ເກົາຫຼີໃຕ້ ຫ້າມພົລເມືອງຂອງຕົນ ເຂົ້າເຂດເສຖກິຈ ພິເສດ ສາມຫຼ່ຽມຄຳ

ເມື່ອວັນທີ 11 ມົກກະຣາ ທີ່ຜ່ານມາ ຣັຖມົນຕຣີ ກະຊວງການຕ່າງປະເທດ ເກົາຫຼີໃຕ້ ໄດ້ສັ່ງຫ້າມນັກທ່ອງທ່ຽວ ຊາວເກົາຫຼີໃຕ້ ເຂົ້າໄປທ່ຽວຢູ່ເຂດເສຖກິຈ ພິເສດ ສາມຫຼ່ຽມຄຳ ແຂວງບໍ່ແກ້ວ ໂດຍຄຳສັ່ງດ່ັງກ່າວມີຜົລຕັ້ງແຕ່ວັນທີ 01 ກຸມພາ ໄປຈົນຮອດວັນທີ 31 ກໍຣະກະດາ ປີ 2024 ແລະ ຖືເປັນການແຈ້ງເຕືອນໄພ ໃນລະດັບ 4 ເຊິ່ງເປັນການແຈ້ງເຕືອນໄພ ລະດັບສູງສຸດ ໃນລະດັບການແນະ ນຳການເດີນທາງ ຂອງຣັຖບານເກົາຫຼີໃຕ້. ອີງຕາມການຣາຍງານ ຂອງສຳນັກຂ່າວຢອນຫັບ (Yonhap News) ຈາກປະເທດເກົາຫຼີໃຕ້.

ໃນຄໍາສັ່ງສະບັບດັ່ງກ່າວນີ້ ຍັງໄດ້ລະບຸຕື່ມວ່າເຂດເສຖກິຈ ພິເສດ ສາມຫຼ່ຽມຄໍາ ໃນແຂວງບໍ່ແກ້ວ ເປັນພື້ນທີ່ ທີ່ຂຶ້ນຊື່ໃນເຣື່ອງຂອງກິຈກັມ ຜິດກົດໝາຍ ເຊັ່ນການຄ້າມະນຸສ ແລະ ການຫຼອກລວງຄົນໄປເຮັດວຽກ ເຊິ່ງການຕັດສິນໃຈ ອອກຄໍາສັ່ງຫ້າມດັ່ງກ່າວນີ້ ເກີດຂຶ້ນໃນຂະນະທີ່ມີຊາວເກົາຫຼີໃຕ້ ໄດ້ຕົກເປັນເຫຍື່ອ ຢູ່ໃນເຂດດັ່ງກ່າວຈຳນວນຫຼາຍຄັ້ງ ເຖິງແມ່ນວ່າ ໄດ້ມີການແຈ້ງເຕືອນໄພໃນລະດັບທີ 3 ໃນກ່ອນໜ້ານີ້ແລ້ວກໍຕາມ. ອີງຕາມຣັຖມົນຕຣີ ກະຊວງການຕ່າງປະເທດ ເກົາຫຼີໃຕ້ກ່າວ.

ກ່ຽວກັບເຣື່ອງນີ້ ວິທຍຸເອເຊັຽ ເສຣີ ໄດ້ຕິດຕໍ່ໄປຍັງສະຖານທູດເກົາຫຼີໃຕ້ ປະຈໍານະຄອນຫຼວງວຽງຈັນ ເພື່ອສອບຖາມຣາຍລະອຽດ ເພີ່ມຕື່ມ ເຊິ່ງເຈົ້າໜ້າທີ່ໄດ້ຢືນຢັນວ່າ ທາງການເກົາຫຼີໃຕ້ ໄດ້ມີການສັ່ງຫ້າມດັ່ງກ່າວແທ້ ແຕ່ກໍບໍ່ສາມາດເວົ້າເຖິງຣາຍລະອຽດໄດ້. ດັ່ງທ່ານໄດ້ກ່າວຕໍ່ວິທຍຸເອເຊັຍເສຣີໃນວັນທີ 15 ມົກຣາ ນີ້ວ່າ.

ທ່ານກ່າວວ່າ.

“ແມ່ນແລ້ວໃນເຂດສາມຫຼ່ຽມຄໍາ ທາງພວກເຮົາໄດ້ມີການຫາລືກັບຣັຖບານ ຂອງພວກເຮົາ ແຕ່ບໍ່ສາມາດໃຫ້ເວົ້າເຖິງຣາຍລະອຽດ ແລະໃຫ້ຂໍ້ມູນເພີ່ມຕື່ມໄດ້ ຫຼາຍກ່ວານີ້.”

