ຊາວບ້ານເມືອງທຸລະຄົມ ສັບສົນການຄິດໄລ່ຄ່າໄຟຟ້າ

ຊາວບ້ານ ແລະ ຜູ້ປະກອບການທຸລະກິດຫຼາຍພາກສ່ວນຢູ່ເມືອງທຸລະຄົມ ແຂວງວຽງຈັນພາກັນສັບສົນ ແລະ ໄດ້ໂພສບິນຄ່າໄຟຟ້າລົງສື່ສັງຄົມອ໋ອນລາຍໃນວັນທີ 14 ເດືອນສິງຫາ ຜ່ານມາພາຍຫຼັງເຫັນຄ່າໄຟຟ້າແພງເກີນຈິງ. ດັ່ງນັ້ນລັດວິສາຫະກິດໄຟຟ້າລາວສາຂາແຂວງວຽງຈັນຈຶ່ງໄດ້ອອກແຈ້ງການດ່ວນໃຫ້ຢຸດຈ່າຍຄ່າໄຟຟ້າຢູ່ພາຍໃນເມືອງທຸລະຄົມເມື່ອວັນທີ 14 ສິງຫາຍ້ອນການຄິດໄລ່ຄ່າໄຟຟ້າປະຈຳເດືອນສິງຫາໄດ້ເກີດຂໍ້ຜິດພາດແລະຊາວບ້ານຈຶ່ງພາກັນຢຸດການສຳລະຄ່າໄຟຟ້າຊົ່ວຄາວຜ່ານທາງແອ໋ບທະນາຄານ. ດັ່ງຊາວບ້ານນາງກໍ່ຕໍ່ວິທຍຸເອເຊັຽເສຣີໃນວັນທີ 15 ສິງຫາ ນີ້ວ່າ.

“ ຍັງເທື່ອເພິ່ນໃຫ້ໂຈະກ່ອນສະເພາະເດືອນສິງຫານີ້ນ່າເພິ່ນກາວ່າມີບັນຫາກາຍັງບໍ່ຮູ້ລະອຽດເທື່ອເນາະຜ່ານມາການບໍ່ຜິດເນາະສະເພາະມີບັນຫາແຕ່ພາຍໃນເດືອນສິງຫາ”

 ຊາວບ້ານຢູ່ເມືອງທຸລະຄົມອີກທ່ານກ່າວວ່ານອກຈາກຊາວບ້ານໄດ້ຢຸດຈ່າຍຄ່າໄຟຟ້າຜ່ານທາງແອ໋ບທະນາຄານແລ້ວກໍ່ຍັງຢຸດຈ່າຍຄ່າໄຟຟ້າແບບໃຊ້ເງິນສົດນໍາດ້ວຍເນື່ອງຈາກຢ້ານວ່າລະບົບການຄິດໄລ່ຄ່າໄຟຟ້າອາດຄິດໄລ່ຜິດພາດໝົດທັງເມືອງ. ດັ່ງນັ້ນຈຶ່ງຕ້ອງລໍຖ້າໃຫ້ມີການແກ້ໄຂ ແລະ ອອກບິນຄ່າໄຟຟ້າທີ່ຖືກຕ້ອງອີກເທື່ອໜຶ່ງກ່ອນເພື່ອຄວາມຖືກຕ້ອງແລະບໍ່ໃຫ້ຖືກເອົາປຽບ. ດັ່ງທ່ານກ່າວວ່າ.

