຈັບເປັນຍ້ອນກິ່ນຂີວຈາກໂຮງງານຂຸດຄົ້ນບໍ່ເກືອກາລີ ຫຼື ໂປຕາສ ຂອງ ບໍລິສັດ ຊີໂນ ອາກຣີໂປຕາສຈໍາກັດຂອງຈີນ ທີ່ມີການເຄື່ອນໄຫວຕະຫຼອດ24 ຊົ່ວໂມງ ແລະ ຍັງປະສົບກັບຜົນກະທົບ ອື່ນໆ ອີກຫຼາຍແນວອັນເກີດຈາກການຂຸດຄົ້ນເກືອກາລີດັ່ງກ່າວ. ຕາມຄວາມເວົ້າຂອງຊາວບ້ານທີ່ຢູ່ໄກ້ບໍ່ເກືອກາລີ ເມືອງທ່າແຂກ ແຂວງຄຳມ່ວນກ່າວຕໍ່ວິທຍຸເອເຊັຽເສຣີໃນວັນທີ 06 ພະຈິກນີ້ວ່າ.

"ຄືໄຂ້ຫວັດຢາກມີຕະຫຼອດຢູ່ເພາະວ່າມົນລະພິດມັນຫຼາຍຢູ່ໂຮງງານນີ້ນ່າບາງທີເຮົາຢູ່ໃນບ້ານນີ້ບາງທີມັນກໍມີກິ່ນຂີ້ວເດ້ ມັນເປັນບາງມື້ຖ້າອາກາດ ຄຶ້ມໆ ຫຼາຍ ກໍຂີວກໍແສບຕາເພາະວ່າໂຮງງານມັນຢູ່ທາງເໜືອແຕ່ເຮົາພັດບ້ານມັນມາທາງນີ້ນ່າມັນພັດມາບາງຄົນກໍເມື່ອຍແບບສິຫັ້ນນາເຂົາເຈົ້າເຮັດວຽກຫຼາຍຄືລົງອຸໂມງລົງຫຍັງພັດບໍ່ມີອາກາດພຽງພໍຄັນເສຍຊີວິດແລ້ວເຂົາເຈົ້າບໍ່ໃຫ້ຮູ້ເລີຍຄັນວ່າເປັນຢູ່ໃນໂຮງງານຫັ້ນນາ"

ນອກຈາກນີ້ ລົດບັນທຸກທີ່ແລ່ນເຂົ້າອອກໃນໂຄງການຂຸດຄົ້ນເກືອກາລີກໍສືບຕໍ່ເຮັດໃຫ້ເສັ້ນທາງເປ່ເພ ແລະ ເປັນບັນຫາຊ້ຳເຮື້ອມາຫຼາຍປີທີ່ບໍ່ໄດ້ຮັບການແກ້ໄຂຢ່າງຈິງຈັງເທື່ອເຮັດໃຫ້ການເດີນທາງໄປມາຂອງຊາວບ້ານພົບກັບຄວາມຫຍຸ້ງຍາກຫຼາຍທັງບັນຫາຂີ້ຝຸ່ນໃນລະດູແລ້ງ ແລະ ຂີ້ຕົມໃນລະດູຝົນດັ່ງຊາວບ້ານທີ່ຢູ່ໃກ້ບໍ່ເກືອກາລີ ເມືອງໜອງບົກ ທ່ານກ່າວວ່າ.

