ສ້າງເຂດເສຖກິດ ຕາມແຄມທາງຣົດໄຟລາວ-ຈີນ

ທ່ານ ບຸນຕາ ເທບພະວົງ ສະມາຊິກສະພາແຫ່ງຊາດ ເຂດເລືອກຕັ້ງທີ 1 ນະຄອນຫຼວງວຽງຈັນ ໄດ້ສເນີຕໍ່ກອງປະຊຸມ ສມັຍສາມັນເທື່ອທີ 2 ຂອງສະພາແຫ່ງຊາດຊຸດທີ 9 ຂອງ ສປປລາວ ໃຫ້ມີການຄົ້ນຄວ້າໂຄງການພັທນາ ເຂດເສຖກິດ ຕາມ 2 ຟາກທາງຣົດໄຟ ລາວ-ຈີນ ແລະຢູ່ບໍລິເວນສະຖານີຣົດໄຟ ແຕ່ລະແຫ່ງ ເພື່ອສ້າງລາຍຮັບເຂົ້າປະເທດ. ທ່ານໄດ້ສເນີໃຫ້ມີການອອກແບບ ແຜນຜັງການພັທນານັ້ນໂດຍໄວ ເພື່ອຮອງຮັບການສັມປະທານ ຂອງນັກລົງທຶນທັງພາຍໃນ ແລະຕ່າງປະເທດ ແຕ່ເຈົ້າໜ້າທີ່ທາງການລາວທ່ານນຶ່ງ ຜູ້ຂໍສງວນຊື່ ແລະຕໍາແໜ່ງ ກ່າວຕໍ່ວິທຍຸເອເຊັຽເສຣີໃນມື້ວັນທີ 8 ພຶສຈິການີ້ວ່າ ຍັງເປັນໄປໄດ້ຍາກທີ່ຈະສ້າງເຂດພັທນາ ຕາມສອງຟາກທາງ ຣົດໄຟ ຫຼືຢູ່ບໍລິເວນສະຖານີຣົດໄຟແຕ່ລະແຫ່ງນັ້ນ ເພາະວ່າມັນຈະກວມເອົາດິນ ຂອງປະຊາຊົນຕື່ມອີກ ຫຼາຍຄອບຄົວ ແລະຈະຕ້ອງໄດ້ໃຫ້ການຊົດເຊີຽຄວາມເສັຽຫາຍຢ່າງສົມເຫດສົມຜົລ ດັ່ງທີ່ທ່ານກ່າວວ່າ:

“ສໍາຄັນກະແມ່ນເວົ້າເຣື່ອງການຊົດເຊີຍຫັ້ນແຫຼະ ຄັນວ່າໂຄງການດັ່ງກ່າວມີການຊົດເຊີຍ ແບບສົເຫັດສົມຜົລ ບໍ່ເອົາປຽບປະຊາຊົນຫຼາຍ ກໍອາຈເກີດຂຶ້ນໄດ້ຢູ່ ແຕ່ວ່ານະໂຍບາຍຕາມທິດທາງລວມ ເພິ່ນກໍວ່າສິມີຫັ້ນແຫຼະ ພັທນາ 2 ແລວທາງຣົດໄຟ.”

ທ່ານກ່າວຕື່ມວ່າ ມາຮອດປັດຈຸບັນ ໃນເຂດເມືອງຂອງທ່ານ ຍັງມີປະຊາຊົນຈໍານວນນຶ່ງ ບໍ່ທັນໄດ້ຮັບຄ່າຊົດເຊີຽຈາກໂຄງການ ກໍ່ສ້າງທາງຣົດໄຟ ລາວ-ຈີນ ເທື່ອ. ດັ່ງນັ້ນ ຫາກຈະມີໂຄງການສ້າງ ເຂດເສຖກິດຂຶ້ນ ຕາມ 2 ຟາກທາງຣົດໄຟ ຊຶ່ງຈະຖືກດິນຂອງຊາວບ້ານຕື່ມອີກນັ້ນ ທາງພາກສ່ວນທີ່ກ່ຽວຂ້ອງ ກໍຈະຕ້ອງວາງແຜນ ເຣື່ອງການຊົດເຊີຽຄວາມເສັຽຫາຍ ໃຫ້ຢ່າງຮອບຄອບ ເພື່ອບໍ່ໃຫ້ເກີດບັນຫາລ້າຊ້າ ແກ່ຍາວອີກ.

