ທຸຣະກິດທ່ອງທ່ຽວຕົກຕໍ່າ ຍ້ອນ ພັຍແລ້ງ

ໄຊຍາ
2019-10-29
ອີແມວລ໌
ຄໍາເຫັນ
Share
ພິມ
ນັກທ່ອງທ່ຽວຊາວເອເຊັຽ ສ່ວນໃຫຍ່ແມ່ນຄົນຈີນ ທີ່ມັກທ່ຽວຊົມ ເມືອງມໍຣະດົກໂລກ ແຂວງຫຼວງພຣະບາງ
ນັກທ່ອງທ່ຽວຊາວເອເຊັຽ ສ່ວນໃຫຍ່ແມ່ນຄົນຈີນ ທີ່ມັກທ່ຽວຊົມ ເມືອງມໍຣະດົກໂລກ ແຂວງຫຼວງພຣະບາງ
RFA

ປີນີ້ຕາມລຳແມ່ນໍ້າຂອງ ຢູ່ແຂວງຫຼວງພຣະບາງ ແຫ້ງຫຼາຍ ເຮືອນໍາທ່ຽວບໍ່ສາມາດນໍານັກ ທ່ອງທ່ຽວໄປລ່ອງເຮືອຕາມລຳແມ່ນໍ້າຂອງໄດ້ ນອກຈາກນັ້ນຍອດແຂກ ເຂົ້າມາໃຊ້ບໍຣິການ ເຮືອນພັກກໍ່ຫຼຸດລົງ, ດ່ັງເຈົ້າຂອງເຮືອນພັກແຫ່ງນຶ່ງ ໄດ້ກ່າວຕໍ່ນັກຂ່າວ ເອເຊັຽເສຣີ ໃນວັນທີ 29 ຕຸລາວ່າ:

"ບ້ານພັກຂອງເຮົາ ນັກທ່ອງທ່ຽວຕົກເກືອບເຄິ່ງນຶ່ງ ຈາກສອງຫາສາມປີ ຫຼັງນໍ້າຂອງແຫ້ງເຈົ້າ ນໍ້າຂອງແຫ້ງຫຼາຍ."

ນາງກ່າວຕື່ມວ່າ ປີນີ້ນໍ້າຂອງບົກແຫ້ງຜິດປົກກະຕິ ສົ່ງຜົນເຮັດໃຫ້ເຮືອນໍາທ່ຽວ ບໍ່ສາມາດນໍານັກທ່ອງທ່ຽວລ່ອງຊົມຕາມລຳແມ່ນໍ້າຂອງໄດ້.

"ເຮືອນໍາທ່ຽວສ່ວນຫຼາຍດຽວນີ້ຫັ້ນ ກໍບໍ່ມີຫຼາຍເພາະວ່າມັນມີຫີນຫຼາຍ ຂະເຈົ້າກໍບໍຢາກໄປຫັ້ນນ່າ."

ສ່ວນໃນເຣື່ອງຂອງເຂື່ອນແຂວງຫຼວງພຣະບາງ ທີ່ກຽມຈະສ້າງນັ້ນ ຍິ່ງເຮັດໃຫ້ຜູ້ປະກອບການທ່ອງທ່ຽວ ວິຕົກກັງວົນຫຼາຍຂຶ້ນ ເນືື່ອງຈາກ ຕົກມາປີນີ້ ນໍ້າຂອງແຫ້ງແລ້ງຫຼາຍ. ຖ້າມີເຂື່ອນຕື່ມອີກນັ້ນ ບໍ່ຮູ້ຄືກັນວ່ານໍ້າຂອງ ຈະບົກແຫ້ງຊໍ່າໃດ ສະເພາະປີນີ້ ອອກເຮືອທ່ອງທ່ຽວບໍ່ໄດ້ ໃນໄລຍະນີ້ ຕາມຄວາມເປັນຈິງ ນໍ້າຂອງລົງນັ້ນ ຢູ່ໃນຣະຫວ່າງ ເດືອນມີນາ ຫາ ເດືອນເມສາ.

