ກວາດລ້າງ ແກ້ງຄໍເຊັນເຕີ້ ຢູ່ ສາມຫຼ່ຽມຄໍາ ໄດ້ 16 ບໍລິສັດ

ໃນວັນທີ 26 ສິງຫາ ເຈົ້າໜ້າທີ່ທາງການລາວ ແລະ ພາກສ່ວນກ່ຽວຂ້ອງ ໄດ້ ກວາດລ້າງ ແກ້ງຄໍເຊັນເຕີ ໄດ້ 16 ບໍບິສັດ ແລະ ຈັບຜູ້ຕ້ອງສົງໄສຊາວຈີນໄດ້ອີກ 60 ຄົນ ຢູ່ເຂດເສດຖະກິດພິເສດສາມຫຼ່ຽມຄໍາ.

ເຈົ້າໜ້າທີ່ຕໍາຫຼວດລາວ ສົມທົບກັບ ພາກສ່ວນກ່ຽວຂ້ອງ ທັງໝົດ 250 ຄົນ ຍັງສືບຕໍ່ກວາດລ້າງ ແລະ ກໍາຈັດແກ້ງຄໍເຊັນເຕີ ທີ່ເປັນສະຍາກໍາ ໃຫ້ອອກໄປຈາກເຂດດັ່ງກ່າວ.  

ເຈົ້າໜ້າທີ່ຕໍາຫຼວດ ປະຈໍາເຂດເສດຖະກິດພິເສດສາມຫຼ່ຽມຄໍາ ໄດ້ກ່າວຕໍ່ເອເຊັຽເສຣີ ໃນວັນທີ 28 ສິງຫາ ວ່າ:

“ແມ່ນໆ ເພິ່ນເຮັດຫຼາຍວັນເດ້ ແຕ່ ວັນທີ 26 ຖືວ່າ ພິ່ນກະ ກໍາລັງກວາດລ້າງຢູ່ ເຂົາກະມາເຮັດວຽກຢູ່. ”

ເຈົ້າໜ້າທີ່ມີການກວາດລ້າງແກ້ງຄໍເຊັນເຕີ ຢ່າງເຂັ້ມງວດທີ່ສຸດ ຈົນເຮັດໃຫ້ຫຼາຍບໍລິສັດ ຖືກຈັບ ແລະ ປິດໂຕໄປ ສ່ວນວ່າ ສະມາຊິກແກ້ງຄໍເຊັນເຕີ ຈໍານວນນຶ່ງ ກໍພາກັນໜີໄປນະຄອນຫລວງວຽງຈັນ ແລະ ໜີໄປປະເທດເພື່ອນບ້ານ.

ຄົນຂັບລົດ ຢູ່ເຂດເສດຖະກິດພິເສດສາມຫຼ່ຽມຄໍາ ໄດ້ກ່າວວ່າ:

“ກະມີຜູ້ອອກໄປແລ້ວ ໝົດໄປຫຼາຍແລ້ວ ບາງຕຶກນ່າ ແຕ່ວ່າກະຊິເຂົາແລ້ວ ບໍ່ໝົດແລ້ວບໍ ໝົດກໍານົດແລ້ວ ແມ່ນບາງຄົນກະໜີໄປຢູ່ວຽງ ໄປຢູ່ກໍາປູເຈ້ຍ.”

ຫຼັງຈາກມີການປາບປາມແລ້ວ ເຂດເສດຖະກິດພິເສດສາມຫຼ່ຽມຄໍາ ກໍງຽບ ບໍ່ມີຄົນຫຼາຍຄືແຕ່ກ່ອນ ຍ້ອນວ່າ ຄົນທີ່ເຮັດວຽກຕອບແຊັດ ພາກັນໜີອອກໄປ ສ່ວນນຶ່ງກໍຖືກຈັບກຸມ.