"ບ່ອນລົດບ່ອນທ່ຽວທາງນີ້ມັນແກ່ໂຕນແກ່ຫຍັງມັນເປັນແອ່ງເປັນຫຍັງແບບວ່າກະທົບຫຼາຍຫັ້ນແຫຼະໄປນາທາງກໍເພ. ບາດນີ້ລົດເຂົາກໍເສຍໝົດແຫຼະເປັນຕົມເປັນຫຍັງລົດຈັກ ລົດໃຫຍ່ຜ່ານມາມານີ້ເຂົາກໍແປງຢູ່ຫັ້ນແຫຼະຄຸມຢູ່ຕະຫຼອດເວົ້າຢູ່ເລື້ອຍໆ ທາງເມືອງ ທາງແຂວງ ເພິ່ນກໍເວົ້າໃຫ້ແປງໃຫ້ເຮັດທາງຢາງລົດແກ່ໜັກແກ່ຫຍັງມັນບໍ່ຢູ່ທາງເພ ແຕ່ 2-3 ປີແລ້ວ ກໍຂໍຢູ່ເລື້ອຍໆ ນາສ່ວນຫຼາຍບັກຫົນທາງນີ້ແຫຼະ"

ວິຖີຊີວິດດັ້ງເດີມຂອງປະຊາຊົນ ບ້ານດົງບູນ ເມືອງໜອງບົກ ທີ່ເຄີຍເຮັດນາໃນແຕ່ກ່ອນກໍໄດ້ປ່ຽນມາເຮັດອາຊີບຮັບຈ້າງທົ່ວໄປພາຍຫຼັງພວກເຂົາເຈົ້າເສຍດິນນາຈຳນວນ 200-300 ເຮັກຕ້າຣ ໃຫ້ອຸດສາຫະກຳເກືອກາລີແບບໄດ້ຮັບຄ່າຊົດເຊີຍບໍ່ເປັນທຳ,ທາງໂຄງການຊົດເຊີຍຄ່າທີ່ດິນໃຫ້ແຕ່ຕາແມັດລະ 34,500 ກີບ, ໃນຂະນະທີ່ຊາວບ້ານຢາກໄດ້ຄ່າຊົດເຊີຍ 50 ພັນກີບ ເຖິງ 1ແສນກີບຕໍ່ຕາແມັດ. ດັ່ງຊາວບ້ານທີ່ຢູ່ໃກ້ກັບບໍ່ເກືອກາລີເຂດໜອງບົກຜູ້ດຽວກັນກັບຂ້າງເທີງກ່າວວ່າ. 

"ລາຄາມັນໜ້ອຍນີ້ນາມັນບໍ່ເໝາະສົມນີ້ນາເຂົາວ່າມື້ໃດນາສິສົ່ງຄືນ 40-50 ປີ 100 ປີ ປີໃດ, ຈຳໃຈຂາຍທາງລັດມາບີບເອົາເພິ່ນວາງລາຄາສຳນັ້ນເອີ້ນໄປຢູ່ຫັ້ນແຫຼະບໍ່ແມ່ນລາຄາສິຂັດໄດ້ບ້ານເຮົາມັນບໍ່ແມ່ນທຸລະກິດເປັນຄົນຊາວນາຫຼາຍບາງເຮືອນກໍໄດ້ລົດນຳແດ່ບາງເຮືອນກໍຊື້ດິນໄວ້ແໜ່ສຳລອງຜູ້ລະເລັກລະໜ້ອຍນາບາງຄົນກໍໝົດເງິນກໍໝົດແລ້ວນາກໍບໍ່ໄດ້ນາຫຼາຍຄອບຄົວຊາວນາເຂົາບໍ່ເຄີຍເຫັນເງິນຄົນກໍຈ່າຍຫຼາຍ"

ປັດຈຸບັນ ອຸດສາຫະກຳເກືອກາລີ ຢູ່ແຂວງຄຳມ່ວນ ຍັງຄົງເປີດຮັບສະໝັກງານຕຳແໜ່ງກຳມະກອນ ແລະ ຄົນຂັບລົດ ເພື່ອຂຸດຄົ້ນເກືອກາລີຈຳນວນຫຼາຍຕຳແໜ່ງ.ໃນຂະນະທີ່ມີການໃຊ້ວຽກຄົນງານລາວຢ່າງໜັກ ແລະ ສ່ຽງຕໍ່ອຸບັດຕິເຫດນຳດ້ວຍ. ດັ່ງພະນັກງານຈາກໂຮງງານອຸດສາຫະກຳຂຸດຄົ້ນບໍ່ເກືອກາລີທ່ານກ່າວວ່າ.