ໃນຂນະທີ່ການແກ້ໄຂ ສິ່ງອຸດຕັນຂອງການທ່ອງທ່ຽວ ທ່ານ ທອງລຸນ ສີສຸລິດ ໄດ້ກ່າວໃນກອງປະຊຸມປັບປຸງ ການທ່ອງທ່ຽວ ເມື່ອກາງປີທີ່ ຜ່ານມາວ່າ ການພັທນາ ການທ່ອງທ່ຽວ ຕ້ອງຕິດພັນກັບ ການອະນຸຮັກ ທັມມະຊາດ.

"ພວກເຮົາຈະໄດ້ສົ່ງເສີມຫຼາຍຕໍ່ໄປນີ້, ນຶ່ງ ຈະໄດ້ແກ້ໄຂບັນຫາທີ່ມັນຕິດ ຂັດອຸດຕັນ ຫຼືວ່າສິ່ງກີດຂວາງຕ່າງໆ ຄົນໄປຄົນມານັ້ນ, ສອງມາ ພວກເຮົາກໍຄວນປົກປັກຮັກສາອະນຸຮັກ ສະຖານທີ່ທ່ອງທ່ຽວ ມັນມີແລ້ວນີ້ໃຫ້ມັນຍືນຍົງ ພັທນາມັນ ແຕ່ບໍ່ໄດ້ ທຳລາຍ ສະພາບແວດລ້ອມ ແລະຂຍາຍສະຖານທີ່ທ່ອງທ່ຽວ ແຫ່ງອື່ນໆ ຂຶ້ນມາ ປະເທດລາວເຮົາຕ້ອງ ເອົາທ່ອງທ່ຽວທັມມະຊາດ ທ່ອງທ່ຽວວັທນາທັມ ທ່ອງທ່ຽວ ປວັດສາດເປັນຫຼັກ."

ອີງຕາມການຣາຍງານຂອງຂແນງການທ່ອງທ່ຽວ ປີ 2018 ຜ່ານມາ ການທ່ອງທ່ຽວລາວ ຫລຸດຄາດໝາຍຈາກໂຕເລກຄາດການ 5 ລ້ານ ຄົນ ແຕ່ມີນັກທ່ອງທ່ຽວເຂົ້າມາ 4 ລ້ານກ່ວາຄົນ. ປີນີ້ເປັນປີທ່ອງທ່ຽວ ລາວ-ຈີນ ການທ່ອງທ່ຽວຄາດວ່າ ນັກທ່ອງທ່ຽວຈີນ ຈະເຂົ້າມາ ລ້ານຄົນ ແຕ່ປັດຈຸບັນ ທົວນໍາທ່ຽວ ຂອງຈີນແມ່ນໄດ້ຜົລປະໂຫຍດ ຫຼາຍກ່ວາທົວນຳ ທ່ຽວຂອງລາວ.

