ຣົຖຂົນສົ່ງສິນຄ້າ ຈອດຕິດຄ້າງ ຈາກນາໝໍ້-ບໍ່ເຕັນ

ບັນຫາຣົຖບັນທຸກ ຈອດຕິດຄ້າງຢູ່ດ່ານຊາຍແດນລາວ-ຈີນ ແຂວງຫຼວງນໍ້າທາ ດ່ານສາກົລບໍ່ເຕັນ-ບໍ່ຫານ ຍັງແກ່ຍາວ ແລະມີສະພາບໜັກຂຶ້ນເລື້ອຍໆ ຍ້ອນດ່ານສາກົລບໍ່ຫານຝັ່ງຈີນ ຍັງຈໍາກັດການເຂົ້າ-ອອກຂອງຣົຖຈາກລາວໄປຈີນໃນແຕ່ລະມື້ ເຮັດໃຫ້ເກີດບັນຫາຣົຖບັນທຸກຫຼາຍຄັນ ຈອດລຽນແຖວຕິດຕໍ່ກັນຢ່າງຍາວຢຽດ ຕັ້ງແຕ່ເມືອງນາໝໍ້ ແຂວງອຸດົມໄຊ ຈົນຮອດເຂດບ້ານນາເຕີຍ ແລະເຂດບໍ່ເຕັນ ແຂວງຫຼວງນໍ້າທາ ແລະກໍສົ່ງຜົນໃຫ້ຊາວບ້ານໃນທ້ອງຖິ່ນ ເດີນທາງໄປ-ມາຫຍຸ້ງຍາກນໍາດ້ວຍ, ດັ່ງຊາວບ້ານ ຢູ່ບ້ານນາເຕີຍ ທ່ານນຶ່ງ ກ່າວຕໍ່ວິທຍຸເອເຊັຽເສຣີ ໃນວັນທີ່ 29 ທັນວາ ນີ້ວ່າ:

“ເກືອບຮອດເດືອນແລ້ວກາ ຕິດບໍ່ຊ່າງໄປບໍ່ຊ່າງມາແຫຼະ ຕິດແທ້ຕິດວ່າແຫຼະ ກາຍນາເຕີຍແລ້ວດຽວນີ້ ຮອດນາໝໍ້ພຸ້ນແລ້ວ ເຮົາເອົາຣົຖຈັກໄປກະຍັງຍາກ ມີມື້ນຶ່ງຄົນກໍໄປຕາຍ ໄປຕາຍຄາຫົນທາງກໍມີ ເອີ່ເກືອບເປັນມື້ ບາງເທື່ອກໍໄດ້ນອນຄືນແຫຼະ.”

ໃນຂະນະດຽວກັນ ຊາວບ້ານຢູ່ບ້ານນາເຕີຍ ອີກທ່ານນຶ່ງກ່າວວ່າ ອີກສາເຫດນຶ່ງ ທີ່ເຮັດໃຫ້ຣົຖບັນທຸກແຫ່ງຕິດຫຼາຍກໍຍ້ອນວ່າ ຖນົນໄປຫາດ່ານສາກົລບໍ່ເຕັນ ຍັງເປັນຖນົນທີ່ຄັບແຄບ ແລະຜູ້ຂັບຂີ່ຣົຖບັນທຸກຫຼາຍຄົນ ກໍຂັບຂີ່ຣົຖແບບບໍ່ມີຣະບຽບວິນັຍ ຫຼາຍຄົນມັກກໍສວຍໂອກາດ ຂັບແຊງກັນເພື່ອຈະຮອດກ່ອນ ພັດແຫ່ງເຮັດໃຫ້ສະພາບການສັນຈອນ ແຫ່ງຫຍຸ້ງຍາກຫຼາຍຂຶ້ນ, ດັ່ງທ່ານກ່າວວ່າ:

“ຍ້ອນຖນົນຂອງເຮົານີ້ມັນນ້ອຍແດ່ ແລ້ວກໍຜູ້ຂັບຂີ່ຫັ້ນບໍ່ມີຣະບຽບໃນການຂັບຂີ່ເນາະ ເຫັນທາງໜ້າມັນຫວ່າງ ແລ້ວຢາກແຊງຂຶ້ນເມືອ ຄິດວ່າໂຕຊິໄປກ່ອນຫັ້ນນ່າ ອີກຄົນນຶ່ງມາມັນກະຄາຢູ່ຫັ້ນແຫຼະ ບັນທຸກສິນຄ້າ ຈອດລຽນເບື້ອງຂວາມືເປັນແຖວເນາະ.”