ນັກທຸຣະກິດ ຢູ່ແຂວງອຸດົມໄຊ ທ່ານນຶ່ງ ເວົ້າຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ ເປັນ ເຣື່ອງຍາກ ທີ່ຈະມີໂຄງການ ພັທນາເຂດເສຖກິດພິເສດຂຶ້ນຕາມ 2 ຟາກທາງຣົດໄຟນີ້ ຍ້ອນດິນແຄມທາງ ທີ່ທາງການສງວນໄວ້ນັ້ນ ບໍ່ກວ້າງພໍທີ່ຈະເຮັດໂຄງການຕ່າງໆ ຂຶ້ນໄດ້ ນອກຈາກຈະເອົາດິນປະຊາຊົນເພິ່ມຕື່ມ:

“ມັນຈະບໍ່ມີບ່ອນເຮັດລະຕີ້ ມັນລະອອກເບື້ອງລະບາງບ່ອນກໍ 50 ແມັດ ສ່ວນຫຼາຍຈະແມ່ນ 30 ແມັດນີ້ແຫຼະ ຫ່າງຈາກເສັ້ນທາງຣົດໄຟ ເນື້ອທີ່ກຫັ້ນໃຜສິໄປເຮັດກິຈກັມທາງໃນຫັ້ນບໍ່ໄດ້ ອັນນັ້ນມັນເດັດຂາດເດ໋ ບໍ່ໃຫ້ຄົນເຂົ້າຄົນອອກ ຄັນເຮັດແທ້ມັນກໍຕ້ອງອອກຈາກນອກຫັ້ນພຸ້ນ.”

ທີ່ ນະຄອນຫຼວງວຽງຈັນ ປະຊາຊົນນາງນຶ່ງເວົ້າວ່າ ປັດຈຸບັນ ພາກສ່ວນທີ່ກ່ຽວຂ້ອງ ກໍາລັງມາຂໍດິນຂອງນາງ ເພື່ອເຮັດໂຄງການພັທນາ ຕາມ 2 ຟາກທາງຣົດໄຟ ແຕ່ນາງຍັງບໍ່ຍອມຍົກໃຫ້ ຍ້ອນດິນທີ່ນາງໄດ້ເສັຽໃຫ້ໂຄງການ ສ້າງທາງຣົດໄຟນັ້ນ ຍັງບໍ່ທັນໄດ້ຄ່າຊົດເຊີຽເທື່ອ:

“ໂອ໋ແມ່ນ ເພິ່ນສິມາເອົາດິນຕື່ມ ປະຊາຊົນນີ້ບໍ່ຍອມດຽວນີ້ນ່າ ເພາະວ່າໂຕທີ່ຖືກໄປນີ້ ກະຍັງບໍ່ໃຫ້ເງິນຈັກກີບເທື່ອ ໂຕເກົ່າຍັງບໍ່ຈ່າຍ ໂຕໃໝ່ຍັງສິມາເອົາອີກແລ້ວ ມັນກະບໍ່ໄດ້ແລ້ວ.”

ນາງເວົ້າຕື່ມວ່າ ໃນໄລຍະກອງປະຊຸມ ສມັຍສາມັນເທື່ອທີ 2 ຂອງສະພາແຫ່ງຊາດຊຸດທີ 9 ນີ້ ນາງກໍໄດ້ໂທຣະສັບໄປປະກອບຄໍາເຫັນ ຢາກໃຫ້ຕິດຕາມເຣື່ອງການຊົດເຊີຽ ຂອງໂຄງ ການກໍ່ສ້າງທາງຣົດໄຟ ລາວ-ຈີນ ທີ່ລ່າຊ້ານັ້ນ, ແຕ່ກໍຍັງບໍ່ເຫັນພາກສ່ວນໃດ ຍົກເຣື່ອງນີ້ຂຶ້ນເວົ້າ ຢູ່ໃນກອງປະຊຸມເທື່ອ ທັງໆ ທີ່ຍັງເຫຼືອເວລາອີກບໍ່ເຖິງ 1 ເດືອນ ຈະເປີດໃຊ້ທາງຣົດໄຟ ຢ່າງເປັນທາງການແລ້ວ.

ຊາວ ນະຄອນຫຼວງວຽງຈັນ ອີກທ່ານນຶ່ງ ທີ່ຂໍສງວນຊື່ ແລະສຽງ ກໍເວົ້າຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ ຫາກມີໂຄງການໃໝ່ເກີດຂື້ນ ຕາມ 2 ຟາກທາງຣົດໄຟ ລາວ-ຈີນ, ແລ້ວມາຂໍດິນຂອງທ່ານຕື່ມອີກ ທ່ານຈະບໍ່ຍອມໃຫ້, ຍ້ອນຍັງບໍ່ທັນໄດ້ມີການໂອນເງິນ ຄ່າຊົດເຊີຽ ເຂົ້າບັນຊີທະນາຄານຂອງທ່ານ ຕາມທີ່ເຈົ້າໜ້າທີ່ໄດ້ບອກໃຫ້ຮູ້ ວ່າ ຈະໃຫ້ຄ່າຊົດເຊີຽບໍ່ກາຍເດືອນຕຸລາ 2021 ນີ້.