ເຈົ້າໜ້າທີ່ຜແນກຖແລງຂ່າວ, ວັທນາທັມ ແລະ ທ່ອງທ່ຽວ ແຂວງບໍ່ແກ້ວ ໄດ້ກ່າວກ່ຽວກັບຄຳສັ່ງຫ້າມດັ່ງກ່າວ ຂອງທາງການເກົາຫຼີໃຕ້ ໂດຍທາງຜແນກ ຍັງບໍ່ຮູ້ຂ່າວເທື່ອ, ແຕ່ຕາມປົກກະຕິແລ້ວ ສຳລັບນັກທ່ອງທ່ຽວ ຊາວຕ່າງປະເທດ ທີ່ຈະເດີນທາງໄປທ່ອງທ່ຽວ ໃນເຂດເສຖກິຈ ພິເສດ ສາມຫຼ່ຽມຄໍາ ຕ້ອງມີພະນັກງານນຳທ່ຽວ ເປັນຜູ້ນຳພາໃນການເຂົ້າ-ອອກ ເພື່ອຮັບປະກັນຄວາມປອດໄພ ເນື່ອງຈາກບາງພື້ນທີ່ ຂ້ອນຂ້າງມີຄວາມສ່ຽງ.

ດ່ັງຍານາງກ່າວວ່າ:

“ບໍ່ມີໄກ໋ດ໌ ໄປນໍາ ມັນຈະບໍ່ມີຜູ້ທີ່ວ່າແນະນໍາໄປຫັ້ນເນາະ ເພາະວ່າມັນຈະບໍ່ເຂົ້ານັ້ນປານໃດ ເປັນເຂດທີ່ວ່າເພິ່ນຫ້າມ ໄປບໍ່ຖືກບ່ອນ ເພິ່ນກາບໍ່ຢາກໃຫ້ໄປຫັ້ນເຈົ້າ, ຈຸດທີ່ວ່າຢາກໃຫ້ແນະນຳຫັ້ນນ່າ ເປັນໄກ໋ດ໌ ພາໄປນີ້ດີກ່ວາເຈົ້າ.”

ພະນັກງານນໍາທ່ຽວ ພາສາເກົາຫຼີ ທີ່ມັກນໍາພານັກທ່ອງທ່ຽວຊາວເກົາຫຼີໃຕ້ ທ່ອງທ່ຽວໃນລາວກ່າວວ່າສຳລັບຄຳສັ່ງຫ້າມດັ່ງກ່າວນີ້ ທ່ານເອງໄດ້ຍິນຂ່າວຢູ່ ແຕ່ກໍຍັງບໍ່ທັນອ່ານຂ່າວແບບລະອຽດເທື່ອ ແລະສຳລັບນັກທ່ອງທ່ຽວ ຊາວເກົາຫຼີໃຕ້ ທີ່ມາທ່ຽວລາວນັ້ນ ສ່ວນໃຫຍ່ບໍ່ຄ່ອຍເດີນທາງໄປທ່ຽວ ໃນເຂດເສຖກິຈ ພິເສດ ສາມຫຼ່ຽມຄຳ ເຊິ່ງຈະມີຄົນຈີນຫຼາຍກ່ວາ ທີ່ເຂົ້າໄປໃນເຂດນັ້ນ.

ດັ່ງທ່ານກ່າວວ່າ:

“ໂອ. ໄດ້ຍິນ ແຕ່ບໍ່ທັນໄດ້ເຫັນຂ່າວເທື່ອ ບໍ່ທັນໄດ້ເບິ່ງຂ່າວລະອຽດ ບໍ່ເຄີຍເດ້ບໍ່ເຄີຍພາໄປຈັກເທື່ອ. ຊິແມ່ນຄົນຈີນສ່ວນຫຼາຍ ທາງນັ້ນແມ່ນວັງວຽງ ສ່ວນຫຼາຍຫຼວງພຣະບາງ ແຕ່ວ່າບໍ່ແກ້ວ ຈະບໍ່ຄ່ອຍຫຼາຍປານໃດ.”

ພະນັກງານນຳທ່ຽວ ພາສາເກົາຫຼີໃຕ້ ອີກນາງນຶ່ງກ່າວວ່າ ກ່ຽວກັບເຂດດັ່ງກ່າວນີ້ ນາງເອງກໍບໍ່ທັນຮູ້ວ່າມີຄຳສັ່ງຫ້າມຄົນເກົາຫຼີໃຕ້ ໄປໃນເຂດເສຖກິຈ ພິເສດສາມ ຫຼ່ຽມຄຳ ແຕ່ສຳລັບລູກຄ້າຊາວເກົາຫຼີໃຕ້ ສ່ວນໃຫຍ່ທີ່ນາງໄດ້ຕ້ອນຮັບນັ້ນ ບໍ່ຄ່ອຍໄປທ່ຽວ ຢູ່ໃນເຂດດັ່ງກ່າວຢູ່ແລ້ວ.

ດັ່ງນາງກ່າວວ່າ:

“ບໍ່ຄ່ອຍໄດ້ຍິນປານໃດ ບໍ່ຍັງບໍ່ເຄີຍເພິ່ນມາລາວ ບໍ່ແມ່ນມັກໄປວັງວຽງ ບາງເທື່ອທ່ຽວຢູ່ວຽງຈັນ ນີ້ແຫຼະ ສ່ວນຫຼາຍບໍ່ໄດ້ໄປທາງສາມຫຼ່ຽມ.”