“ເຂົາເຈົ້າອາດຈະມີການຜິດພາດໃນການຕິດໄລ່ໜ້ອຍໜຶ່ງໂຈະຈ່າຍອ໋ອນລາຍແລ້ວກໍ່ທັງໂຕຈິງນໍາກາບໍ່ຕ້ອງຈ່າຍດຽວເພິ່ນຈະໄລ່ໃຫ້ໃໝ່ອັນນີ້ກາຫາເປັນຄັ້ງທຳອິດທີ່ວ່າເພິ່ນໄລ່ຜິດແລ້ວເພິ່ນກາແຈ້ງການອອກມາລະບົບໃນການຄິດໄລ່ໄຟຟ້າແບບອີເລັກໂທຣນິກຂອງເພິ່ນຫັ້ນມີບັນຫາ”

 ສ່ວນຜູ້ປະກອບການທຸລະກິດຢູ່ເມືອງທຸລະຄົມກ່າວວ່າກ່ອນໜ້ານີ້ນາງເອັງກໍ່ເຫັນຊາວບ້ານຈຳນວນໜຶ່ງໄດ້ນໍາຂໍ້ມູນຄ່າໄຟຟ້າທີ່ຄິດໄລ່ແບບຜິດພາດມາເຜີຍແຜ່ຜ່ານສື່ສັງຄົມອ໋ອນລາຍເຊີ່ງມີທັງຄ່າໄຟຟ້າລະດັບຫຼັກ 10 ລ້ານກີບໄປຈົນເຖີງ 100 ລ້ານກີບຈຶ່ງເຮັດໃຫ້ຫຼາຍຄົນຢ້ານວ່າຄ່າໄຟຟ້າອາດຄິດໄລ່ຜິດ. ແຕ່ສຳລັບສຳລັບນາງເອັງກໍ່ຍັງບໍ່ທັນກວດກາຄ່າໄຟຟ້າຂອງເດືອນນີ້ເທື່ອ. ດັ່ງນາງກ່າວວ່າ.

“ ແມ່ນແຫຼະເຫັນຢູ່ແຕ່ວ່າຂອງໂຕເອັງກາບໍ່ໄດ້ເຂົ້າເບິ່ງເຫັນແຕ່ວ່າຄ່າໄຟມັນຂື້ນຫຼາຍ ໆ ຫັ້ນນ່າເພິ່ນຍັງບໍ່ທັນອອກບິນໃຫ້ເທື່ອເດືອນນີ້ນ່າກາບໍ່ກາບໍ່ເຄີຍໄລ່ຜິດກໍ່”

  ທາງດ້ານເຈົ້າໜ້າທີ່ສູນບໍລິການໄຟຟ້າຢູ່ເມືອງທຸລະຄົມໄດ້ຊີ້ແຈງວ່າສາເຫດທີ່ຕ້ອງໄດ້ໂຈະການຈ່າຍຄ່າໄຟຟ້າແມ່ນເກີດຈາກລະບົບຄິດໄລ່ຄ່າໄຟຟ້າມີບັນຫາແທ້ແຕ່ທາງພາກສ່ວນທີ່ກ່ຽວຂ້ອງກໍ່ເລັ່ງແກ້ໄຂຢູ່ເພື່ອໃຫ້ມີຄວາມຖືກຕ້ອງແລະບໍ່ໃຫ້ເກີດຫາງສຽງຕຳນິວິຈານຈາກສັງຄົມຕື່ມອີກເຊີ່ງຄາດວ່າຈະສາມາດແກ້ໄຂແລະອອກບິນຄ່າໄຟຟ້າໃນອີກບໍ່ດົນນີ້. ດັ່ງນາງກ່າວວ່າ.

“ ເພິ່ງຍັງພວມຄິດໄລ່ບິນໃໝ່ເດີ້ເພາະວ່າລະບົບມີບັນຫາແກ້ໄຂຢູ່ແຕ່ວ່າກາຊິໄວ ໆ ນີ້ແລ້ວແຫຼະການຄິດໄລ່ບິນຫັ້ນນ່າເປັນຄວາມຜິດພາດແຕ່ວ່າເພິ່ນພວມແກ້ໄຂຢູ່ຖ້າບິນມາພຸ້ນແຫຼະຄ່ອຍຈ່າຍກາໄດ້”

