ເສັຽເງີນຫຼາຍລ້ານ, ຖືກມິຈສາຊີບ ຕົວະໃຫ້ຖືກເລຂ

ມາຮອດປັດຈຸບັນມີກຸ່ມມິຈສາຊີບ ຫຼືນັກຕົວະຕົ້ມ ໄດ້ສ້າງເພສໃນເຟສບຸກ ໂດຍໃສ່ຊື່ເປັນພາສາວຽດນາມ ແລະໂຄສະນາວ່າ ຕົນເອງເປັນໂຕແທນຈໍາໜ່າຍຫວຍພັທນາ ທີ່ສາມາດໃຫ້ເລຂລາງວັນ 6 ໂຕ ແກ່ຜູ້ທີ່ຕິດຕໍ່ໄປຫາພວກເຂົາເຈົ້າ ຜ່ານທາງເບີໂທ ແລະວອດແອັບໄດ້ ແຕ່ຢ່າງໃດກໍຕາມ ຜູ້ທີ່ຕ້ອງການໄດ້ເລຂລາງວັນດັ່ງກ່າວ ແລ້ວຕິດຕໍ່ໄປນັ້ນ ຈະຕ້ອງໂອນເງິນລົງທະບຽນກ່ອນ ເປັນເງິນຈໍານວນ 3 ລ້ານກີບ ເພື່ອແລກກັບການຖືກເລຂລາງວັນ ແຕ່ 400-1,600 ລ້ານກີບ ແຕ່ຫາກຜູ້ໃດບໍ່ຖືກເລຂລາງວັນ ກໍຈະໄດ້ເງິນຄືນ 50 ລ້ານກີບ ແຕ່ທີ່ຜ່ານມາ ກໍຍັງບໍ່ທັນເຫັນຜູ້ໃດໄດ້ເງິນຄືນເທື່ອ, ດັ່ງຊາວບ້ານ ຜູ້ທີ່ຖືກຕົວະໃຫ້ໂອນເງິນໃຫ້ກຸ່ມດັ່ງກ່າວເປັນຈໍານວນ 18 ລ້ານກີບ ຢູ່ເມືອງໄຊເສດຖາ ນະຄອນຫຼວງວຽງຈັນ ທ່ານນຶ່ງ ກ່າວຕໍ່ວິທຍຸເອເຊັຽເສຣີ ໃນວັນທີ່ 29 ທັນວາ 2021 ນີ້ວ່າ:

“ເພິ່ນກໍໃຫ້ໂອນ 3 ລ້ານກ່ອນ ແລ້ວກໍໃຫ້ໂອນ 5 ລ້ານ ແລ້ວກໍໂອນອີກ 10 ລ້ານ ໂອນອີກ 8 ລ້ານຫັ້ນແຫຼະ ແລ້ວບໍ່ໄດ້ອີກເທື່ອດອກເລຂຫັ້ນນ່າ ໂອນແທ້ກໍບໍ່ໄດ້ຄືນແຫຼະ ເພິ່ນຍັງໂທຣະສັບມາດົນເຕີບແລ້ວ ປະມານເດືອນປາຍແລ້ວ ຄົນວຽດນາມນີ້ແຫຼະ ກໍຮູ້ແຫຼະ ພາສປອດກໍມີດອກ ຄົນວຽດນາມແທ້ໆນີ້ແຫຼະ ອັນນີ້ກໍແມ່ນປະມານຢູ່ 30 ປາຍຄົນພຸ້ນແຫຼະ ມີອີກພວກນຶ່ງອີກ ພວກນຶ່ງກໍາລັງເຮັດເອກສານ.”