ຊາວລາວ ທ່ານນຶ່ງ ທີ່ເຮັດວຽກຢູ່ເຂດເສດຖະກິດພິເສດສາມຫຼ່ຽມຄໍາ ໄດ້ກ່າວວ່າ:

“ເອີ ມັນກໍງຽງໆ ລົງໄປໜ້ອຍນຶ່ງ ບໍ່ມີຢູ່ຫຼາຍແລ້ວ ເຂົາຄົ້ນແຫຼະ ສ່ວນຫຼາຍກະຄົນຈີນ ຄົນພວກຕອບແຊັດນີ້ຊື່ໆ ຄົນທ່ຽວນີ້ບໍ່ເປັນຫຍັງ ຄົນທ່ຽວຫັ້ນນ່າ.”

ຄົນທີ່ເຮັດວຽກຕອບແຊັດຢູ່ເຂດເສດຖະກິດພິເສດສາມຫຼ່ຽມຄໍາ ຫຼາຍຄົນ ພາກັນມາພັກຄ້າງຄືນ ຢູ່ໃກ້ກັບສະຖານນີລົດໄຟນາເຕີຍ ເພື່ອເດີນທາງກັບບ້ານ. 

ຜູ້ປະກອບການເຮືອນພັກແຫ່ງນຶ່ງ ທີ່ຢູ່ໃກ້ສະຖານີລົດໄຟນາເຕີຍ ໄດ້ກ່າວວ່າ:

“ສ່ວນຫຼາຍກະເປັນຄົນຢູ່ທາງວຽງພຸ້ນແຫຼະ ຢູ່ທາງໃຕ້ພຸ້ນ ທາງຫລວງພະບາງ ພຸ້ນນ່າ ພັກຢູ່ນາເຕີຍ ເອີ ມານອນແລ້ວ ກໍບາງເທື່ອຮອດ 3 ໂມງ ລົດໄຟອອກເຂົາກະໄປລໍລົດໄຟ ປາບຮອດວັນທີ 25 ຕິ ດຽວນີ້ ກະວັນທີ 28 ແລ້ວ ມື້ນີ້ເນາະ.”

ຊາວລາວທ່ານນຶ່ງ ເຊື່ອວ່າ ກຸ່ມຄົນຈີນທີ່ເປັນແກ້ງຄໍາເຊັນເຕີ້ ຄົງຈະບໍ່ກັບມາໃນເຂດດັ່ງກ່າວອີກ ຖ້າມີການປ້ອງກັນ ແລະ ຄຸ້ມຄອງຢ່າງເຂັ້ນງວດ:

“ກະຕິດຕາມເບິ່ງຂ່າວຢູ່ເນາະ ເຂົາເຈົ້າມາເຮັດປະຕິບັດແບບນີ້ ຂ້ອຍຄິດວ່າ ໂອກາດທີ່ເຂົາເຈົ້າຊິກັບມາເຮັດແບບນີ້ ຄືຊີບໍ່ມີແລ້ວ ອາດຈະເປັນແບບນັ້ນຢູ່ ເພາະວ່າ ມີຫຼາຍປະເທດຊ່ວຍກັນເນາະ ເພາະວ່າ ຄັນຖ້າບໍ່ເຮັດແບບນີ້ເນາະ ມັນກະມີແບບຜົນກະທົບຕໍ່ຊື່ສຽງ ຂອງເຂດນັ້ນນັ້ນນ່າ.”

ນອກຈາກນີ້ ຍັງມີລາຍງານວ່າ ມີຄົນຂັບລົດແທັກຊີ້ ຈໍານວນນຶ່ງ ໄດ້ຮັບຈ້າງພາຄົນຈີນທີ່ເປັນຫົວໜ້າແກ້ງຄໍເຊັນເຕີ້ ຫຼົບໜີອອກຈາກເຂດດັ່ງກ່າວ ແລະ ກໍໍຖືກເຈົ້າໜ້າທີ່ຕໍາຫຼວດ ນໍາຈັບໂຕໄດ້ຈໍານວນນຶ່ງ ແຕ່ບໍ່ມີການເປີດເຜີຍລາຍລະອຽດເລື່ອງນີ້.

