ຄົນຫວ່າງງານສາມຫຼ່ຽມຄໍາ ຂໍໃຫ້ຊ່ອຍ ກັບບ້ານ

ຈໍາປາທອງ
2021-06-21
Share
ຄົນຫວ່າງງານສາມຫຼ່ຽມຄໍາ ຂໍໃຫ້ຊ່ອຍ ກັບບ້ານ ໜ່ວຍງານແພດສະເພາະກິຈ ຕັ້ງດ່ານກວດກາ ຜູ້ສັນຈອນໄປມາ ເຂດ ເມືອງຕົ້ນເຜິ້ງ ແຂວງບໍ່ແກ້ວ ຕາມມາຕການປ້ອງກັນໂຄວິດ-19
ນັກຂ່າວພົລເມືອງ

ຄົນງານລາວຈໍານວນນຶ່ງ ທີ່ເຮັດວຽກຢູ່ ເຂດ ພິເສດສາມຫລ່ຽມຄໍາ ເມືອງຕົ້ນເຜິ້ງ ແຂວງບໍ່ແກ້ວ ຢາກໃຫ້ພາກສ່ວນ ທີ່ກ່ຽວຂ້ອງ ອໍານວຍຄວາມສະດວກ ໃຫ້ໄດ້ກັບຄືນບ້ານເກີດໄວ ຍ້ອນບໍ່ມີວຽກເຮັດ, ບໍ່ມີເງິນ, ລໍາບາກໃນການດໍາເນີນ ຊີວິດປະຈໍາວັນ. ເຖິງ ແມ່ນວ່າຫລາຍຄົນໄດ້ປະຕິບັດ ຕາມເງື່ອນໄຂ ຂອງຄະນະຄຸ້ມຄອງ ເຂດເສຖກິດພິເສດທີ່ວ່າຜູ້ໃດຈະອອກ ໄປຈາກເຂດເສຖກິດ ພິເສດ ຕ້ອງໄດ້ສັກວັກຊິນ ປ້ອງກັນໂຄວິດ-19 ຄົບ 2 ເຂັມ ແລະ ມີເອກກະສານຢັ້ງຢືນ ຢ່າງຖືກຕ້ອງແລ້ວ ແຕ່ກໍຍັງບໍ່ທັນໄດ້ ອອກໄປຈາກເຂດນັ້ນເທື່ອ ໂດຍທີ່ພາກສ່ວນທີ່ກ່ຽວຂ້ອງ ບໍ່ບອກສາເຫດແບບຈະແຈ້ງໃຫ້ຮູ້. ແຕ່ຄົນງານຜູ້ນຶ່ງ ທີ່ຍັງບໍ່ທັນໄດ້ອອກ ຈາກເຂດເສຖກິດພິເສດນັ້ນ ເວົ້າຕໍ່ວິທຍຸເອເຊັຍເສຣີ ໃນມື້ວັນທີ 21 ມິຖຸນາ ນີ້ວ່າ ມີໝູ່ 4 ຄົນ ໄດ້ອອກໄປແລ້ວ ໂດຍໄດ້ຈ່າຍເງິນ ໃຫ້ເຈົ້າໜ້າທີ່:

“ຍັງບໍ່ໄດ້ອອກ ເຮົາໂທໄປ ມີແຕ່ບອກວ່າໃຫ້ຖ້າ. ອັນນີ້ແມ່ນຫຍັງເຮົາກະມີຄົບແລ້ວ ເປັນຫຍັງເຮົາຄືເມືອບໍ່ໄດ້. ເຮົາບໍ່ຢາກຢູ່ໃນນ່າ ເພາະວ່າຈ່າຍຄ່າຫ້ອງ ທັງຄ່າກິນຄ່າຫຍັງ ແລະ ເຂົາເຈົ້າກະບໍ່ໄດ້ຫລຸດໃຫ້ ເຮົາກໍໝົດເງິນຫລາຍຫັ້ນນ່າ ແຫລະເຮົາຢາກອອກ ເຮົາຢາກເມືອຫັ້ນນ່າ. ມື້ນັ້ນໝູ່ເຮົາ 4 ຄົນ ກໍໄດ້ອອກໄປແລ້ວ ຕ້ອງໄດ້ຈ້າງເຂົາຄົນນຶ່ງລະ 2 ລ້ານ 5.”