ທ່ານກ່າວຕື່ມວ່າ ສາເຫດທີ່ໂອນເງິນໃຫ້ ກັບກຸ່ມນັກຕົວະຕົ້ມດັ່ງກ່າວນີ້ ຍ້ອນຫຼົງເຊື່ອວ່າ ພວກເຂົາເຈົ້າຈະສາມາດສົ່ງເລຂລາງວັນ 6 ໂຕມາໃຫ້ແທ້ ຈຶ່ງໄດ້ຊອກຫາເງິນຈາກບ່ອນຕ່າງໆ ບໍ່ວ່າຈະເປັນການຂາຍເຮືອນ, ຂາຍທີ່ດິນ ແລະເອົາຣົຖຈັກ ຫຼືຣົຖໃຫຍ່ໄປຈໍາ ເພື່ອໃຫ້ໄດ້ເງິນມາ.

ນອກຈາກນີ້ ສໍາລັບຜູ້ທີ່ເຄີຍໂອນເງິນໃຫ້ກຸ່ມນັກຕົວະຕົ້ມແລ້ວນັ້ນເທື່ອນຶ່ງ ກໍມັກຈະຖືກຕົວະໃຫ້ໂອນເງິນໃຫ້ອີກຫຼາຍເທື່ອ ເຮັດໃຫ້ຜູ້ຖືກຕົວະຕ້ອງເສັຍເງິນຢ່າງໜ້ອຍ 5 ລ້ານກີບ ແລະບາງຄົນກໍຖືກຕົວະຫຼາຍເຖິງ 50 ຫາ 70 ລ້ານກີບ.

ໃນຂະນະດຽວກັນ ນັກຕົວະຕົ້ມຂາຍເລຂລາງວັນ 6 ໂຕນັ້ນ ຈະຄ່ອຍໆປ່ຽນບັນຊີເຟສບຸກແລະເບີວອດແອັບໄປເລື້ອຍໆ ອີກທັງພວກເຂົາເຈົ້າຍັງນໍາຮູບພາບຂອງບໍຣິສັດໂຕແທນຈໍາໜ່າຍຫວຍພັທນາ ມາໃຊ້ແອບອ້າງເພື່ອຕົວະຕົ້ມຊາວບ້ານ, ດັ່ງພະນັກງານ ບໍຣິສັດໂຕແທນຈໍາໜ່າຍຫວຍພັທນາ ແບບຖືກກົດໝາຍ ທ່ານນຶ່ງ ກ່າວໃນມື້ດຽວກັນນີ້ວ່າ:

“ເຮົາກໍເຮັດກ່ຽວກັບຫວຍຫັ້ນນ່າ ເປັນໂຕແທນຈໍາໜ່າຍຫວຍ ຫວຍພະຍານາກ ທີ່ເຮົາເຫັນເຂົາ ກ໊ອບຮູບຂອງຫວຍພະຍານາກ ແລ້ວກໍເອົາໄປລົງເຟສຕົວະກໍມີ ມັນກໍເຮັດບໍ່ຖືກຫັ້ນນ່າ ແລ້ວກໍມີຜູ້ເສັຍຫາຍ ເຂົາກໍໂທມາຖາມເຮົາຫຼາຍຄົນຢູ່.”

ກ່ອນໜ້ານີ້ ຄືເມືອວັນທີ່ 24 ພຶສຈິກາ 2021 ທີ່ຜ່ານມາ ບໍຣິສັດໂຕແທນຈໍາໜ່າຍຫວຍພັທນາໂຊກໄຊຈະເລີນ ຈໍາກັດຜູ້ດຽວ ອອກໜັງສືແຈ້ງການວ່າ ປັດຈຸບັນ ມີກຸ່ມຄົນບໍ່ດີຈໍານວນນຶ່ງ ນໍາເອກະສານໂຕເລຂ, ໂລໂກ້ ແອບອ້າງເປັນພະນັກງານ ແລະໂຄສະນາ ເງື່ອນໄຂການຊື້ຫວຍ ເພື່ອສ້າງຂ້າວວ່າ ພວກເຂົາເຈົ້າສາມາດໃຫ້ເລຂລາງວັນ 6 ໂຕ ແກ່ຜູ້ທີ່ຕ້ອງການຖືກເລຂໄດ້ ເຊິ່ງການກະທໍາດັ່ງກ່າວນີ້ ເປັນຂ່າວປອມ ແລະບໍ່ມູນຄວາມຈິງ ໂດຍທາງບໍຣິສັດ ຈະສົມທົບກັບໜ່ວຍງານທີ່ກ່ຽວຂ້ອງ ເພື່ອດໍາເນີນການຕາມຂໍ້ກົດໝາຍ ກັບກຸ່ມຄົນດັ່ງກ່າວນີ້ຕໍ່ໄປ.

