ປະຊາຊົນຢູ່ຫຼາຍເມືອງ ຂອງແຂວງຜົ້ງສາລີ ເກືອບໜຶ່ງສ່ວນສາມ ບໍ່ມີໄຟຟ້າໃຊ້

ຄອບຄົວປະຊາຊົນລາວ ທີ່ຢູ່ຕາມເຂດຊົນນະບົດ ໃນຫຼາຍເມືອງຂອງແຂວງຜົ້ງສາລີ ມາເຖິງປັດຈຸບັນ ກໍຍັງບໍ່ມີໄຟຟ້າໃຊ້ເຖິງ 32.67% ໃນຈໍານວນທັງໝົດ 37,246 ຄອບຄົວ ຊຶ່ງທາງການລາວ ຍັງບໍ່ສາມາດແກ້ໄຂໃຫ້ມີໄຟຟ້າໃຊ້ໄດ້ ເຖິງແມ່ນວ່າຢູ່ແຂວງນີ້ ມີເຂື່ອນໄຟຟ້າຂອງຈີນຫຼາຍແຫ່ງ ດັ່ງເຈົ້າໜ້າທີ່ ທີ່ເຮັດວຽກກ່ຽວກັບ ການຂະຫຍາຍຕາຂ່າຍໄຟຟ້າ ຢູ່ແຂວງຜົ້ງສາລີທ່ານນຶ່ງ ກ່າວຕໍ່ວິທຍຸເອເຊັຽເສຣີ ໃນມື້ວັນທີ 6 ສິງຫານີ້ວ່າ:

“ມັນມີຫລາຍບ້ານຢູ່ ທີ່ໄຟບໍຮອດນ່າ ທຸກເມືອທີ່ເປີດເວົ້າເລື້ອງເສັ້ນທາງຫັ້ນແຫລະ ເສັ້ນທາງຫ່າງໄກ ເວົ້າເລື້ອງເງິນຫັ້ນແຫລະ ເກືອບຈະທຸກເມືອງຫັ້ນແຫລະຫ່າງໄກສອກຫລີກ ຕິດຫວຽດກໍມີຕິດຈີນກໍມີ ເລື້ອງໄຟກໍໃຊ້ລະບົບໄຟຂອງລາວຫັ້ນແຫລະ ສ່ວນຫລາຍເຂົາໃຊ້ໂລລາເຊວ ປະຊາຊົນຈະຊື້ເອງ ເຂື່ອນຈີນສໍາປະທານ ຈີນ ຈີນນີ້ກໍມີຫລາຍຄັກ ມີ 3-4 ບໍລິສັດ ສົ່ງໄປຈີນ ບ້ານໃດຢູ່ໃນເຂດຫ່າງໄກ ເຂົາເອົາໂຊລາໄປໃຊ້ ບໍ່ມີໄຟກໍໃຊ້ແຜ່ນ.”

ຢູ່ແຂວງຜົ້ງສາລີ ນັກລົງທຶນຈີນ ກໍ່ສ້າງເຂື່ອນໄຟຟ້າຢ່າງຕໍ່ເນື່ອງຢູ່ໃນຂະນະນີ້ ແຕ່ຍັງບໍ່ທັນມີການຂະຫຍາຍຕາຂ່າຍໄຟຟ້າພໍເທົ່າໃດ ໄປເຂດຫ່າງໄກ ບ່ອນທີ່ມີປະຊາຊົນຢູ່ໜ້ອຍ ດັ່ງເຈົ້າໜ້າທີ່ທີ່ກ່ຽວຂ້ອງ ຢູ່ແຂວງຜົ້ງສາລີ ເວົ້າໃນມື້ດຽວກັນນີ້ວ່າ:

“ກໍຍັງບໍ່ທັນໄດ້ເຂົ້າເຖິງ ກໍຍັງມີຫລາຍຢູ່ຢູ່ຕາມຊົນນະບົດ ໜ້າຈະຕາມເຂດພູດອຍ ທາງ... ເສັ້ນທາງບໍ່ດີເທື່ອ ສ່ວນຫລາຍນີ້ ເປັນເສັ້ນທາງແດງເບິດ ໂດຍ ອຸປະກອນນີ້ເຂົ້າໄດ້ຢູ່ ແຕ່ວ່າແບບ ຄື ຜູ້ໃຊ້ໄຟຟ້າຫັ້ນແມ່ນບໍ່ຫລາຍ ຢູ່ນີ້ເຂື່ອນໄຟຟ້າ ຂອງບໍລິສັດຈີນມາລົງທຶນນີ້ແຫລະ ເຂົາຜະລິດໄປຢູ່ຈີນໂດຍກົງຕີ້ ໂຕນີ້ ແມ່ນຄົນລາວໄດ້ໃຊ້ ກໍໄດ້ໃຊ້ປະມານ 30% ອີກ 70% ນີ້ສົ່ງໄປຢູ່ຈີນ.”