ໃນຂນະດຽວກັນ ທ່ານກໍເຫັນວ່າ ມີຄົນຈີນ ຈາກເມືອງຕົ້ນເຜິ້ງ ສາມາດເຂົ້າມາໃນເຂດເສຖກິດພິເສດ ສາມຫລ່ຽມຄໍານີ້ໄດ້, ແຕ່ສໍາລັບ ຄົນລາວ ທີ່ມີເອກກະສານຖືກຕ້ອງ ກັບບໍ່ໃຫ້ ອອກຈາກເຂດນັ້ນໄດ້:

“ຄົນຈີນຫັ້ນນ່າ ແບບເຂົາຄືເຮັດແບບປົກກະຕິ ແບບບໍ່ມີຫຍັງເກີດຂຶ້ນຫັ້ນນ່າ ແຕ່ຄົນລາວເຮົາຫັ້ນນ່າ ເຂົາເຫັນນະ ຄົນລາວເຮົາສິອອກ ໄປບໍ່ໄດ້ບາງທີເຂົາກໍດ່າ. ແຕ່ວ່າມີຄົນຈີນຢູ່ໃນ ຕົ້ນເຜີ້ງ ສິເຂົ້າມາໃນຄາສິໂນນ່າ ໄດ້.”

ແລະ ຄົນງານຢູ່ເຂດເສຖກິດພິເສດ ອີກຜູ້ນຶ່ງ ກໍເວົ້າວ່າ ຕົນເອງກໍຢາກອອກໄປຈາກ ເຂດນີ້ຄືກັນ ເພາະບໍ່ໄດ້ເຮັດວຽກ, ບໍ່ມີເງິນໃຊ້ ຈ່າຍແລ້ວ ແລະເຈົ້າໜ້າທີ່ ທີ່ກ່ຽວຂ້ອງກໍບໍ່ໄດ້ ຊ່ອຍເຫລືອຫຍັງຈັກຢ່າງ ດັ່ງນັ້ນຈຶ່ງຢາກໃຫ້ທາງການລາວ ອໍານວຍຄວາມສະດວກ ໃຫ້ໄດ້ອອກຈາກເຂດນີ້ໄວ ຍ້ອນບໍ່ມີໃຜຊ່ອຍ, ໃຜກໍຢາກໄດ້ເງິນ:

“ເຮົາໂທຫາຕໍາຣວດຫລາຍຄົນແລ້ວ ເຂົາເຈົ້າບໍ່ມີຜູ້ໃດຊ່ວຍ ເຂົາບໍ່ໄດ້ຊ່ວຍເຮົາຈັກຢ່າງ. ຂນາດເຈົ້າຂອງໂຮງແຮມຍັງບໍ່ຊ່ວຍ. ຢູ່ໃນ ນີ້ນ່າ ຄັນສິເວົ້ານ່າ ບໍ່ມີເງິນເຮັດຫຍັງ ກໍຍາກຢູ່ແລ້ວ ກະແຈ້ງຫຍັງກໍບໍ່ມີໃຜຢາກຊ່ວຍ ໃຜກໍຢາກໄດ້ເງິນຫັ້ນນ່າ.”

ກ່ຽວກັບເຣື່ອງທີ່ວ່ານີ້ ເຈົ້າໜ້າທີ່ ຄະນະຄຸ້ມຄອງ ເຂດເສຖກິດພິເສດ ແຂວງບໍ່ແກ້ວ ທ່ານນຶ່ງກ່າວວ່າ ມີແຈ້ງການວັນທີ 8 ມິຖຸນາ 2021 ວ່າ ຄົນລາວ ຫລືຄົນຕ່າງປະເທດ ທີ່ເຮັດວຽກຢູ່ໃນເຂດເສຖກິດພິເສດ ຜູ້ຕ້ອງການກັບຄືນພູມລໍາເນົາ ຂອງຕົນນັ້ນກໍໄປລົງ ທະບຽນໄດ້ ແຕ່ຕ້ອງມີເງື່ອນໄຂ ຄືຕ້ອງໄດ້ສັກວັກຊິນ ປ້ອງກັນໂຄວິດ-19 ຄົບ 2 ເຂັມ ກ່ອນຈະເດີນທາງໄດ້. ແລະວ່າທີ່ຜ່ານມາ ກໍໄດ້ອະນຸຍາດໃຫ້ຄົນງານ ຈໍານວນນຶ່ງອອກໄປຈາກເຂດນີ້ແລ້ວ ແຕ່ຍັງອີກຈໍານວນນຶ່ງ ອອກໄປບໍ່ໄດ້ ຍ້ອນນໍ້າຢາກວດຫາເຊື້ອ ໂຄວິດ-19 ໝົດແລ້ວ, ທາງເມືອງຕົ້ນເຜິ້ງໃຫ້ລໍຖ້າກ່ອນ ດັ່ງທີ່ທ່ານກ່າວວ່າ:

“ມັນເປັນແນວນີ້ ດຽວນີ້ອອກໄປມັນກໍຕ້ອງໄດ້ກວດໂຄວິດ ຢູ່ເມືອງຕົ້ນເຜິ້ງ ດຽວນີ້ຢູ່ແຂວງຫັ້ນນໍ້າຢາ ກວດໂຄວິດມັນໝົດ. ທີ່ຈິງ ເພິ່ນກໍຢາກປ່ອຍຄົນລາວ ອອກໝົດຫັ້ນນະ ແຕ່ວ່າ ແບບວ່າຫັ້ນແຫລະ ຄັນມີນໍ້າຢາໂຕນີ້ມາປຸບ ເຂົາເຈົ້າກວດ ເຂົາເຈົ້າກໍຈະເອົາ ມື້ນຶ່ງເທື່ອນຶ່ງ ກໍສິແມ່ນ 700-800 ຄົນນີ້ນະ. ດຽວນີ້ເຮົາຣະບາຍອອກໄດ້ເທື່ອລະ 100-200 ຊື່ໆ. ບໍ່ມີຄໍາຕອບເທື່ອນໍ ແຕ່ວ່າກະສິ ແມ່ນອາທິດນີ້ ເພິ່ນວ່າກໍຢາກໃຫ້ມັນໄດ້ໄວຫັ້ນນະ.”

ເພື່ອປ້ອງກັນການຣະບາດຂອງໂຄວິດ-19 ຄະນະສະເພາະກິດ ປ້ອງກັນໂຄວິດ-19 ໄດ້ອອກແຈ້ງການກ່ຽວກັບ ການສືບຕໍ່ປະຕິບັດ ມາຕການປ້ອງກັນໂຄວິດ-19 ໄປຕື່ມອີກ 15 ມື້ ຄືແຕ່ວັນທີ 20 ມິຖຸນາ ຫາ ວັນທີ 4 ກໍຣະກະດາ 2021 ຊຶ່ງມີທັງຍັງຫ້າມບໍ່ໃຫ້ ຕັ້ງວົງຊຸມແຊວ, ຫ້າມຂາຍເຄື່ອງຢູ່ເດີ່ນທາດຫລວງ, ບໍ່ໃຫ້ເປີດສະຖານທີ່ ທ່ອງທ່ຽວ ແລະ ສວນອາຫານ, ຫ້າມບໍ່ໃຫ້ຜູ້ທີ່ບໍ່ໄດ້ສັກ ວັກຊິນປ້ອງກັນ ໂຄວິດ-19 ເຂົ້າ-ອອກ ນະຄອນຫລວງວຽງຈັນ. ແຕ່ກໍໄດ້ຜ່ອນຜັນມາຕການລົງ ຄືໃຫ້ເປີດຮ້ານເສີມສວຍ ແລະ ຮ້ານຕັດຜົມ, ຕລາດກາງຄືນແຄມຂອງ ສວນເຈົ້າອະນຸວົງ ແລະ ອື່ນໆອີກ ແຕ່ບໍ່ໃຫ້ເກີນ 10:00 ໂມງກາງຄືນ, ໃຫ້ອອກກໍາລັງກາຍ ນອກສະຖານທີ່ ໄດ້ ແຕ່ໃຫ້ຮັກສາໄລຍະຫ່າງ, ໃສ່ຜ້າອັດປາກ ອັດດັງ, ສ່ວນການເດີນທາງເຂົ້າ-ອອກ ແຂວງຕໍ່ແຂວງ ຕ້ອງໄດ້ຮັບ ອະນຸຍາດ ຈາກ ຄະນະສະເພາະກິດແຂວງກ່ອນ.