ທ່່ານກ່າວຕື່ມວ່າ ເຖິງແມ່ນວ່າໃນແຕ່ລະມື້ ເຈົ້າໜ້າທີ່ທີ່ກ່ຽວຂ້ອງ ໄດ້ລົງພື້ນທີ່ມາແກ້ໄຂບັນຫາຣົຖຕິດ ພ້ອມທັງພຍາຍາມຣະບາຍຊ່ອງທາງການສັນຈອນ ພໍໃຫ້ຣົຖບັນທຸກ ສາມາດເຄື່ອນໄປ-ມາໄດ້ຢູ່ກໍຕາມ ແຕ່ກໍບໍ່ໄດ້ເຮັດວຽກຕລອດ 24 ຊົ່ວໂມງ ພໍຮອດເວລາເລີກການ ຫຼືຕອນກາງຄືນ ເຈົ້າໜ້າທີ່ກໍພາກັນເມືອບ້ານ ຈຶ່ງເຮັດໃຫ້ຍັງບໍ່ສາມາດແກ້ໄຂບັນຫາດັ່ງກ່າວນີ້ໄດ້ຫຼາຍປານໃດ.

ສ່ວນຊາວບ້ານ ຢູ່ບ້ານບໍ່ເຕັນ ກໍປະສົບບັນຫາຫຍຸ້ງຍາກໃນການເດີນທາງ ທັງອອກໄປຊື້ເຄື່ອງຢູ່ຕລາດ ຫຼືໄປໂຮງໝໍ ຊຶ່ງສະພາບຣົຖຕິດດັ່ງກ່າວນີ້ ກໍໄດ້ກິນເວລາມາດົນເຕີບແລ້ວ ແລະກໍບໍ່ຮູ້ວ່າຈະແກ່ຍາວໄປຮອດມື້ໃດ ຈຶ່ງຈະສາມາດແກ້ໄຂໄດ້, ດັ່ງຊາວບ້ານ ບ້ານບໍ່ເຕັນ ນາງນຶ່ງ ກ່າວວ່າ:

“ຕິດໜັກເລີຍແຫຼະ ມັນກະໄປຍາກ ຣົຖຕິດ ຣົຖບັນທຸກມັນຕິດຫຼາຍ ບໍ່ເຕັນນີ້ກະຮອດແລ້ວ ຮອດເດືອນປາຍແລ້ວ ແຕ່ວ່າເຂດນາເຕີຍນີ້ ກະປະມານເຄິ່ງເດືອນນີ້ແຫຼະ ເດີນທາງລໍາບາກແລ້ວທຸກວັນນີ້ນ່າ.”

ກ່ຽວກັບບັນຫາດັ່ງກ່າວນີ້ ຜແນກໂຍທາທິການແລະຂົນສົ່ງ ແຂວງຫຼວງນໍ້າທາ ກໍພຍາຍາມແກ້ໄຂສະພາບຣົຖຕິດຢູ່ທຸກມື້ ແຕ່ຍັງບໍ່ສາມາດຣະບຸໄດ້ເທື່ອວ່າ ຈະໃຊ້ເວລາແກ້ໄຂດົນປານໃດ ຊຶ່ງສາເຫດຫຼັກທີ່ເຮັດໃຫ້ເກີດບັນຫາຣົຖບັນທຸກ ຈອດຕິດຄາກັນຫຼາຍ ກໍຍ້ອນດ່ານສາກົລຝັ່ງຈີນ ຍັງມີການຈໍາກັດຈໍານວນຣົຖບັນທຸກຈາກລາວ ທີ່ຈະເຂົ້າໄປຈີນ ຕາມມາຕການປ້ອງກັນເຊື້ອໂຄວິດ-19 ຈຶ່ງເຮັດໃຫ້ຣົຖບັນທຸກ ຕ້ອງຈອດຕິດຕໍ່ກັນເປັນແຖວຍາວຫຼາຍກິໂລແມັດ, ດັ່ງເຈົ້າໜ້າທີ່ ຜແນກໂຍທາທິການແລະຂົນສົ່ງ ແຂວງຫຼວງນໍ້າທາ ກ່າວວ່າ:

“ມີອ້າຍນ້ອງເຂົາແຕ່ລະພາກສ່ວນຫັ້ນ ໄປປະຈໍາຢູ່ຫັ້ນ ແກ້ໄຂກໍພໍເຄື່ອນຍ້າຍໄປເຄື່ອນຍ້າຍມາໄດ້ຢູ່ ເຂົາໃຫ້ຣົຖເຂົ້າໄປ ມີຈໍານວນຈໍາກັດ ບາດນີ້ຣົຖທີ່ວ່າມາຫັ້ນ ມັນມີຈໍານວນຫຼາຍເນາະ ມັນກະຕົກຄ້າງສະສົມຂຶ້ນ ແຕ່ລະມື້ໆ ມັນບໍ່ມີໝ້ອງຈອດຢູ່ສາງຄ່ຽນຖ່າຍຫັ້ນນ່າ ກະເລີຍໄດ້ຈອດຕາມເສັ້ນທາງຍາວ.”

ສ່ວນຜູ້ປະກອບການຣົຖບັນທຸກທີ່ຍັງຕິດຄາ ຢູ່ຕາມເສັ້ນທາງດັ່ງກ່າວ ຫຼາຍຄົນກໍໄດ້ຮັບຜົລກະທົບຫຼາຍຂຶ້ນ ແລະກໍເຊື່ອວ່າບັນຫານີ້ຈະໝົດໄປກໍຕໍ່ເມື່ອດ່ານສາກົລຝັ່ງຈີນ ປ່ອຍໃຫ້ຣົຖບັນທຸກຈາກຝັ່ງລາວ ເຂົ້າໄປຈີນຫຼາຍຕາມປົກກະຕິ ແຕ່ກໍຍັງບໍ່ຮູ້ວ່າຈະເກີດຂຶ້ນມື້ໃດ, ດັ່ງເຈົ້າຂອງຣົຖບັນທຸກ ທ່ານນຶ່ງ ກ່າວວ່າ:

“ຄາໄດ້ 2 ມື້ເນາະ ອັນນີ້ກະບໍ່ແນ່ນອນເທື່ອ ເພາະວ່າຂະເຈົ້າຍັງບໍ່ເຄັຍໃຫ້ໂຕນີ້ ມັນຫຼາຍບໍຣິສັດ ມັນຣົຖເຂົ້າດ່ານນ່າ ຮັບເຂົ້າດ່ານບໍ່ທັນ ແລ້ວມັນໄດ້ຈອດໆຕໍ່ໆ ກັນມາ.”

ໃນຂະນະທີ່ ຜູ້ປະກອບການຂົນສົ່ງສິນຄ້າແຫ່ງນຶ່ງ ຢູ່ແຂວງຫຼວງນໍ້າທາ ທີ່ມັກຂົນສົ່ງສິນຄ້າຜ່ານທາງເມືອງນາໝໍ້ ແຂວງອຸດົມໄຊ ເພື່ອໄປຍັງແຂວງອື່ນໆ ກໍໄດ້ຮັບຜົລກະທົບ ຈາກສະພາບຣົຖຕິດນີ້ເຊັ່ນກັນ ຍ້ອນເຮັດໃຫ້ລູກຄ້າໃຊ້ບໍຣິການໜ້ອຍລົງ ເນື່ອງຈາກຫຼາຍຄົນຢ້ານສິນຄ້າປະເພດອາຫານຈະເໜົ່າເປື່ອຍ ແລະເສັຍຖິ້ມໄປລ້າໆ ໃນໄລຍະທີ່ການຂົນສົ່ງສິນຄ້າມີຄວາມຫຍຸ້ງຍາກ ແລະຫຼ້າຊ້າ, ດັ່ງພະນັກງານ ບໍຣິສັດຂົນສົ່ງສິນຄ້ານາງນຶ່ງ ກ່າວວ່າ:

“ກະຫຼຸດລົງຫຼາຍເຕີບເພາະວ່າບໍຣິສັດເຮົາ ຮັບປະເພດອາຫານການກິນເນາະ ແລ້ວກໍແບບເສັ້ນທາງມັນຕິດຂັດ ແຕ່ນາເຕີຍຮອດນາໝໍ້ພຸ້ນນ່າ ເສັ້ນທາງມັນຕິດຍາວເລີຍ ຖ້າໄປທາງພຸ້ນແມ່ນໄປທາງນາໝໍ້ເອົາ.”

