ຄົນງານທາງຣົດໄຟບໍ່ໄດ້ ຄ່າແຮງງານ

ສຸພັດຕາ
2019-11-26
ອີແມວລ໌
ຄໍາເຫັນ
Share
ພິມ
ຄົນງານລາວ ໃນໂຄງການ ທາງຣົດໄຟ ລາວ-ຈີນ ໃນເຂດ ແຂວງວຽງຈັນ
ຄົນງານລາວ ໃນໂຄງການ ທາງຣົດໄຟ ລາວ-ຈີນ ໃນເຂດ ແຂວງວຽງຈັນ
ຮູບຈາກ : ນັກຂ່າວພົລເມືອງ

ກັມມະກອນ ລາວ 9 ຄົນ ຈາກ ແຂວງຜົ້ງສາລີ ທີ່ເຮັດວຽກໃນ ໂຄງການທາງຣົດໄຟ ລາວ-ຈີນ ຢູ່ ເມືອງຫິນເຫີບ ແຂວງວຽງຈັນ ບໍ່ໄດ້ຮັບ ຄ່າແຮງງານ ຈາກບໍຣິສັດຮັບເໝົາ ຂອງຄົນລາວ, ດັ່ງກັມມະກອນ ຜູ້ບໍ່ໄດ້ຮັບຄ່າແຮງງານ ກ່າວຕໍ່ ວິທຍຸ ເອເຊັຽເສຣີ ໃນວັນທີ 25 ພຶສຈິກາ ນີ້ວ່າ:

“10 ມື້ເຂົາວ່າຊິໄລ່ໃຫ້ມື້ 80 ເນ້ ລະເຂົາກໍໄລ່ໃຫ້ ໃຫ້ແຕ່ບົດບັນທຶກຫັ້ນແຫຼະ ບໍ່ໄດ້ເງິນແຫຼະ ແລ້ວນ້ອງກະອອກເມືອບ້ານຄ່າຣົດກໍບໍ່ມີຊໍ້າ ໃຫ້ພໍ່ແມ່ມາຮັບຢູ່ຄິວຣົດ ໃຫ້ເຂົາຈ່າຍຢູ່ບ້ານພີ້.”

ກັມມະກອນອີກຜູ້ນຶ່ງ ກໍເວົ້າວ່າ ເຮັດວຽກແຕ່ເຊົ້າຮອດຄໍ່າ ແຕ່ເງິນພັດບໍ່ໄດ້ ໄດ້ແຕ່ລາຍເຊັນ:

“ໄປເຊັນສັນຍາ ນໍາຕໍາຣວດຫ້ອງການກຸ່ມ ຢູ່ບ້ານຫິນເຫີບຫັ້ນ ກະສັນຍາແລ້ວ ກະຍັງບໍ່ໄດ້ ເຂົາເປັນຄົນຕັດສິນເດ້ ຈັ່ງໃດ ຄັນທາງຣົດໄຟ ພວກອັນນາຍໜ້າ ຈັ່ງໃດຄັນບໍ່ມີເງິນ ຈັ່ງໃດກະຊິເອົາເງິນໂຕເອງໃຫ້ ນັດວັນທີນີ້ ວັນທີນັ້ນ ພັດຮອດມື້ນັດໄປຫາ ຫາເຂົາຢູ່ຫ້ອງການ ກະຍັງບໍ່ໄດ້ ຍັງຄອບອີກ.”

ນອກຈາກກັມມະກອນ 9 ຄົນ ຈາກແຂວງຜົ້ງສາລີ ກັມມະກອນລາວ ສອງຄົນ ຢູ່ເມືອງຫິນເຫີບເອງ ກໍບໍ່ໄດ້ຮັບເງິນ ຄ່າແຮງງານມາເປັນ ເວລາເກືອບສອງເດືອນແລ້ວ, ດັ່ງຊາວບ້ານ ທີ່ເຫັນເຫດການ ທ່ານນຶ່ງ ກ່າວຕໍ່ວິທຍຸເອເຊັຽເສຣີ ວ່າ:

“ມີໆເດ້ ມີໆ ຂະເຈົ້າເຂົ້າມາຈົ່ມ ມາເຮັດວຽກນໍາຈີນແລ້ວບໍ່ໄດ້ເງິນ ໂຕຕ່າງແຂວງກະມີ ຕ່າງເມືອງກະມີ ບໍ່ມີອັນຈະກິນ ເບີກເງິນບໍ່ໄດ້ ຖືກກົດດັນ ຖືກໃຊ້ແຮງງານໜັກ ແລ້ວຈະກັບບ້ານ ກໍກັບບໍ່ໄດ້ ບໍ່ມີເງິນ ຢູ່ແຕ່ໃນຄວາມບັງຄັບຂອງຂະເຈົ້າຫັ່ນລະ ອັນທີ່ຕົວະຕົ້ມກັນ ຫ່ັນນະ ມັນຈະມີຄົນມາຮັບເໝົາຕໍ່ໆໄປ ລະມັນຈະມີຫົວໜ່ວຍນຶ່ງ ວ່າຮັບຜິດຊອບ ອັນນັ້ນອັນນີ້ນາ.”