 ເຈົ້າໜ້າທີ່ລັດວິສາຫະກິດໄຟຟ້າລາວແຂວງວຽງຈັນກ່າວຢືນຢັນວ່າເມືອງທີ່ມີບັນຫາກ່ຽວກັບການຄິດໄລ່ຄ່່າໄຟຟ້າຜິດພາດແມ່ນມີແຕ່ສະເພາະເມືອງທຸລະຄົມເທົ່ານັ້ນເຊີ່ງກຳລັງເລັ່ງແກ້ໄຂບັນຫາຢູ່ສ່ວນການຄິດໄລ່ຢູ່ເມືອງອື່ນ ໆ ບໍ່ໄດ້ມີບັນຫາແລະຄ່າໄຟຟ້າກໍ່ເປັນໄປຕາມມາດຕະຖານຖືກຕ້ອງ. ດັ່ງທ່ານກ່າວວ່າ.

“ ຢູ່ໂຈະແຕ່ທຸລະຄົມເຈົ້າໂພນໂຮງປົກກະຕິໂອຈາກລະບົບໜ້ອຍໜຶ່ງເດີ້ຜິດພາດຈາກລະບົບເນາະບໍ່ໄດ້ຈົດຜິດພາດເດີ້ມີແຕ່ລະບົບ VS ເຂົາມີບັນຫາເນາະດຽວນີ້ເພິ່ນກຳລັງແກ້ໄຂ”

 ກ່ອນໜ້ານີ້ກໍ່ເຄີຍມີເຫດການຊາວບ້ານຈົ່ມກ່ຽວກັບຄ່າບິນໄຟຟ້າທີ່ແພງເກີນຈິງຢູ່ຫຼາຍເຂດແລະເມື່ອໄດ້ມີການສືບສວນກໍ່ພົບວ່າເປັນຍ້ອນພະນັກງານໄຟຟ້າບາງຄົນທີ່ຈົດຕົວເລກການໃຊ້ໄຟຟ້າຜິດພາດເປັນຕົ້ນເມື່ອເດືອນມິຖຸນາປີ 2021 ມີຊາວບ້ານຈຳນວນໜຶ່ງຢູ່ເມືອງນາຊາຍທອງ ນະຄອນຫຼວງວຽງຈັນໄດ້ມີການຮ້ອງຮຽນກ່ຽວກັບຄ່າບິນໄຟຟ້າທີ່ມີລາຄາແພງເກີນຈິງ. ຫຼັງຈາກນັ້ນລັດວິສາຫະກິດໄຟຟ້າລາວກໍ່ໄດ້ມີການຖະແຫຼງຂ່າວຊີ້ແຈງຕໍ່ບັນຫາດັ່ງກ່າວພ້ອມທັງຍອມຮັບວ່າເກີດຈາກພະນັກງານໄຟຟ້າບາງຄົນໄດ້ຈົດຕົວເລກນໍາໃຊ້ໄຟຟ້າຂອງລູກຄ້າໃສ່ໃນບິນຜິດພາດແລະກໍ່ໄດ້ມີການປະຕິບັດວິໄນຕໍ່ພະນັກງານທີ່ເຮັດຜິດແລ້ວ.

 ກ່ຽວກັບບັນຫາດັ່ງກ່າວນີ້ຊາວບ້ານຫຼາຍຄົນກໍ່ເຄີຍຮຽກຮ້ອງໃຫ້ພາກລັດຖະບານມີການປະຕິຮູບການປະຕິບັດໜ້າທີ່ຂອງເຈົ້າໜ້າທີ່ແລະພະນັກງານລັດວິສາຫະກິດໄຟຟ້າລາວເພື່ອໃຫ້ເປັນມາດຕະຖານດຽວກັນທົ່ວປະເທດເປັນຕົ້ນເລື່ອງຄ່າໄຟຟ້າ, ຊ່ອງທາງໃນການສຳລະຄ່າໄຟຟ້າລວມທັງແກ້ບັນຫາໄຟຟ້າຕົກ-ໄຟຟ້າດັບ.