ທ່ານ ພັນເອກ ອານຸສິນ ສັກປະເສີດ ຫົວໜ້າກອງບັນຊາການປ້ອງກັນຄວາມສະຫງົບ ເຂດເສດຖພກິດພິເສດສາມຫຼ່ຽມຄໍາ ໄດ້ກ່າວຕໍ່ສື່ມວນຊົນລາວ ໃນວັນທີ 27 ສິງຫາ ວ່າ: ນັບແຕ່ປີ 2023 ເປັນຕົ້ນມາ ໄດ້ມີການມ້າງແກ້ງຄໍເຊັນເຕີ້ ຫຼື ກວາດລ້າງ ຢູ່ເຂດເສດຖະກິດພິເສດສາມຫຼ່ຽມຄໍາ ໄດ້ຈໍານວນ 240 ບໍລິສັດ.

ນັບ ແຕ່ວັນທີ 9-25 ສິງຫາ ທາງການລາວ ໄດ້ອອກແຈ້ງການເພື່ອໃຫ້ກວາດລ້າງ ແກ້ງຕອບແຊັດ ຫຼື ຄໍເຊັນເຕີ້ ໃນເຂດເສດຖະກິດພິເສດສາມຫຼ່ຽມຄໍາ.​

ຫຼັງຈາກວັນທີ 25 ສິງຫາ ເປັນຕົ້ນໄປ ຖ້າວ່າ ເຈົ້າໜ້າທີ່ ພົບເຫັນຜູ້ທີ່ຍັງເຮັດວຽກຕອບແຊັດ ຢູ່ໃນເຂດດັ່ງກ່າວ ເຈົ້າໜ້າທີ່ຈະຈັບມາດໍາເນີນຄະດີ ອີງຕາມຂໍ້ມູນຈາກເຈົ້າໜ້າທີ່ກ່ຽວຂ້ອງ.

ນັບແຕ່ເຈົ້າໜ້າທີ່ ໄດ້ເລີ່ມປະຕິບັດການກວາດລ້າງ ແກ້ງຄໍເຊັນເຕີ້ ໃນເຂດເສດຖະກິດພິເສດ ສາມຫຼ່ຽມຄໍາ ສົ່ງຜົນໃຫ້ການໂຄສະນາມຮັບສະໝັກວຽກຕອບແຊັດ ຜ່ານສື່ສັງຄົມອອນລາຍ ໄດ້ຫາຍໄປ ແລະ ປະກົດວ່າ ມີການສືບຂໍ້ມູນຕ່າງໆອອກຈາກເວບໄຊ້ ຫຼື ເຟສບຸກ.  

ເຖິງຢ່າງໃດກໍ່ຕາມຄະນະຄຸ້ມຄອງ ເຂດເສດຖະກິດພິເສດສາມຫຼ່ຽມຄຳ ຍັງແຈ້ງໃຫ້ທຸກຫົວໜ່ວຍທຸລະກິດຕ້ອງໄດ້ຮັບການອະນຸຍາດ ຈາກເຈົ້າໜ້າທີ່ທາງການຈຶ່ງເຄື່ອນໄຫວ ປະກອບອາຊີບໄດ້ພ້ອມທັງໃຫ້ຈ່າຍເງິນເດືອນ, ເງິນປັນຜົນກຳໄລໃຫ້ຄົນງານຂອງຕົນຢ່າງຄົບຖ້ວນ ພ້ອມກັນນັ້ນບໍ່ໃຫ້ກັກໜັງສືຜ່ານແດນ ແລະເອກະສານ ທີ່ເປັນຂອງສ່ວນຕົວຂອງຄົນງານ ຖ້າຫົວໜ່ວຍທຸລະກິດໃດ ບໍ່ປະຕິບັດ ຈະຖືກປັບໃໝ ແລະ ຮັບຜິດຊອບຕາມກົດໝາຍ.