ຜ້າອັດປາກອັດດັງມີຂາຍ ແຕ່ ແພງຂຶ້ນ

ຈໍາປາທອງ
2020-04-08
ອີແມວລ໌
ຄໍາເຫັນ
Share
ພິມ
ຜ້າອັດປາກອັດດັງ ທີ່ ທຸກຄົນຈໍາເປັນ ຕ້ອງມີຕ້ອງໃຊ້ ໃນສະຖານທີ່ສາທາຣະນະ ຢ່າງນ້ອຍ ເຮົາກໍໄດ້ເຮັດໜ້າທີ່ ຂອງພົລເມືອງດີ
ຜ້າອັດປາກອັດດັງ ທີ່ ທຸກຄົນຈໍາເປັນ ຕ້ອງມີຕ້ອງໃຊ້ ໃນສະຖານທີ່ສາທາຣະນະ ຢ່າງນ້ອຍ ເຮົາກໍໄດ້ເຮັດໜ້າທີ່ ຂອງພົລເມືອງດີ
RFA/TS

ປັດຈຸບັນ ພໍ່ຄ້າຄົນກາງຈໍານວນນຶ່ງໃນລາວ ທີ່ຊື້ຜ້າອັດປາກອັດດັງ ມາຈາກຕ່າງປະເທດ ແລະບໍຣິສັດບາງແຫ່ງໃນລາວ ສວຍໂອກາດຂຶ້ນ ຣາຄາຂາຍຍ່ອຍກັບລະ 150 ພັນ ເຖິງ 180 ພັນກີບ ຊຶ່ງຣາຄາທີ່ ທາງການກໍານົດໃຫ້ຂາຍ ແມ່ນ 1 ພັນກີບຕໍ່ແຜ່ນ ຫລື 50 ພັນກີບ ຕໍ່ກັບ. ແລະຈ່າວຂາຍໃຫ້ຮ້ານຂາຍຢາໃນຣາຄາກັບນຶ່ງ ໃນຣະຫວ່າງ 150 ຫາ160 ພັນກີບ, ຖ້າສັ່ງນໍາຮ້ານຂາຍຢາໃຫຍ່ເພິ່ນ ກໍຢູ່ໃນໝ້ອງ 100 ພັນກີບ ເຮັດໃຫ້ຫລາຍຮ້ານຂາດຜ້າອັດປາກອັດດັງ, ດັ່ງເຈົ້າຂອງຮ້ານຂາຍຢາແຫ່ງນຶ່ງ ໃນນະຄອນຫຼວງພະບາງ ເວົ້າຕໍ່ວິທຍຸເອເຊັຽ ເສຣີ ໃນມື້ວັນທີ 7 ເມສາ ນີ້ວ່າ:

”ຂະເຈົ້າ ມາຈ່າວແລ້ວມັນແພງນະ ແລ້ວບໍ່ເອົາ ຂະເຈົ້າໂທມາວ່າມີຫລາຍຢູ່ ແສນຫ້າ ແສນຫົກພຸ້ນນະ ສັ່ງຢູ່ວຽງຈັນ ຢູ່ນໍາຮ້ານຂາຍຢາເພິ່ນ ກະຍາກໄດ້ໝ່ອງແສນນຶ່ງ ນີ້ແຫລະ ມາຂາຍ.”

ນາງເວົ້າວ່າ ຜ້າອັດປາກອັດດັງ ທີ່ພໍ່ຄ້າຄົນກາງມາສເນີຂາຍໃຫ້ນັ້ນ ເປັນຜ້າອັດປາກອັດດັງ ທີ່ຜລິດຢູ່ປະເທດລາວເອງ, ບໍ່ຮູ້ວ່າມັນໄດ້ຜ່ານ ມາດຕຖານ ຂອງກະຊວງສາທາຣະນະສຸຂ ແລະມີຄວາມປອດພັຍ ຫລືບໍ່. ດັ່ງນັ້ນຮ້ານຂອງຕົນ ແລະຮ້ານໃກ້ຄຽງ ບໍ່ຢາກຊື້ມາຂາຍ ຍ້ອນ ຢ້ານຂາດທຶນ ແລະຢ້ານຜິດຣະບຽບ ຂອງທາງການເພິ່ນ.