ກ່ຽວກັບເລື່ອງນີ້ ທ່ານ ຍີນໄຊ ດວງພະຈັນ ຫົວໜ້າພະແນກພະລັງງານ ແລະບໍ່ແຮ່ ແຂວງຜົ້ງສາລີ ເວົ້າເມື່ອສັບປະດາຜ່ານມານີ້ວ່າ ປັດຈຸບັນ ຢູ່ແຂວງຜົ້ງສາລີ ມີເຂື່ອນໄຟຟ້າຂະໜາດນ້ອຍ ແລະຂະໜາດໃຫຍ່ 6 ເຂື່ອນ, ມີສະຖານີໄຟຟ້າແຮງສູງ 230 ກິໂລໂວນ 2 ແຫ່ງ, 115 ກິໂລໂວນ 1 ແຫ່ງ, ມີລະບົບສາຍສົ່ງໄຟຟ້າແຮງສູງ 230 ກິໂລໂວນ, 391.96 ກິໂລໂວນ ຍາວ 18.66 ກິໂລແມັດ, ສາຍສົ່ງໄຟຟ້າ 35 ກິໂລໂວນ 4.26 ກິໂລແມັດ, ຕາຂ່າຍແຮງດັນກາງ 22 ກິໂລໂວນ 1,624.4 ກິໂລແມັດ, ຕາຂ່າຍແຮງດັນຕໍ່າ 0.4 ກິໂລໂວນ 358.5 ກິໂລແມັດ, ມຮໝໍ້ແບ່ງໄຟ 940 ຊຸດ.

ສໍາລັບໂຄງການຂະຫຍາຍລະບົບຕາຂ່າຍໄຟຟ້າ 220.4 ກິໂລໂວນ ແລະການຕິດຕັ້ງໝໍ້ແບ່ງໄຟສູ່ຊົນນະບົດ 10 ບ້ານ ຢູ່ 4 ເມືອງ ຄືເມືອງຜົ້ງສາລີ, ເມືອງສໍາພັນ, ເມືອງບຸນເໜືອ ແລະເມືອງຍອດອູ ຍັງກໍາລັງຕິດຕັ້ງຢູ່.

ສ່ວນບ່ອນທີ່ຍັງບໍ່ທັນຂະຫຍາຍຕາຂ່າຍໄຟຟ້າໄປເຖິງນັ້ນ ສ່ວນຫຼາຍເປັນເຂດນອກເທດສະບານ, ເຂດຫ່າງໄກ ທີ່ເຂົ້າໄປເຖິງໄດ້ຍາກ ດັ່ງຊາວບ້ານຢູ່ເມືອງບຸນເໜືອ ຜູ້ນຶ່ງເວົ້າວ່າ:

“ບໍ່ທົ່ວເທື່ອໆ ຢູ່ບ້ານນອກນີ້ບໍ່ຢາກມີ ກໍຍ້ອນເສັ້ນທາງນີ້ບໍ່ປົກກະຕິເນາະ ເຂດພູດອຍ ຈະຊົນເຜົ່າອາຂ່ານີ້ແຫລະນ່າ ເອີ ບໍ່ມີໆ ບອກຈະຮອດກໍບໍ່ຮອດເທື່ອ ເອີ ໃຊ້ໂຊລາ ແສງສະຫວ່າງ ຫັ້ນແຫລະ ສ່ວນຫລາຍຫັ້ນນ່າ ກໍແບ່ງກັນຫັ້ນນ່າເນາະມັນມີຫລາຍແບບເດ້ ເຂົາຂາຍຢູ່ຕະຫລາດຫັ້ນນ່າ ນໍ້າອູ 6 ນີ້ໂອ໋ ນໍ້າອູ 7 ນີ້ແຫລະ ຈີນເຮັດນໍ້າອູ 6 ນໍ້າອູ 7 ນີ້ແຫລະສົ່ງໄປຈີນນີ້ແຫລະກໍ໋ ລາວເຄິ່ງນຶ່ງນີ້ແຫລະເນາະ ກໍແບ່ງກັນຫັ້ນນ່າເນາະ. ເອີ ກໍຍັງບໍ່ຄົບເທື່ອ ຍັງບໍ່ທົ່ວເຖິງເທື່ອນ່າ.”