ທີ່ ແຂວງຫຼວງນໍ້າທາ ປະຊາຊົນຜູ້ນຶ່ງກໍເວົ້າວ່າ ຖ້າມີໂຄງການເຂດເສຖກິດເກີດຂຶ້ນ ຢູ່ 2 ຟາກທາງຣົດໄຟ, ແລ້ວກວມເອົາດິນຂອງຕົນນໍານັ້ນ ຕົນກໍຈະບໍ່ຂັດຂ້ອງ ຫາກມີການຊົດເຊີຽໃຫ້ ແບບສົມເຫດສົມຜົລ, ບໍ່ດັ່ງນັ້ນກໍຈະບໍ່ຍອມຍົກໃຫ້:

“ຄັນວ່າຖືກກະຈໍາເປັນແລ໋ວກໍ໋ ທີ່ວ່າຂອງພັກຂອງຣັຖຫັ້ນເນາະ ຂອງພັກຂອງຣັຖກໍຈໍາເປັນ. ຄັນເຮົາຖືກໂຄງການ ລະບຽບກົດໝາຍມີແນວໃດ ກໍໃຫ້ເພິ່ນຊົດເຊີຍເອົາແນວໃດ ກະຈໍາເປັນເອົາແນວນັ້ນ.”

ແຕ່ໃນຂະນະດຽວກັນ ປະຊາຊົນລາວຜູ້ໃຊ້ ສື່ສັງຄົມອອນລາຍນ໌ ຈໍານວນນຶ່ງ ແມ່ນບໍ່ເຫັນດີ ນໍາເຣື່ອງການສເນີສ້າງໂຄງການດັ່ງກ່າວ ເນື່ອງຈາກຈະເຮັດໃຫ້ປະຊາຊົນ ເສັຍດິນເພີ່ມຕື່ມ, ແຕ່ປະຊາຊົນອີກຈໍານວນນຶ່ງ ແມ່ນເຫັນດີໃຫ້ສ້າງເພື່ອພັທນາ 2 ຟາກທາງຣົດໄຟ ໃຫ້ທັນສມັຍ ແລະເປັນແຫຼ່ງທ່ອງທ່ຽວຄົບວົງຈອນ.

ກ່ຽວກັບເຣື່ອງທີ່ນີ້ ວິທຍຸເອເຊັຽເສຣີ ໄດ້ຕິດຕໍ່ໄປຫາບໍຣິສັດທາງຣົດໄຟ ລາວ-ຈີນ ຈໍາກັດເພື່ອຂໍຮູ້ວ່າ ມີແຜນຈະສ້າງໂຄງການ ພັທນາເຂດເສຖກິດ ຕາມ 2 ຟາກທາງຣົດໄຟ ຫຼືບໍ່, ແຕ່ເຈົ້າໜ້າທີ່ ທີ່ກ່ຽວຂ້ອງ ຍັງບໍ່ສະດວກທີ່ຈະໃຫ້ຄໍາເຫັນ.

ຍັງເຫຼືອເວລາອີກປະມານ 20 ປາຍມື້ ກໍຈະມີພິທີເປີດໃຊ້ທາງຣົດໄຟ ລາວ-ຈີນ 422 ກິໂລແມັດ ຢ່າງເປັນທາງການ ໃນຂະນະທີ່ຍັງມີຫຼາຍບັນຫາ ທີ່ພາກສ່ວນກ່ຽວຂ້ອງ ຈະຕ້ອງໄດ້ເລັ່ງແກ້ໄຂ ເປັນຕົ້ນເຣື່ອງການຈ່າຍຄ່າຊົດເຊີຽຄວາມເສັຽຫາຍ ໃຫ້ປະຊາຊົນທີ່ຍັງຄ້າງຄາຢູ່ນັ້ນໃຫ້ແລ້ວ. ນອກຈາກນັ້ນ ກໍຍັງມີບັນຫາ ການລັກຕັດສາຍໄຟຟ້າ ຕາມແລວທາງຣົດໄຟ ເປັນເທື່ອທີ 3 ແລ້ວໃນປີນີ້ ຊຶ່ງລ່າສຸດ ກໍເກີດຂຶ້ນຢູ່ເຂດບ້ານ ໂຄກໃຫຍ່ ເມືອງໄຊທານີ ນະຄອນຫຼວງວຽງຈັນ ໃນມື້ວັນທີ 4 ພຶສຈິກາ 2021 ຂະນະນີ້ ຜູ້ລັກຕັດນັ້ນ ກໍາລັງປິ່ນປົວຢູ່ໂຮງໝໍ ຍ້ອນຖືກໄຟຟ້າຊ໋ອດ ແລະຈະຖືກນໍາຕົວໄປດໍາເນີນຄະດີ.