ເຈົ້າໜ້າທີ່ສະເພາະກິດ ທ່ານນຶ່ງເວົ້າວ່າ ມາຕການທີ່ວ່ານັ້ນ ສາມາດເລິ້ມປະຕິບັດໄດ້ເລີຍ, ອໍານາດການປົກຄອງແຕ່ລະບ້ານໄດ້ແຈ້ງ ໃຫ້ລູກບ້ານ ຂອງຕົນຮູ້ແລ້ວ ແຕ່ກໍຍັງກໍານົດ ເຂດ ບ້ານແດງ ທີ່ຕ້ອງໄດ້ເຝົ້າຣະວັງຢູ່:

”ແມ່ນແຫຼະ ຄັນໂຕໃດເພິ່ນຜ່ອນຜັນ ກໍປະຕິບັດໄດ້. ນາຍບ້ານກໍເອົາອັນທີ່ວ່າໂຕແຈ້ງການ ຂອງມາຕການເພິ່ນມາ ແລະກໍແຈ້ງໃຫ້ ບ້ານແຕ່ລະບ້ານໃຫ້ເຂົາເຈົ້າຮູ້ແລ້ວເດ. ມັນມີ ເຂດແດງຫັ້ນນະ ເພິ່ນຢາກຈໍາກັດຢູ່ເຂດນັ້ນຫັ້ນ ເພາະວ່າມັນມີຄວາມສ່ຽງເດ ຜູ້ທີ່ວ່າ ກໍາລັງເຝົ້າຣະວັງ ຫັ້ນມັນມີຢູ່ ກໍາລັງລໍຖ້າຜົລກວດຫັ້ນນະ.”

ຕໍ່ມາຕການຜ່ອນຜັນນີ້ ເຈົ້າຂອງຮ້ານເສີມສວຍ ນາງນຶ່ງເວົ້າວ່າຕົນຮູ້ສຶກດີໃຈຫຼາຍ ເພາະໄດ້ປິດຮ້ານມາຫຼາຍເດືອນແລ້ວເຮັດໃຫ້ ບໍ່ມີຣາຍໄດ້. ເຖິງຈະຍັງບໍ່ທັນມີລູກຄ້າຫລາຍ ແຕ່ກໍດີກວ່າບໍ່ໄດ້ເປີດຮ້ານ ທາງຮ້ານກໍມີມາຕການປ້ອງກັນໂຄວິດ-19 ຄືໃຫ້ລູກຄ້າ ປະຕິບັດໄລຍະຫ່າງ, ໃສ່ຜ້າອັດປາກອັດດັງ ແລະ ມີເຈວລ້າງມືໃຫ້:

“ເລິ້ມເປີດມື້ນີ້ ເຮົາກໍບໍ່ໃຫ້ຄົນເຂົ້າມາຫລາຍ ກະມີຜ້າອັດປາກ ລະກະເຈວລ້າງມື. ມັນບໍ່ມີຫລາຍດອກຊ່ວງນີ້ ເພາະວ່າ ເຂົາກໍຍັງຢ້ານ ຢູ່ຕິລູກຄ້າກໍດາຍ. ກະຮູ້ສຶກດີໃຈຫັ້ນແຫລະ ເພາະໄດ້ປິດມາຫລາຍເດືອນ ລະເຮົາກໍບໍ່ມີເງິນຊື້ຢູ່ຊື້ກິນ.”

ເວົ້າເຖິງການຣະບາດ ຂອງເຊື້ອໂຄວິດ-19 ຢູ່ ປະເທດລາວ, ຈາກຜົລຂອງການກວດວິເຄາະ ຫາເຊື້ອໂຄວິດ-19 911 ຄົນ ໃນມື້ ວັນທີ 20 ມິຖຸນານີ້ ທາງການລາວກວດພົບຜູ້ຕິດເຊື້ອ ເພິ່ມຂຶ້ນອີກ 1 ຄົນ ຢູ່ແຂວງສວັນນະເຂດ, ເຮັດໃຫ້ລາວມີຜູ້ຕິດເຊື້ອ ສະສົມ 2,054 ຄົນ ດັ່ງ ດຣ. ລັດສະໝີ ວົງຄໍາຊາວ ຮອງຫົວໜ້າກົມຄວບຄຸມ ພຍາດຕິດຕໍ່ ກະຊວງ ສາທາຣະນະສຸຂ ແລະຕາງໜ້າຄະນະ ສະເພາະກິດ ປ້ອງກັນໂຄວິດ-19 ກ່າວໃນພິທີຖແລງຂ່າວ ຕໍ່ສື່ມວນຊົນ ໃນມື້ວັນທີ 21 ມິຖຸນາ ນີ້ວ່າ:

”ໃນມື້ວານນີ້ ທົ່ວປະເທດໄດ້ມີການເກັບຕົວຢ່າງ ມາກວດເຊື້ອໂຄວິດ-19 ທັງໝົດ 911 ຕົວຢ່າງ ຊຶ່ງໃນນັ້ນກວດພົບຜູ້ຕິດເຊື້ອ 1 ຄົນ ຊຶ່ງມາຈາກແຂວງສວັນນະເຂດ. ແມ່ນເປັນ ແຮງງານລາວ ທີ່ກັບຄືນມາຈາກປະເທດໃກ້ຄຽງ ຖືກຕ້ອງຕາມຣະບຽບຫລັກການ.”