ເມື່ອກ່ອນໜ້ານີ້ ທ່ານ ທອງພັດ ອິນທະວົງ ຮອງລັດຖະມົນຕີ ກະຊວງພະລັງ ງານ ແລະບໍ່ແຮ່ ໄດ້ກ່າຕໍ່ກອງປະຊຸມ ສະຫຼຸບການຈັດຕັ້ງປະຕິບັດ ແຜນພັດທະນາວຽກງານພະລັງງານ ແລະບໍ່ແຮ່ ປະຈໍາປີ 2023 ໃນລະຫວ່າງວັນທີ 20-21 ທັນວາ 2023 ວ່າ ມາເຖິງປັດຈຸບັນ ການເຂົ້າເຖິງໄຟຟ້າຂອງຄົວເຮືອນທົ່ວປະເທດ ປະຕິບັດໄດ້ 95.27%. ແຕ່ແຂວງຜົ້ງສາລີ, ອຸດົມໄຊ, ຫົວພັນ, ຫຼວງນໍ້າທາ ແລະແຂວງເຊກອງ ຍັງມີການເຂົ້າເຖິງໄຟຟ້າຕໍ່າກວ່າໝູ່ ຊຶ່ງໃນນັ້ນ ແຂວງຜົ້ງສາລີ ມີຄົວເຮືອນເຂົ້າເຖິງ 66%. ແຕ່ໃນຂະນະນີ້ ເຂົ້າເຖິງເພີ່ມຂຶ້ນເປັນ 71.77%.

ກ່ຽວກັບເລື່ອງທີ່ວ່ານີ້ ປະຊາຊົນ ຢູ່ເມືອງບຸນໃຕ້ ເວົ້າວ່າ ຊາວບ້ານ ທີ່ບໍ່ທັນໄດ້ໃຊ້ໄຟຟ້າຈາກເຂື່ອນ ພວກເຂົາເຈົ້າໄປຊື້ແຝງໂຊລາເຊວ ມາໃຊ້ດ້ວຍຕົນເອງ ທາງການລາວບໍ່ໄດ້ຊ່ອຍເຫຼືອ.

“ແຖວນອກພຸ້ນແຫລະ ບໍ່ເຂົ້າເຖິງຕາຄ່າຍຫັ້ນນະ ແຕ່ວ່າໄຟຟ້າເຂົາຮັບເຮັດຢູ່ ບໍລິສັດເຂົາຮັບເຮັດຢູ່ ບໍລິສັດຢູ່ບຸນເໜືອກໍມີຢູ່ບຸນໃຕ້ກໍມີ ຕາຂ່າຍນ່າ ຈັກເທົ່າໃດ ບໍ່ຮູ້ນໍາເຂົານະ ທາງໄປ... ກໍທຸກ ທາງນັ້ນທາງພີ້ກໍທຸກ ເມືອງບຸນໃຕ້ສ່ວນຫລາຍ ສ່ວນຫລາຍດຽວນີ້ເຂົາກໍໃຊ້ໂຊລາເຊວແລ້ວ ເພາະວ່າ ແຖວບໍ່ມີໄຟ ແຖວນີ້ ແຂວງພວກເຮົາກໍມີຢູ່ ທາງເມືອງສໍາພັນທາງນໍ້າອູຫັ້ນ.”

ອີງຕາມຄໍາເວົ້າຂອງທ່ານ ຈັນທະບູນ ສຸກອາລຸນ ຜູ້ອໍານວຍການໃຫຍ່ ລັດວິສາຫະກິດໄຟຟ້າລາວເມື່ອກ່ອນໜ້ານີ້, ກ່ອນຈະສາມາດນໍາໄຟຟ້າ ໄປເຖິງບ້ານເຮືອນປະຊາຊົນ ທີ່ຢູ່ເຂດຫ່າງໄກສອກຫຼີກໄດ້ ກໍຈໍາເປັນຕ້ອງມີສາຍສົ່ງໄຟຟ້າແຮງສູງ ທັງແບບ 115 ກິໂລໂວນ, 230 ກິໂລໂວນ ແລະ 500 ກິໂລໂວນ ໃຫ້ສໍາເລັດພາຍໃນປີ 2024 ຮວມໄປເຖິງການຂະຫຍາຍສະຖານີໄຟຟ້າຕ່າງໆເພີ່ມຂຶ້ນ ຊຶ່ງປັດຈຸບັນມີປະມານ 76 ແຫ່ງ ແລະປະຊາຊົນທົ່ວປະເທດ ໄດ້ໃຊ້ໄຟຟ້າແລ້ວປະມານ 95% ໃນປີ 2023.

ທ່ານກ່າວຕື່ມວ່າ ປັດຈຸບັນ ໃນທົ່ວປະເທດ ໄດ້ໃຊ້ໄຟຟ້າ 95%. ສ່ວນທີ່ເຫຼືອ ແມ່ນຢູ່ເຂດຫ່າງໄກສອກຫຼີກ, ບາງບ່ອນບໍ່ມີເສັ້ນທາງໄປເຖິງ, ປະຊາຊົນຢູ່ແບບກະແຈກກະຈາຍ, ຢູ່ເຂດພູດອຍ ບາງບ້ານມີພຽງ 20-30 ຄອບຄົວ ແລະສະພາບເສດຖະກິດ ແລະການເງິນຂອງປະເທດ ກໍມີຄວາມຫຍຸ້ງຍາກຫຼາຍ ສະນັ້ນ ການລົງທຶນ ເພື່ອໃຫ້ປະຊາຊົນໄດ້ໃຊ້ໄຟຟ້າ 100% ນັ້ນ ຈຶ່ງເປັນໄປໄດ້ຍາກ.