"ຖ້າວ່າອັນເປັນກຳມະກອນມັນຢູ່ລຸ່ມມັນຈະຮ້ອນວຽກມັນກໍຄືກຳມະກອນຄືລົງໄປເນາະບາງເທື່ອເຮົາກໍໄດ້ໂບ້ມບາດນີ້ເຮົາໄດ້ຕໍ່ຖົງລົງຫຼືວ່າເວລາລົດເຈາະຫຼືວ່າເຮົາຢູ່ນຳຫົວເຈາະ ເບິ່ງສາຍຟືນສາຍໄຟເພາະວ່າຫຼາຍຄົນກໍເຮັດວຽກຢູ່ຫັ້ນຄືດຽວແຕ່ວ່າມັນກໍຮ້ອນ”  

ເຖິງຢ່າງໃດກໍຕາມປະເທດຈີນຍັງຕ້ອງການເກືອກາລີຈາກລາວຈຳນວນຫຼາຍ ແລະ ຈະສົ່ງເສີມໃຫ້ລາວເປັນຜູ້ສະໜອງໃຫ້ຫຼາຍຂຶ້ນຍ້ອນລາວມີຄວາມອຸດົມສົມບູນຂອງເກືອກາລີ.

ອີງຕາມຄວາມເວົ້າຂອງທ່ານ ເຢົາປິ່ນ ປະທານສະພາການຄ້າຊາວຈີນຕ່າງດ້າວປະຈຳລາວລາຍງານຕໍ່ກອງປະຊຸມພັດທະນາຕ່ອງໂສ້ອຸດສາຫະກຳເກືອໂປຕາສ ວັນທີ 3 ພະຈິກ 2024 ຜ່ານມານີ້. ຫາກລາວສົ່ງເສີມການລົງທຶນແຮ່ທາດໂປຕາສຈະເຮັດໃຫ້ປະເທດລາວໄດ້ຮັບການພັດທະນາເສດຖະກິດ ແລະ ເສີມຂະຫຍາຍອິດທິພົນສາກົນຂອງລາວຜ່ານເສັ້ນທາງລົດໄຟລາວຈີນ ແລະ ລາວຈະກາຍເປັນສູນກາງຂອງຕະຫຼາດປຸ໋ຍໂປຕາສໃນອາຊີ ແລະ ໃຫຍ່ທີ່ສຸດເປັນອັນດັບ 3 ຂອງໂລກຖັດຈາກຣັດເຊຍ ແລະ ການາດາ.

ນອກນັ້ນ 9 ເດືອນ ຂອງປີ 2024 ລັດຖະບານລາວ ອະນຸຍາດກິດຈະການກ່ຽວກັບເກືອໂປຕາສ 18 ບໍລິສັດ ເພື່ອດຳເນີນການຊອກຄົ້ນສຳຫຼວດ ຂຸດຄົ້ນ ແລະ ປຸງແຕ່ງເກືອໂປຕາສ ໂດຍມີເນື້ອທີ່ທັງໝົດ 162,260 ເຮັກຕາ ກວມເອົາ 4 ແຂວງ ຄື ນະຄອນຫຼວງວຽງຈັນ, ແຂວງວຽງຈັນ, ແຂວງຄຳມ່ວນ ແລະ ແຂວງສະຫວັນນະເຂດ ເຊິ່ງມາຮອດເດືອນກັນຍາ 2024ສາມາດຜະລິດແລະຈຳໜ່າຍຜະລິດຕະພັນເກືອໂປຕາສ ຄຸນນະພາບ 95% ຈຳນວນ 12.22 ລ້ານໂຕນ ມູນຄ່າ 2.95 ຕື້ໂດລາ ສະຫະລັດ.