ອີງຕາມການຣາຍງານຂອງຄະນະສະເພາະກິດ ປ້ອງກັນໂຄວິດ-19 ວັນທີ 21 ມິຖຸນາ ນີ້, ມາເຖິງປັດຈຸບັນ ຢູ່ລາວມີຜູ້ໄດ້ຮັບການ ກວດວິເຄາະຫາເຊື້ອໂຄວິດ-19 ທັງໝົດ 284,191 ຄົນ. ໃນນັ້ນມີຜູ້ຕິດເຊື້ອ ສະສົມ 2,054 ຄົນ, ເສັຍຊີວິດ 3 ຄົນ, ປິ່ນປົວຫາຍ ແລ້ວ 1,948 ຄົນ, ກໍາລັງປິ່ນປົວ ແລະ ຕິດຕາອາການຢູ່ໂຮງໝໍ 103 ຄົນ; ມີຜູ້ໄດ້ຮັບການສັກວັກຊິນ ເຂັມທີ 1 ແລ້ວ 780,552 ຄົນ ແລະໄດ້ສັກເຂັມທີ 2 ແລ້ວ 461,632 ຄົນ.

ຄໍາເຫັນ (1)

ເບິ່ງຄວາມເຫັນທັງໝົດ.

Anonymous says:
Jun 22, 2021 11:20 AM

ບໍ່ເຂົ້າໃຈຄືກັນທັ້ງໆທີ່ແຂວງບໍ່ແກ້ວກໍເປັນແຂວງນຶ່ງຂອງລາວແລະຄົນຢູ່ທີ່ນັ້ນກໍຄົນລາວແທ້ໆເປັນຫຍັງຈື່ງມີຂໍ້ຈໍາກັດແລະກີດຂວາງການສັນຈອນຂອງເຂົາເຈົ້າບາດຄົນຕ່າງຊາດເປັນຕົ້ນແມ່ນຄົນຈີນຄືມີສິດສັນຈອນໄດ້ຕາມຕ້ອງການແໍະບໍ່ມີຂໍ້ຜູກມັດໄດໆ,ແລະຍັງມີສິດເໜືອກ່ວາຄົນລາວເສັຽອີກແລະເຫດການດັ່ງກ່າວນີ້ມັນມີບັນຫາມາຕັ້ງແຕ່ຈີນເລີ້ມເຂົ້າມາສໍາປະທານທຸກໆພາກສ່ວນຂອງລາວແຕ່ເໜືອເຖິງໄຕ້,ທົ່ວປະເທດລາວໃຜໆກໍ່ຮູ້ແລະເຂົ້າໃຈດີຕໍ່ການລົງທືນຂອງຈີນນີ້,ແຕ່ຄວາມຄວມເຂົ້າໃຈນີ້ມ້ນໄດ້ແຍກເປັນສອງພາກສ່ວນເຊັ່ນພາກສ່ວນທີ່ໄດ້ຮັບຜົນປະໂຍດກໍເວົ້າວ່າເປັນການພັດທະນາພາກສ່ວນທີ່ບໍ່ໄດ້ຮັບຜົນປະໂຍດກັບທັງເສັຽຫາຍຊັບສີນແລະທີຢູ່ອາສັຍວ່າເປັນການທໍາລາຍຊາດຢ່າງສີ້ນເຊີງສະນັ້ນຂອ້ຍຢາກໄຫ້ພໍ່ແມ່ປະຊາລອງພິຈາລະນາແລະໄຕ່ຕອງເບີ່ງເອົາເອັງວ່າຈະເລືອກຂ້າງໄດດີລະວ່າງທຸກກາຍແຕ່ສະບາຍໃຈກັບທຸກໃຈແຕ່ສະບາຍກາຍ,ສຸດທ້າຍນີ້ຂ້ອຍເຂົ້າວ່າປະຈຸບັນນີ້ປະເທດລາວໄດ້ເສັຽຜົນປະໂຍດໄຫ້ຈີນໄປແລ້ວ69,9%ຂອງຈຸດສໍາຄັນໄຫ່ຽໆຢູ່ໃນປະເທດລາວເປັນຕົ້ນດ້ານຄວາມໝັ້ນຄົງ,ເສດຖກິດ,ຊັພຍາກອນ,ພື້ນຖານໂຄງຮ່າງແລະອື່ນໆ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