ໄດ້ງົປມານຖນົນຍັງບໍ່ແລ້ວ

ໃນ ສົກ ງົບປະມານ ປີ 2014-15 ກະຊວງ ໂຍທາ ທິການ ແລະ ຂົນສົ່ງ ຂອງ ລາວ ໄດ້ ອະນຸມັດ ເງິນ ເກືອບ 800 ລ້ານ ກີບ ເພື່ອ ໃຊ້ເຂົ້າ ໃນ ວຽກງານ ສ້ອມແປງ ເສັ້ນທາງ ໃນ ນະຄອນ ຫລວງ ວຽງຈັນ. ໃນ ວັນທີ 24 ເມສາ 2015 ຍັງໄດ້ ອະນຸມັດ ງົປມານ ໃຫ້ ອີກ ເກືອບ 6 ຕື້ກີບ ເພື່ອ ສ້ອມແປງ ເສັ້ນທາງ ຢູ່ ນະຄອນ ຫຼວງວຽງຈັນ ຊຶ່ງຖືວ່າ ເປັນການ ໃຊ້ ງົປມານ ທີ່ ເກີນຄວາມ ຕ້ອງການ.

ແຕ່່ ທາງການ ປົກຄອງ ນະຄອນ ຫລວງ ເຫັນວ່າ ງົບປະມານ ທີ່ ໃຫ້ມາ ນັ້ນ ບໍ່ພຽງພໍ ກັບ ວຽກງານ ຕົວຈິງ. ຕາມ ຣາຍງານ ຂອງ ເຈົ້າໜ້າທີ່ ໂຍທາ ທິການ ແລະ ຂົນສົ່ງ ທີ່ ຂໍສງວນ ຊື່. ດັ່ງນັ້ນ ທາງ ຜແນກ ໂຍທາ ທິການ ແລະ ຂົນສົ່ງ ນະຄອນ ຫລວງ ວຽງຈັນ ຈຶ່ງ ໄດ້ສເນີ ຂໍ ງົບປະມານ ເພິ່ມອີກ ປະມານ 6 ຕື້ ກີບ ໂດຍໃຫ້ ເຫດຜົນ ວ່າ ໄດ້ອີງໃສ່ ການ ສໍາຣວດ ສະພາບ ຂອງ ເສັ້ນທາງ ໃນ ປັດຈຸບັນ. ຖ້າບໍ່ໄດ້ ສ້ອມແປງ ກ່ອນ ຣະດູ ຝົນ ນີ້ ເສັ້ນທາງ ຈະເປ່ເພ ຫລາຍ ກວ່າເກົ່າ ຈະໄດ້ ໃຊ້ ງົບປະມານ ຫລາຍ ຂຶ້ນ ແລະ ການ ສັນຈອນ ກໍຈະ ຫຍຸ້ງ ຍາກ ລໍາບາກ.

ເງິນທຶນ ທີ່ ອະນຸມັດ ໃຫ້ ໃນ ວັນທີ 24 ເມສາ 2015 ນີ້ ເປັນ ງົບປະມານ ຮີບດ່ວນ ເພື່ອ ໃຫ້ ທັນ ສ້ອມແປງ ຖນົນ ຫົນທາງ ກ່ອນ ຣະດູຝົນ ຈະມາເຖິງ ຂນະທີ່ ບໍຣິສັດ ກໍ່ສ້າງ ທາງ ຈໍານວນ ນຶ່ງ ເວົ້າວ່າ ໄດ້ ຮັບເໝົາ ສ້ອມແປງ ເສັ້ນທາງ ບາງສາຍ ແລ້ວ ແຕ່ຍັງ ບໍ່ ທັນໄດ້ ຮັບເງິນ ຈາກ ທາງການ ນະຄອນ ຫລວງ ເທື່ອ.

ເສັ້ນທາງ ໃນ ນະຄອນ ຫລວງ ທີ່ ຈະມີການ ສ້ອມແປງ ດ່ວນນັ້ນ ມີ 12 ສາຍ ຮວມທັງ ຖນົນ ສີທອງ ແຕ່ ສີ່ແຍກ ໄຟແດງ ໜອງດ້ວງ ໄປຫາ ສາມແຍກ ໜອງແຕ່ງ ແລະ ເສັ້ນທາງ ຊ່ວງ 1, ແຕ່ ສີ່ແຍກ ໄຟແດງ ທາດຫລວງ ໄປຫາ ໂພນທັນ ແລະ ໜອງໄຮ.