ກ່ອນໜ້ານີ້ ຄືໃນມື້ວັນທີ່ 26 ທັນວາ ທີ່ຜ່ານມາ ທ່ານຄໍາແພງ ໄຊສົມແພງ ຣັຖມົນຕຣີກະຊວງອຸດສາຫະກັມແລະການຄ້າ ໄດ້ລົງພື້ນທີ່ຕິດຕາມສະພາບດັ່ງກ່າວ ຢູ່ດ່ານສາກົລບໍ່ເຕັນ ພ້ອມທັງສເນີໃຫ້ພາກສ່ວນທີ່ກ່ຽວຂ້ອງ ເລັ່ງແກ້ໄຂບັນຫາດັ່ງກ່າວ ເນື່ອງຈາກໃນໄລຍະນີ້ ແມ່ນຢູ່ໃນໄລຍະການເກັບກ່ຽວສິນຄ້າການກະເສດ ເພື່ອສົ່ງອອກໄປປະເທດຈີນຫຼາຍຣາຍການ ຈຶ່ງຢ້ານສິນຄ້າດັ່ງກ່າວຈະເໜົ່າເສັຍຖິ້ມ.

ປັດຈຸບັນ ຣົຖບັນທຸກທີ່ແລ່ນຜ່ານດ່ານສາກົລບໍ່ເຕັນເຂົ້າໄປຈີນ ມີພຽງແຕ່ 150 ຄັນຕໍ່ມື້ ແລະຣົຖເປົ່າອອກມາ ແມ່ນ 50 ຄັນຕໍ່ມື້ ໃນຂະນະທີ່ ຣົຖບັນທຸກສິນຄ້າທີ່ລໍຖ້າຜ່ານເຂົ້າໄປຈີນ ມີປະມານ 350 ຄັນຕໍ່ມື້ ແລະນັບມື້ກໍເພີ່ມຈໍານວນສະສົມຂຶ້ນເລື້ອຍໆ ແລະໂຊເຟີ້ຊຸດຂາວເບື້ອງຈີນ ທີ່ເຮັດວຽກສີດພົ່ນຢາຂ້າເຊື້ອໂຄວິດ-19 ກໍມີພຽງແຕ່ 80 ຄົນ ແລະກໍໃຊ້ເວລາສີດພົ່ນຢາຂ້າເຊື້ອ 15 ຫາ 20 ນາທີ ຕໍ່ຄັ້ງຕໍ່ຄົນ ແລະຕ້ອງສີດຢາຂ້າເຊື້ອ 3 ຄັ້ງຕໍ່ຄົນ ຈຶ່ງຈະປ່ອຍໃຫ້ເຂົ້າໄປຈີນໄດ້ ໂດຍໃນແຕ່ລະມື້ ດ່ານສາກົລບໍ່ຫານກໍເປີດພຽງແຕ່ເວລາ 8 ໂມງ ຫາ 16 ໂມງເທົ່ານັ້ນ, ອີງຕາມການຣາຍງານຂອງໜັງສືພິມປະຊາຊົນ ເສຖກິຈ-ສັງຄົມ.

ຫຼ້າສຸດ ໃນວັນທີ 29 ທັນວາ 2021 ນີ້ ຜແນກໂຍທາທິການ ແລະຂົນສົ່ງ ແຂວງອຸດົມໄຊ ອອກແຈ້ງການ ເລຂທີ 107/ຍທຂ.ອຊ ຣະບຸວ່າ: ໂຈະຣົຖຂົນສົ່ງສິນຄ້າທີ່ຈະເດີນທາງໄປຊາຍແດນບໍ່ເຕັນ ແຂວງຫຼວງນໍ້າທາ ແລະແຂວງບໍ່ແກ້ວ ຊົ່ວຄາວ ຈົນກວ່າຈະສາມາດຣະບາຍລົດຕິດຂັດໄດ້.

ເນື່ອງຈາກສະພາບການສັນຈອນຕາມເສັ້ນທາງເລຂທີ 13 ເໜືອ ຣົຖຕິດຂັດ ບໍ່ສາມາດສັນຈອນໄປ-ມາໄດ້ ຍ້ອນວ່າຣົຖຂົນສົ່ງສິນຄ້າ ຕິດເລີ່ມແຕ່ບ້ານປາງທອງ ເມືອງນາໝໍ້ ຈົນຮອດຊາຍແດນບໍ່ເຕັນ ອີງຕາມການຣາຍງານ ຂອງໜັງສືພິມລາວພັທນາ ໃນວັນທີ່ 29 ທັນວາ 2021.