ຊາວລາວອີກທ່ານນຶ່ງ ກໍເຫັນວ່າການແກ້ໄຂ ແລະຊ່ອຍເຫຼືອເຫຍື່ອຢູ່ເຂດເສຖກິຈ ພິເສດ ສາມຫຼ່ຽມຄຳ ນັ້ນຍັງບໍ່ທັນໄດ້ມີພາກສ່ວນໃດ ໃນລາວ ທີ່ເຮັດວຽກດ້ານນີ້ແບບຈິງຈັງ ຈຶ່ງເຮັດໃຫ້ເຂດດັ່ງກ່າວ ຍັງຄົງເປັນເຂດອັນຕະລາຍຕໍ່ຊາວລາວ ແລະຕ່າງປະເທດ ໂດຍສະເພາະຜູ້ທີ່ມີຄວາມຮູ້ ທາງດ້ານຄອມພີວເຕີ້ ທີ່ອາດຖືກຕົວະໄປເຮັດວຽກ ໄດ້ງ່າຍ.

ດັ່ງທ່ານກ່າວວ່າ:

“ມັນບໍ່ມີໜ່ວຍງານທີ່ກ່ຽວຂ້ອງ ທີ່ວ່າຈະເຂົ້າໄປດູແລຈີງຈັງປະເທດລາວເຮົາ ມັນບໍ່ເຄີຍໄດ້ມີງົບປະມານ ທີ່ວ່າຈະໄປຊ່ອຍເຫຼືອ ຜູ້ທີ່ວ່າຕົກທຸກໄດ້ຍາກ ສ່ວນຫຼາຍມີແຕ່ຕ່າງປະເທດ ຊ່ອຍເຫຼືອ ບໍ່ເຄີຍໄດ້ເຫັນຈັກຄັ້ງ. ສ່ວນຫຼາຍກາຊິເປັນພວກທີ່ວ່າ ເກັ່ງຄອມພີວເຕີ້ ໄດ້ພາສາອັງກິດ ຈັ່ງຊີ້ເນາະ. ເຂົາເຈົ້າຊິຊັກຈູງ ໃນການໄປເຮັດວຽກ.”

ກ່ອນໜ້ານີ້ ຫຼາຍປະເທດ ໄດ້ອອກແຈ້ງການເຕືອນ ພົລເມືອງຂອງຕົນ ເພື່ອໃຫ້ຫຼີກລ້ຽງການເດີນທາງ ໄປທ່ຽວ ຢູ່ເຂດເສຖກິຈ ພິເສດ ສາມຫຼ່ຽມຄຳ ເປັນຕົ້ນ ສະຫະຣັຖອາເມຣິກາ, ໄທຍ, ມາເລເຊັຍ, ອິນເດັຽ, ອອດສເຕຣເລັຽ, ສີລັງກາ ແລະ ອື່ນໆ.

ຫຼ້າສຸດໃນວັນທີ 08 ທັນວາ 2023 ທີ່ຜ່ານມາ ຣັຖບານອັງກິດ ໄດ້ປະກາດຄວ້ຳບາດ ບຸກຄົນ ແລະໜ່ວຍງານທີ່ມີສ່ວນກ່ຽວຂ້ອງກັບການຄ້າມະນຸສ ໃນປະເທດກັມພູຊາ, ລາວ ແລະ ພະມ້າ ດ້ວຍການບັງຄັບ, ຂູດຮີດ ໃຫ້ເຮັດວຽກເປັນສະແກມເມີ ຈຳນວນ 14 ຄົນ, ໃນນີ້ແມ່ນປະກອບດ້ວຍ ຜູ້ທີ່ກ່ຽວຂ້ອງກັບບັນຫາການຄ້າມະນຸສ ຢູ່ເຂດເສຖກິຈ ພິເສດ ສາມຫຼ່ຽມຄຳ ຢູ່ເມືອງຕົ້ນເຜິ້ງ ແຂວງບໍ່ແກ້ວ ປະເທດລາວ ຈຳນວນ 4 ຄົນ ປະກອບມີ ທ່ານ ຈ້າວເຫວີ່ຍ, ເຈົ້າຂອງ ແລະ ປະທານ ຄິງສ໌ ໂຣມັນສ໌ ກຣຸບ (Kings Romans Group), ຍານາງ ກຸ້ຍຊີນຊູ ເມັຍຂອງທ່ານ ຈ້າວເຫວີ່ຍ ແລະ ມີຕຳແໜ່ງ ເປັນຜູ້ອຳນວຍການ ຄິງສ໌ ໂຣມັນສ໌ ກຣຸບ (Kings Romans Group), ທ່ານ ນັດ ຣຸ່ງຕະວັນສີຣິ, ສັນຊາຕໄທຍ ຜູ້ຖືຮຸ້ນໃນ ຄິງສ໌ ໂຣມັນສ໌ (Kings Romans Company Limited) ແລະ ທ່ານ ອັບບາສ ອີບີຣາຮີມ, ສັນຊາຕອອດສເຕຣເລັຽ ຜູ້ອຳນວຍການທົ່ວໄປຂອງ ຄິງສ໌ ໂຣມັນສ໌ (Kings Romans Casino and Entertainment Co.)