ທ່ານອະທິບາຍວ່າ ສ່ວນໃຫຍ່ ບັນຫາທີ່ກັມມະກອນ ບໍ່ໄດ້ຮັບຄ່າຈ້າງ ໃນໂຄງການສ້າງທາງຣົດໄຟ ລາວ-ຈີນ ນັ້ນ ແມ່ນຍ້ອນມີຫຼາຍບໍຣິສັດ ຮັບວຽກຕໍ່ຊ້ວງກັນ ເປັນແບບວ່າ ບໍຣິສັດນີ້ບໍ່ຈ່າຍ ບໍຣິສັດໃໝ່ມາກໍບໍ່ຈ່າຍ. ກ່ຽວກັບ ເຣື້ອງນີ້ ເຈົ້າໜ້າທີ່ຜແນກ ແຮງງານ ແລະສວັດດີການ ສັງຄົມ ເມືຶຶອງຫິນເຫີບ ກ່າວວ່າ ຍັງບໍ່ຮູ້ຂໍ້ມູນ ເຣື້ອງທີ່ກັມມະກອນ ຈາກ ແຂວງຜົ້ງສາລີ ບໍ່ໄດ້ຮັບຄ່າແຮງງານ ແຕ່ເຈົ້າໜ້າທີ່ ຈະລົງກວດກາ ເພີ້ມຕື່ມ.

ທ່ານກ່າວເພີ້ມວ່າທີ່ຜ່ານມາ ເຄີຍມີກັມມະກອນລາວ ມາຈາກແຂວງຫຼວງພຣະບາງ ກໍບໍ່ໄດ້ຮັບຄ່າແຮງງານປະມານ 2 ເດືອນຄືກັນແຕ່ກໍໄດ້ ແກ້ໄຂແລ້ວ, ດັ່ງທີ່ທ່ານກ່າວວ່າ:

“ແກ້ໄຂມື້ກີ້ ກໍມີກໍຣະນີນຶ່ງເນາະ ຂະເຈົ້າຢູ່ຫຼວງພຣະບາງພຸ້ນນະເນາະ ທີ່ມາອອກແຮງງານ ລະເຂົ້ານ້ໍາຊ້າມປາ ມັນຈະຂາດເນາະ ອັນເງິນ ເດືອນ ບໍ່ໄດ້ຫັ່ນນາ ນາຍຈ້າງຖືວ່າ ເປັນສອງຊ້ວງເນາະ ສ່ວນຫຼາຍເປັນທາງຣົດໄຟ.”

ເຖິງຢ່າງໃດກໍຕາມ, ເຈົ້າໜ້າທີ່ຜແນກແຮງງານ ແລະສວັດດີການສັງຄົມ ເຄີຍສອບຖາມ ຜູ້ຮັບເໝົາກໍ່ສ້າງ ໂຄງການທາງຣົດໄຟ ລາວ-ຈີນ ກ່ຽວກັບເຣື່ອງທີ່ ກັມມະກອນບໍ່ໄດ້ຮັບຄ່າແຮງງານ ແລະກໍໄດ້ຄໍາຕອບວ່າ ກັມມະກອນບາງຄົນ ເຮັດວຽກບໍ່ດີ ແລະ ບໍຣິສັດກໍໄດ້ຮັບເງິນຊ້າ ຈາກບໍຣິສັດໃຫຍ່ຂອງຈີນ.

ຄໍາເຫັນ (2)
Share

ຜູ້ອ່ານທີ່ບໍ່ອອກຊື່

ຄັນເຫັນເຂົາເຮັດວຽບໍ່ດີຫຼືບໍ່ເປັນຄືບໍ່ໄຫ້ເຂົາອອກງານແຕ່ມື້ທໍາອິດພຸ້ນອັນນີ້ປ່ອຍໄຫ້ເຂົາເຮັດມາຈົນຮອດສອງສາມເດືອນແລ້ວບໍ່ໄຫ້ເງິນຄ່າຈ້າງງານຫາວ່າເຂົາເຮັດວຽກບໍ່ດີແລ້ວສິໄຫ້ວ່າແບບໃດກັບຫົວໜ້າຈ້າງງານພວກນີ້ຕໍ່ໄປອີກ,ຄັນສິວ່າມະນຸດເດັຽລະສານກໍຄືສິບໍ່ຖືກດອກ,ທົ່ວໂລກກໍເວົ້າວ່າສະໄໝນີ້ຈີນມາແຮງຫຼາຍແລະຈີນຊິຄອງໂລກວ່າຊັ້ນແຕ່ຂ້ອຍເອັງບໍ່ໄດ້ຄິດວ່າຈີນຊິຄອງໂລກແບບງ່າຍດາຍດອກ,ເຖີງແມ່ນວ່າເຈົ້າສິໄປທົ່ວໂລກຫຼືຂະຫຽາຍອິດທິພົນໄປທົ່ວໂລກກໍແລ້ວແຕ່ແຕ່ເຈົ້າກໍຍັງຂາດພື້ນຖານໃນການຮັບຮູ້,ຮັບຮອງ,ເວົ້າລວມແລ້ວກໍຄືຄຸນຄ່າຂອງຄວາມນິຍົມຊົມຊອບນັ້ນເອງແລະຜູ້ທີ່ຈະຮັບຮູ້ເຈົ້າກໍມີແຕ່ຜະເດັດການນັ້ນເອັງ.

Nov 27, 2019 11:00 PM

ຜູ້ອ່ານທີ່ບໍ່ອອກຊື່

The Chinese promised jobs not pays. The red Chinese have 1.4 billion slaves in China. Now they have another 6 million in Laos. Don't worry, be happy.

Nov 26, 2019 01:59 PM

ເຕັມຫນ້າ