ທາງດ້ານບໍຣິສັດ ໂຕແທນຈໍາໜ່າຍຫວຍພັທນາ ແບບຖືກກົດໝາຍຈໍານວນນຶ່ງ ກໍເຊື່ອວ່າ ກຸ່ມນັກຕົວະຕົ້ມເປັນຄົນວຽດນາມ ຍ້ອນພວກເຂົາເຈົ້າ ຈະບໍ່ໄດ້ເວົ້າພາສາລາວ ດັ່ງທີ່ຄົນລາວໃຊ້ລົມກັນ ແລະເຖິງແມ່ນວ່າທາງບໍຣິສັດ ຈະພຍາຍາມຊອກຫາວ່າ ກຸ່ມນັກຕົວະຕົ້ມນີ້ແມ່ນໃຜ ແຕ່ກໍບໍ່ສາມາດຕິດຕາມໂຕໄດ້, ດັ່ງພະນັກງານ ບໍຣິສັດໂຕແທນຈໍາໜ່າຍຫວຍພັທນາແບບຖືກກົດໝາຍ ອີກນາງນຶ່ງ ກ່າວໃນມື້ດຽວກັນນີ້ວ່າ:

“ຈາກທີ່ເບິ່ງທີ່ການພິມເນາະ ກໍບໍ່ໜ້າຈະແມ່ນຄົນລາວແລ້ວ ເພາະວ່າເບິ່ງໜັງສື ທີ່ເຂົາເຈົ້າແປຫັ້ນ ຈາກ google translate ເອົາ ມີແຕ່ໃຫ້ຮວບຮວມຫຼັກຖານ ແລ້ວໄປແຈ້ງຕໍາຣວດເລີຍເດີ້ ເພາະວ່າທາງບໍຣິສັດເຮົາ ກໍເຄີຍພຍາຍາມຕິດຕໍ່ຫາເຂົາເຈົ້າແລ້ວ ແຕ່ເຂົາເຈົ້າບໍ່ໄດ້ຮັບສາຍ ແລ້ວກໍບໍ່ໄດ້ຕິດຕໍ່ກັບ ແລ້ວກໍບໍ່ໃຫ້ພວກເຮົາຕິດຕໍ່ຫາເລີຍ ມີແຕ່ໃຫ້ໄປແຈ້ງເຈົ້າໜ້າທີ່ຕໍາຣວດເລີຍ.”

ເຖິງແມ່ນວ່າ ຜູ້ເສັຍຫາຍຈໍານວນນຶ່ງ ຈະພຍາຍາມຮວບຮວມຫຼັກຖານ ເພື່ອແຈ້ງຄວາມ ໃຫ້ເຈົ້າໜ້າທີ່ ທີ່ກ່ຽວຂ້ອງດໍາເນີນຄະດີ ກັບກຸ່ມຄົນບໍ່ດີດັ່ງກ່າວນີ້ແລ້ວກໍຕາມ ແຕ່ຢ່າງໃດກໍຕາມ ຂບວນການຕົວະຕົ້ມດັ່ງກ່າວນີ້ ກໍເກີດຂຶ້ນຜ່ານຣະບົບອອນລາຍນ໌ ເຮັດໃຫ້ການຊອກຫາໂຕນັກຕົວະຕົ້ມມາດໍາເນີນຄະດີຕາມກົດໝາຍນັ້ນ ຄົງເປັນໄປໄດ້ຍາກ, ດັ່ງເຈົ້າໜ້າທີ່ຂັ້ນທ້ອງຖິ່ນ ທີ່ໄດ້ຮັບແຈ້ງເຣື່ອງຈາກຊາວບ້ານ ທີ່ຖືກຕົວະໃຫ້ຊື້ເລຂ 6 ໂຕ ຢູ່ເມືອງຊໍາເໜືອ ແຂວງຫົວພັນ ນາງນຶ່ງ ກ່າວວ່າ:

“ເຈົ້າກະຂຽນພາສາລາວຫັ້ນຈະແຈ້ງ ແລ້ວກໍເຮົາບໍ່ເຫັນໜ້າເພິ່ນນ່າ ປະຊາຊົນເພິ່ນຖືກຕົວະ 3 ຄົນ ແລ້ວເອື້ອຍກໍຊ່ວຍເຂົາເຈົ້າແກ້ໄຂເທົ່ານັ້ນດອກ ລວມທັງໝົດເປັນ 3 ລ້ານກີບ ເຂົາກໍແນະນໍາວ່າໃຫ້ໂອນ 3 ລ້ານຕື່ມ ແລ້ວເຂົາເຈົ້າຈະເວົ້າໂຕເລຂອອກຫັ້ນ ນັກຕົ້ມຕົວະຫັ້ນນ່າ ໃຫ້ໂອນເງິນຄືນ ຄັນບໍ່ໂອນເອື້ອຍຊິແຈ້ງເຈົ້າໜ້າທີ່ ວ່າແນວນັ້ນດອກ ແລ້ວເອື້ອຍກະບໍ່ຮູ້.”

ທີ່ຜ່ານມາກຸ່ມນັກຕົວະຕົ້ມ ໄດ້ໂພສຂໍ້ຄວາມຂາຍເລຂລາງວັນ 6 ໂຕ ຜ່ານສື່ສັງຄົມອອນລາຍນ໌ຢ່າງຈະແຈ້ງ ແລະຂ້ອນຂ້າງແຜ່ຂຍາຍມາຫຼາຍເດືອນແລ້ວ ເຊິ່ງທາງບໍຣິສັດຣັຖວິສາຫະກິຈຫວຍພັທນາ ກໍໄດ້ໂຄສະນາບໍ່ໃຫ້ປະຊາຊົນຫຼົງເຊື່ອ ແລະປະສານງານກັບເຈົ້າທີ່ຕໍາຣວດໃນການຊອກຫາໂຕຜູ້ກະທໍາຄວາມຜິດ, ດັ່ງເຈົ້າໜ້າທີ່ທີ່ກ່ຽວຂ້ອງ ຜູ້ປະສົງອອກຊື່ແລະຕໍາແໜ່ງ ນາງນຶ່ງກ່າວວ່າ:

“ສໍາລັບຄົນທີ່ວ່າ ຖືກຕົ້ມຖືກຫຍັງ ເຮົາກໍໄດ້ແຈ້ງໄປບໍ່ໃຫ້ເຂົາຫຼົງເຊື່ອ ຖ້າເຮົາອ່ານເນື້ອໃນທີ່ເຂົາເຈົ້າເຮັດແທ້ໆ ມັນກໍບໍ່ເປັນຕາຫຼົງເຊື່ອເທົ່າໃດຫັ້ນນ່າ ພວກເຮົາກໍແຈ້ງໄປແລ້ວ ວ່າເປັນປອມເດີ້ ມັນເປັນອິຫຍັງຫັ້ນນ່າ ໂຕນີ້ຂໍ້ມູນທີ່ວ່າ ບຸກຄົນຫັ້ນກໍໄດ້ແຈ້ງເຂົ້າໄປທາງຕໍາຣວດເສຖກິຈ ເຂົາເຈົ້າກໍໄດ້ດໍາເນີນການໄປແລ້ວ.”