ຄໍາເຫັນ (1)
Share

ລູກ​ນ້ຳ​ຄານ

ຈາກ ​ຫລວງ​ພ​ຣ​ບາງ

ຊາວຫລວງພຣະບາງ ສ່ວນຫລາຍກໍເພິ່ງພາ ການທ່ອງທ່ຽວ ເປັນລາຍໄດ້ຫລັກ ເພື່ອເອົາມາລ້ຽງຄອບຄົວ ຕັ້ງແຕ່ ການເຮັດວຽກ ໃນໂຮງແຮມ ບ້ານພັກ ຂອງຕົວເອງ, ການນຳທ່ຽວທາງເຮືອ ທາງລົດ ການຂາຍເຄື່ອງພື້ນເມືອງ ຫັດຖະກຳ ການປູກຝັງ ຂາຍໃຫ້ຮ້ານຫານ ແລະ ໂຮງແຮມ ແລະ ອື່ນໆ ໂດຍບໍ່ໄດ້ ອາໃສ ຫຍັງຫລາຍ ຈາກພັກລັດ, ແຕ່ພາກລັດ ກໍຍັງມີບົດບາດສຳຄັນ ທີ່ຈະສົ່ງເສີມ ການທ່ອງທ່ຽວ ໂດຍດຶງດູດເອົານັກທ່ອງທ່ຽວເຂົ້າມາຫລາຍໆ ໂດຍໃຫ້ຄວາມສະດວກແກ່ເຂົາເຈົ້າ ແລະ ສ້າງແຫລ່ງທ່ອງທ່ຽວ ໃຫ້ມີຄວາມສະດວກສະບາຍ ສວຍງາມ ຕາມທຳມະຊາດ ປາສະຈາກ ການປູກຕົ້ນໄມ້ ເສດຖະກິດ, ຮັກສາ ປ່າໄມ້ເອົາໄວ້ ແລະ ບໍ່ສ້າງເຂື່ອນ ກໍພໍແລ້ວ. ຜູ້ນຳໃນລະດັບແຂວງກໍມີຄວາມສຳຄັນ ໃນການສົ່ງເສີມ ການທ່ອງທ່ຽວ ຂອງແຂວງ, ຊຶ່ງຜູ້ໃນສະໄໝນີ້ ແມ່ນບໍ່ໄດ້ຊ່ອຍ ການທ່ອງທ່ຽວຫຍັງຫລາຍ ດັ່ງນັ້ນ ຖ້າຫາກວ່າ ຈະຊັບຊ້ອນ ຜູ້ນຳ ຢາກໃຫ້ ເອົາຄົນທ້ອງຖິ່ນ ທີ່ເຂົ້າໃຈ ວັດທະນະທຳ ປະເພນີ ແລະ ນິໃສໃຈຄໍ ຂອງຄົນຫລວງພຣະບາງແດ່ ແລະ ໃຫ້ຟັງຄວາມຄິດຄວາມເຫັນ ຂອງຊາວຫລວງພຣະບາງແດ່. ການໃຫ້ຫວຽດ ແລະ ຈີນ ເຂົ້າມາເຊົ່າໂຮງແຮມ ແລະ ຮ້ານອາຫານ ກໍເຮັດໃຫ້ ທຸລະກິດ ຂອງຄົນລາວ ເຊື່ອມໂຊມລົງ ເໝືອນກັນ. ຢາກໃຫ້ພາກລັດ ຈົ່ງເອົາໃຈໃສ່ ຈຳກັດ ປະເພດນີ້ແດ່ ຢ່າເຫັນແຕ່ ເງິນ ແລະ ການພົວພັນ ທາງການເມືອງລະດັບ ພັກຫລາຍ ຈົ່ງຫັນມາເບິ່ງ ປາກທ້ອງ ປະຊາຊົນແດ່. ຈົ່ງໃຫ້ເຂົ້າໃຈ ຄໍາວ່າ ຜູ້ນຳ ການເປັນຜູ້ນຳ ການນຳ ວ່າ ມີໜ້າທີ່ ແລະ ຮັບຜິດຊອບຫຍັງແທ້. ເປັນເວລາ ຫລາຍສິບປີມາແລ້ວ ແຕ່ກໍບໍ່ມີຫຍັງດີຂຶ້ນ ຕາມທີ່ຄຳເວົ້າ ຂອງທ່ານຜູ້ນຳເລີຍ ປະຊາຊົນ ເຮົາທຸກຫລາຍເດີ ນາຍຍົກ ທອງລຸງ. ຈົ່ງຊ່ອຍປະຊາຊົນຕົວເອງ ແລະ ປະເທດຊາດເຮົາເອງແດ່ເດີ.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Oct 31, 2019 07:03 AM

ເຕັມຫນ້າ