ແລະເຈົ້າຂອງຮ້ານຂາຍຢາແຫ່ງນຶ່ງ ໃນນະຄອນຫລວງວຽງຈັນ ກໍເວົ້າວ່າ ມີພໍ່ຄ້າຄົນກາງ ສວຍໂອກາດຂຶ້ນຣາຄາຜ້າອັດປາກອັດດັງແທ້, ຢູ່ນະຄອນຫຼວງວຽງຈັນຂາຍກັບລະ 170 -180 ພັນກີບ, ມັນແພງເກີນ ກໍານົດຫຼາຍ, ດັ່ງນັ້ນຕົນຈຶ່ງບໍ່ຊື້ມາຂາຍ, ປະຕິບັດຕາມຄໍາສັ່ງ ຂອງທາງການ ກ່ຽວກັບການຄວບຄຸມຣາຄາ ຜ້າອັດປາກອັດດັງ ດັ່ງທີ່ນາງກ່າວວ່າ:

”ຂະເຈົ້າມາຈ່າວຂາຍກັບນຶ່ງ ແສນເຈັດ ແສນແປດ ຂາຍແພງໂພດ ເຮົາເລີຍບໍ່ຂາຍນໍ ບາງເທື່ອຂາຍລຸກໆນັ່ງໆ ຊິມາກະຕີຖືກຕີແພງ ກະເລີຍບໍ່ຂາຍສາ ມັນເກີນຣາຄາເພິ່ນກໍານົດໄວ້.”

ກ່ຽວກັບເຣຶ່ອງນີ້ ເຈົ້າໜ້າທີ່ລາວທ່ານນຶ່ງ ເວົ້າວ່າ ບັນຫາພໍ່ຄ້າຄົນກາງສວຍໂອກາດ ຂຶ້ນຣາຄາຜ້າອັດປາກອັດດັງ ເຖິງ 180 ພັນກີບ ຕໍ່ກັບ ນັ້ນ ກໍໄດ້ຍິນຢູ່ ແລະເຈົ້າໜ້າທີ່ໄດ້ປັບໃໝໄປແລ້ວຈໍານວນນຶ່ງ ແຕ່ກໍຍັງມີອີກຈໍານວນນຶ່ງ ທີ່ຍັງຝ່າຝືນກົດຣະບຽບຂອງທາງການຢູ່ເປັນຕົ້ນ ໃນເຂດທີ່ເຈົ້າໜ້າທີ່ ໄປກວດກາບໍ່ທົ່ວເຖິງ ດັ່ງທີ່ທ່ານກ່າວວ່າ:

“ແມ່ນແຫລະໄດ້ຍິນຢູ່ ເພິ່ນວ່າແສນແປດ ວ່າຊັ້ນເດ້ ເພິ່ນກະເວົ້າຢູ່ບາງບ່ອນກະປັບໃໝກັນເດ້ ແລ້ວບາງບ່ອນກະວຽດເຮັດປອມມາຂາຍ ເພິ່ນກະເວົ້າຢູ່ວ່າຊິເຄັ່ງຄັດ ໃນການກວດກາເຣຶ່ອງຣາຄານີ້ ແຕ່ວ່າເຣຶ່ອງ ພະນັກງານມັນກະບໍ່ທົ່ວເຖິງ.”

ເມື່ອບໍ່ດົນມານີ້ ເຈົ້າໜ້າທີ່ຕໍາຣວດ ນະຄອນຫລວງວຽງຈັນ ຈັບຄົນວຽດນາມ ຈໍານວນນຶ່ງ ທີ່ເອົາຜ້າອັດປາກອັດດັງປອມ ມາເລາະຂາຍໃຫ້ ປະຊາຊົນລາວ. ຜ້າອັດປາກອັດດັງປອມ ທີ່ວ່ານັ້ນ ເປັນອັນຕະລາຍ ຕໍ່ສຸຂພາບ ຢ່າງຮ້າຍແຮງ ໂດຍສະເພາະເຮັດໃຫ້ເກີດພຍາດກ່ຽວກັບ ຣະບົບທາງເດີນຫາຍໃຈ ແລະເມື່ອເດືອນທີ່ຜ່ານມາ ກະຊວງອຸດສາຫະກັມ ແລະການຄ້າ ກໍໄດ້ອອກກົດຣະບຽບ ຄວບຄຸມຣາຄາຜ້າອັດປາກ ອັດດັງ ໂດຍກໍານົດໃຫ້ຂາຍໃນຣາຄາ 1 ພັນ ກີບຕໍ່ແຜນ ຫລື 50 ພັນກີບຕໍ່ກັບ.

ເຕັມຫນ້າ