ໄທ-ລາວຈະຫາລືໂຄງການ ຣົດໄຟ

ຣັຖມົນຕຣີ ກະຊວງ ຄົມມະນາຄົມ ຂອງໄທ ທ່ານ ປຣາຈີນ ຈັນຕອງ ກ່າວວ່າ ຈະ ຊຸກຍູ້ ໂຄງການ ທາງຣົດໄຟ ລາງຄູ່ ທີ່ ເຊື່ອມຕໍ່ ກາງກອກ, ວຽງຈັນ ແລະ ຂຸນໝິງ ໃນວາລະ ການ ເຈຣະຈາ ກັບ ທາງການ ລາວ ໃນ ເດືອນ ກຸມພາ ທີ່ ຈະມາເຖີງ ນີ້. ອີງຕາມ ໜັງສືພິມ ບາງກອກ ໂພັສ.

ທ່ານ ປຣາຈີນ ກ່າວຕໍ່ ນັກຂ່າວ ໃນວັນເສົາ ຜ່ານມາ ວ່າ ທ່ານ ເອງ ຈະນຳພາ ຄນະ ຜູ້ແທນ ຝ່າຍໄທ ເຂົ້າໄປ ປຶກສາ ຫາລື ເພີ່ມເຕີມ ກ່ຽວກັບ ໂຄງການ ທາງ ຣົດໄຟ ຊຶ່ງ ການ ເຈຣະຈາ ຈະມີຂຶ້ນ ໃນ ວັນທີ 1-3 ກຸມພາ ທີ່ ຈະມາເຖີງ ນີ້. ທາງ ຣົດໄຟ ມີຄວາມ ກວ້າງ 1.453 ແມັດ ທີ່ ເປັນ ຂນາດ ມາຕຖານ ຈະ ເຊື່ອມຕໍ່ ຈາກ ບາງກອກ ຫາ ນະຄອນ ຫລວງ ວຽງຈັນ ແລະ ແຂວງ ຂຸນໝິງ ແລະ ແຂວງ ຢູນານ ຂອງຈີນ, ທ່ານ ກ່າວອີກວ່າ ການ ເຈຣະຈາ ຄັ້ງນີ້ ຈະໃຫ້ ຄວາມ ຈະແຈ້ງ ຂຶ້ນ ຕື່ມ.

ໃນອາທິດ ທີ່ ຜ່ານມາ ທາງການ ໄທ ໄດ້ ບັນລຸ ຂໍ້ຕົກລົງ ກັບ ທາງການ ຈີນ ກ່ຽວກັບ ການ ກໍ່ສ້າງ ທາງ ຣົດໄຟ ຢູ່ ປະເທດໄທ ຊຶ່ງ ຂໍ້ຕົກລົງ ດັ່ງກ່າວ ແມ່ນການ ກໍ່ສ້າງ ທາງຣົດໄຟ ຈາກ ແກ່ງຄອຍ ເຂດ ມາບຕາພຸດ ມາຫາ ແຂວງ ໜອງຄາຍ ຊຶ່ງ ຕິດກັບ ນະຄອນ ຫລວງ ວຽງຈັນ.

ຫລາຍຄົນ ກໍເຊື່ອວ່າ ການທີ່ ທາງການ ໄທ ມາ ເຈຣະຈາ ກັບ ທາງການ ລາວ ໃນ ຄັ້ງນີ້ ກໍເພື່ອໃຫ້ ລາວ ສ້າງ ທາງຣົດໄຟ ແຕ່ ພາກເໜືອ ທີ່ ຕິດກັບ ປະເທດຈີນ ລົງມາ ນະຄອນ ຫລວງ ວຽງຈັນ ແລ້ວ ມາຈອດ ກັບ ທາງຣົດໄຟ ຢູ່ແຂວງ ໜອງຄາຍ. ແຕ່ ຣາຍ ຣະອຽດ ດັ່ງກ່າວ ຝ່າຍລາວ ກໍຍັງ ບໍ່ທັນ ມີການ ເປີດເຜີຍ ໃຫ້ ສາທາຣະນະ ໄດ້ຮູ້.

ແຕ່ກໍມີຄົນ ອອກມາ ວິພາກ ວິຈານ ກັນວ່າ ປະເທດລາວ ຈະໄດ້ຮັບ ຜົນ ປະໂຫຍດ ໜ້ອຍ ທີ່ສຸດ ຈາກ ໂຄງການ ສ້າງ ທາງຣົດໄຟ ໃນ ຄັ້ງນຶ່ງ ເມື່ອ ທຽບໃສ່ ເງິນ ກູ້ຢືມ 7 ຕື້ ໂດລາ ສະຫະຣັດ ທີ່ ຈະໃຊ້ ເຂົ້າໃນ ການ ກໍ່ສ້າງ ໂຄງການ ດັ່ງກ່າວ.
ແລະ ປະເທດ ລາວ ຍັງມີ ຄວາມສ່ຽງ ທີ່ ຈະກາຍ ເປັນ ປະເທດ ທີ່ຕິດໜີ້ ອັບດັບ 4 ຂອງ ໂລກ ຮອງ ຈາກ ຍີ່ປຸ່ນ, ຊິບບອບເວ ແລະ ປະເທດ ກຣິກ.