ໃນຂະນະດຽວກັນ ຜູ້ຖືກຕົວຕົ້ມ ວ່າຈະຖືກເລຂລາງວັນ 6 ໂຕນີ້ ກໍຢາກໃຫ້ໜ່ວຍງານທີ່ກ່ຽວຂ້ອງ ກວາດລ້າງແລະຊອກຈັບໂຕຜູ້ກະທໍາຜິດມາລົງໂທດຢ່າງຈິງຈັງ, ດັ່ງຊາວນະຄອນຫຼວງວຽງຈັນ ຜູ້ຖືກຕົວະຕົ້ມ ອີກທ່ານນຶ່ງ ກ່າວວ່າ:

“ຍັງບໍ່ທັນຈັບໄດ້ ພວກນັ້ນຫັ້ນນ່າ ດຽວນີ້ເຂົາວ່າເປັນຄົນວຽດນາມວ່າຊັ້ນ ກໍຢາກໃຫ້ໜ່ວຍງານ ນໍາໂຕພວກເຂົາເຈົ້າຫັ້ນມາດໍາເນີນຄະດີ ຕາມຣະບຽບການ ແລ້ວກໍສົ່ງເງິນ ເວລາປະຊາຊົນນີ້ ເພາະວ່າກ່ຽວກັບຜົນເສັຍຫາຍຫັ້ນ ແຕ່ວ່າຂໍ້ມູນກ່ຽວກັບເລຂບັນຊີທະນາຄານ ພວກເຮົາກໍໄດ້ສົ່ງຫາ ເພາະວ່າພວກເຮົາໄດ້ໂອນເງິນເຂົ້າທະນາຄານອັນນັ້ນ ລາວ-ວຽດ.”

ກ່ຽວກັບເຣື່ອງນີ້ ວິທຍຸເອເຊັຽເສຣີ ໄດ້ຕິດຕໍ່ໄປຍັງເຈົ້າໜ້າທີ່ຕໍາຣວດທີ່ກ່ຽວຂ້ອງ ເພື່ອສອບຖາມກ່ຽວກັບ ຄວາມຄືບໜ້າໃນການຕິດຕາມໂຕຜູ້ກະທໍາຄວາມຜິດ ແຕ່ເຈົ້າໜ້າທີ່ ທີ່ກ່ຽວຂ້ອງບໍ່ສະດວກໃຫ້ຂໍ້ມູນ.

ອີງຕາມປະມວນກົດໝາຍອາຍາ ສບັບປີ 2017 ມາດຕຣາ 233 ຣະບຸວ່າ ບຸກຄົນໃດຫາກໃຊ້ເລ້ຫຼ່ຽມຕົວະຍົວະຫຼອກລວງດ້ວຍວິທີໃດກໍຕາມ ເພື່ອໃຫ້ຜູ້ອື່ນເອົາຊັບສິນໃຫ້ຕົນ ຈະຖືກລົງໂທດຕັດອິສຣະພາບແຕ່ 3 ເດືອນ ຫາ 3 ປີ ແລະ/ຫຼື ຖືກປັບໃໝ ແຕ່ 5 ລ້ານ ຫາ 20 ລ້ານກີບ ໃນກໍຣະນີທີ່ເອົາການສໍ້ໂກງຊັບເປັນອາຈິນ, ມີການຈັດຕັ້ງເປັນກຸ່ມ ຫຼືໃນກໍຣະນີກໍຄວາມເສັຍຫາຍຢ່າງຫຼວງຫຼາຍ ຈະຖືກລົງໂທດຕັດອິສຣະພາບ ແຕ່ 3-8 ປີ ແລະ/ຫຼືຖືກປັບໃໝ ແຕ່ 10 ລ້ານ ຫາ 50 ລ້ານກີບ.